តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
លោកប្រធានាធិបតី Donald Trump បាននិយាយថា លោកប្តេជ្ញានឹងនាំ«យកជនទាំងឡាយណា ដែលចូលរួមក្នុងអំពើឃោរឃៅនៃការជួញដូរមនុស្សទៅឱ្យតុលាការកាត់ទោស ហើយនឹងស្វែងរកសេរីភាពសម្រាប់ក្រុមជនរងគ្រោះទាំងអស់នៃឧក្រិដ្ឋកម្មដ៏អាក្រក់នេះ»។
កាលពីពេលថ្មីៗនេះ លោកប្រធានាធិបតី Trump បានចេញផ្សាយផែនការសកម្មភាពជាតិមួយរបស់រដ្ឋបាលលោក ដើម្បីប្រយុទ្ធប្រឆាំងនឹងការជួញដូរមនុស្ស។ នេះ ជាផែនការមួយមានគោលដៅបញ្ចប់ការកេងអត្ថប្រយោជន៍កម្លាំងពលកម្មដោយបង្ខំ ឬការជួញដូរផ្លូវភេទនៅក្នុងសហរដ្ឋអាមេរិក។ ផែនការនេះ បានត្រូវរៀបចំឡើងដោយផ្តោតទៅលើសរសរស្តម្ភបី គឺការបញ្ចៀស ការការពារ និងការចោទប្រកាន់ក្នុងតុលាការ។ តាមរយៈរបៀបដោះស្រាយមួយរបស់រដ្ឋាភិបាល សហរដ្ឋអាមេរិក នឹងប្រើឧបករណ៍ដែលខ្លួនមាន ដើម្បីប្រយុទ្ធប្រឆាំងនឹងការជួញដូរមនុស្ស។
ទីភ្នាក់ងារអន្តោប្រវេសន៍ និងគយរបស់សហរដ្ឋអាមេរិកជាមួយនឹងទីភ្នាក់ងារឯទៀតៗ បានចាប់ខ្លួនពួកជួញដូរមនុស្សជាង៥ពាន់នាក់ កាលពីបីឆ្នាំកន្លងទៅនេះ។ នៅក្នុងសេចក្តីផ្តើមនៃផែនការសកម្មភាពជាតិនេះ លោកប្រធានាធិបតី Trump បាននិយាយថា «យើងបានរំលាយអង្គការឧក្រិដ្ឋកម្មនៅពេលយើងបង្អាក់ហេដ្ឋារចនាសម្ព័ន្ធហិរញ្ញវត្ថុនៃបណ្តាញទាំងនេះ។ ទីភ្នាក់ងារពង្រឹងច្បាប់សហរដ្ឋអាមេរិក ធ្វើកិច្ចសហប្រតិបត្តិការជាមួយមន្ត្រីពង្រឹងច្បាប់ប្រទេសម៉ិកស៊ិក ដើម្បីបំផ្លាញបណ្តញាជួញដូរមនុស្ស ដែលធ្វើប្រតិបត្តិការឆ្លងកាត់ព្រំដែនភាគខាងត្បូង»។
សហរដ្ឋអាមេរិក ក៏អំពាវនាវដល់ប្រទេសជាតិទាំងអស់ វិស័យធុរកិច្ច និងពួកអ្នកប្រើ ប្រាស់គ្រឿងឧបភោគបរិភោគ ឱ្យធ្វើការជាមួយចង្វាក់ផ្គត់ផ្គង់ដែលគ្មានពលកម្មដោយបង្ខំ។ រដ្ឋមន្ត្រីកាបរទេសសហរដ្ឋអាមេរិកលោក Mike Pompeo បានមានប្រសាសន៍ថា ក្រសួងការបរទេសសហរដ្ឋអាមេរិក «នឹងបន្តថ្កោលទោសយ៉ាងខ្លាំងដល់ការអនុវត្តពលកម្មដោយការបង្ខំ ដ៏គួឲ្យរន្ធត់ដោយគណបក្សកម្មុយនិស្តចិន ដែលជាផ្នែកមួយនៃយុទ្ធនាការសង្កត់សង្កិនប្រឆាំងនឹងក្រុមជនជាតិភាគតិចវីហ្គើ និងពួកសមាជិកនៃក្រុមជនភាគតិចផ្សេងទៀត និងសាសនានានានៅក្នុងតំបន់ស៊ីនជាង និងនៅទូទាំងប្រទេសចិន»។
សហរដ្ឋអាមេរិក បានដាក់ឱ្យមានការរឹតត្បិតខាងទិដ្ឋាការលើពួកមន្ត្រីនៃសាធារណរដ្ឋប្រជាមានិតចិន និងគណបក្សកម្មុយនិស្តចិន ដែលបានត្រូវជឿថាជាអ្នកទទួលខុសត្រូវដល់ការរំលោភលើសិទ្ធិមនុស្សដ៏សែនអាក្រក់ កសាងក្រុមចម្រុះអន្តរជាតិនៅអង្គការសហប្រជាជាតិ និងចេញផ្សាយការណែនាំអំពីសង្វាក់ផ្គត់ផ្គង់សម្រាប់ធុរកិច្ចក្នុងតំបន់ស៊ីនជាង។
លោករដ្ឋមន្ត្រី Pompeo បានមានប្រសាសន៍ទៀតថា «ដរាបណាគណបក្សកម្មុយនិស្តចិន នៅតែរំលោភបែបនេះតទៅទៀត យើងនឹងបន្តធ្វើការជាមួយវិស័យឧស្សាហកម្ម ពួកអ្នកគាំទ្រក្រុមពលករ និងរដ្ឋាភិបាលឯទៀតៗ ឱ្យយកចិត្តទុកដាក់លើបញ្ហានេះ និងដាក់សម្ពាធលើរដ្ឋាភិបាលចិន ឱ្យបញ្ឈប់គោលនយោបាយពលកម្មដោយបង្ខំនេះ»។
សហរដ្ឋអាមេរិក តាំងចិត្តដាច់ខាតនៅក្នុងការប្តេជ្ញារបស់ខ្លួនដើម្បីបញ្ចប់ទម្រង់ទាំងអស់នៃការជួញដូរមនុស្ស នៅក្នុងប្រទេសនិងក្រៅប្រទេស។ លោករដ្ឋមន្ត្រី Pompeo បានមានប្រសាសន៍ថា «ឧក្រិដ្ឋកម្មដ៏សែនអាក្រក់នេះ មិនអាចបន្តគំរាមកំហែងសុវត្ថិភាពសហគមន៍ និងបុគ្គលទេ។ យើងនឹងជំរុញទៅមុខ ឆ្ពោះទៅកាន់ការយកជ័យជម្នះលើឧក្រិដ្ឋកម្មនេះ»៕