Accessibility links

Breaking News

ບົດບັນນາທິການ: ການຕັດສິນໃຈຄັ້ງປະຫວັດສາດ ປະນາມການໃຊ້ອາວຸດເຄມີ ຂອງອາຊາດ ໃນຊີເຣຍ


ສຳນັກງານຂອງອົງການ OPCW.

ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ

ໃນການລົງຄະແນນສຽງຄັ້ງປະຫວັດສາດ ສະຫະລັດ ແລະ 45 ປະເທດ-ຊຶ່ງເປັນຜູ້ຮ່ວມສະເໜີຍັດຕິຢູ່ທີ່ກອງປະຊຸມອົງການເກືອດຫ້າມການນຳໃຊ້ອາວຸດເຄມີ ຫຼື OPCW ຂອງປະເທດ ທີ່ເປັນສະມາຊິກ ໄດ້ປະສົບຄວາມສຳເລັດໃນການປະນາມອຳນາດການປົກຄອງບາຊາ ອາລ-ອາຊາດ ຢູ່ໃນປະເທດຊີເຣຍທີ່ຍັງສືບຕໍ່ນຳໃຊ້ ແລະຄອບຄອງ ອາວຸດເຄມີ. ການມີອາວຸດໃນທຳນອງນີ້ ແມ່ນເປັນການລະເມີດຕໍ່ພັນທະຂອງຊີເຣຍ ພາຍໃຕ້ອະນຸສັນຍາວ່າດ້ວຍອາວຸດເຄມີ.

ການຕັດສິນໃຈນີ້ ມີຂຶ້ນໂດຍ 87 ປະເທດ ລົງຄະແນນສຽງເຫັນພ້ອມນຳແລະມີແຕ່ 15 ປະເທດຄັດຄ້ານ. ນອກເໜືອໄປຈາກ ການກ່າວປະນາມ ຕໍ່ການນໍາໃຊ້ອາວຸດເຄມີຂອງຊີເຣຍແລ້ວຍັງໄດ້ມີການຖອດຖອນເປັນການຊົ່ວຄາວສິດທິແລະ ອະພິສິດບາງຢ່າງທີ່ຊີເຣຍມີ ພາຍໃຕ້ອະນຸສັນຍາດັ່ງກ່າວ ແລະ ທີ່ເຫັນໄດ້ຢ່າງຈະແຈ້ງ ກໍແມ່ນສິດທິໃນການລົງຄະແນນສຽງ. ສິດທິນີ້ ຈະຖືກມອບຄືນໃຫ້ກໍຕໍ່ເມື່ອເວລາໃດ ຜູ້ອຳນວຍການໃຫຍ່ຂອງອົງການ OPCW ລາຍງານວ່າ ຊີເຣຍໄດ້ເຮັດຫຼ້ອນມາດຕະການຈຳນວນນຶ່ງ. ໂຄສົກກະຊວງການຕ່າງປະເທດສະຫະລັດ ທ່ານເນດ ໄພຣສ໌ ກ່າວວ່າ ໂຕຢ່າງກໍຄື “ຊີເຣຍຕ້ອງໄດ້ແກ້ໄຂທຸກໆບັນຫາ ທີ່ສຳຄັນໆ ຕໍ່ການປະກາດໃນຂັ້ນຕົ້ນ ກ່ຽວກັບການເກັບສະສົມອາວຸດເຄມີ ແລະໂຄງການຂອງຕົນ.”

ການລົງຄະແນນສຽງມີຂຶ້ນຫຼັງຈາກໄດ້ມີການເປີດເຜີຍກ່ຽວກັບ ການສືບສວນ 2 ຄັ້ງຂອງອົງການ OPCW ແລະລາຍງານຂອງຄະນະເຮັດວຽກໃນຮອບປີທີ່ຜ່ານມາທີ່ໄດ້ລະບຸຢ່າງເປັນທາງການວ່າລັດຖະບານຊີເຣຍມີການເຊື່ອມໂຍງກັບການກັບການໂຈມຕີດ້ວຍອາວຸດເຄມີ ໃນປີ 2017 ແລະ 2018. ລາຍງານເຫຼົ່ານັ້ນສະຫຼຸບວ່າ ຊີເຣຍຍັງສືບຕໍ່ນຳໃຊ້ແກັສພິດ ຫຼາຍປີຫຼັງຈາກອຳນາດການປົກອງອາຊາດ ໄດ້ກ່າວປະນາມຕໍ່ການນຳໃຊ້ຂອງພວກເຂົາເຈົ້າແລະມອບອາວຸດເຄມີທີ່ອຳນາດການປົກຄອງ ເກັບສະສົມໄວ້ ເພື່ອໃຫ້ທຳລາຍ. ສະຫະລັດໄດ້ຊັ່ງຊາ ວ່າ ອຳນາດການປົກຄອງອາຊາດໄດ້ນຳໃຊ້ອາວຸດເຄມີຢ່າງໜ້ອຍ 50 ເທື່ອນັບແຕ່ໄດ້ເຂົ້າເປັນສະມາຊິກຂອງອະນຸສັນຍາ ວ່າດ້ວຍອາວຸດເຄມີ ໃນປີ 2013.

ນີ້ແມ່ນເທື່ອທຳອິິດ ທີ່ໄດ້ມີການເອົາມາດຕະການໃນທຳນອງນີ້ ຕໍ່ປະເທດໃດປະເທດນຶ່ງ ຢູ່ກອງປະຊຸມ ອົງການເກືອດຫ້າມ ການນຳໃຊ້ອາວຸດເຄມີ. ທ່ານເນດ ໄພຣສ໌ ໂຄສົກກະຊວງການຕ່າງປະເທດສະຫະລັດ ກ່າວວ່າ “ສະຫະລັດ ຂໍສະ
ແດງຄວາມຍິນດີ ໃນການຕັດສິນໃຈຂອງອົງການ OPCW ແລະຕົບມືຊົມເຊີຍ ຕໍ່ຄວາມໝັ້ນໝາຍຂອງປະຊາຄົມນາໆຊາດທີ່ຍັງສືບຕໍ່ຍຶດໝັ້ນໃນຫຼັກການສາກົນຕໍ່ຕ້ານການນຳໃຊ້ອາວຸດເຄມີ.”

ທ່ານເນດ ໄພຣສ໌ ກ່າວສະຫຼຸບວ່າ “ການນຳໃຊ້ອາວຸດເຄມີ ໂດຍປະເທດໃດກໍຕາມ ແມ່ນສະແດງໃຫ້ເຫັນເຖິງໄພຂົ່ມຂູ່ ທີ່ຮັບເອົາບໍ່ໄດ້ ຕໍ່ຄວາມໝັ້ນຄົງຂອງທຸກໆປະເທດ.”

XS
SM
MD
LG