តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
សហរដ្ឋអាមេរិកសន្យាថា នឹងកាត់បន្ថយចំនួនអ្នកជាប់ឃុំនៅកន្លែងឃុំឃាំងនៅឆកសមុទ្រ Guantanamo នៃប្រទេសគុយបាហើយនៅទីបញ្ចប់នឹងបិទទីកន្លែងនោះ។
កាលពីថ្ងៃទី១៩ ខែកក្កដា ក្រសួងការពារជាតិសហរដ្ឋអាមេរិកបានប្រកាសថា ឈ្មោះ Abdul Latif Nasir ពលរដ្ឋម៉ារ៉ុកដែលបានជាប់ឃុំនៅមន្ទីរឃុំឃាំង Guantanamoចាប់ពីឆ្នាំ២០០២ ត្រូវបានផ្ទេរទៅរាជាណាចក្រម៉ារ៉ុកវិញ។ Nasir ត្រូវចាប់ខ្លួនក្នុងប្រទេសអាហ្វហ្គានីស្ថានហើយត្រូវបានចោទប្រកាន់ដោយរដ្ឋាភិបាលសហរដ្ឋអាមេរិកថា បានប្រយុទ្ធជាមួយក្រុមតាលីបង់ហើយបានបម្រើការជាអ្នកហ្វឹកហ្វឺនអាវុធសម្រាប់ក្រុមអាល់កៃដា (al-Qaida)។
នៅក្នុងសេចក្តីថ្លែងការណ៍ ក្រសួងការពារប្រទេសអាមេរិកបានបញ្ជាក់ថា កាលពីឆ្នាំ ២០១៦ គណៈកម្មាធិការពិនិត្យសើរើករណីអ្នកទោសតាមពេលកំណត់បានសម្រេចថាការឃុំឃាំង Nasir «លែងជាការចាំបាច់ដើម្បីការពារប្រឆាំងនឹងការគំរាមកំហែងដល់សន្តិសុខសហរដ្ឋអាមេរិកទៀតហើយ»។ នៅក្រោមរដ្ឋបាលអាមេរិកមុនដែលជំទាស់និងការបិទមន្ទីរឃុំឃាំង Guantanamoការផ្ទេរពួកអ្នកជាប់ឃុំសឹងតែទាំងអស់ត្រូវបានផ្អាក។ Abdul Nasir ជាអ្នកជាប់ឃុំដំបូងគេដែលត្រូវធ្វើមាតុភូមិនិវត្តន៍ទៅកាន់ប្រទេសកំណើតវិញចាប់តាំងពីលោកប្រធានាធិបតី Biden ចូលកាន់តំណែងមក។
នៅក្នុងសន្និសីទកាសែត អ្នកស្រី Jen Psaki អ្នកនាំពាក្យសេតវិមានបាននិយាយថា៖«គោលដៅរបស់យើងគឺបិទកន្លែងឃុំឃាំងនៅឆកសមុទ្រ Guantanamo»។ អ្នកស្រីបាននិយាយថា នៅក្រោយការផ្ទេរ Nasir មាន«នៅសល់អ្នកជាប់ឃុំឃាំង៣៩នាក់ទៀត..១០នាក់មានសិទ្ធិត្រូវផ្ទេរ ១៧នាក់មានសិទ្ធិត្រូវពិចារណាដោយគណៈកម្មាធិការពិនិត្យសើរើករណីអ្នកទោសតាមពេលកំណត់ ១០នាក់មានទាក់ទិននឹងដំណើរការគណៈកម្មការយោធាហើយអ្នកជាប់ឃុំ២នាក់ទៀតត្រូវបានកាត់ទោសហើយ»។
លោក Ned Price អ្នកនាំពាក្យក្រសួងការបរទេសអាមេរិកបានសរសើរមុខនាទីរបស់ប្រទេសម៉ារ៉ុកក្នុងការផ្ទេរ Nasir ដោយបាននិយាយថា៖ «ការនាំមុខរបស់ម៉ារ៉ុកក្នុងការសម្រួលមាតុភូមិនិវត្តន៍របស់Nasir ជាមួយបំណងរបស់ប្រទេសនេះកាលពីពេលមុនៗក្នុងការផ្ទេរពួកយុទ្ធជនបរទេសរបស់ខ្លួនពីប៉ែកឦសាន្តនៃប្រទេសស៊ីរីគួរលើកទឹកចិត្តប្រទេសជាតិឯទៀតៗឱ្យធ្វើមាតុភូមិនិវត្តន៍ពលរដ្ឋខ្លួនដែលបានធ្វើដំណើរទៅប្រយុទ្ធឲ្យអង្គការភេរវជននៅក្រៅប្រទេស»។
នៅពេលត្រូវសួរថា នៅពេលណាអ្នកជាប់ឃុំ១០នាក់ដែលមានសិទ្ធិត្រូវផ្ទេរដោយគណៈកម្មាធិការពិនិត្យសើរើករណីអ្នកទោសតាមពេលកំណត់អាចត្រូវយកចេញពីកន្លែងឃុំឃាំងនោះ អ្នកស្រី Jen Psaki អ្នកនាំពាក្យសេតវិមានបាននិយាយថា៖ «ខ្ញុំគ្មានតារាងពេលវេលានៃការដោះលែងប្រាប់អ្នកទេ។ ដូចអ្នកដឹងហើយថា គឺមានដំណើរការមួយ...ហើយយើងពិចារណាអំពិវីធីទាំងអស់ដែលមានដើម្បីផ្ទេរអ្នកជាប់ឃុំដោយមានការទទួលខុសត្រូវហើយដើម្បីបិទមន្ទីរឃុំឃាំង Guantanamo»៕