កាលពីថ្ងៃទី៩ ខែកញ្ញា ទីបញ្ជាការរបស់សហរដ្ឋអាមេរិកនៅតំបន់ឥណ្ឌូប៉ាស៊ីហ្វិកលោកឧត្តមនាវីឯក Samuel Paparoបានធ្វើសន្និសីទវីដេអូជាមួយសមភាគីចិនរបស់លោកគឺលោកឧត្តមសេនីយ៍ Wu Yanan មេបញ្ជាការនៃទីបញ្ជាការភាគខាងត្បូងនៃកងទ័ពរំដោះប្រជាជនចិន។
បុរសទាំង២នេះជាមេដឹកនាំយោធាកំពូលអាមេរិកាំងនិងចិនសម្រាប់តំបន់ដែលបានក្លាយជាឆាកនៃចំណាត់ការគឃ្លើនជាច្រើនលើកដោយចិនប្រឆាំងនឹងសម្ពន្ធមិត្តរបស់សហរដ្ឋអាមេរិក រួមទាំងប្រទេសហ្វីលីពីនផង។
នៅក្នុងសេចក្តីថ្លែងការណ៍មួយ ក្រសួងការពារជាតិអាមេរិកបានបញ្ជាក់ថា ការសន្ទនាតាមវីដេអូនេះ ជា«ផ្លែផ្កា»មកពីជំនួបរវាងលោកប្រធានាធិបតី Joe Biden និងប្រធានាធិបតីចិនលោក Xi Jinping កាលពីខែវិច្ឆិកា ឆ្នាំ២០២៣ នៅពេលដែលមេដឹកនាំទាំង២បានព្រមព្រៀងគ្នា ដើម្បីបន្តការទាក់ទងរវាងយោធានិងយោធាក្នុងកម្រិតខ្ពស់។
លោកឧត្តមនាវីឯក Paparoបានបញ្ជាក់ប្រាប់ឧត្តមសេនីយ Wuពីសារៈសំខាន់នៃការទាក់ទងជាប្រចាំដើម្បីកាត់បន្ថយហានិភ័យនៃការគណនាខុសឬការយល់ខុស។ ក្រសួងការពារជាតិអាមេរិកបានថ្លែងថា លោកឧត្តមនាវីឯក Paparo «បានបញ្ជាក់ឡើងវិញពីកាតព្វកិច្ចរបស់កងទ័ពប្រជាជនចិន PLAដើម្បីអនុវត្តទៅតាមច្បាប់អន្តរជាតិនិងច្បាប់ដើម្បីធ្វើឱ្យប្រាកដថាកិច្ចប្រតិបត្តិការមានសុវត្ថិភាព។ ក្រសួងការពារជាតិអាមេរិកថា លោក Paparoក៏បានជំរុញឱ្យកងទ័ពរំដោះប្រជាជនចិន PLA «ពិចារណាឡើងវិញនូវការប្រើកលល្បិចប្រកបដោយគ្រោះថ្នាក់ បង្ខិតបង្ខំនិងកាន់តែតានតឹងខ្លាំងឡើងនៅក្នុងសមុទ្រចិនខាងត្បូងនិងហួសពីនោះ»។
ក្នុងអំឡុងខែសីហា កលល្បិចបែបនេះដោយចិន ជាពិសេសប្រឆាំងនឹងនាវាហ្វីលីពីនត្រូវបានប្រើក្នុងវិសាលភាពដ៏ខ្លាំងគួរឱ្យភ្ញាក់ផ្អើល។ នៅក្នុងសេចក្តីថ្លែងការណ៍មួយ អ្នកនាំពាក្យក្រសួងការបរទេសអាមេរិកលោក Matthew Miller បានថ្កោលទោស«សកម្មភាពប្រកបដោយគ្រោះថ្នាក់និងកាន់តែតានតឹងឡើងដោយសាធារណរដ្ឋប្រជាមានិតចិនប្រឆាំងនឹងកិច្ចប្រតិបត្តិការនាវាចរណ៍ស្របច្បាប់របស់ហ្វីលីពីននៅក្នុងសមុទ្រចិនខាងត្បូង។ ការទាមទារដោយខុសច្បាប់របស់សាធារណរដ្ឋប្រជាមានិតចិនឬ PRCនូវ«បូរណភាពដែនដី»លើតំបន់មហាសមុទ្រនានាជាទីកន្លែងដែលមិនមានដែនដីនោះ ហើយនិងសកម្មភាពគឃ្លើនកើនឡើងរបស់ចិនដើម្បីប្រតិបត្តិកិច្ចប្រតិបត្តិការទាំងនោះ គំរាមកំហែងដល់សេរីភាពនៃការធ្វើនាវាចរណ៍និងការហោះហើរលើប្រទេសទាំងអស់»។
នៅឯសន្និសីទកាសែតមួយនាពេលថ្មីៗនេះ លោកឧត្តមនាវីឯក Andrew Sugimotoមេបញ្ជាការរងឆ្មាំការពារដែនសមុទ្រសហរដ្ឋអាមេរិកនៃតំបន់ប៉ាស៊ីហ្វិកបានព្រមានថា ចិនកំពុងធ្វើឱ្យអន្តរាយស្ថានភាពរបស់ខ្លួនដោយសារអាកប្បកិរិយាដ៏បំផ្លិចបំផ្លាញរបស់ខ្លួន ដែលរួមមានការបើកបុកនាវាហ្វីលីពីននិងធ្វើឱ្យរបួសដល់ពួកអ្នកដើរកប៉ាល់ហ្វីលីពីន។
លោកបានថ្លែងថា៖«ចិនចង់ឱ្យគេមើលឃើញខ្លួនថា ជាសមាជិកមួយរបស់ពិភពលោកដែលមានច្បាប់និងអនុវត្តច្បាប់ ក៏ប៉ុន្តែ នៅពេលដែលចិនធ្វើឱ្យមានបញ្ហាដូចជាការបុកឬប្រើកាណុងបាញ់ទឹកដាក់នាវាដែលគ្មានអាវុធ វាមិនបានបង្ហាញដូច្នេះទេ។ នៅពេលដែលចិនគោរពច្បាប់ ហើយចិនធ្វើជាគំរូ នៅពេលនោះ ប្រទេសផ្សេងទៀតរបស់ពិភពលោក នឹងកត់សម្គាល់ថា ចិនជាមេដឹកនាំរបស់ពិភពលោកហើយមិនមែនជាអ្នកធ្វើបាបគេទេ»។
នៅក្នុងការសន្ទនារបស់លោកជាមួយឧត្តមសេនីយ៍ Wu លោកឧត្តមនាវីឯក Paparo បានសម្តែងនូវក្តីសង្ឃឹមថា ការពិភាក្សាជាមួយសមភាគីចិនរបស់លោកនឹងបន្ត។ ក្នុងពេលដ៏សំខាន់នេះ សហរដ្ឋអាមេរិក បន្តជំរុញឱ្យសាធារណរដ្ឋប្រជាមានិតចិនឬPRC គឺដូចដែលអ្នកនាំពាក្យលោក Miller បាននិយាយថា៖ «ឱ្យឈប់ធ្វើសកម្មភាពប្រកបដោយគ្រោះថ្នាក់និងអស្ថិរភាព»៕