តទៅនេះ ជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
លោកស្រី Beth Van Schaack ឯកអគ្គរដ្ឋទូតសហរដ្ឋអាមេរិកទទួលបន្ទុកកិច្ចការយុត្តិធម៌សាកលប្រឆាំងនឹងឧក្រិដ្ឋកម្មបានប្រកាសនៅក្នុងសវនកម្មកាលពីពេលថ្មីៗនេះក្នុងសភាសហរដ្ឋអាមេរិកថាត្រូវតែមានយុត្តិធម៌សម្រាប់ជនជាតិអ៊ុយក្រែនរាប់លាននាក់ដែលជីវភាពពួកគេត្រូវបានបង្អាក់និងបំផ្លាញដោយសារសង្គ្រាមឈ្លានពានបង្កដោយប្រធានាធិបតីរុស្ស៊ីលោក Vladimir Putin។
សហរដ្ឋអាមេរិកកំពុងរកវិធីជាច្រើនសម្រាប់យកពួកជនទទួលខុសត្រូវដល់ការរំលោភបំពានទាំងនេះទៅឱ្យតុលាការកាត់ទោស។ លោកស្រីឯកអគ្គរដ្ឋទូត Schaack បាននិយាយថាវិធីទីមួយទាក់ទិនជាមួយតុលាការនិងស្ថាប័នអន្តរជាតិ។
លោកស្រី Schaack បាននិយាយថា៖ «ការប្រឹងប្រែងរបស់យើងនៅទីនេះមានរួមការធ្វើការដើម្បីបង្កើតហើយបន្ទាប់មកបន្តអាណត្តិគណៈកម្មការស៊ើបអង្កេតរបស់អ.ស.ប.សម្រាប់អ៊ុយក្រែន។ មានការនិយាយយោងច្រើនដងដល់យន្តការមូស្គូនៃអង្គការសន្តិសុខនិងកិច្ចសហប្រតិបត្តិការនៅអឺរ៉ុប។ យើងក៏ធ្វើអន្តរាគមន៍ក្នុងករណីរបស់អ៊ុយក្រែនប្រឆាំងនឹងរុស្ស៊ីតាមរយៈអនុសញ្ញាស្តីពីការប្រល័យពូជសាសន៍នៅចំពោះមុខតុលាការយុត្តិធម៌អន្តរជាតិ។ ហើយជាទីបញ្ចប់...រដ្ឋអាជ្ញានៃតុលាការឧក្រិដ្ឋកម្មអន្តរជាតិ...បានចេញដីកាចាប់ខ្លួនពីរដោយជោគជ័យ»។
លោកស្រីឯកអគ្គរដ្ឋទូត Van Schaack បានពន្យល់ថា វិធីទីពីរដើម្បីរកយុត្តិធម៌មានគោលដៅពង្រឹងនិងបង្កើនសមត្ថភាពស្ថាប័នអ៊ុយក្រែនដើម្បីប្រមួលឯកសារ ស៊ើបអង្កេតនិងយកពួកជនឧក្រិដ្ឋមកកាត់ទោស ក្នុងតុលាការអ៊ុយក្រែន។
លោកស្រីបាននិយាយថា៖ «មកទល់នឹងពេលនេះ ការិយាល័យអគ្គរដ្ឋអាជ្ញាអ៊ុយក្រែនបានកត់ត្រាឧក្រិដ្ឋកម្មជិត៩ម៉ឺនដែលអាចយកអ្នកប្រព្រិត្តទៅកាត់ទោសក្នុងតុលាការបាន។ តាមរយៈក្រុមទីប្រិក្សាខាងឧក្រិដ្ឋកម្មឃោរឃៅ...យើងផ្តល់ជំនួយនិងការណែនាំខាងភាពជំនាញ ការកសាងសមត្ថភាព ការហ្វឹកហ្វឺនខាងភាពជំនាញអំពីសេចក្តីត្រូវការខាងការកាត់ទោសក្នុងតុលាការនិងខាងការស៊ើបអង្កេតរបស់អគ្គរដ្ឋអាជ្ញា។ ការណ៍នេះមានរួមការយកចិត្តទុកដាក់ខ្លាំងលើអំពើហិង្សាខាងភេទទាក់ទិននឹងសង្គ្រាមនេះផងដែរ»។
លោកស្រី Schaack បានពន្យល់ថា៖ «វិធីទីបីដើម្បីរកយុត្តិធម៌គឺគាំទ្រដល់ក្តីក្តាំយុទ្ធសាស្ត្រដែលអាចកើតមានក្នុងរដ្ឋទីបី» មានរួមក្នុងអឺរ៉ុបផងដែរ។
លោកស្រីឯកអគ្គរដ្ឋទូត Van Schaack បានថ្លែងថា ការយកពួកជនប្រព្រឹត្តល្មើសខាងឧក្រិដ្ឋកម្មឈ្លានពានទៅកាត់ទោសក៏ជាវិធីមួយទៀតនៃការឱ្យមានយុត្តិធម៌ដែរ។
លោកស្រីបានពោលថា៖ «ការអនុញ្ញាតឱ្យមាននិទណ្ឌភាពសម្រាប់សង្គ្រាមឈ្លានខុសច្បាប់របស់រុស្ស៊ីនឹងធ្វើឱ្យតួអង្គឯទៀតៗហ៊ានធ្វើការរំលោភឥតលាក់លៀមស្រដៀងគ្នានេះលើអធិបតេយ្យភាព បូរណភាពដែនដីនិងឯករាជ្យនយោបាយរបស់រដ្ឋឯទៀតៗ។ ហេតុដូច្នេះហើយបានជាយើងគាំទ្រឱ្យមានការបង្កើតតុលាការពិសេសមួយសម្រាប់យកពួកជនមានការទទួលខុសត្រូវច្រើនបំផុតក្នុងឧក្រិដ្ឋកម្មនៃការឈ្លានពានទៅឱ្យតុលាការកាត់ទោស»។
លោកស្រីឯកអគ្គរដ្ឋទូត Van Schaack បានប្រកាសថា៖ «មិនអាចមានសន្តិភាពប្រកបដោយសន្តិសុខឬជាប់លាប់ទេ បើគ្មានយុត្តិធម៌។ ការឱ្យរុស្ស៊ីទទួលខុសត្រូវចំពោះឧក្រិដ្ឋកម្មសង្គ្រាមរបស់ខ្លួន ឧក្រិដ្ឋកម្មប្រឆាំងនឹងមនុស្សជាតិនិងអំពើឃោរឃៅឯទៀតៗនៅក្នុងប្រទេសអ៊ុយក្រែននិងប្រឆាំងនឹងប្រជារាស្ត្រអ៊ុយក្រែនមានសារៈសំខាន់ក្នុងការការពារគុណតម្លៃរបស់សហរដ្ឋអាមេរិក និងក្នុងការរក្សាឱ្យមានពិភពលោកមួយដែលមានសន្តិភាព យុត្តិធម៌ និងសន្តិសុខ»៕
បទវិចារណកថា៖ មិនអាចមានសន្តិភាពក្នុងប្រទេសអ៊ុយក្រែន ដោយគ្មានយុត្តិធម៌ទេ
