ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ເຂດອິນໂດປາຊີຟິກ ແມ່ນຢູ່ໃນທ່າທີພ້ອມແລ້ວທີ່ຈະຟື້ນໂຕຄືນ ຫຼັງຈາກທີ່ໄດ້ເກີດໂຣກລະບາດ ແລະດຳເນີິນການໄປໜ້າ ເພື່ອກ້າວໄປສູ່ອະນາຄົດທີ່ແຈ່ມໃສກວ່າເກົ່າ ໃນການປົກຄອງ ທີ່ມີກົດໝາຍລະຫວ່າງປະເທດ ເປັນຫຼັກພື້ນຖານ
ນັ້ນຄືການປະກາດ ຂອງລັດຖະມົນຕີ ກະຊວງປ້ອງກັນປະເທດສະຫະລັດ ທ່ານລອຍ ອອສຕິນ ໃນຄຳປາໄສທີ່ກ່າວຢູ່ສິງກະໂປ.
“ຂ້າພະເຈົ້າມີຄວາມເຊື່ອໝັ້ນວ່າ ໂດຍຜ່ານການດຳເນີນຄວາມພະຍາຍາມຮ່ວມກັນຂອງພວກເຮົາ ເຂດອິນໂດປາຊີຟິກ ອີກຄັ້ງນຶ່ງ ຈະລຸກຂຶ້ນຮັບມືກັບການທ້າທາຍ” ນັ້ນຄືຄໍາເວົ້າຂອງທ່ານລັດຖະມົນຕີກະຊວງປ້ອງກັນປະເທດລອຍ ອອສຕິນ. ທ່ານກ່າວວ່າ ຄຳຕອບແມ່ນພົວພັນກັບອົງປະກອບ 3 ຢ່າງຊຶ່ ງທັງໝົດຕ່າງກໍມີຮາກເຫງົ້າໃນຄວາມເປັນພາຄີກັນ.
ທຳອິດ ພາລະກິດທີ່ຮີບດ່ວນທີ່ສຸດ ກໍຄືການຟື້ນໂຕຄືນ. ທ່ານກ່າວວ່າ “ພວກເຮົາຕ້ອງໄດ້ເພີ້ມການຕໍ່ສູ້ຂອງພວກເຮົາຕ້ານໂຄວິດຂຶ້ນເປັນສອງເທົ່າ ແລະຍົກສູງຄວາມປອດໄພ ສຸຂະອະນາໄມ ແລະຄວາມອຸດົມຮັ່ງມີ ໃນອະນາຄົດ.”
ສອງມາ ພວກເຮົາຕ້ອງໄດ້ເບິ່ງໄປຂ້າງໜ້າ ແລະລົງທຶນໃນການສະກັດກັ້ນໃນຖານະທີ່ເປັນເສົາຫຼັກດ້ານຄວາມໝັ້ນຄົງຂອງອາເມຣິກັນ. ນັບເປັນເວລາຫຼາຍທົດສະວັດມາແລ້ວ “ພວກເຮົາຍັງຮັກສາຄວາມສາມາດ ການມີໜ້າແລະຄວາມສຳພັນທີ່ຈຳເປັນເພື່ອປ້ອງກັນບໍ່ໃຫ້ເກີດບັນຫາຂັດແຍ້ງ ແລະປົກປັກຮັກສາໃຫ້ມີສະຖຽນລະພາບ” ນັ້ນຄືຄຳເວົ້າຂອງລັດຖະມົນຕີກະຊວງປ້ອງກັນປະເທດ ທ່ານລອຍ ອອສຕິນ.
ໄພຂົ່ມຂູ່ທີ່ພວມປາກົດໂຕຂຶ້ນແລະເທັກໂນໂລຈີທີ່ລ້ຳໜ້າທັນສະໄໝ ກຳລັງປ່ຽນແປງໂສມໜ້າແລະຈັງຫວະໃນການເຮັດສົງຄາມ. ລັດຖະມົນຕີກະຊວງປ້ອງກັນປະເທດລອຍ ອອສຕິນກ່າວວ່າ “ດັ່ງນັ້ນ ພວກເຮົາກຳລັງປະຕິບັດງານພາຍໃຕ້ວິໄສທັດແບບໃໝ່ ຂອງສັດຕະວັດທີ 21 ທີ່ຂ້າພະເຈົ້າເອີ້ນວ່າ ‘ການສະກັດກັ້ນຮ່ວມກັນ.’” ນັ້ນແມ່ນໝາຍຄວາມວ່າ ນຳໃຊ້ຄວາມສາມາດທີ່ມີຢູ່ແລ້ວ ສ້າງສາອັນໃໝ່ຕື່ມ ແລະຕິດຕັ້ງໃນວິທີທາງທີ່ເປັນຕາໜ່າງແບບໃໝ່.
ສາມມາ ສະຫະລັດ ແມ່ນພ້ອມໆກັນ “ເຮັດວຽກຮ່ວມກັບໄຕ້ຫວັນ ເພື່ອເສີມຂະຫຍາຍຄວາມສາມາດຂອງຕົນ ແລະເພີ້ມຄວາມພ້ອມ ສຳລັບສະກັດກັ້ນໄພຂົ່ມຂູ່ແລະການບີບບັງຄັບ ປະຕິບັດຕາມຄວາມໝັ້ນໝາຍຂອງເຮົາ ພາຍໃຕ້ກົດໝາຍຄວາມສຳພັນກັບໄຕ້ຫວັນແລະສອດຄ່ອງກັບນະໂຍບາຍຈີນດຽວຂອງພວກເຮົາ.” ນັ້ນຄືຄຳເວົ້າຂອງທ່ານລັດຖະມົນຕີປ້ອງກັນປະເທດລອຍ ອອສຕິນ.
ການໃຫ້ຄວາມສະໜັບສະໜຸນຂອງພວກເຮົາ ຕໍ່ການເປັນພາຄີກັບໄຕ້ຫວັນແມ່ນກົງກັນຂ້າມຢ່າງຈະແຈ້ງກັບການເອົາບາດກ້າວຂອງປັກກິ່ງທີ່ຍັງສືບຕໍ່ເຮັດໃຫ້ຂົງເຂດດັ່ງກ່າວບໍ່ມີສະຖຽນລະພາບ. ລັດຖະມົນຕີກະຊວງປ້ອງກັນປະເທດລອຍ ອອສຕິນ ກ່າວວ່າ “ການອ້າງເອົາກຳມະສິດ ຕໍ່ຂົງເຂດສ່ວນໃຫຍ່ ຂອງທະເລຈີນໃຕ້ໂດຍປັກກິ່ງນັ້ນ ບໍ່ມີພື້ນຖານທາງດ້ານກົດໝາຍລະຫວ່າງປະເທດໃດໆເລີຍ.”
“ແຕ່ບໍ່ເປັນຈັ່ງບຸນ ຄວາມບໍ່ເຕັມໃຈຂອງປັກກິ່ງທີ່ຈະແກ້ໄຂບັນຫາຂັດແຍ້ງແບບສັນຕິແລະໃຫ້ການເຄົາລົບຕໍ່ການປົກຄອງດ້ວຍຕົວບົດກົດໝາຍບໍ່ແມ່ນເກີດຂຶ້ນພຽງແຕ່ໃນເຂດນ່ານນ້ຳເທົ່ານັ້ນ” ລັດຖະມົນຕີກະຊວງປ້ອງກັນປະເທດ ລອຍ ອອສຕິນ ເຕືອນວ່າ:
“ພວກເຮົາຍັງໄດ້ເຫັນການຮຸກຮານຕໍ່ປະເທດອິນເດຍ ການເຄື່ອນໄຫວທາງທະຫານເພື່ອສ້າງຄວາມບໍ່ທຸ່ນທ່ຽງແລະການບີບບັງຄັບໃນຮູບແບບອື່ນໆຕໍ່ໄຕ້ຫວັນແລະການຂ້າລ້າງເຊື້ອຊາດເຜົ່າພັນ ແລະການກໍ່ອາຊະຍາກຳຕ້ານມະນຸດຊາດຕໍ່ຊາວມຸສລິມວີເກີ້ໃນເຂດຊິນຈຽງນຳດ້ວຍ.”
ທ່ານລັດຖະມົນຕີກະຊວງປ້ອງກັນປະເທດລອຍ ອອສຕິນ ກ່າວວ່າ “ພວກເຮົາຈະບໍ່ຖອຍ ເວລາຜົນປະໂຫຍດຂອງພວກເຮົາຖືກຂົ່ມຂູ່. ແຕ່ໃນຂະນະດຽວກັນພວກເຮົາບໍ່ຢາກໃຫ້ມີການປະເຊີນໜ້າກັນ.”
ເປົ້າໝາຍຂັ້ນສຸດທ້າຍແມ່ນເພື່ອສ້າງໃຫ້ຂົງເຂດອິນໂດປາຊີຟິກ ເປັນເຂດທີ່ເສລີແລະເປີດກວ້າງ ທີ່ເສີມຂະຫຍາຍການເປັນພາຄີ ຄວາມອຸດົມຮັ່ງມີ ແລະຄວາມກ້າວໜ້າ.
ລັດຖະມົນຕີກະຊວງປ້ອງກັນປະເທດລອຍ ອອສຕິນກ່າວວ່າ “ພວກເຮົາມີຄວາມເຊື່ອໝັ້ນວ່າ ຮ່ວມກັນແລ້ວ ພວກເຮົາສາມາດເສີມສ້າງອະນາຄົດທີ່ດີຂຶ້ນ ສົດໃສກວ່າເກົ່າ ສຳລັບເດັກນ້ອຍຂອງພວກເຮົາທຸກໆຄົນ.”