តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
នៅក្នុងឱកាសទស្សនកិច្ចរបស់ប្រធានាធិបតីបារាំង លោក Emmanuel Macron កាលពីពេលថ្មីៗនេះនៅសេតវិមាន សហរដ្ឋអាមេរិក ប្រធានាធិបតីសហរដ្ឋអាមេរិក លោក Joe Biden បានប្រកាសថា សហរដ្ឋអាមេរិកនិងប្រទេសបារាំង«ប្រកាន់គោលជំហរខ្លាំងជានិច្ចប្រឆាំងនឹងសង្គ្រាមឃោរឃៅរបស់រុស្ស៊ីប្រឆាំងនឹងប្រទេសអ៊ុយក្រែន»។
លោកប្រធានាធិបតី Joe Biden បានមានប្រសាសន៍ថា៖ «ហើយ យើងនឹងបន្តគាំទ្រយ៉ាងខ្លាំងដល់ប្រជាជននៃប្រទេសអ៊ុយក្រែននៅពេលពួកគេការពារផ្ទះសម្បែង គ្រួសារពួកគេ អធិបតេយ្យភាព និងបូរណភាពដែនដីរបស់ពួកគេ ប្រឆាំងនឹងការឈ្លានពានរបស់រុស្ស៊ី ដ៏សែនឃោរឃៅ»។
លោកប្រធានាធិបតី Biden បានពន្យល់ថាអាមេរិកនិងបារាំងបានតាំងចិត្តឱ្យប្រទេសរុស្ស៊ីទទួលខុសត្រូវដល់សកម្មភាពរបស់ខ្លួននិងបន្ធូរផលប៉ះពាល់សាកលនៃសង្គ្រាមរបស់ Putin លើពិភពលោក។
លោកប្រធានាធិបតីបាននិយាយថា៖ «សហរដ្ឋអាមេរិកជួយអឺរ៉ុបឱ្យមានជម្រើសផ្សេងៗពីឧស្ម័នធម្មជាតិរុស្ស៊ីក្នុងរយៈពេលមធ្យម នៅពេលពន្លឿនអន្តរកាលទៅកាន់ថាមពលស្អាតរបស់យើង ហើយយើងនឹងបន្តធ្វើការក្នុងភាពដៃគូជិតស្និទ្ធជាមួយអឺរ៉ុបនៅពេលយើងធ្វើចលនាទៅមុខ...យើងក៏ប្តេជ្ញាពង្រឹងកិច្ចសហប្រតិបត្តិការរវាងប្រទេសបារាំងនិងសហរដ្ឋអាមេរិកអំពីថាមពលនុយក្លេអ៊ែរស៊ីវិលតាមរយៈភាពដៃគូថាមពលស្អាតទ្វេភាគីរបស់យើង»។
លោកប្រធានាធិបតីបានថ្លែងថានៅទូទាំងពិភពលោក ប្រទេសបារាំងនិងអាមេរិកកំពុងធ្វើការដើម្បីពង្រឹងស្ថិរភាពនិងសន្តិសុខ មានរួមនៅក្នុងតំបន់ឥណ្ឌូ-ប៉ាស៊ីហ្វិកផងដែរ។ យើងចង់មានតំបន់ឥណ្ឌូ-ប៉ាស៊ីហ្វិកមួយដែលមានសេរីភាពនិងបើកចំហ ចម្រើនរុងរឿងនិងមានសន្តិសុខ ដោយមានសេរីភាពនាវាចរណ៍និងការហោះហើរពីលើថែមទៀតផង។
លោក Biden បានថ្លែងថា៖ «យើងធ្វើការជាមួយគ្នាដើម្បីគាំទ្រតំបន់មជ្ឈិមបូព៌ាមួយដែលមានការចូលរួម មានសន្តិភាពនិងរុងរឿងជាងមុន»ដោយមានរួមបញ្ចូលប្រទេសអ៊ីរ៉ង់ផងដែរ។
លោកប្រធានាធិបតី Biden បានមានប្រសាសន៍ថា៖ «យើងក៏ឈរជាមួយប្រជាជនអ៊ីរ៉ង់ដែរ។ ហើយបារាំងនិងអាមេរិកធ្វើការជាមួយគ្នាដើម្បីឱ្យពួកជនទទួលខុសត្រូវដល់ការរំលោភលើសិទ្ធិមនុស្ស ទទួលខុសត្រូវដល់សកម្មភាពពួកគេ ដើម្បីប្រឆាំងនឹងការទ្រទ្រង់របស់អ៊ីរ៉ង់ដល់សង្គ្រាមរបស់រុស្ស៊ី និងធ្វើឱ្យប្រាកដថាប្រទេសអ៊ីរ៉ង់...នឹងគ្មានអាវុធនុយក្លេអ៊ែរឡើយ»។
នៅទ្វីបអាហ្វ្រិក សហរដ្ឋអាមេរិកនិងប្រទេសបារាំងបានយល់ស្របគ្នាជួយពង្រឹងអភិបាលកិច្ច សន្តិសុខនិងឱកាសសេដ្ឋកិច្ចនៅទូទាំងទ្វីបនេះ។
ភាពដៃគូរវាងស.រ.អ.និងប្រទេសបារាំងក៏មានក្នុងកិច្ចសហការលើការរុករកនិងការប្រើប្រាស់តំបន់ហួសពីអវកាស ធ្វើវិនិយោគក្នុងថាមពលស្អាតនិងកសាងឧស្សាហកម្មសម្រាប់ពេលអនាគត មានរួមអាគុយនិង អ៊ីដ្រូសែនបៃតងមិនធ្វើឱ្យខូចបរិស្ថាន។
រដ្ឋមន្ត្រីការបរទេសសហរដ្ឋអាមេរិក លោក Antony Blinken បានកត់សម្គាល់ថា៖ «គេពិបាកនឹងរកឃើញឧបសគ្គមួយដែលយើងមិនអាចដោះស្រាយបាន ប្រសិនបើសហរដ្ឋអាមេរិកនិងប្រទេសបារាំងធ្វើការជាមួយគ្នា។ នៅក្នុងអ្វីទាំងអស់ដែលយើងធ្វើ ប្រជាជននិងប្រទេសជាតិរបស់យើងបានចងភ្ជាប់គ្នាដោយគុណតម្លៃស្នូលរបស់យើងនៃសេរីភាពនិងលទ្ធិប្រជាធិបតេយ្យ ការគោរពសិទ្ធិមនុស្សនិងនីតិរដ្ឋ»៕
បទវិចារណកថា៖ សហរដ្ឋអាមេរិកនិងប្រទេសបារាំងជាសម្ព័ន្ធមិត្តរឹងមាំ
