Accessibility links

Breaking News

ບົດບັນນາທິການ: ຊູດານຍົກເລີກການຂວໍ້າບາດຕໍ່ອິສຣາແອລ


ຊູດານ

ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ

ເມື່ອໄວໆມານີ້ ສະພາອະທິປະໄຕ ແລະກອງປະຊຸມຄະນະລັດຖະມົນຕີຊູດານ ໄດ້ລົງຄະແນນສຽງຍົກເລີກການບອຍຄອດອິສຣາແອລທີ່ມີມາເປັນເວລາ 6 ທົດສະວັດ. ສະພານິຕິບັນຢັດຂອງຊູດານ ໄດ້ຫ້າມບໍ່ໃຫ້ມີການສ້າງຕັ້ງສາຍພົວພັນທາງດ້ານການທູດ ກັບອິສຣາແອລ ແລະຫ້າມບໍ່ໃຫ້ມີຄວາມສຳພັນທາງດ້ານການຄ້າໃດໆກັບປະເທດຢິວດັ່ງກ່າວ. ການລົງໂທດສຳລັບພວກທີ່ທຳການ
ຄ້າຂາຍກັບອິສຣາແອລ ແມ່ນຮວມທັງຖືກຄຸກ 10 ປີ ແລະປັບໃໝຢ່າງໜັກ.

ໂຄສົກກະຊວງການຕ່າງປະເທດ ສະຫະລັດ ທ່ານເນດ ໄພຣສ໌ ກ່າວວ່າ “ສະຫະລັດຂໍສະແດງຄວາມຍິນດີ ຕໍ່ການປະກາດດັ່ງກ່າວ. ມັນເປັນບາດກ້າວທີ່ສຳ ຄັນ ເພື່ອສ້າງໂອກາດໃໝ່ ທີ່ມີທ່າທາງວ່າຈະເປັນໂອກາດອັນດີ ສຳລັບປະຊາ ຊົນຊາວຊູດານ ຊາວອິສຣາແອລ ແລະທົ່ວທັງຂົງເຂດ.”

ການປະກາດດັ່ງກ່າວ ແມ່ນເຮັດໃຫ້ຊູດານແລະອິສຣາແອ ໃກ້ຈະສ້າງຕັ້ງຄວາມສຳພັນແບບເປັນປົກກະຕິລະຫວ່າງກັນແລ້ວ ລຸນຫຼັງການລົງນາມ ຂອງປະເທດທັງສອງໃນສັນຍາອາບຣາຮາມກັບສະຫະລັດ.

ໃນເດືອນສິງຫາປີ 2019 ປະຊາຊົນຊູດານໄດ້ທຳການໂຄ່ນລົ້ມ ຈອມຜະເດັດ ການ ໂອມາ ອາລ-ບາເຊຍ ທີ່ກຳອຳນາດ ມາເປັນເວລາດົນນານ. ເວລານີ້ ຊູດານແມ່ນປົກຄອງໂດຍລັດຖະບານໃນໄລຍະຂ້າມຜ່ານພາຍໃຕ້ການນຳພາຂອງ ພົນລະເຮືອນທີ່ພວມຊອກສະແຫວງຫາການມີສາຍສຳພັນທີ່ດີຂື້ຶ້ນກັບປະເທດຕາ ເວັນຕົກ ແລະການພັດທະນາເສດຖະກິດ. ເສດຖະກິດຂອງຊູດານໄດ້ປະສົບກັບການບໍລິຫານທີ່ຜິດພາດມາເປັນເວລາຫຼາຍໆທົດສະວັດພາຍໃຕ້ການນຳພາຂອງທ່ານບາເຊຍ ຊຶ່ງໄດ້ເຂົ້າກຳອຳນາດປົກຄອງປະເທດມາແຕ່ປີ 1989 ຫຼັງຈາກການເຮັດລັດຖະປະຫານຂອງພວກທະຫານ ທີ່ໄດ້ຮັບການໜຸນຫຼັງ ຈາກກຸ່ມອິສລາມຫົວຮຸນແຮງ. ນອກນັ້ນຊູດານຍັງໄດ້ຖືກລະບຸວ່າ ເປັນປະເທດທີ່ໃຫ້ການສະໜັບສະໜຸນພວກກໍ່ການຮ້າຍໃນຊຸມປີ 1990 ຍ້ອນໃຫ້ບ່ອນຫຼົບລີ້ແກ່ທ້າວໂອຊາມາ ບິນ ລາເດັນ ຫົວໜ້າກຸ່ມກໍ່ການຮ້າຍອາລກາອີດາ ແລະພວກກໍ່ການຮ້າຍທີ່ທາງການຕ້ອງການໂຕຄົນອື່ນໆ.

ການເອົາບາດກ້າວຂອງຄະນະນຳພາໃໝ່ຢູ່ໃນຊູດານ ເພື່ອຍຸຕິການໃຫ້ຄວາມສະໜັບສະໜຸນຂອງປະເທດດັ່ງກ່າວ ຕໍ່ພວກກໍ່ການຮ້າຍລະຫວ່າງປະເທດນັ້ນ ເຮັດໃຫ້ມັນເປັນການງ່າຍຂຶ້ນ ເພື່ອໃຫ້ສະຫະລັດ ຍົກເລີກການລະບຸຊື່ຊູດານເປັນປະ ເທດ ທີ່ໃຫ້ການສະໜັບສະໜຸນພວກກໍ່ການຮ້າຍ ເມື່ອເດືອນທັນວາປີ 2020.

ຍິ່ງໄປກວ່ານັ້ນ ຂໍ້ຕົກລົງເພື່ອສ້າງຕັ້ງຄວາມສຳພັນຢ່າງເປັນປົກກະຕິ ໄດ້ມີການລົງນາມກັນໃນປີກາຍນີ້ ລະຫວ່າງອິສຣາແອລ ແລະສະຫະລັດອາຣັບເອເມເຣັສ. ນອກນັ້ນ ໂມຣອກໂກ ກໍໄດ້ສ້າງຕັ້ງຄວາມສຳພັນທາງດ້ານການທູດ ກັບອິສຣາແອລ.

ໂຄສົກກະຊວງການຕ່າງປະເທດເນດ ໄພຣສ໌ ກ່າວວ່າ “ພວກເຮົາມີຄວາມຍິນດີທີ່ຈະຕ້ອນຮັບຍຸກໃໝ່ ໃນຄວາມສຳພັນ ລະຫວ່າງຊູດານ ກັບອິສຣາແອລ ແລະພວກເຮົາຫວັງວ່າຈະໄດ້ເຫັນໝາກຜົນໃນການສິ້ນສຸດລົງຂອງການບອຍຄອດດັ່ງ
ກ່າວນີ້.”

XS
SM
MD
LG