ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ອົງການບັນດາປະເທດໃນທະວີບອາເມຣິກາທີ່ເອີ້ນຫຍໍ້ວ່າ OAS ໄດ້ຮັບຜ່ານມະຕິສະບັບນຶ່ງ ດ້ວຍຄະແນນສຽງອັນຖ້ວມລົ້ນເພື່ອ “ສະແດງຄວາມເປັນຫ່ວງ ກ່ຽວກັບສະຖານະການທາງດ້ານການເມືອງແລະສິດທິມະນຸດ ທີ່ພວມຊຸດໂຊມລົງ ຢູ່ໃນປະເທດນິກາຣາກົວ ແລະການດຳເນີນຄວາມພະຍາຍາມຂອງລັດຖະບານນິກາຣາກົວ ທີ່ຈະບ່ອນທຳລາຍຂັ້ນຕອນໃນການເລືອກຕັ້ງ.”
ໃນວັນທີ 20 ຕຸລາຜ່ານມານີ້ ອົງການ OAS ໄດ້ຮຽກຮ້ອງໃຫ້ປ່ອຍບັນດາຜູ້ສະໝັກເປັນປະທານາທິບໍດີແລະພວກນັກໂທດການເມືອງໃນທັນທີ ຮຽກຮ້ອງໃຫ້ລັດຖະບານນິກາຣາກົວ ຈັດຕັ້ງປະຕິບັດການປະຕິຮູບ ທີ່ອະນຸຍາດໃຫ້ມີການເລືອກຕັ້ງທີ່ເສລີແລະຍຸຕິທຳ ແລະໃຫ້ຄຳໝັ້ນສັນຍາ “ວ່າມີຄວາມຈຳເປັນ” ທີ່ຈະຕ້ອງມີການເອົາບາດກ້າວເພີ້ມຕື່ມເພື່ອໃຫ້ເປັນການສອດຄ່ອງກັບກົດບັດຂອງອົງການ OAS ແລະກົດບັດປະຊາທິປະໄຕຂອງບັນດາປະເທດໃນທະວີບອາເມຣິກາຮວມທັງການຊັ່ງຊາການເລືອກຕັ້ງໃນວັນທີ 7 ພະຈິກ ຢູ່ໃນປະເທດນິກາຣາກົວ ໃນກອງປະຊຸມສະໄໝສາມັນຄັ້ງທີ 51 ຂອງສະມັດຊາໃຫຍ່ອົງການ OAS.
ມະຕິຂອງອົງການ OAS ມີຂຶ້ນຫຼັງຈາກໄດ້ມີການລ່ວງລະເມີດສິດທິມະນຸດໂດຍອຳນາດການປົກຄອງຂອງປະທານາທິບໍດີແດນຽລ ອໍເຕກ້າແລະພັນລະຍາຂອງລາວ ຮອງປະທານາທິບໍດີໂຣຊາຣີໂອ ມູຣິໂຍມາເປັນເວລາຫຼາຍໆປີ. ພວກເຂົາໄດ້ປຸກລະດົມໃຫ້ມີການກົດຂີ່ຕໍ່ກຸ່ມສັງຄົມພົນລະເຮືອນ ພວກນັກຂ່າວ ແລະນັກການເມືອງຝ່າຍຄ້ານ. ຊາວນິກາຣາກົວຫຼາຍຮ້ອຍຄົນໄດ້ຖືກຈັບກຸມຄຸມຂັງຍ້ອນເຫດຜົນທາງດ້ານການເມືອງ ຊຶ່ງເຮັດໃຫ້ຫລາຍກວ່າ 100 ພັນຄົນຕ້ອງໄດ້ຫຼົບໜີອອກຈາກປະເທດ. ໃນເດືອນສິງຫາຜ່ານມາອຳນາດການປົກຄອງນິກາຣາກົວ ໄດ້ສ້າງຄວາມເສຍຫາຍຮ້າຍແຮງ ໃຫ້ແກ່ຄວາມຫວັງໃນການເລືອກຕັ້ງແບບປະຊາທິປະໄຕທີ່ຍັງຫຼົງເຫຼືອຢູ່ ໂດຍປະກາດວ່າພັກຝ່າຍຄ້ານທີ່ສຳຄັນສຸດຂອງປະເທດ ບໍ່ມີສິດລົງສະໝັກແຂ່ງຂັນໃນການເລືອກຕັ້ງເມື່ອວັນທີ 7 ພະຈິກຜ່ານມາ.
ລັດຖະມົນຕີການຕ່າງປະເທດສະຫະລັດ ທ່ານແອນໂທນີ ບລິງເກັນ ໄດ້ຕົບມືຊົມເຊີຍມະຕິຂອງອົງການ OAS ໂດຍໃຫ້ຂໍ້ສັງເກດວ່າມັນໄດ້ເນັ້ນຢ້ຳເຖິງການປະນາມຂອງບັນດາປະເທດສະມາຊິກ ຕໍ່ “ຂັ້ນຕອນການເລືອກຕັ້ງທີ່ບໍ່ເປັນປະຊາທິປະໄຕ ແລະການກົດຂີ່ ທີ່ຍັງດຳເນີນຢູ່ຕໍ່ມາ ຂອງປະທານາທິບໍດີອໍເຕກ້າ ແລະຮອງປະທານາທິບໍດີມູຣິໂຍ.”
ທ່ານແບຣັດລີ ຟຣິເດັນ ຮັກສາການຜູ້ຕາງໜ້າຖາວອນຂອງສະຫະລັດປະຈຳອົງການ OAS ກ່າວວ່າ ມະຕິສະບັບນີ້ ໄດ້ສົ່ງ “ຄຳເຕືອນອັນຈະແຈ້ງ ໄປຍັງປະທານາທິບໍດີອໍເຕກ້າ ແລະຮອງປະທານາທິບໍດີມູຣິໂຍ ໃຫ້ຮູ້ວ່າ ການກະທຳຂອງພວກເຂົາເຈົ້າຈະເປັນທີ່ຮັບເອົາບໍ່ໄດ້ໂດຍບັນດາປະເທດໃນທະວີບອາເມຣິກາ.”
ທ່ານຊີຈີໂອ ຣາມີເຣສ (Sergio Ramirez) ນັກຂຽນນິຍາຍທີ່ໄດ້ຮັບການຍ້ອງຍໍສັນລະເສີນ ຊຶ່ງໃນເວລານີ້ ລີ້ໄພຢູ່ທີ່ປະເທດສະເປນ ແມ່ນນຶ່ງ ໃນບັນດາຜູ້ນຳປະຕິວັດຂອງກຸ່ມຊາງດີນິສຕາ ຜູ້ຊຶ່ງພ້ອມດ້ວຍທ່ານແດນຽລ ອໍເຕກ້າ ໄດ້ຊ່ວຍໂຄ່ນລົ້ມຈອມຜະເດັດການ ອານາສຕາຊີໂອ ໂຊໂມຊາ ໃນປີ 1979. ໃນການໃຫ້ສຳພາດເມື່ອໄວໆມານີ້ ກັບໜັງສືພິມ ຮາວານາໄທມ໌ ທ່ານຣາມີເຣສກ່າວວ່າ “(ອໍເຕກ້າ) ຈະຖືກຈາລຶກຊື່ ລົງໃນປະຫວັດສາດ ໃນຖານະຜູ້ນຳຂອງການປະຕິວັດ ແຕ່ລາວຈະຖືກຕັດສິນວ່າ ເປັນຜູ້ກົດຂີ່….ສີສັນຂອງອຸດົມການ ແມ່ນບໍ່ສຳຄັນ… ໂດຍປາສະຈາກຄວາມສົງໄສໃດໆ ລາວເປັນຈອມຜະເດັດການ.”
ດັ່ງທີ່ ຮັກສາການຜູ້ຕາງໜ້າຖາວອນຂອງສະຫະລັດປະຈຳອົງການ OAS ໄດ້ກ່າວໄວ້ກໍແມ່ນວ່າ “ແດນຽລ ອໍເຕກ້າ ແລະໂຣາຊາຣີໂອ ມູຣິໂຍ ບໍ່ໄດ້ຮັບອະນຸຍາດຈາກປະຊາຊົນຊາວນິກາຣາກົວ ໃຫ້ຫັນປ່ຽນປະເທດນິກາຣາກົວ ເປັນປະເທດຜະເດັດການ ທີ່ປົກຄອງໂດຍພັກການເມືອງພັກດຽວ ແລະບໍລິຫານງານໂດຍຄອບຄົວ.” ທ່ານປະກາດວ່າ ສະຫະລັດ “ຈະສືບຕໍ່ນຳໃຊ້ທຸກເຄື່ອງມືທີ່ມີຢູ່ທາງດ້ານການທູດແລະເສດຖະກິດຂອງພວກເຮົາເພື່ອເຮັດໃຫ້ພວກທີ່ບ່ອນທຳລາຍຕໍ່ຄວາມສາມາດຂອງປະຊາຊົນນິກາຣາກົວໃນການເລືອກເອົາອະນາຄົດຂອງພວກເຂົາເຈົ້າໄດ້ຢ່າງເສລີນັ້ນ ເປັນຜູ້ຮັບຜິດຊອບ.”