Accessibility links

Breaking News

ບົດບັນນາທິການ: ການໂຈມຕີເຈາະຂໍ້ມູນ ທີ່ມີຈຸດປະສົງຮ້າຍຂອງຈີນ ຕ້ອງປະເຊີນກັບຜົນລັບທີ່ຕາມມາ


ການໂຈມຕີທາງໄຊເບີ້ໂດຍແຣນຊຳແວຂອງຈີນ.

ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ

ສະຫະລັດ ແລະປະເທດອື່ນໆໃນທົ່ວໂລກ ກ່າວຫາສາທາລະນະປະຊາຊົນ
ຈີນ ຫຼື ສປ ຈີນວ່າ ເຂົ້າຮ່ວມໃນກິດຈະກຳ ທີ່ມີເຈດຕະນາຮ້າຍທາງດ້ານໄຊເບີ້ ຮວມທັງການໂຈມຕີຮຽກຄ່າໄຖ່ດ້ວຍແຣນຊຳແວ ຕະຫຼອດທັງລັກຂະໂມຍຊັບສິນທາງດ້ານສະຕິປັນຍາ ແລະຂໍ້ມູນຕ່າງໆທີ່ຈະເປັນຜົນປະໂຫຍດ ແກ່ບໍລິສັດຂອງຈີນເອງ.

ສະຫະລັດແມ່ນມີຄວາມເປັນຫ່ວງຢ່າງເລິກເຊິ່ງ ຢ້ານວ່າ ສປ ຈີນ ແມ່ນເປັນຜູ້ໃຫ້ການອູ້ມຊູວິສາຫະກິດສືບລັບ ທີ່ຮວມທັງຈ້າງພວກເຈາະຂໍ້ມູນຫຼືແຮັກເກີ້ເພື່ອທຳການປະຕິບັດງານດ້ານໄຊເບີ້ໃນທົ່ວໂລກແບບທີ່ບໍ່ໄດ້ຮັບການອະນຸຍາດຮວມທັງເພື່ອຜົນປະໂຫຍດຂອງພວກເຂົາເອງ. ແນວທາງຂອງການປະພຶດ ແບບຂາດຄວາມຮັບຜິດຊອບໃນດ້ານໄຊເບີ້ຂອງ ສປ ຈີນ ແມ່ນບໍ່ສອດຄ່ອງ ກັບຈຸດປະສົງທີ່ຈີນໄດ້ກ່າວໄວ້ ໃນການທີ່ຖືກມອງເບິ່ງວ່າ ເປັນຜູ້ນຳ ທີ່ມີຄວາມຮັບຜິດຊອບ ຂອງໂລກ.

ຕົວຢ່າງນຶ່ງໃນການລັກຂະໂມຍຊັບສິນທາງດ້ານສະຕິປັນຍາແລະຂໍ້ມູນ ກໍຄືຄະນະຕຸລາການຂອງລັດຖະບານກາງ ໃນນະຄອນແຊນດີເອໂກລັດຄາລີຟໍເນຍໄດ້ຕັດສິນໂທດພົນລະເມືອງ ສປ ຈີນ 4 ຄົນແລະຜູ້ທີ່ອາໄສຢູ່ໃນປະເທດດັ່ງກ່າວຢ່າງຖືກຕ້ອງຕາມກົດໝາຍ ໃນເດືອນພຶດສະພາຜ່ານມາ ໂດຍກ່າວຫາພວກເຂົາເຈົ້າວ່າ ທຳການປຸກລະດົມເຈາະຂໍ້ມູນລະບົບຄອມພິວເຕີ້ຂອງຫຼາຍໆບໍລິສັດ ມະຫາວິທະຍາໄລ ແລະອົງການຕ່າງໆຂອງລັດຖະບານ ຢູ່ໃນສະຫະລັດ ແລະ ໃນຕ່າງປະເທດ ລະຫວ່າງປີ 2011 ຫາ 2018.

ການຕັດສິນໂທດ ຊຶ່ງໄດ້ຖືກເປີດເຜີຍໂດຍກະຊວງຍຸຕິທຳສະຫະລັດ ເມື່ອວັນທີ 16 ກໍລະກົດຜ່ານມານີ້ແຈ້ງວ່າ ພວກໂຈມຕີສ່ວນໃຫຍ່ແລ້ວແມ່ນໄດ້ແນໃສ່ເພື່ອເກັບກຳເອົາຂໍ້ມູນທີ່ຈະໃຫ້ຜົນປະໂຫຍດແກ່ບັນດາບໍລິສັດແລະພາກສ່ວນການຄ້າຂອງຈີນ. ຈຸດນຶ່ງທີ່ໜ້າສົນໃຈຂອງແຜນການຊົ່ວຮ້າຍດັ່ງກ່າວ ກໍແມ່ນຂໍ້ມູນທີ່ຈະສາມາດຫຼົບຫຼີກ ຂັ້ນຕອນການຄົ້ນຄວ້າແລະການພັດທະນາ ທີ່ໃຊ້ເວລາຍືດຍາວແລະທຶນຮອນຢ່າງຫຼວງຫຼາຍ.

ທ້າວດິງ ສ່ຽວຢັງ, ເຈັງ ຈິງໝິງ ແລະ ສູ ຢຸນໝິງ ເປັນເຈົ້າໜ້າທີ່ຮັກສາຄວາມປອດໄພຂອງແຂວງໄຮນັງ ຊຶ່ງເປັນພະແນກນຶ່ງຂອງກະຊວງຮັກສາຄວາມປອດໄພແຫ່ງລັດຂອງຈີນ ຊຶ່ງເປັນຜູ້ປະສານງານ ອຳນວຍຄວາມສະດວກ ແລະຄຸ້ມຄອງພວກເຈາະຂໍ້ມູນແລະພວກນັກພາສາທີ່ MSS ຊຶ່ງເປັນບໍລິສັດບັງໜ້າເພື່ອລັກເຈາະຂໍ້ມູນ ທີ່ເປັນຜົນປະໂຫຍດສຳລັບຈີນ ແລະບໍລິສັດລັດວິສາຫະກິດແລະໜ່ວຍງານຕ່າງໆ ທີ່ລັດເປັນຜູ້ສະໜັບສະໜຸນ. ສ່ວນທ້າວຫວູ ຊູຣອງ ແມ່ນນັກເຈາະຂໍ້ມູນ ແລະຜູ້ສ້າງມັນແວຫຼືໂປຣແກຣມທຳລາຍຄອມພິວເຕີ້ແລະເຈາະຂໍ້ມູນລະບົບຄອມພິວເຕີ້ຂອງລັດຖະບານປະເທດຕ່າງໆ ບໍລິສັດ ແລະມະຫາວິທະຍາ ໄລ ແລະກໍເປັນຫົວໜ້າກຸ່ມເຈາະຂໍ້ມູນໄຮນັງ ຊຽນດຸນ.

ການປຸກລະດົມໂຈມຕີເຈາະຂໍ້ມູນດັ່ງກ່າວແມ່ນແນເປົ້າໝາຍໃສ່ພວກເຄາະຮ້າຍຢູ່ໃນສະຫະລັດ ອອສເຕຣຍ ກຳປູເຈຍ ການາດາ ເຢຍຣະມັນ ອິນໂດເນເຊຍ ມາເລເຊຍ ນໍເວ ຊາອຸດີອາຣາເບຍ ອາຟຣິກາໃຕ້ ສວິດເຊີແລນ ແລະສະຫະຣາຊະອານາຈັກ.

ການໂຈມຕີທາງໄຊເບີ້ ທີ່ມີຈຸດປະສົງຮ້າຍເຫຼົ່ານີ້ ມີຂຶ້ນທັງໆທີ່ໄດ້ມີຂໍ້ຕົກລົງໃນປີ 2015 ລະຫວ່າງສະຫະລັດແລະ ສປ ຈີນ ເພື່ອຫຼຸດຜ່ອນການລັກຂະໂມຍໂດຍຜ່ານທາງໄຊເບີ້.

ຮອງລັດຖະມົນຕີກະຊວງຍຸຕິທຳສະຫະລັດ ທ່ານນາງລີຊາ ໂອ ໂມນາໂຄ ກ່າວວ່າ “ຂໍ້ກ່າວຫາໃນການກໍ່ອາຊະຍາກຳເຫຼົ່ານີ້ອີກເທື່ອນຶ່ງ ໄດ້ເນັ້ນຢ້ຳໃຫ້ເຫັນວ່າ ຈີນຍັງສືບຕໍ່ໃຊ້ການໂຈມຕີທາງໄຊເບີ້ ເພື່ອລັກຂະໂມຍໃນສິ່ງທີ່ປະເທດອື່ນໆຜະ
ລິດ ໂດຍການບໍ່ໃຫ້ຄວາມເຄົາລົບຢ່າງເປີດແຜນ ໃນຄວາມໝັ້ນໝາຍຂອງຕົນຕໍ່ຂໍ້ຕົກລົງສອງຝ່າຍ ແລະຫຼາຍຝ່າຍ.”

ລັດຖະມົນຕີການຕ່າງປະເທດຂອງສະຫະລັດ ທ່ານແອນໂທນີ ບລິງເກັນ ກ່າວວ່າ “ດັ່ງທີ່ເຫັນເປັນຫຼັກຖານໃນການຕັດສິນໂທດຕໍ່ເຈົ້າໜ້າທີ່ 3 ຄົນຂອງ MSS ແລະນັກເຈາະຂໍ້ມູນຜູ້ນຶ່ງ ທີ່ເປັນພະນັກງານສັນຍາຈ້າງ ຂອງພວກເຂົານັ້ນ ສະ ຫະລັດຈະທຳການລົງໂທດເພື່ອສັ່ງສອນພວກເຈາະຂໍ້ມູນທີ່ມີິຈຸດປະສົງຮ້າຍຂອງ ສປ ຈີນ ຍ້ອນການປະພຶດແບບຂາດຄວາມຮັບຜິດຊອບຢູ່ໃນໄຊເບີ້.”

XS
SM
MD
LG