តទៅនេះ គឺជាបទវិចារណកថាដែលឆ្លុះបញ្ចាំងអំពីឧត្តមគតិ និងស្ថាប័នអាមេរិកាំង
ថ្ងៃទី២៥ ខែធ្នូ ជាថ្ងៃពិសិដ្ឋបំផុតមួយនៃគ្រិស្តសាសនា។ ទិវានេះ ជាការរំឭកដល់កំណើតកាលពីប្រមាណ ២០០០ ឆ្នាំមុននៃព្រះយេស៊ូ គ្រិស្ត ដែលព្រះអង្គត្រូវបានគ្រិស្តសាសនិកនានា គោរពបូជាថាជា តំណាងជាមនុស្សនៃព្រះជាម្ចាស់ ព្រះសង្គ្រោះ និងព្រះពន្លឺនៃពិភពលោក។ ឪពុកម្តាយរបស់ព្រះអង្គ គឺ Mary និង Joseph ជាជនក្រីក្រ ហើយរឿងប្រពៃណីបាននិទានថា ព្រះយេស៊ូបានប្រសូត្រនៅឯក្រោលសត្វដ៏ត្រជាក់មួយ ក្នុងយប់មួយនៃរដូវរងារ។
តាំងពីបូរាណយូរអង្វែងមកហើយ មនុស្សម្នាដែលរស់នៅតំបន់អឌ្ឍគោលខាងជើង តែងបានអបអរបាតុភូតសុលស្ទីសរដូវរងារ នៅពេលដែលពន្លឺថ្ងៃកាន់តែខ្លី ត្រូវជំនួសវិញដោយទិវាដែលកាន់តែវែងវិញ ដែលតំណាងឱ្យដំណើរការកកើតជាថ្មីនៃធម្មជាតិ។ មនុស្សនៅបុរាណកាលជុំវិញពិភពលោក បានស្វាគមន៍ការបញ្ចប់ទៅនៃឆ្នាំចាស់ និងការលេចឡើងជាថ្មីនៃព្រះអាទិត្យ ដោយប្រារព្ធពិធីនិងទំនៀមទម្លាប់ដ៏ល្អិតល្អន់។ ទំនៀមទម្លាប់ខ្លះ នៅមានបង្កប់ក្នុងពិធីបុណ្យសព្វថ្ងៃ រួមទាំងប្រពៃណីដែលផ្តោតទៅលើពន្លឺ។
ការអបអរថ្ងៃប្រសូត្ររបស់ព្រះយេស៊ូនៅជិតពេលបាតុភូតសុលស្ទីសនេះ ជាការចូលរួមជាមួយប្រពៃណីបូរាណទាំងនេះដែលធ្វើនៅពាក់កណ្តាលរដូវរងារ ហើយដែលនៅតែត្រូវបានគេប្រារព្ធតាមសហគមន៍នានាជុំវិញពិភពលោក។
នៅប្រមាណថ្ងៃទី២២ ខែធ្នូ ជនជាតិចិន និងជនជាតិនៅអាស៊ីបូព៌ាមួយចំនួនទៀតប្រារព្ធពិធី តុងជឺ (Dōngzhì) ដែលជាពេលវេលាមួយសម្រាប់ក្រុមគ្រួសារជួបជុំគ្នា និងចងចាំឆ្នាំដែលទើបបានកន្លងផុតទៅ ក៏ដូចជាអបអរការមកដល់នៃរដូវរងារ និងការត្រឡប់វិញនៃពន្លឺថ្ងៃ។ ពិធីបុណ្យបុរាណ Yalda ជាពិធីបុណ្យអបអរសុលស្ទីសរដូវរងារនៅក្នុងប្រទេសអ៊ីរ៉ង់ ខណៈដែលជនជាតិជប៉ុនប្រារព្ធពិធី Toji ដែលជាប្រពៃណីមួយផ្តោតលើការចាប់ផ្តើមឆ្នាំថ្មីដោយសុខភាពល្អ និងសំណាងល្អ។
ពិធីបុណ្យទាំងនេះខុសៗគ្នា ប៉ុន្តែនៅគ្រប់ទីកន្លែង ស្មារតីនៃភាពរីករាយនិងសុទិដ្ឋិនិយមមានជាចម្បង។
សម្រាប់គ្រិស្តសាសនិក អ្វីដែលត្រូវបានបន្ទរអស់រាប់សតវត្សរ៍មកហើយនោះ គឺការប្រកាសដោយទេវតា ក្នុងថ្ងៃណូអែលទី១នោះ អំពីការប្រសូត្រនិងក្តីសង្ឃឹមដែលមកជាមួយ គឺ «សន្តិភាពលើភពផែនដី សុឆន្ទៈចំពោះមនុស្ស»។
លោកប្រធានាធិបតី Donald Trump បានថ្លែងថា៖ «ជារៀងរាល់ឆ្នាំនៅរដូវបុណ្យណូអែល យើងបានដឹងថា ស្មារតីពិតប្រាកដនៃបុណ្យណូអែលមិនមែនអ្វីដែលយើងមាននោះទេ ប៉ុន្តែអំពីយើងម្នាក់ៗ ដែលយើងម្នាក់ៗជាបុត្រាបុត្រីនៃព្រះជាម្ចាស់។ នេះជាប្រភពពិតប្រាកដនៃសេចក្តីរីករាយនៅអំឡុងពេលចុងឆ្នាំនេះ។ នេះជាអ្វីដែលធ្វើឱ្យរាល់បុណ្យណូអែលមានភាពសំបូរសប្បាយ»។
លោកប្រធានាធិបតីបន្តថា៖ «យើងបួងសួងឱ្យប្រទេសយើងជាកន្លែងដែលកុមារគ្រប់រូបមានគេហដ្ឋានមួយដែលពោរពេញដោយក្តីស្រឡាញ់ មានសហគមន៍មួយដែលសម្បូរដោយក្តីសង្ឃឹម និងមានប្រទេសជាតិមួយដែលសមប្រកបដោយជំនឿ»៕