Accessibility links

Breaking News

បទ​វិចារណកថា៖ របាយការណ៍​សិទ្ធិ​មនុស្ស​ក្នុង​ប្រទេស​រុស្ស៊ី​ក្នុង​ឆ្នាំ២០២០


ប៉ូលិស​ចាប់​ខ្លួន​អ្នកស្រី Anastasia Vasilyeva ប្រធាន​សហជីព​សម្ព័ន្ធភាព​គ្រូពេទ្យ នៅ​ឯ​​​ពន្ធនាគារ​​ដ៏​តឹងតែង IK-2 នៅ​ក្រុង Pokrov ចម្ងាយ ៨៥គ.ម.​​ភាគ​ខាង​កើត​រដ្ឋធានី​មូស្គូ។

តទៅនេះ​ គឺ​ជា​បទ​វិចារណកថា​ដែល​ឆ្លុះ​បញ្ចាំង​ពី​ទស្សនៈ​របស់​រដ្ឋាភិបាល​សហរដ្ឋ​អាមេរិក

របាយការណ៍​សិទ្ធិ​មនុស្ស​ថ្មី​បំផុត​របស់​ក្រសួងការបរទេស​សហរដ្ឋ​អាមេរិក​បាន​ឲ្យ​ដឹង​ថា​ប្រទេស​រុស្ស៊ីមានប្រព័ន្ធ​នយោបាយ​បែប​ផ្តាច់ការ​ខ្លាំង​ដែល​នៅ​ក្នុង​នោះមានការរំលោភសិទ្ធិ​មនុស្សច្រើនក្នុង​ឆ្នាំ២០២០ ដែល​ជា​ញឹក​ញយកើត​ឡើង​ដោយ​គ្មានការ​ដាក់​ទោសពៃរ៍កម្រិត​ខ្ពស់។

មានសេចក្តីរាយការណ៍​មួយ​ចំនួន​បាន​ឲ្យ​ដឹង​ថា រដ្ឋាភិបាល​រុស្ស៊ី​ ឬ​ពួក​ភ្នាក់ងារ​រដ្ឋាភិបាលរុស្ស៊ី​បាន​ប្រព្រឹត្ត​ ឬ​បាន​ប៉ុនប៉ង​ប្រព្រឹត្ត​ឃាតកម្ម​ដោយ​ចេតនា និង​មិន​ត្រឹមត្រូវ​តាម​ច្បាប់។ ​លោក Aleksey Navalny សកម្មជន​បក្ស​ប្រឆាំង​ដ៏​ល្បី​ល្បាញ​មួយ​រូប និង​ជា​អ្នក​ធ្វើ​យុទ្ធនាការ​ប្រឆាំង​នឹងអំពើ​ពុក​រលួយ​ ត្រូវ​បាន​បំពុលកាល​ពី​ខែ​សីហា ឆ្នាំ​២០២០ ដោយ​សារធាតុ​បំផ្លាញ​សរសៃ​ប្រសាទក្នុង​ប្រភេទក្រុម “Novichok"។

ក៏​មាន​របាយការណ៍គួរ​ឱ្យ​ជឿជាក់​បាន​ដែរ​ថា​ អាជ្ញាធរ​រុស្ស៊ី​បាន​ឃុំឃាំងពួក​អ្នកទោស​នយោបាយព្រមទាំងបានឃាត់ខ្លួន​ និងចោទ​ប្រកាន់ក្រុម​បុគ្គលដើម្បីហេតុផល​នយោបាយ​ផង​ដែរ។ មាន​ការ​រាយការណ៍​ថា​ ក្រុម​អ្នក​ទោស​នយោបាយ ត្រូវ​បាន​ឃុំឃាំង​ក្នុង​ស្ថានភាព​យ៉ាង​ឃោរឃៅ​ជួន​កាល​ត្រូវ​ឃុំឃាំង​តែ​ឯកឯង ឬ​ត្រូវ​ដាក់​ទណ្ឌកម្ម​ឱ្យ​ឋិត​នៅ​ក្នុងមន្ទីរ​ព្យាបាល​មនុស្សវិកល​ចរិតថែមទៀត​ផង។

គិត​ត្រឹម​ខែធ្នូ ​ឆ្នាំ២០២០ បញ្ជី​របស់​អង្គការ​ Memorial មាន​ឈ្មោះ​អ្នក​ទោស​នយោបាយ​រុស្ស៊ី​ចំនួន ៣៥៨​ នាក់​។ ទោះ​ជា​យ៉ាង​ណា​ក៏​ដោយ ​ក៏​អង្គការ​ Memorial បាន​ប៉ាន់​ប្រមាណថា​ចំនួនពិត​ប្រាកដ​នៃ​ក្រុម​អ្នកទោស​នយោបាយ​ក្នុង​ប្រទេស​រុស្ស៊ី​ អាច​មាន​ពី​ពីរ​ដងទៅ​បី​ដង​ច្រើន​ជាង​ចំនួន​នេះ។

រដ្ឋាភិបាល​រុស្ស៊ី​ក៏​បាន​រំលោភ​យ៉ាង​ធ្ងន់ធ្ងរ​នៅ​ខាង​ក្រៅដែនដី​របស់​ខ្លួន​ផង​ដែរដោយ​មាន​រួម​បញ្ចូល​ការរំលោភក្នុង​ឧបទ្វីប​គ្រីមៀ (Crimea) ​ប្រឆាំង​ក្រុម​ជន​អំបូរ​ Tatar និង​ក្រុម​ជន​ភាគ​តិច​ខាង​សាសនា និង​ខាងពូជ​សាសន៍​ផង​ដែរ។ អាជ្ញាធរ​រុស្ស៊ី​ ក៏​បានធ្វើការ​ចាប់​ខ្លួន​មនុស្សទាក់ទិន​នឹង​នយោបាយ​ឃុំឃាំង​ និងកាត់​ទោសក្រុម​ពលរដ្ឋ​អ៊ុយក្រែន​ពី​តំបន់​គ្រីមៀ ហើយមនុស្ស​ជា​ច្រើន​នាក់​បាន​និយាយ​ថា ពួក​គេត្រូវ​បាន​ធ្វើ​ទារុណកម្ម។ នៅ​ក្នុង​ផ្នែក​ខាងកើត​នៃ​ប្រទេសអ៊ុយក្រែន រដ្ឋាភិបាល​រុស្ស៊ី​នៅ​តែ​បន្ត​ផ្តល់​អាវុធហ្វឹកហ្វឺន​ ដឹកនាំ​និងរួម​ប្រយុទ្ធជា​មួយកងកម្លាំង​ដែល​ដឹក​នាំ​ដោយ​រុស្ស៊ី។ ពួក​អ្នក​អង្កេតការណ៍គួរ​ឱ្យ​ជឿ​ទុកចិត្ត​បានអះអាង​ថា មាន​ជន​ស៊ីវិល​រាប់​ពាន់​នាក់​បាន​ស្លាប់​ និង​ត្រូវ​របួស​ដោយសារ​កង​កម្លាំង​ដឹកនាំ​ដោយ​រុស្ស៊ី​ក្នុងតំបន់ Donbas នៃ​ប្រទេស​អ៊ុយក្រែន។

អាជ្ញាធរ​រុស្ស៊ី​បានគ្រប់គ្រងតឹងរ៉ឹង​លើ​បណ្តាញ​ផ្សព្វផ្សាយ​ព័ត៌មាន។ បើ​តាម​របាយការណ៍​ប្រចាំ​ឆ្នាំ​របស់​ក្រសួង​ការបរទេស​សហរដ្ឋ​អាមេរិក​អំពី​សិទ្ធិ​មនុស្ស​ការ​រឹតត្បិត​ពី​រដ្ឋាភិបាល​និង​ការរឹតត្បិត​ខ្លួន​ឯង​ក្នុង​កម្មវិធី​ទូរទស្សន៍​និង​បណ្តាញ​ព័ត៌មាន​បោះពុម្ព​មាន​ធ្វើ​ច្រើន ជាពិសេសទៅ​លើ​ទស្សនៈ​រិះគន់​រដ្ឋាភិបាល ឬ​គោលនយោបាយ​របស់​រដ្ឋាភិបាល។ បរាជ័យ​របស់​រដ្ឋាភិបាល​ក្នុង​ការស៊ើបអង្កេត ឬ​យក​ទៅ​កាត់​ទោស​ពួក​ជនធ្វើការ​វាយ​ប្រហារលើ​ពួក​អ្នក​ការពារ​សិទ្ធិ​មនុស្ស​ និងក្រុមបាតុករដោយសន្តិវិធី​បានបង្ក្រាប​ថែម​ទៀតលើ​សេរីភាព​នៃ​ការ​ជួប​ជុំ​គ្នា។

អាជ្ញាធរ​រុស្ស៊ី​ នៅតែ​បន្ត​ប្រើប្រាស់ខុសនិយមន័យនូវ​ភាព​ជ្រុលនិយមដើម្បី​បង្ក្រាបសេរីភាពខាង​ការ​ចូលរួម និង​សេរីភាព​ខាង​សាសនា ​ឬ​ខាង​ជំនឿ។ កាល​ពីឆ្នាំ​២០១៧ ​តុលាការ​កំពូលបាន​ចាត់​ទុក​សកម្មភាពរបស់​សមាជិក​ក្រុម Jehovah’s Witnesses ថា​ ជា​ឧក្រិដ្ឋកម្ម ដោយ​បាន​ហាមប្រាម​សកម្មភាព​ទាំង​អស់​នៃ​អង្គភាព​ច្បាប់​របស់​ក្រុម Jehovah’s Witnesses នេះ​នៅ​ទូទាំង​ប្រទេស និង​ហាមប្រាម​ការ​គោរពសាសនារបស់​ពួក​គេ​ផង​ដែរ។ ពួក​សមាជិក​នៃ​សាសនា​នេះ​បាន​ក្លាយ​ជា​គោលដៅ​នៃ​ការ​ចាប់​ដាក់​ពន្ធនាគារ​ឃុំឃាំង​ ឃុំឃាំង​ក្នុង​ផ្ទះ ​ឬ​ត្រូវ​ស៊ើបអង្កេតពី​បទ​ព្រហ្មទណ្ឌដោយសារ​បាន​ចូលរួម​ក្នុង«អង្គការ​ជ្រុល​និយម​មួយ​ត្រូវ​ហាមប្រាម»។

​រដ្ឋមន្ត្រី​ការបរទេស​សហរដ្ឋ​អាមេរិក លោក Antony Blinken បានមានប្រសាសន៍​ថា​ នៅ​ពេលប្រទេស​ទាំង​ឡាយ​ ដោយ​មាន​រួម​បញ្ចូល​ទាំង​ប្រទេស​រុស្ស៊ី​ផង​ដែរ «ស្វះស្វែង​បំផ្លាញ» ​សិទ្ធិ​ជា​មូលដ្ឋាន «យើង​នឹង​ងើប​ឈរហើយ​និយាយ​ខ្លាំងៗ​អំពី​បញ្ហា​នេះ»៕

XS
SM
MD
LG