តទៅនេះ គឺជាបទវិចារណកថាដែលឆ្លុះបញ្ចាំងអំពីឧត្តមគតិនិងស្ថាប័នសហរដ្ឋអាមេរិក
នៅរៀងរាល់ថ្ងៃចន្ទសប្ដាហ៍ទី ៣ នៃខែកុម្ភៈ សហរដ្ឋអាមេរិកប្រារព្ធទិវាប្រធានាធិបតី។ កាលពីដំបូង ការប្រារព្ធនេះមានគោលបំណងផ្ដល់កិត្តិយសដល់លោក George Washington ដែលជាប្រធានាធិបតីដំបូងបង្អស់របស់សហរដ្ឋអាមេរិក។
ចាប់ពីឆ្នាំ ១៨០០ មក គឺក្នុងពេលមួយឆ្នាំក្រោយមក បន្ទាប់ពីលោក George Washington បានទទួលមរណភាព ថ្ងៃកំណើតរបស់លោក ថ្ងៃទី ២២ ខែកុម្ភៈ ត្រូវបានប្រារព្ធមិនផ្លូវការនៅទូទាំងសហរដ្ឋអាមេរិក ដែលជាប្រទេសថ្មី ដែលលោកបានជួយបង្កើតឡើង។
នៅទីបំផុត ការប្រារព្ធផ្ដល់កិត្តិយសនេះត្រូវបានប្រារព្ធឡើងផងដែរសម្រាប់លោក Abraham Lincoln ដែលជាមេដឹកនាំអស្ចារ្យម្នាក់ទៀត ដែលថ្ងៃកំណើតរបស់លោក ថ្ងៃទី ១២ ខែកុម្ភៈ គឺកៀកនឹងថ្ងៃកំណើតរបស់លោក George Washington ដែរ។
លោកប្រធានាធិបតី George Washington និងលោកប្រធានាធិបតី Abraham Lincoln ស្ទើរតែត្រូវបានចាត់ទុកជាទូទៅថាជាមេដឹកនាំល្អជាងគេបំផុតពីររូបនៅក្នុងសហរដ្ឋអាមេរិក។ មូលហេតុគឺដោយសារស្ថានការណ៍សំខាន់នានាដែលបានកើតឡើងនៅជុំវិញលោកទាំងពីរ និងសេចក្ដីសុចរិតរបស់ប្រធានាធិបតីទាំងពីររូបនេះ ដែលធ្វើឱ្យលោកទាំងពីរឆ្លើយតបដោយការសម្រេចចិត្តពោរពេញដោយឥទ្ធិពលធំធេង ដែលធ្វើឱ្យសហរដ្ឋអាមេរិកដើរលើមាគ៌ាមួយដែលរីកចម្រើនខ្លាំងក្លា មានវិបុលភាពនិងប្រជាធិបតេយ្យ។
លោក George Washingtonគឺជាបុគ្គលដ៏មានប្រជាប្រិយបំផុតនៅក្នុងសម័យរបស់លោក។ លោកគឺជាប្រធានាធិបតីតែម្នាក់គត់ដែលត្រូវបានបោះឆ្នោតជ្រើសរើសជាឯកច្ឆន្ទ ដោយគ្រប់អ្នកតំណាងរបស់រដ្ឋទាំងអស់នៅក្នុងសហរដ្ឋអាមេរិកបានបោះឆ្នោតឱ្យលោក។
នៅពេលដែលលោក Goerge Washington ឡើងកាន់តំណែងជាប្រធានាធិបតី នៅពេលនោះមិនមានរដ្ឋាភិបាលឬក៏មេដឹកនាំណាម្នាក់ដែលអាចធ្វើជាគំរូសម្រាប់លោក និងមិនមានប្រទេសណាមួយផ្សេងទៀតនៅលើពិភពលោកដែលមានប្រជាធិបតេយ្យនោះទេ។ ប៉ុន្តែ លោកបានជួយតម្កល់ទុកនូវគោលការណ៍ដែលលោកបានជួយប្រយុទ្ធនៅក្នុងសង្គ្រាម ដែលនោះគឺថា មនុស្សគ្រប់រូបនៅគ្រប់ទីកន្លែងទាំងអស់មានសិទ្ធិស្មើគ្នា។
លោកគឺជាកម្លាំងជំរុញចម្បងមួយនៅពីក្រោយការបង្កើតរដ្ឋធម្មនុញ្ញ ដែលជាឯកសារចែងអំពីគោលការណ៍និងយន្តការនានាសម្រាប់បង្កើតរដ្ឋាភិបាល និងតម្កល់សិទ្ធិរបស់ពលរដ្ឋ។
សកម្មភាពផ្ទាល់របស់លោកបានបង្កើតជាបទដ្ឋានសម្រាប់ការអនុវត្តផ្នែកនយោបាយនិងយោធា ក៏ដូចជាគោលនយោបាយសេដ្ឋកិច្ចផងដែរ។ លោកបានចុះចេញពីតំណែងក្រោយពីបញ្ចប់ការដឹកនាំបានពីរអាណត្តិ ដើម្បីបង្ហាញឱ្យឃើញថា ដំណែងជាប្រធានាធិបតីមិនមែនជាដំណែងពេញមួយជីវិតនោះទេ ហើយអំណាចរបស់ប្រធានាធិបតីត្រូវផ្ទេរដោយសន្តិវិធី។
ស្រដៀងគ្នានេះដែរ លោកប្រធានាធិបតី Abraham Lincoln បានដឹកនាំសហរដ្ឋអាមេរិកនៅពេលប្រទេសមានភាពចលាចល។ សម្រាប់លោក George Washington នៅពេលលោកដឹកនាំប្រទេស លោកប្រឈមមុខដោះស្រាយបញ្ហាបង្កើតប្រទេសថ្មី ប៉ុន្តែសម្រាប់លោក Abraham Lincoln វិញ បញ្ហាប្រឈមរបស់លោកគឺការត្រួសត្រាយប្រទេសនៅពេលដែលមានសង្គ្រាមស៊ីវិល ដោយធ្វើយ៉ាងណាបង្ការកុំឱ្យប្រទេសបែកបាក់ និងធ្វើឱ្យប្រទេសដើរលើមាគ៌ាមួយឆ្ពោះទៅរកការរីកចម្រើនខ្លាំងក្លានិងមានការរួបរួមជាងមុនពេលមានសង្គ្រាម។
លោក Abraham Lincoln បានដឹកនាំសហរដ្ឋអាមេរិកតាមទិសដៅថ្មី ដោយបង្កើតនូវសហភាពដ៏ពិតប្រាកដមួយនៃបណ្ដារដ្ឋទាំងអស់ ដែលដឹកនាំដោយរដ្ឋាភិបាលសហព័ន្ធដ៏ខ្លាំងក្លាមួយ ជំនួសឱ្យរដ្ឋាភិបាលកណ្ដាលដ៏ទន់ខ្សោយនៃសហព័ន្ធបែបធូររលុងរបស់បណ្ដារដ្ឋនានា។
សព្វថ្ងៃនេះ ទិវាប្រធានាធិបតីត្រូវបានប្រារព្ធឡើងដើម្បីផ្ដល់កិត្តិយសជូនប្រធានាធិបតីគ្រប់រូបរបស់សហរដ្ឋអាមេរិក។ ប៉ុន្តែមិនមានប្រធានាធិបតីរូបណាមានឥទ្ធិពល ឬក៏សក្តិសមនឹងទទួលបានកិត្តិយសនេះដូចលោកប្រធានាធិបតី George Washington និងលោកប្រធានាធិបតី Abraham Lincoln នោះទេ៕