Accessibility links

Breaking News

បទ​វិចារណកថា៖ សហរដ្ឋ​អាមេរិក​រួបរួម​ជាមួយ​ប្រជាពលរដ្ឋ​គុយបា


រូប​ឯកសារ៖ ប្រជាពលរដ្ឋ​គុយបា​ធ្វើ​ការ​តវ៉ា​នៅ​ខាង​ក្រៅ​​វិមាន​សភា​​ ក្នុង​រដ្ឋធានី​ឡាហាវ៉ាន​ កាល​ពី​ថ្ងៃ​ទី​១១ ខែ​កក្កដា ឆ្នាំ​២០២១​ ដើម្បី​ប្រឆាំង​នឹង​រដ្ឋាភិបាល​លោក​​ប្រធានាធិបតី ​លោក Miguel Diaz-Canel។

តទៅនេះ​ គឺ​ជា​បទ​វិចារណកថា​ដែល​ឆ្លុះ​បញ្ចាំង​អំពី​ទស្សនៈ​របស់​រដ្ឋាភិបាល​សហរដ្ឋ​អាមេរិក

ដោយ​ឆ្អែតឆ្អន់​ជាមួយ​នឹង​ការ​គាប​សង្កត់​ជិះជាន់​និង​ការ​ខ្វះខាត​ផ្នែក​សេដ្ឋកិច្ច ប្រជាពលរដ្ឋ​រាប់​ពាន់​នាក់​បាន​ចេញ​តវ៉ា​តាម​ដង​ផ្លូវ​នៅ​ក្នុង​ប្រទេស​គុយបា​កាលពី​ខែ​កក្កដា។ ពួកគេ​បាន​ស្រែក​បន្ទោរ​ពាក្យ​ស្លោក​មួយ​ចំនួន​ដូចជា «សេរីភាព» «ឯកភាព» និង «មាតុភូមិ​និង​ជីវិត» ជាដើម និង​បាន​អំពាវនាវ​ឲ្យ​ប្រធានាធិបតី​គុយបា​លោក Miguel Diaz-Canel ចុះចេញ​ពី​តំណែង។

ការ​តវ៉ា​ដោយ​សន្តិវិធី​ទាំង​នេះ ដែល​បាន​ចាប់ផ្ដើម​កាលពី​ថ្ងៃ​ទី ១១ ខែ​កក្កដា បាន​រីក​រាលដាល​នៅ​ទូទាំង​ប្រទេស​គុយបា​ចាប់ពី​រដ្ឋធានី​ឡាហាវ៉ាន​រហូត​ដល់​ទីក្រុង Santiago និង​ជា​បាតុកម្ម​ដ៏​ធំ​បំផុត​ប្រឆាំង​នឹង​រដ្ឋាភិបាល​នៅ​ក្នុង​រយៈពេល​ប៉ុន្មាន​ទសវត្សរ៍​ចុងក្រោយ​នេះ។

ប្រធានាធិបតី​សហរដ្ឋ​អាមេរិក​លោក Joe Biden បាន​បង្ហាញ​សាមគ្គីភាព​ជាមួយ​នឹង​ប្រជាពលរដ្ឋ​គុយបា «ដោយ​ទាមទារ​សេរីភាព​របស់​ពួកគេ​ពី​របប​ផ្ដាច់ការ» និង​បាន​អំពាវនាវ​ឲ្យ​រដ្ឋាភិបាល​គុយបា «ឈប់​ប្រើ​អំពើ​ហិង្សា ឬ​ក៏​ការ​ប៉ុនប៉ង​ណា​មួយ​នៅ​ក្នុង​ការ​បំបិទ​សំឡេង​របស់​ប្រជាពលរដ្ឋ​គុយបា»។

ការ​អំពាវនាវ​នេះ​ត្រូវ​បាន​គេ​ធ្វើ​ព្រងើយ​កន្ដើយ ដោយសារតែ​អ្នក​តវ៉ា​នៅតែ​រង​នូវ​អំពើ​ហិង្សា ដូចជា​ការ​វាយដំ​និង​ការ​ប្រើ​ឧស្ម័ន​បង្ហូរ​ទឹកភ្នែក​ជាដើម។

បើ​យោង​តាម​ប្រព័ន្ធ​ផ្សព្វផ្សាយ​ឯករាជ្យ​នានា គិត​ត្រឹម​ថ្ងៃ​ទី ១៣ ខែ​កក្កដា អ្នក​តវ៉ា​ជាង ៥.០០០ នាក់ ត្រូវ​បាន​ចាប់​ឃុំ​ខ្លួន ឬ​ក៏​ស្ថិត​ក្រោម​ការ​ស៊ើបអង្កេត ដោយ​ក្នុង​ចំណោម​នោះ​មាន​សកម្មជន​និង​អ្នក​កាសែត​ផងដែរ។ ជាង​នេះ​ទៀត ប្រព័ន្ធ​អ៊ីនធឺណិត​ត្រូវបាន​កាត់ផ្ដាច់​ម្ដងម្កាល។

ជាជាង​ស្ដាប់​តាម​ការ​ទាមទារ​របស់​ប្រជាពលរដ្ឋ​គុយបា​ដែល​ចង់​បាន​នូវ​សិទ្ធិ​ជា​សាកល​របស់​ខ្លួន ប្រធានាធិបតី​គុយបា​លោក Diaz-Canel បាន​បន្ទោស​សហរដ្ឋ​អាមេរិក​ថា​ជា​អ្នក​ធ្វើ​ឲ្យ​សេដ្ឋកិច្ច​របស់​ប្រទេស​គុយបា​លិចលង់​និង​ជា​អ្នក​បង្ក​ឲ្យ​មាន​ភាព​ចលាចល​សង្គម​នៅ​ក្នុង​ប្រទេស​គុយបា។

រដ្ឋមន្ត្រី​ការបរទេស​សហរដ្ឋ​អាមេរិក​លោក Antony Blinken បាន​ច្រានចោល​យ៉ាង​ដាច់​អហង្ការ​នូវ​ការ​ប៉ុនប៉ង​របស់​លោក Diaz-Canel នៅ​ក្នុង​ការ​គេច​ពី​ការ​ទទួល​ខុសត្រូវ។

លោក Blinken បាន​ថ្លែង​ដូច្នេះ​ថា៖ «វា​ជា​កំហុស​ធ្ងន់ធ្ងរ​មួយ​ដែល​រដ្ឋាភិបាល​គុយបា​បកស្រាយ​អ្វី​ដែល​កំពុង​កើតឡើង​នៅ​ក្នុង​ទីក្រុង​រាប់សិប​នៅ​ទូទាំង​ប្រទេស​គុយបា​ថា​ជា​លទ្ធផល​នៃ​អ្វី​ដែល​សហរដ្ឋ​អាមេរិក​បាន​ធ្វើ»។

លោក Blinken បាន​បន្ត​ថា៖ «វា​ជា​កំហុស​ធ្ងន់ធ្ងរ​មួយ ដោយសារតែ​ការ​បកស្រាយ​របស់​រដ្ឋាភិបាល​គុយបា​នេះ​បាន​បង្ហាញ​ថា ពួកគេ​មិន​ខ្វល់​ពី​សំឡេង​និង​ឆន្ទៈ​របស់​ប្រជាពលរដ្ឋ​គុយបា​នោះ​ទេ។ ប្រជាពលរដ្ឋ [គុយបា] ឆ្អែតឆ្អន់​ហួស​ថ្លែង​ចំពោះ​ការ​ជិះជាន់​គាប​សង្កត់​ដែល​អូស​បន្លាយ​អស់​រយៈពេល​ជា​យូរ ឆ្អែតឆ្អន់​នឹង​ការ​គ្រប់គ្រង​សេដ្ឋកិច្ច​គុយបា​មិន​បាន​ល្អ ឆ្អែតឆ្អន់​នឹង​កង្វះ​ម្ហូប​អាហារ និង​កង្វះ​វិធានការ​ឆ្លើយតប​ចំពោះ​ការ​រាតត្បាត​ជំងឺ​កូវីដ១៩»។

លោក​រដ្ឋមន្ត្រី Blinken បាន​ប្រកាស​ថា៖ «រដ្ឋបាល​របស់​លោក Biden និង​អ្នកស្រី Harris គាំទ្រ​ប្រជាពលរដ្ឋ​គុយបា​និង​ប្រជាពលរដ្ឋ​នៅ​ទូទាំង​ពិភពលោក ដែល​ទាមទារ​សិទ្ធិ​របស់​ពួកគេ និង​ដែល​រំពឹង​ឲ្យ​រដ្ឋាភិបាល​របស់​ពួកគេ​ស្ដាប់​តាម​ការ​ចង់​បាន​និង​បម្រើ​ពួកគេ ជា​ជាង​បំបិទ​សំឡេង​ពួកគេ»។

លោក Blinken បាន​បញ្ជាក់​ដូច្នេះ​ថា៖ «អ្នក​តវ៉ា​ដោយ​សន្តិវិធី​មិនមែន​ជា​ឧក្រិដ្ឋជន​នោះ​ទេ។ សហរដ្ឋ​អាមេរិក​ចូលរួម​ជាមួយ​នឹង​ដៃគូ​នានា​នៅ​ទូទាំង​អឌ្ឍគោល​នេះ​និង​នៅ​ទូទាំង​ពិភពលោក​ដើម្បី​ជំរុញ​ឲ្យ​របប​ដឹកនាំ​គុយបា​គោរព​សិទ្ធិ​របស់​ប្រជាពលរដ្ឋ​គុយបា​នៅ​ក្នុង​ការ​កំណត់​អនាគត​របស់​ខ្លួន ដែល​នេះ​ជា​អ្វី​ដែល​ពួកគេ​មិន​ទទួល​បាន​អស់​រយៈពេល​ជា​យូរ​មក​ហើយ»៕

XS
SM
MD
LG