តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
ការដាក់សហរដ្ឋអាមេរិកជាថ្មីលើមាគ៌ាឆ្ពោះទៅកាន់ការបន្ធូរបន្ថយការប្រែប្រួលអាកាសធាតុ គឺជាអាទិភាពចម្បងនៃរបៀបវារៈរបស់លោកប្រធានាធិបតី Joe Biden។ នៅថ្ងៃទីមួយនៃការចូលកាន់តំណែង លោកប្រធានាធិបតីថ្មី បានចាត់វិធានការជាបន្ទាន់ក្នុងការចូលរួមជាថ្មីក្នុងកិច្ចព្រមព្រៀងក្រុងប៉ារីស។ បន្ទាប់មកក្នុងពេលតែប៉ុន្មានថ្ងៃក្រោយលោកបានស្បថសច្ចាប្រណិធានចូលកាន់តំណែង លោកប្រធានាធិបតី បានចុះហត្ថលេខាលើបទបញ្ជាប្រធានាធិបតីជាច្រើនក្នុងគោលដៅដោះស្រាយវិបត្តិធាតុអាកាសនៅក្នុងប្រទេសអាមេរិក និងនៅប្រទេសក្រៅដោយកែប្រែយ៉ាងច្រើននូវគោលនយោបាយរដ្ឋាភិបាល។
ក៏ប៉ុន្តែ ការប្រែប្រួលអាកាសធាតុជាបញ្ហាសាកលមួយដែលមិនអាចដោះស្រាយបានដោយគ្មានកិច្ចសហប្រតិបត្តិការអន្តរជាតិនោះទេ។ លោក John Kerry ជាប្រេសិតប្រធានាធិបតីពិសេសរបស់លោកប្រធានាធិបតី Biden សម្រាប់បញ្ហាការប្រែប្រួលអាកាសធាតុនៅក្នុងការប្រជុំតាមវីដេអូកាលពីថ្ងៃទី២៧ ខែមករា នៅវេទិកាសេដ្ឋកិច្ចពិភពលោក Davos។
លោក Kerry បានមានប្រសាសន៍ថា៖ «សកម្មភាពក្នុងប្រទេសមិនអាចគ្រាប់គ្រាន់ទេ ប្រសិនបើយើងមិនបង្កើតយុទ្ធសាស្ត្រអន្តរជាតិមួយដើម្បីជំរុញឱ្យពិភពលោកសកម្មជាងមុនក្នុងការជំរុញមហិច្ឆិតាធំជាងមុនពីប្រទេសនិងវិស័យទាំងអស់ហើយធ្វើឱ្យប្រាកដថា ថាមពលស្អាតក្នុងពេលអនាគតដែលយើងត្រូវការ មានលក្ខណៈសាកលទាំងទំហំនិងវិសាលភាព»។
បើតាមទីភ្នាក់ងារអវកាសសហរដ្ឋអាមេរិកដែលហៅកាត់ថា NASA ឆ្នាំ២០២០ ជាឆ្នាំដែលមានសីតុណ្ហភាពក្តៅបំផុតក្នុងកំណត់ត្រា។ លោករដ្ឋមន្ត្រី Kerry បាននិយាយថា ដើម្បីរក្សាសីតុណ្ហភាពសាកលមិនឱ្យឡើងលើសជាង១,៥អង្សារសេ លើសកម្រិតមុនពេលពិភពលោកចាប់មានឧស្សាហកម្មដែលចំនួននេះអ្នកជំនាញច្រើនចាត់ទុកថាជាការចាំបាច់ដើម្បីបញ្ជៀសមហន្តរាយនោះ «យើងត្រូវការកាត់បន្ថយការសាយភាយឧស្ម័នផ្ទះកញ្ចក់ឱ្យបានចំនួនពាក់កណ្តាល មិនឱ្យហួសពីឆ្នាំ២០៣០»។
លោក Kerry បានមានប្រសាសន៍ទៀតថា៖ «នេះមានន័យថា យើងត្រូវបន្ថយការប្រើធ្យូងថ្មឱ្យបានលឿនជាងមុន៥ដង។ នេះមានន័យថា យើងត្រូវដាំដើមឈើឱ្យបានលឿនជាងមុន៥ដង។ នេះមានន័យថា យើងត្រូវតែបង្កើនការប្រើថាមពលប្រើបានជាថ្មីឱ្យបានលឿនជាងមុន៦ដង។ នេះមានន័យថា យើងត្រូវតែមានអន្តរកាលទៅកាន់រថយន្តអគ្គិសនីតាមអត្រាលឿនជាងមុន២២ដង»។
លោករដ្ឋមន្ត្រី Kerry បានមានប្រសាសន៍ថា៖ «យើងអាចធ្វើអ្វីៗទាំងអស់នេះបានប្រសិនបើយើងមានផែនការ ប្រសិនបើយើងបណ្តាក់ទុនវិនិយោគ ហើយបើយើងប្រមូលកម្លាំងនៃទីផ្សារ»។
លោករដ្ឋមន្ត្រី Kerry បានមានប្រសាសន៍បន្ថែមថា៖ «យើងត្រូវតែចាកចេញពីការនិយាយអះអាងដែលក្រុមអ្នកបដិសេធនិងក្រុមអ្នកពន្យារពេលបានប្រើ ដែលថាបញ្ហានេះ ជាជម្រើសមួយរវាងគុណភាពជីវិត ឬការដោះស្រាយបញ្ហានេះ។ ជោគជ័យមានន័យថា ការប្រើប្រាស់ឱ្យពេញលេញនូវអ្វីៗល្អបំផុតនៃភាពប៉ិនប្រសប់ ការច្នៃប្រឌិតថ្មី និងទំនាក់ទំនងការទូតទូទាំងសាកល។ យើងត្រូវប្រើគ្រប់វិធីនិងឧបករណ៍ដែលយើងមាន ដើម្បីសម្រេចគោលដៅរបស់យើងចាប់រួមមានកម្លាំងនៃសតិប្រាជ្ញានិងកម្លាំងថាមពលស្អាតជាដើម។ អនាគតដែលគ្មានការសាយភាយឧស្ម័នផ្ទះកញ្ចក់ផ្តល់ឱកាសសម្រាប់ធុរកិច្ច សម្រាប់ការបង្កើតការងារស្អាត និងគ្មានការធ្វើកុំឱ្យបំពុលបរិស្ថាន សម្រាប់ការចម្រើនលូតលាស់សេដ្ឋកិច្ចថែមទៀតផងដែរ»។
លោករដ្ឋមន្ត្រី Kerry បានមានប្រសាសន៍ទៀតថា៖ «យើងអាចនិយាយបានថា ... យើងមិនអាចខ្ជះខ្ជាយពេលវេលាសូម្បី១វិនាទី។ ពិភពលោកទាំងមូលត្រូវតែមកអង្គុយនៅតុនេះដើម្បីដោះស្រាយបញ្ហានេះ»៕