តទៅនេះ ជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
លោកប្រធានាធិបតី Joe Biden បានហៅទំនាក់ទំនងរបស់សហរដ្ឋអាមេរិកជាមួយប្រទេសឥណ្ឌាថាជា«ទំនាក់ទំនងយ៉ាងសំខាន់»នៃសតវត្សរ៍ទី២១។
រដ្ឋមន្ត្រីការបរទេសសហរដ្ឋអាមេរិកលោក Antony Blinken បានប្រកាសនៅក្នុងសន្និសីទកំពូលនៃក្រុមប្រឹក្សាជំនួញសហរដ្ឋអាមេរិក ឥណ្ឌាថា«ផ្លូវដែលយើងបានដើរអស់ពេល២៥ឆ្នាំមកហើយមានភាពអស្ចារ្យណាស់»។
លោក Blinken បាននិយាយថា៖ «យើងឃើញទំនាក់ទំនងយ៉ាងសំខាន់នេះថាជាការភ្ជាប់តែមួយគត់រវាងប្រទេសពីរមានលទ្ធិប្រជាធិបតេយ្យធំជាងគេនិងចាស់ជាងគេ ជាមួយកាតព្វកិច្ចពិសេសមួយក្នុងពេលនេះដើម្បីបង្ហាញថា រដ្ឋាភិបាលយើងអាចផ្តល់ផលប្រយោជន៍និងអំណាចជូនប្រជាពលរដ្ឋរបស់យើង»។
លោករដ្ឋមន្ត្រី Blinken បានថ្លែងថា៖ «យើងឃើញសារៈសំខាន់នៃភាពដៃគូនៅក្នុងការប្តេជ្ញាដូចគ្នាមួយដើម្បីដោះស្រាយឧបសគ្គក្នុងតំបន់និងឧបសគ្គសាកល។ តែស្នូលនៃទំនាក់ទំនងយុទ្ធសាស្ត្ររវាងប្រទេសយើងទាំងពីរគឺចំណងទាក់ទងសេដ្ឋកិច្ច»។
លោក Blinken បានថ្លែងថា៖ «ដូចអស់លោកអ្នកដឹងហើយថា កាលពីឆ្នាំទៅមិញ ពាណិជ្ជកម្មរវាងប្រទេសជាតិយើងបានកើនដល់១៩១ពាន់លានដុល្លារ ធ្វើឱ្យសហរដ្ឋអាមេរិកក្លាយជាដៃគូពាណិជ្ជកម្មធំបំផុតរបស់ឥណ្ឌា។ នៅពេលនេះ ក្រុមហ៊ុនអាមេរិកាំងបានបណ្តាក់ទុនយ៉ាងតិចណាស់៥៤ពាន់លានដុល្លារក្នុងប្រទេសឥណ្ឌាតាំងពីការផលិតប្រដាប់ប្រដាប្រើប្រាស់រហូតដល់ទូរគមនាគមន៍។ នៅក្នុងសហរដ្ឋអាមេរិក ក្រុមហ៊ុនឥណ្ឌាបានវិនិយោគជាង៤០ពាន់លានដុល្លារក្នុងវិស័យព័ត៌មានបច្ចេកវិទ្យា ការផលិតឱសថនិងវិស័យផ្សេងទៀត ដោយបង្កើតការងារ៤២៥.០០០តាំងពីរដ្ឋ California រហូតដល់រដ្ឋ Georgia»។
ប្រទេសឥណ្ឌាក៏បានចូលរួមជាមួយសសរស្តម្ភបីនៃក្របខណ្ឌសេដ្ឋកិច្ចតំបន់ឥណ្ឌា-ប៉ាស៊ីហ្វិក-ដោយប្តេជ្ញាកសាងចង្វាក់ផ្គត់ផ្គង់មានភាពធន់ជាងមុន ដើម្បីក្តាប់ឱកាសថាមពលស្អាតនិងប្រយុទ្ធប្រឆាំងនឹងអំពើពុករលួយ។
សហរដ្ឋអាមេរិកនិងឥណ្ឌាកំពុងបង្កើននិងពង្រីកភាពដៃគូយុទ្ធសាស្ត្ររបស់ពួកគេ គ្រប់ជាន់ថ្នាក់ ពីព្រោះប្រទេសជាតិទាំងពីរនេះមានជំនឿថាការប្រើប្រាស់បច្ចេកវិទ្យាគួរតែសមស្របតាមគុណតម្លៃប្រធិបតេយ្យនិងការគោរពសិទ្ធិមនុស្ស។
ផ្នែកសំខាន់នៃកិច្ចសហការទាំងអស់នេះគឺធ្វើឱ្យចង្វាក់ផ្កត់ផ្គង់មានភាពចម្រុះនិងស៊ីជម្រៅជាមួយពួកប្រទេសគួរទុកចិត្តបាន នៅពេលកាត់បន្ថយការពឹងពាក់ខាងយុទ្ធសាស្ត្រ។
លោក Blinken បានមាននិយាយថា សហរដ្ឋអាមេរិកនិងប្រទេសឥណ្ឌាធ្វើវិនិយោគក្នុងប្រជារាស្ត្រពួកគេ។
លោករដ្ឋមន្ត្រី Blinken បានមានប្រសាសន៍ថា៖ «ប្រព័ន្ធសិក្សាអប់រំរបស់សហរដ្ឋអាមេរិកនិងប្រទេសឥណ្ឌាបានផលិតពួកមេដឹកនាំក្រុមហ៊ុនសំខាន់ៗភាគច្រើនរបស់យើង...ក្រុមពលរដ្ឋអាមេរិកាំងដើមកំណើតឥណ្ឌា បង្កើតក្រុមហ៊ុនបច្ចេកវិទ្យា ចំនួនមួយភាគបីនៃក្រុមហ៊ុនបច្ចេកវិទ្យាទាំងអស់ក្នុងប្រទេសអាមេរិក។...ហើយក្រុមហ៊ុនទាំងនេះអាចមានសារៈសំខាន់បំផុតសម្រាប់ពេលអនាគត-សម្រាប់អនាគតនៃចំណងទាក់ទងរវាងប្រទេសយើង។ យើងមានជនជាតិឥណ្ឌាជាង២សែននាក់សិក្សាក្នុងសាកលវិទ្យាល័យអាមេរិកាំង ធ្វើឱ្យឥណ្ឌាជាប្រភពធំទីពីរនៃក្រុមនិស្សិតបរទេសក្នុងសហរដ្ឋអាមេរិក»។
សហរដ្ឋអាមេរិកនិងប្រទេសឥណ្ឌានឹងបន្តធ្វើការជាមួយគ្នាដើម្បីជំរុញតម្លាភាព ផ្ចុងផ្ដើមការបើកទីផ្សារនិងពង្រឹងលទ្ធិប្រជាធិបតេយ្យរបស់ពួកគេ ដើម្បីបញ្ចេញសក្ដានុពលរបស់ប្រជារាស្ត្រយើងឱ្យបានពេញលេញ៕
បទវិចារណកថា៖ ទំនាក់ទំនងរវាងសហរដ្ឋអាមេរិកនិងឥណ្ឌាកំពុងរីកចម្រើន
