តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋ អាមេរិក
ស.រ.អ. បានព្យួរ និងចាប់ផ្តើមដំណើរការបញ្ចប់កិច្ចព្រមព្រៀងសហប្រតិបត្តិការសុំសិទ្ធិជ្រកកោនជាមួយរដ្ឋាភិបាលនៃប្រទេស El Salvador Guatemala និងប្រទេស Honduras ដែលជាជំហានដំបូងៗលើផ្លូវទៅកាន់ភាពដៃគូ និងកិច្ចសហប្រតិបត្តិការធំជាងមុនក្នុងតំបន់រៀបចំដោយលោកប្រធានាធិបតី Joe Biden។
កិច្ចព្រមព្រៀងចុះហត្ថលេខាដោយប្រទេស Guatemala កាលពីឆ្នាំ២០១៩ អនុញ្ញាតឱ្យស.រ.អ. បញ្ជូនពួកអ្នកស្វះស្វែងសុំសិទ្ធិជ្រកកោនពីប្រទេស El Salvador និងប្រទេស Honduras ដែលបានឆ្លងកាត់ព្រំដែនខាងត្បូងស.រ.អ. ឱ្យទៅសុំសិទ្ធិជ្រកកោនក្នុងប្រទេស Guatemala ជាដំបូងសិន។ កិច្ចព្រមព្រៀងស្រដៀងគ្នានេះត្រូវចុះហត្ថលេខាដោយប្រទេស El Salvador និង Honduras តែមិនត្រូវបានអនុវត្តទេ។
បទបញ្ជានីតិប្រតិបត្តិកាលពីថ្ងៃទី២ ខែកុម្ភៈ មានគោលដៅបង្កើតក្របខណ្ឌតំបន់ទូលំទូលាយមួយដើម្បីដោះស្រាយបុព្វហេតុនៃចំណាកស្រុក គ្រប់គ្រងទេសន្តរប្រវេសន៍នៅទូទាំងតំបន់ខាងជើងនិងកណ្តាលទ្វីបអាមេរិក និងផ្តល់ដំណើរការពិនិត្យមើលពួកអ្នកសុំសិទ្ធិជ្រកកោនដោយសុវត្ថិភាព និងមានរបៀបរៀបរយនៅព្រំដែនស.រ.អ.។
លោករដ្ឋមន្ត្រីការបរទេសស.រ.អ. Anthony Blinken បានមានប្រសាសន៍នៅក្នុងសេចក្តីថ្លែងការណ៍មួយថា៖ «ជាការច្បាស់លាស់ សកម្មភាពទាំងនេះ មិនមែនមានន័យថា ព្រំដែនស.រ.អ.បើកចំហទេ។ នៅពេលដែលយើងសន្យាថា ពង្រីកវិធីផ្លូវច្បាប់សម្រាប់ការការពារនិងផ្តល់ឱកាសនៅទីនេះ និងក្នុងតំបន់ ក៏ស.រ.អ. នៅតែជាប្រទេសដែលមានព្រំដែននិងច្បាប់ ដែលត្រូវតែពង្រឹង»។ លោកបាននិយាយបន្ថែមថា៖ «យើងសន្យាពិនិត្យមើលសំណើរបស់ពួកជនទាំងអស់ដែលមកដល់ព្រំដែនយើង តែជនទាំងឡាយណាដែលប៉ុនប៉ងធ្វើចំណាកស្រុកដោយមិនត្រឹមត្រូវ គឺនាំឲ្យគ្រោះថ្នាក់ដល់ខ្លួនឯងនិងក្រុមគ្រួសារ ដោយសារតែការធ្វើដំណើរមានគ្រោះថ្នាក់ខ្លាំងណាស់»។
រដ្ឋបាលលោក Biden មានជំនឿថា មានវិធីច្រើនជាងមុនដើម្បីធ្វើការជាមួយរដ្ឋាភិបាលជាដៃគូដើម្បីគ្រប់គ្រងជនចំណាកស្រុកក្នុងតំបន់។ ស.រ.អ. នឹងធ្វើការបន្តលើទំនាក់ទំនងខ្លាំងក្លារបស់ខ្លួន និងគាំទ្រដល់កិច្ចខិតខំប្រឹងប្រែងរបស់រដ្ឋាភិបាលទាំងនេះ ក្នុងការដោះស្រាយការបង្ខំឱ្យផ្លាស់ប្តូរកន្លែងរស់នៅដោយមិនឱ្យមានបន្ទុកមិនចាំបាច់លើពួកគេ ជាពិសេសនៅពេលពួកគេប្រឹងប្រែងរើបចេញពីការរាតត្បាតនៃជំងឺកូវីដ១៩។
លោករដ្ឋមន្ត្រី Blinken បានមានប្រសាសន៍ថា៖ «របៀបដោះស្រាយរបស់យើង នឹងបន្តផ្តល់ការគាំទ្រដល់ផែនការសកម្មភាពជាតិរបស់យើងតាមរយៈក្របខណ្ឌទូលំទូលាយសម្រាប់ការការពារ និងរកដំណោះស្រាយថ្នាក់តំបន់តាមរយៈដៃគូមនុស្សធម៌អន្តរជាតិ»។
ស.រ.អ. ប្តេជ្ញាដោះស្រាយឫសគល់នៃបុព្វហេតុនៃការបង្ខំឱ្យផ្លាស់ប្តូរកន្លែងរស់នៅនិងចំណាកស្រុកមិនធម្មតាដោយមានរួមបញ្ចូលការប្រយុទ្ធប្រឆាំងនឹងអំពើពុករលួយ និងភាពគ្មានទោសពៃរ៍ ធ្វើតាមកាតព្វកិច្ចខ្លួនក្នុងការការពារពួកជនភៀសខ្លួន និងធ្វើការជាមួយដៃគូដើម្បីឧបត្ថម្ភផ្ចុងផ្តើមឱកាស និងភាពសំបូររុងរឿងសម្រាប់ប្រជារាស្ត្រ និងសហគមន៍នៅទូទាំងតំបន់៕