តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
ទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិហៅកាត់ថា USAID កំពុងដឹកនាំការឆ្លើយតបរបស់សហរដ្ឋអាមេរិកដើម្បីជួយដល់តំបន់អាមេរិកកណ្ដាល ដែលរងគ្រោះដោយសារព្យុះសង្ឃរា។ ក្រុមការងារទទួលបន្ទុកខាងផ្តល់ជំនួយគ្រាមានមហន្តរាយនៃទីភ្នាក់ងារ USAID កំពុងធ្វើការជាមួយកងយោធាសហរដ្ឋអាមេរិកដើម្បីជួយដល់ក្រុមជនរងគ្រោះ ដោយសារព្យុះសង្ឃរាដ៏បំផ្លិចបំផ្លាញ។
ខ្យល់ព្យុះសង្ឃរា Eta និង Iota បានបោកបក់ទៅកាន់តំបន់អាមេរិកកណ្ដាលកាលពីថ្ងៃទី៣ និងទី១៦ ខែវិច្ឆិកា ដែលបានបណ្តាលមកឱ្យមនុស្ស ១៨៩ នាក់ស្លាប់ និងនាំឱ្យមានផលប៉ះពាល់ដល់មនុស្សជាង ៦ លាននាក់ថែមទៀតនៅក្នុងប្រទេសកូឡុំប៊ី ប៉ាណាម៉ា នីការ៉ាហ្គា ក្វាតេម៉ាឡា និងហុងឌូរ៉ាស។
អ្នកស្រី Alison Lapp គឺជាអ្នកគ្រប់គ្រងខាងការឆ្លើយតបនៃក្រុមការងារទទួលបន្ទុកខាងផ្តល់ជំនួយគ្រាមានមហន្តរាយនៃទីភ្នាក់ងារ USAID នៅពេលមានខ្យល់ព្យុះ hurricane នៅអាមេរិកឡាទីន និងតំបន់ការ៉ាអ៊ីប។
អ្នកស្រី Lapp បាននិយាយថា៖
«នៅកន្លែងខ្លះ មានទឹកជំនន់កម្ពស់ត្រឹមក ឬខ្ពស់ជាងនេះទៅទៀត។ ជាលទ្ធផល មនុស្សរាប់ម៉ឺននាក់ត្រូវតែចាកចេញពីផ្ទះសម្បែង ហើយត្រូវទៅរស់នៅបណ្ដោះអាសន្ននៅមជ្ឈមណ្ឌលជម្លៀសខ្លួន»។
មជ្ឈមណ្ឌលជម្លៀសខ្លួនទាំងនោះជាកន្លែងដែលក្រុមការងាររបស់ទីភ្នាក់ងារ USAID កំពុងផ្តោតយកចិត្តទុកដាក់លើ «សកម្មភាពជួយស្រោចស្រង់ជីវិត»ជាបន្ទាន់ ដោយមានរួមបញ្ចូលការផ្តល់ម្ហូបអាហារ និងទឹកស្អាតសម្រាប់បរិភោគ ក៏ដូចជាបំពេញនូវតម្រូវការជាមូលដ្ឋានឯទៀតៗផងដែរ។
អ្នកស្រី Lapp បានថ្លែងទៀតថា៖ «ជាឧទាហរណ៍ទីភ្នាក់ងារ USAID បានផ្តល់ពូក ភួយ និងឧបករណ៍អនាម័យដល់ទីជម្រកទាំងនោះដើម្បីជួយដល់តម្រូវការប្រចាំថ្ងៃរបស់ពួកគេ។ យើងក៏បានផ្តល់ប្រាក់សម្រាប់កសាងបង្គន់ និងកន្លែងងូតទឹកដើម្បីជួយបំពេញតម្រូវការជាមូលដ្ឋាននៃក្រុមជនទាំងនោះផងដែរ»។
រដ្ឋាភិបាលសហរដ្ឋអាមេរិកបានចាត់ចែងប្រាក់ជិត ៤៨ លានដុល្លារដើម្បីជួយក្រុមមនុស្សដែលអាចរងគ្រោះដោយងាយដោយសារខ្យល់ព្យុះ hurricane ក្នុងតំបន់អាមេរិកឡាទីន។ ក្នុងការគាំទ្រដល់ការឆ្លើយតបរបស់ទីភ្នាក់ងារ USAID កងយោធាសហរដ្ឋអាមេរិកបានផ្ដល់ម្ហូបអាហារ ទឹក និងរបស់របរជួយសង្គ្រោះសំខាន់ៗឯទៀតៗទម្ងន់ ១ លាន ២ សែនផោន ដល់តំបន់ពិបាកទៅដល់ ដែលត្រូវការជំនួយទាំងនេះខ្លាំងបំផុត។
ប្រាក់ដែលមានក្នុងកម្មវិធីឆ្លើយតបនឹងជំងឺកូវីដ១៩ កំពុងត្រូវយកទៅប្រើដើម្បីជួយបញ្ចៀសការរាលដាលនៃជំងឺនេះក្នុងកន្លែងជម្លៀសទាំងនោះ។
សកម្មភាពទាំងអស់នេះកើតចេញពីកិច្ចខិតខំប្រឹងប្រែងរយៈពេលរាប់ឆ្នាំរបស់ទីភ្នាក់ងារ USAID ក្នុងការពង្រឹងសមត្ថភាពឆ្លើយតបនឹងមហន្តរាយក្នុងមូលដ្ឋាន ពង្រឹងប្រព័ន្ធព្រមានពីដំបូង បង្រៀនអំពីការប្រុងប្រៀបសម្រាប់គ្រាមានមហន្តរាយដល់សិស្សសាលាបឋមសិក្សា អភិវឌ្ឍផែនការសកម្មភាពសហគមន៍ និងបណ្ដុះបណ្ដាលពួកអ្នកធ្វើការខាងឆ្លើយតបដំបូងៗ។
ក្នុងរយៈពេលយូរ ជំនួយបច្ចុប្បន្ននេះនឹងរៀបចំសម្រាប់ឱ្យប្រជាជនវិលទៅកាន់ផ្ទះពួកគេវិញ ហើយជួយចាប់ផ្តើមកិច្ចខិតខំប្រឹងប្រែងធ្វើស្ដារឡើងវិញ។
អ្នកស្រី Lapp បានថ្លែងថា៖ «កម្មវិធីដែលយើងរៀបចំនេះនឹងមានបន្តរហូតដល់រយៈពេល ១២ ខែ។ ចាប់ពីពេលនោះទៅ យើងនឹងប្រគល់ភារកិច្ចឱ្យសហការីរបស់យើងខាងការអភិវឌ្ឍន៍របស់ទីភ្នាក់ងារ USAID ក្នុងបេសកកម្មនៃប្រទេសទាំងនេះដែលពួកគេនឹងធ្វើការស្ដារឡើងវិញ ហើយបន្ទាប់មកនឹងត្រឡប់ទៅធ្វើការងារខាងការអភិវឌ្ឍន៍រយៈពេលវែងវិញដើម្បីគាំទ្រដល់ប្រទេសទាំងនេះ»។
អ្នកស្រី Lapp បានមានប្រសាសន៍ថា៖ «នេះគឺជាការបង្ហាញទឹកចិត្តសប្បុរសរបស់ប្រជាជនអាមេរិកចេញពីបេះដូងទៅដល់ក្រុមជនរងគ្រោះបំផុតដោយសារគ្រោះមហន្តរាយនានា»៕