Accessibility links

Breaking News

បទវិចារណកថា៖ សហរដ្ឋ​អាមេរិក ថ្កោលទោស​ការចាប់ខ្លួន​នៅ​ហុងកុង


រូបឯកសារ៖ លោក Tony Chung ជា​មេដឹកនាំ​​និស្សិត​ហុងកុង ដែល​គាំទ្រឯករាជ្យភាព។

តទៅ​នេះ គឺ​ជា​បទ​វិចារណកថា​ដែល​ឆ្លុះ​បញ្ចាំង​អំពី​ទស្សនៈ​របស់​រដ្ឋាភិបាល​សហរដ្ឋ​អាមេរិក

ចំនួននៃ​ការ​ចាប់ខ្លួន​ពួក​អ្នក​គាំទ្រលទ្ធិប្រជាធិបតេយ្យតាម​រយៈ​ច្បាប់​សន្តិសុខ​ថ្មី​និង​បទបញ្ញត្តិឯ​ទៀតៗ នៅ​ក្នុង​ក្រុង​ហុងកុងនៅ​តែ​កើនឡើង​ច្រើន​តទៅ​ទៀត។ ជា​មួយរាល់​ការ​ចាប់​ខ្លួនថ្មី គណបក្សកុម្មុយនីស្ត​ចិន​ កាន់​តែ​បំផ្លិចបំផ្លាញ​ស្វ័យភាពនៃ​ដែនដី​ហុងកុង និង​ការ​គោរព​សិទ្ធិ​មនុស្ស។

កាល​ពីពេល​ថ្មីៗ​បំផុត​នេះ អាជ្ញាធរបានចាប់​ខ្លួនក្រុម​អ្នកនយោបាយប្រជាធិបតេយ្យ៨​នាក់នៅហុងកុង​ ដោយ​មាន​រួម​បញ្ជូល​សមាជិក​កំពុង​កាន់​តំណែង​៥​នាក់​នៃ​ក្រុម​ប្រឹក្សានីតិបញ្ញត្តិ។ បើ​តាម​មន្ត្រី​ប៉ូលិស​ថា ក្រុមជនទាំង​នេះ បាន​ត្រូវ​ចាប់​ឃុំឃាំងជា​ផ្នែក​មួយ​នៃ​ការ​ស៊ើបអង្កេតអំពី​ការប្រជុំមួយ​កាល​ពី​ថ្ងៃ​ទី៨ ខែ​ឧសភា ស្តី​ពី​តើ​នរណា​គួរត្រួតត្រា​គណៈកម្មាធិការ​សំខាន់​មួយ​នៅ​ក្នុង​ស្ថាប័ន​នីតិ​បញ្ញត្តិ​នេះ។

រដ្ឋមន្ត្រី​ការ​បរទេស​សហរដ្ឋ​អាមេរិក លោក​Mike Pompeo ​បានប្រកាស​នៅ​ក្នុងសេចក្តី​ថ្លែងការណ៍​មួយ​ថា៖ «ការ​ចាប់​ខ្លួន​ក្រុម​សមាជិក​សភា​ទាំង​នេះ នៅ​៦ខែ ក្រោយឧប្បត្តិហេតុនោះ​ ជាការរំលោភ​ច្បាស់លាស់​ពីអ្នក​ពង្រឹង​ច្បាប់ ​ដើម្បី​គោលដៅនយោបាយ។ ការ​យាយី​និង​ការ​ធ្វើ​ទុក្ខ​បុក​ម្នេញដោយ​រដ្ឋាភិបាល​ហុងកុងលើ​ពួក​អ្នកតំណាងរាស្ត្រ​ដែល​គាំទ្រលទ្ធិ​ប្រជាធិបតេយ្យ និង​ការ​ប៉ុន​ប៉ង​ក្នុង​ការ​បង្ក្រាប​ក្រុម​អ្នក​ប្រឆាំង ជា​ឧទាហរណ៍​ជាក់​ស្តែង​នៃ​ការ​ឃុបឃិតរបស់រដ្ឋាភិបាលដែន​ដី​នេះជា​មួយគណបក្សកុម្មុយនីស្តចិន​ដែល​កាន់អំណាច​ផ្តាច់ការ»។

កាល​ពី​ថ្ងៃ​ទី​២៣​ ខែ​តុលា​ សមាជិក​បី​នាក់​នៃ​អតីតក្រុម​និស្សិត​មួយ​ដែលទាមទារ​ឯករាជ្យ​សម្រាប់​ដែនដី​ហុងកុង បាន​ត្រូវ​ចាប់​ខ្លួនតាម​រយៈ​ច្បាប់​សន្តិសុខ​ជាតិ​ ដោយសារ​មាន​ការ​សង្ស័យ​ថា ពួក​គេ​បាន​ផ្សាយ​អត្ថបទតាម​បណ្តាញ​សង្គម​ញុះញង់ឱ្យមាន​ការ​បំបែក​រដ្ឋ។ ជន​ទាំង​បី​នាក់​នេះ មាន​រួម​លោក Tony Chung អតីតមេដឹកនាំនិស្សិតនិងអតីតសមាជិក​គឺ​លោក William Chan និង​នាង​ Yanni Ho។

សហរដ្ឋ​អាមេរិក​ ថ្កោលទោស​យ៉ាង​ខ្លាំងដល់​ការចាប់​ខ្លួននិង​ការ​ឃុំឃាំងក្រុមជនទាំងនេះ ​ហើយអំពាវនាវ​ដល់អាជ្ញាធរដែនដី​ហុងកុង​ឱ្យ​ដោះលែងជា​បន្ទាន់​នូវជន​ទាំង​ឡាយ​ដែលនៅ​ជាប់ឃុំឃាំង​នៅ​ឡើយ។

សាធារណរដ្ឋ​ប្រជាមានិត​ ចិនបាន​រំលោភលើ​កាតព្វកិច្ចអន្តរជាតិរបស់ខ្លួននៅ​ក្រោម​សេចក្តី​ប្រកាស​រួម​រវាង​ប្រទេសចិន​ និងចក្រភព​អង់គ្លេសកាល​ពី​ឆ្នាំ១៩៨៤។​

គណបក្ស​កម្មុយនីស្ត​ចិន និងពួក​តំណាង​ខ្លួននៅ​ហុងកុង​ កម្ទេចស្វ័យភាព​ដែលបានត្រូវ​សន្យាដល់ដែនដី​ហុងកុង និង​កាត់​បន្ថយការ​គោរព​សិទ្ធិ​មនុស្ស​នៅ​ហុង​កុងដោយ​មាន​រួមបញ្ចូល​សិទ្ធិក្នុង​ការប្រមូលផ្តុំ​គ្នា​ដោយ​សន្តិវិធី​ និង​សេរីភាព​ក្នុង​ការបញ្ចេញ​មតិ។

សហរដ្ឋ​អាមេរិក​បន្តឈរ​ជាមួយពលរដ្ឋ​ហុងកុង៕

XS
SM
MD
LG