Accessibility links

Breaking News

ບົດບັນນາທິການ: ປະຊາທິປະໄຕ ໃນຮົງກົງ ຊຸດໂຊມລົງຕື່ມ


ສະພານິຕິບັນຢັດຮົງກົງ ຮັບຜ່ານບົດແກ້ໄຂລະບົບການເລືອກຕັ້ງ ດ້ວຍຄະແນນສຽ 40 ຕໍ່ 2.

ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ

ສະພານິຕິບັນຢັດຂອງຮົງກົງໄດ້ຮັບຜ່ານຮ່າງກົດໝາຍສະບັບໃໝ່ເພື່ອກວດສອບແລະປັບປຸງລະບົບການເລືອກຕັ້ງຂອງຮົງກົງໂດຍປ່ອຍໃຫ້ປັກກິ່ງເຂົ້າຄວບຄຸມຮົງກົງຫຼາຍຂຶ້ນ.

ຈຳນວນບ່ອນນັ່ງຢູ່ໃນສະພານິຕິບັນຢັດຂອງຮົງກົງ ຈະຂະຫຍາຍເປັນ 90 ຄົນໂດຍທີ່ 40 ຄົນຂອງຈຳນວນດັ່ງກ່າວ ສ່ວນໃຫຍ່ແລ້ວແມ່ນຖືກເລືອກໂດຍຄະນະກຳມະການທີ່ນິຍົມປັກກິ່ງ. ຈຳນວນສະມາຊິກສະພານິຕິບັນຢັດທີ່ຖືກເລືອກໂດຍກົງຈາກຜູ້ມີສິດປ່ອນບັດຊາວຮົງກົງ ຈະຖືກຕັດລົງ ໃຫ້ເຫຼືອພຽງ 20 ຄົນຈາກຈຳນວນ 35 ຄົນໃນເມື່ອກ່ອນ. ຍິ່ງໄປກວ່ານັ້ນ ເຈົ້າໜ້າທີ່ດ້ານຄວາມໝັ້ນຄົງແຫ່ງຊາດຂອງຮົງກົງ ຈະກວດປະຫວັດຜູ້ສະໝັກທາງການເມືອງເພື່ອຄ້ຳປະກັນວ່າ ພວກເຂົາເຈົ້າ “ມີຄວາມຮັກຊາດ” ພຽງພໍ ໝາຍຄວາມວ່າ ນິຍົມປັກກິ່ງພຽງພໍ.

ອັນທີ່ເອີ້ນວ່າ “ການປະຕິຮູບ” ໃໝ່ດັ່ງກ່າວນີ້ ໄດ້ຖືກຮັບຮອງເອົາດ້ວຍຄະແນນສຽງຢ່າງຖ້ວມລົ້ນ ໂດຍສະພານິຕິບັນຢັດ ທີ່ເກືອບຈະເວົ້າໄດ້ວ່າ ບໍ່ມີສະມາຊິກພັກຝ່າຍຄ້ານເລີຍ ນັບຕັ້ງແຕ່ສະມາຊິກສະພາສ່ວນໃຫຍ່ໄດ້ພາກັນລາອອກເພື່ອປະທ້ວງໃນປີກາຍນີ້ ເວລາສະມາຊິກສະພາ 4 ທ່ານຖືກຂັບໄລ່ອອກຈາກໜ້າທີ່ຍ້ອນນິຍົມປັກກິ່ງບໍ່ພຽງພໍ.

ຮ່າງກົດໝາຍສະບັບໃໝ່ນີ້ ແມ່ນນຶ່ງໃນມາດຕະການທີ່ມີມາເປັນລຳດັບ ທີ່ໄດ້ຖືກນຳໃຊ້ໃນຮອບຫຼາຍໆປີທີ່ຜ່ານມາ ເພື່ອຕັດຮອນການຄ້ຳປະກັນຕໍ່ອິດສະຫຼຼະພາບຂອງປະຊາຊົນຊາວຮົງກົງ ພາຍໃຕ້ກົດໝາຍພື້ນຖານ ແລະຄຳປະກາດຮ່ວມລະ
ຫວ່າງຈີນກັບອັງກິດ ຊຶ່ງໃຫ້ການເທີດທູນຕໍ່ຫຼັກການ “ນຶ່ງປະເທດສອງລະບົບ.” ນັບແຕ່ປີ 2019 ເປັນຕົ້ນມາພວກນັກເຄື່ອນໄຫວເພື່ອປະຊາທິປະໄຕແລະພວກ ປະທ້ວງຫຼາຍພັນຄົນໄດ້ຖືກຈັບກຸມ ໃນຂໍ້ຫາເຮັດໃຫ້ຄວາມໝັ້ນຄົງແຫ່ງຊາດຕົກຢູ່ໃນອັນຕະລາຍ.

ຢູ່ໃນຖະແຫຼງການສະບັບນຶ່ງ ລັດຖະມົນຕີການຕ່າງປະເທດ ສະຫະລັດ ທ່ານແອນໂທນີ ບລິງເກັນ ຕ້ອງຕິຕໍ່ການທີ່ລັດຖະບານຈີນ ຍັງສືບຕໍ່ເຮັດໃຫ້ສະຖາບັນປະຊາທິປະໄຕຕ່າງໆຂອງຮົງກົງຊຸດໂຊມລົງ “ໂດຍປະຕິເສດບໍ່ໃຫ້ປະຊາຊົນຊາວຮົງກົງ ມີສິດທິທີ່ສາທາລະນະລັດປະຊາຊົນຈີນເອງ ໄດ້ໃຫ້ການຄ້ຳປະກັນ. ສະພານິຕິບັນຢັດຂອງຮົງກົງ ໄດ້ຮັບຜ່ານຮ່າງກົດໝາຍໃໝ່ເມື່ອວັນທີ 27 ພຶດສະພາຜ່ານມາ ທີ່ໄດ້ປ່ຽນແປງສ່ວນປະກອບຂອງສະພານິຕິບັນຢັດຮົງກົງ ແລະຄະນະກຳມາທິການເລືອກຕັ້ງ” ຊຶ່ງທ່ານເວົ້າວ່າ “ຈຳກັດຮັດແຄບຢ່າງເຄັ່ງຄັດບໍ່ ໃຫ້ປະຊາຊົນຊາວຮົງກົງ ສາມາດປະກອບສ່ວນເຂົ້າຮ່ວມຢ່າງມີຄວາມໝາຍໃນການປົກຄອງ ແລະຮັບຟັງຄວາມຄິດຄວາມເຫັນຂອງພວກເຂົາເຈົ້າ.”

ລັດຖະມົນຕີການຕ່າງປະເທດບລິງເກັນ ໃຫ້ຂໍ້ສັງເກດວ່າ ຮ່າງກົດໝາຍໃໝ່ສະ ບັບນີ້ “ທ້າທາຍຕໍ່ການຮັບຮູ້ກົດໝາຍພື້ນຖານ ຊຶ່ງຈຸດປະສົງໃນທີ່ສຸດນັ້ນ ແມ່ນການເລືອກເອົາ ສະມາຊິກສະພານິຕິບັນຢັດທັງໝົດ ດ້ວຍສິດທິ ໃນການລົງຄະ ແນນສຽງເລືອກຕັ້ງແບບສາກົນ.”

ລັດຖະມົນຕີການຕ່າງປະເທດບລິງເກັນປະກາດວ່າ “ພວກເຮົາຂໍຮຽກຮ້ອງອີກຄັ້ງນຶ່ງ ຕໍ່ ສປ ຈີນ ແລະເຈົ້າໜ້າທີ່ຂອງຮົງກົງຈົ່ງໄດ້ຮັບຟັງຄຳຮຽກຮ້ອງຂອງປະຊາຊົນຊາວຮົງກົງທຸກຖ້ວນໜ້າ. ນອກນັ້ນ ພວກເຮົາຍັງຂໍຮຽກຮ້ອງໃຫ້ເຈົ້າໜ້າທີ່ເຫຼົ່ານີ້ ປ່ອຍໂຕແລະຍົກເລີກຂໍ້ຫາຕໍ່ທຸກສ່ວນບຸກຄົນທີ່ຖືກຟ້ອງພາຍໃຕ້ກົດໝາຍຄວາມໝັ້ນຄົງແຫ່ງຊາດສະບັບໃໝ່ ແລະກົດໝາຍສະບັບອື່ນໆ ພຽງແຕ່ໃຫ້ການສະໜັບສະໜຸນຕໍ່ການເລືອກຕັ້ງ ຫຼືສະແດງຄວາມເຫັນທີ່ບໍ່ເຫັນພ້ອມນຳເທົ່ານັ້ນ. ສະຫະລັດແມ່ນມີຄວາມເປັນເອກກະພາບ ກັບບັນດາພັນທະມິດ ແລະພາຄີຂອງພວກເຮົາ ໃນການໃຊ້ສິດໃຊ້ສຽງເພື່ອປົກປ້ອງສິດທິມະນຸດ ແລະອິດສະຫຼະພາບຂັ້ນພື້ນຖານ ທີ່ໃຫ້ການຄ້ຳປະກັນແກ່ປະຊາຊົນໃນຮົງກົງ ໂດຍຄຳປະກາດຮ່ວມລະຫວ່າງຈີນກັບອັງກິດ ແລະໃນກົດໝາຍຂັ້ນພື້ນຖານນັ້ນ.”

XS
SM
MD
LG