តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
កាលពីថ្ងៃទី១ ខែកុម្ភៈ យោធាមីយ៉ាន់ម៉ាបានធ្វើរដ្ឋប្រហារទម្លាក់រដ្ឋាភិបាលស៊ីវិលរបស់ប្រទេសនេះ។
រដ្ឋមន្ត្រីការបរទេសសហរដ្ឋអាមេរិកលោក Antony Blinken បានបញ្ជាក់នៅក្នុងសេចក្ដីថ្លែងការណ៍ជាលាយលក្ខណ៍អក្សរមួយថា៖ «មុនរដ្ឋសភាដែលត្រូវបានបោះឆ្នោតជ្រើសរើសថ្មី គ្រោងបើកសម័យប្រជុំលើកដំបូងរបស់ខ្លួន យោធាមីយ៉ាន់ម៉ា បានឃុំខ្លួនថ្នាក់ដឹកនាំរដ្ឋាភិបាលជាច្រើនរូប ដែលក្នុងនោះមានទាំងទីប្រឹក្សារដ្ឋអ្នកស្រី Aung San Suu Kyi និងលោកប្រធានាធិបតី Win Myint រួមទាំងមេដឹកនាំសង្គមស៊ីវិល អ្នកកាសែត និងសកម្មជនសិទ្ធិមនុស្សនានាផងដែរ»។
លោក Blinken បានបន្ថែមថា៖ «សហរដ្ឋអាមេរិកបានបបញ្ជាក់យ៉ាងច្បាស់ថា នេះគឺជារដ្ឋប្រហារ ហើយយើងនឹងមិនធ្វើព្រងើយកន្ដើយចំពោះរឿងនេះ នោះឡើយ។ រដ្ឋប្រហារនេះ ប៉ុនប៉ងច្រានចោលឆន្ទៈរបស់ប្រជាពលរដ្ឋមីយ៉ាន់ម៉ាដែលបានបង្ហាញឡើងនៅក្នុងការបោះឆ្នោតកាលពីខែវិច្ឆិកា ឆ្នាំ២០២០»។
នៅក្នុងការឆ្លើយតបចំពោះរដ្ឋប្រហារនេះ លោកប្រធានាធិបតី Joe Biden បានចេញបទបញ្ជានីតិប្រតិបត្តិមួយរារាំងទ្រព្យសម្បត្តិទាក់ទិនទៅនឹងស្ថានភាពនៅក្នុងប្រទេសមីយ៉ាន់ម៉ា ដោយបានអនុញ្ញាតឲ្យមានការដាក់ទណ្ឌកម្មពាក់ព័ន្ធនឹងរដ្ឋប្រហារនេះ។
បន្ទាប់មក ក្រសួងហិរញ្ញវត្ថុសហរដ្ឋអាមេរិក បានដាក់ទណ្ឌកម្មលើមន្ត្រីនិងអង្គភាពមីយ៉ាន់ម៉ាមួយចំនួន។
ស្របតាមបទបញ្ជានីតិប្រតិបត្តិថ្មីនេះ ក្រសួងហិរញ្ញវត្ថុ ដោយមានការពិគ្រោះយោបល់ជាមួយនឹងក្រសួងការបរទេស បានកំណត់បុគ្គលចំនួន១០ នាក់ ដែលពាក់ព័ន្ធនឹងរដ្ឋប្រហារនេះ និងអង្គភាពចំនួន ៣ ដែលគាំទ្ររចនាសម្ព័ន្ធចាត់តាំងរបស់យោធាមីយ៉ាន់ម៉ា។
បុគ្គលដែលត្រូវបានកំណត់នេះមានដូចជា អគ្គមេបញ្ជាការយោធាមីយ៉ាន់ម៉ាលោក Min Aung Hlaing អគ្គមេបញ្ជាការរងយោធាលោក Soe Win អនុប្រធានាធិបតីទីមួយ និងជាឧត្តមសេនីយ៍ឯកចូលនិវត្តន៍លោក Myint Swe លោកឧត្តមសេនីយ៍ឯក Sein Win លោកឧត្តមសេនីយ៍ឯក Soe Htut និងលោកឧត្តមសេនីយ៍ឯក Ye Aung ដែលអ្នកទាំងអស់នេះ គឺជាអ្នកដឹកនាំការធ្វើរដ្ឋប្រហារ។
ក្រៅពីនេះមានលោកនាយឧត្តមសេនីយ៍ Mya Tun Oo លោកនាយឧត្តមនាវី Tin Aung San លោកឧត្តមសេនីយ៍ឯក Ye Win Oo និងលោកឧត្តមសេនីយ៍ឯក Aung Lin Dwe ដែលជាអ្នកពាក់ព័ន្ធនឹងការធ្វើរដ្ឋប្រហារនេះដែរ។
ក្រុមហ៊ុន Myanmar Ruby Enterprise ក្រុមហ៊ុន Myanmar Imperial Jade Company និងក្រុមហ៊ុន Cancri Company ត្រូវបានដាក់ទណ្ឌកម្ម ដោយសារតែបានគ្រប់គ្រងទាំងស្រុងនូវសាខារបស់មហាក្រុមហ៊ុនមួយដែលគ្រប់គ្រងដោយយោធាមីយ៉ាន់ម៉ា។
ជាលទ្ធផលនៃការកំណត់ដាក់ទណ្ឌកម្មនេះ ទ្រព្យសម្បត្តិនិងផលប្រយោជន៍ទាំងអស់របស់បុគ្គលនិងអង្គភាពទាំងនេះ ដែលស្ថិតនៅក្នុងដែនអំណាចគ្រប់គ្រងរបស់សហរដ្ឋអាមេរិក ឬក៏ស្ថិតនៅក្នុងកម្មសិទ្ធិ ឬក៏ការគ្រប់គ្រងរបស់បុគ្គលអាមេរិកាំង ត្រូវបានរារាំង ហើយបុគ្គលអាមេរិកាំងនោះ មិនត្រូវពាក់ព័ន្ធនឹងការជួញដូរណាមួយជាមួយនឹងអ្នកទាំងនោះឡើយ។
លោករដ្ឋមន្ត្រី Blinken បាននិយាយថា៖ «ការកំណត់ដាក់ទណ្ឌកម្មទាំងនេះសំដៅជាពិសេសលើមន្ត្រីយោធាបច្ចុប្បន្ន ឬពីមុនណា ដែលបានដឹកនាំការទម្លាក់រដ្ឋាភិបាលដែលត្រូវបានជ្រើសរើសតាមបែបប្រជាធិបតេយ្យរបស់ប្រទេសមីយ៉ាន់ម៉ា»។
លោកបានបន្ថែមថា៖ «ការកំណត់ដាក់ទណ្ឌកម្មនេះមិនសំដៅលើសេដ្ឋកិច្ច ឬក៏ប្រជាពលរដ្ឋរបស់ប្រទេសមីយ៉ាន់ម៉ានោះទេ។ សហរដ្ឋអាមេរិកបានព្យាយាមយ៉ាងខ្លាំងដើម្បីធានាថា យើងនឹងមិនបន្ថែមស្ថានភាពលំបាកវេទនាផ្នែកមនុស្សធម៌បន្ថែមទៀតដល់ប្រជាពលរដ្ឋមីយ៉ាន់ម៉ានោះឡើយ»៕