តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
សហរដ្ឋអាមេរិក ជាមិត្តរបស់សមាគមប្រជាជាតិអាស៊ីអាគ្នេយ៍ (អាស៊ាន) តាំងពីយូរយារណាស់មកហើយ។ ថ្លែងតាមរយៈវីដេអូនៅឯកិច្ចប្រជុំរដ្ឋមន្រ្តីការបរទេសអាមេរិក-អាស៊ានប្រចាំឆ្នាំ លោក Mike Pompeo រដ្ឋមន្រ្តីការបរទេសសហរដ្ឋអាមេរិកបានមានប្រសាសន៍ថា ទស្សនវិស័យរបស់យើងចំពោះអនាគតនៃតំបន់ឥណ្ឌូប៉ាស៊ីហ្វិក ត្រូវបានតម្រែតម្រង់យ៉ាងដិតដល់។
លោក Pompeo និយាយថា៖ «សហរដ្ឋអាមេរិកតាំងចិត្តគាំទ្រអាស៊ានឲ្យស្ថិតនៅជាចំណុចស្នូលនៃតំបន់ឥណ្ឌូប៉ាស៊ីហ្វិក និងគាំទ្រវិបុលភាពរបស់ដៃគូអាស៊ានរបស់យើង»។
លោកបន្តថា៖ «យើងផ្តល់ជំនួយចំនួន ៨៩ លានដុល្លារ ដើម្បីប្រយុទ្ធប្រឆាំងនឹងជំងឺកូវីដ១៩ នៅក្នុងបណ្តាប្រទេសអាស៊ាន។ នេះ ជាផ្នែកមួយនៃថវិកាជាង ២០ ពាន់លានដុល្លារ ដែលយើងបានផ្តល់នៅទូទាំងពិភពលោក។ យើងបានបញ្ជូនម៉ាស៊ីនជំនួយការដកដង្ហើមចំនួន ៨៥០ គ្រឿងទៅប្រទេសឥណ្ឌូនេស៊ី ហើយ ១៥០ គ្រឿងទៀត នឹងរំពឹងថា នឹងត្រូវបញ្ជូនទៅដល់ក្នុងអំឡុងពេលប៉ុន្មានសប្តាហ៍ខាងមុខ។ ជាងនេះទៀត យើងក៏បានបញ្ជូនម៉ាស៊ីនជំនួយការដកដង្ហើមចំនួន ១០០ គ្រឿងទៅប្រទេសហ្វីលីពីន ដូចដែលបានសន្យាផងដែរ»។
លោករដ្ឋមន្ត្រីការបរទេស Pompeo បានប្រកាសអំពីគំនិតផ្តួចផ្តើមថ្មីៗមួយចំនួន ដែលត្រូវបានរៀបចំឡើងដើម្បីជួយប្រទេសអាស៊ាន នៅក្នុងការពង្រឹងអធិបតេយ្យភាព និងកំណើនសេដ្ឋកិច្ចរបស់ពួកគេ។
លោកថ្លែងដូច្នេះថា៖ «ដំបូង យើងរីករាយនឹងអនុម័តផែនការសកម្មភាពអាស៊ាន-អាមេរិកសម្រាប់ឆ្នាំ២០២១-២០២៥ ដើម្បីត្រួសត្រាយការចូលរួមទាំងអស់គ្នានាពេលអនាគតរបស់យើង ស្របតាមទស្សនវិស័យអាស៊ានស្តីពីតំបន់ឥណ្ឌូប៉ាស៊ីហ្វិក។ យើង ក៏កំពុងចាប់ផ្តើមផងដែរនូវភាពជាដៃគូមេគង្គ-សហរដ្ឋអាមេរិក ដើម្បីពង្រីកការចូលរួមរបស់យើងជាមួយប្រទេសទាំង ៥ នៃតំបន់មេគង្គ ដែលជាតំបន់មានសារៈសំខាន់យ៉ាងខ្លាំងចំពោះវិបុលភាព និងសាមគ្គីភាពរបស់អាស៊ាន។ យើងក៏មានមោទនភាពផងដែរនៅក្នុងការជំរុញភាពជាដៃគូរវាងសហរដ្ឋអាមេរិកនិងអាស៊ាន និងសេចក្តីថ្លែងការណ៍របស់មេដឹកនាំស្តីពីការអភិវឌ្ឍមូលធនមនុស្ស ហើយគាំទ្រវាដោយគំនិតផ្តួចផ្តើមថ្មី។ រដ្ឋាភិបាលសហរដ្ឋអាមេរិក មានបំណងផ្តល់ថវិកាចំនួន ៥ លានដុល្លារសម្រាប់កម្មវិធីមេដឹកនាំយុវជនអាស៊ីអាគ្នេយ៍ (Young Southeast Asian Leaders’ Academy) និងកម្មវិធីសាកលវិទ្យាល័យ Fulbright វៀតណាម (Fulbright University Vietnam)»។
ជំនួយទាំងនេះ គឺបន្ថែមលើថវិកាជាង ១៣ លានដុល្លារ ដែលបានផ្តល់សម្រាប់កម្មវិធីនៅក្រោមគម្រោងភាពជាដៃគូទីក្រុងឆ្លាតសហរដ្ឋអាមេរិក-អាស៊ាន (US-ASEAN Smart Cities Partnership) ដើម្បីកសាងផលិតភាព និងលើកកម្ពស់ជីវភាពរស់នៅរបស់ប្រជាពលរដ្ឋ។
ជាចុងក្រោយ សហរដ្ឋអាមេរិក បានលះបង់ធនធានថ្មីៗ ដើម្បីជួយបណ្តាប្រទេសអាស៊ាននៅក្នុងការតទល់នឹងវិបត្តិជំងឺកូវីដ១៩ នាពេលបច្ចុប្បន្ននេះ ក៏ដូចជាជំងឺរាតត្បាតនានានៅពេលអនាគតផងដែរ។
លោករដ្ឋមន្ត្រីការបរទេស Pompeo ថ្លែងថា៖ «ដោយបានថវិកាឧបត្ថម្ភចំនួន ១ លាន ៥ សែនដុល្លារពីក្រសួងការបរទេសសហរដ្ឋអាមេរិក ប្រព័ន្ធសម្របសម្រួលសង្គ្រោះបន្ទាន់ផ្នែកសុខភាពសាធារណៈអាស៊ាន (ASEAN Public Health Emergency Coordination System) នឹងបង្កើនសមត្ថភាពរបស់អាស៊ាននៅក្នុងការឆ្លើយតបក្នុងនាមជាតំបន់មួយចំពោះវិបត្តិសុខភាពសាធារណៈ ដែលកំពុងលេចចេញជារូបរាងឡើង ហើយនិយាយដោយត្រង់ទៅ គឺដើម្បីជួយទប់ស្កាត់ជំងឺរាតត្បាតនាពេលខាងមុខផងដែរ។ យើងបានបង្កើតបណ្តាញអតីតនិស្សិតនៃអនាគតផ្នែកសុខាភិបាល (Health Futures Alumni Network) ដែលជាបណ្ដាញថ្មីមួយ ដើម្បីចែករំលែកវិធីអនុវត្តល្អបំផុតនៅក្នុងការប្រយុទ្ធ និងដោះស្រាយវិបត្តិជំងឺកូវីដ១៩។ ក្រសួងសុខាភិបាលរបស់សហរដ្ឋអាមេរិក ក៏ចង់ធ្វើឲ្យទំនាក់ទំនងរបស់ខ្លួនជាមួយវិស័យសុខាភិបាលអាស៊ាន មានលក្ខណៈផ្លូវការផងដែរ»។
លោករដ្ឋមន្ត្រីការបរទេស Pompeo ថ្លែងបន្ថែមថា៖ «ខ្ញុំមានមោទនភាពចំពោះកិច្ចការរបស់រដ្ឋាភិបាលសហរដ្ឋអាមេរិក នៅក្នុងការគាំទ្រមិត្តរបស់យើងនៅក្នុងតំបន់អាស៊ាន។ លោកអ្នក អាចពឹងផ្អែកលើវាតទៅមុខទៀតបាន»៕