Accessibility links

Breaking News

ເພື່ອ​ເປັນ​ກຽດ ໃຫ້​ແກ່​ອິດ​ສະ​ຫຼະ​ພາບ ດ້ານ​ການ​ຂ່າວ


ປະ​ທາ​ນາ​ທິ​ບໍ​ດີ​ໄບ​ເດັ​ນ ແລະ​ທ່ານ​ມູ​ຣາ​ຕອ​ຟ

ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ

ອົງ​ການ​ຂ່າວ​ທີ່​ເສ​ລີ ແລະ​ອິດ​ສະ​ຫຼະ ​ຖື​ວ່າ​ລັດ​ຖະ​ບານ​ຕ່າງໆ​ເປັນ​ຜູ້​ມີ​ຄວາມຮັບ​ຜິດ​ຊອບ ເປີດ​ເຜີຍ​ການລ່ວງລະ​ເມີດ​ອຳ​ນາດ​ແລະ​ການ​ຄໍ​ຣັບ​ຊັ່ນ ແລະຊ່ວຍ ​ຄ້ຳ​ປະ​ກັນ​ວ່າ​ປະ​ຊາ​ຊົນ​ມີ​ຊ່ອງ​ທາງ​ໄດ້​ຮັບ​ຂໍ້​ມູນ​ທີ່​ເຊື່ອ​ຖື​ໄດ້. ຢູ່​ໃນ​ຫຼາຍໆ​ປະເທດ ພວກ​ນັກ​ຂ່າວ​ແມ່ນພວມ​ປະ​ເຊີນ​ໜ້າ​ກັບ​ຄວາມ​ຮຸນ​ແຮງ ​ຫຼືການຖືກ​ຈັບ​ກຸມ​ຄຸມ​ຂັງ ໃນ​ການ​ລາຍ​ງານ​ຂ່າວ​ຂອງ​ພວກ​ເຂົາ​ເຈົ້າ.

ເພື່ອ​ເປັນ​ການ​ຮັບ​ຮູ້​ເຖິງວຽກ​ການ​ອັນ​ສຳ​ຄັນ​ທີ່​ພວກ​ນັກ​ຂ່າວ​ໄດ້​ເຮັດໃນ​ນາມຂອງ ​ອິດ​ສະ​ຫຼະ​ພາບ ໃນ​ການ​ສະ​ແດງ​ຄວາມ​ຄິດ​ຄວາມ​ເຫັນນັ້​ນ ລາງວັນ​ໂນ​ແບ​ລ​ຂະແໜງ​ສັນ​ຕິ​ພາບ​ໃນ​ປີນີ້ຈຶ່ງໄດ້​ຖືກມອບ​ໃຫ້​ນັກ​ຂ່າວ 2 ຄົນ ຄືທ່ານນາງ​ມາ​ຣີ​ອາ ແຣັ​ສ​ສາ ຈາກ​ປະ​ເທດ​ຟີ​ລິບ​ປິນແລະ​ທ່ານ​ດະ​ມີ​ຕ​ຣີ ມູ​ຣາ​ຕອ​ຟ ຈາກ​ປະ​ເທດ​ຣັດ​ເຊຍ. ​ປະທາ​ນາ​ທິ​ບໍ​ດີໂຈ ​ໄບ​ເດັນ ກ່າວ​ຢູ່​ໃນ​ຖະ​ແຫຼງ​ການ​ສະ​ບັບ​ນຶ່ງ ເພື່ອ​ເປັນ​ກຽດ​ໃຫ້​ແກ່​ພວກ​ນັກ​ຂ່າວ​ທັງ​ສອງວ່າ “ຄື​ກັນ​ກັບພວກ​ນັກ​ຂ່າວ​ຫຼາຍໆ​ຄົນຢູ່​ໃນ​ທົ່ວ​ໂລກ ທ່ານນາງແຣັ​ສ​ສາ ແລະ​ທ່ານມູ​ຣາ​ຕອ​ຟ ໄດ້​ຊອກ​ສະ​ແຫວງ​ຫາ​ຄວາມ​ຈິງຢ່າງ​ບໍ່​ຮູ້​ອິດ​ເມື່ອຍ ແລະ​ປາ​ສະ​ຈາກ​ຄວາມ​ຢ້ານ​ກົວ. ພວກ​ເຂົາ​ເຈົ້າ​ໄດ້​ເຮັດ​ວຽກ​ ເພື່ອກວດ​ສອບ​ເບິ່ງການ​ໃຊ້​ອຳ​ນາດ​ໄປ​ໃນ​ທາງ​ຜິດ ເຜີຍ​ແບ​ການ​ສໍ້​ລາດ​ບັງ​ຫຼວງແລະຮຽກ​ຮ້ອງໃຫ້​ມີ​ຄວາມ​ໂປ່ງ​ໃສ. ພວກ​ເຂົາ​ເຈົ້າ​ມີ​ຄວາມຢຶດໝັ້ນ ໃນ​ການ​ສ້າງ​ຕັ້ງ​ ອົງ​ການ​ສື່​ມ​ວນ ຊົນ​ອິດ​ສະ​ຫຼະ ແລະ​ປົກ​ປ້ອງ​ອົງ​ການເຫຼົ່າ​ນີ້ ຕ້ານ​ກັບ​ກຳ​ລັງ​ທີ່​ຊອກ​ຫາ​ຊ່ອງ​ທາງເພື່ອ​ຈະ​ປິດ​ປາກ​ປິດ​ສຽງ​ຂອງ​ພວກ​ເຂົາເຈົ້າ​ໃຫ້​ມິດ​ງຽບ​.”

ທ່ານ​ນາງ​ແຣັ​ສ​ສາແລະ​ທ່ານ​ມູ​ລາ​ຕອ​ຟ ກໍ​ຄື​ກັນ​ກັບ​ພວກ​ນັກ​ຂ່າວ​ອື່ນໆ ພວກ​ເຂົາ​ເຈົ້າຕ່າງ​ກໍ​ໄດ້​ຮັບ​ການ​ສູນ​ເສຍ ຍ້ອນ​ຄວາມ​ໝັ້ນ​ໝາຍ​ຂອງ​ພວກ​ເຂົາ​ເຈົ້າ​ ທີ່​ຈະ​ລາຍງານ​ຄວາມ​ຈິງ. ພວກ​ເຂົາ​ເຈົ້າ​ໄດ້​ຕົກ​ເປັນ​ເປົ້າ​ຂອງ​ການ​ຂົ່ມ​ຂູ່​ ການ​ຮາ​ວີ​ລົບ​ກວນແລະ​ການຄຸກ​ຄາມຢ່າງ​ຕໍ່​ເນື່ອງ ​ການ​ເຄື່ອນ​ໄຫວ​ທີ່​ຈອມ​ປອມ​ທາງ​ກົດ​ໝາຍແລະແມ່ນ​ກະ​ທັງ ໃນ​ກໍ​ລະ​ນີ​ຂອງ​ທ່ານ​ມູ​ຣາ​ຕອ​ຟນັ້ນ ການ​ເສຍ​ຊີ​ວິດ​ຂອງ​ໝູ່ລາວ.

ສະ​ຫະ​ລັດ​ຂໍ​ປະ​ນາມ​ການ​ຂົ່ມ​ຂູ່ ການ​ຮາ​ວີ​ລົບ​ກວນ ແລະ​ການ​ກໍ່​ຄວາມ​ຮຸນ​ແຮງ​ທີ່ແນ​ເປົ້າ​ໝາຍ​ໃສ່ພວກ​ນັກ​ຂ່າວ ແລະ​ພະ​ນັກ​ງານ​ສື່ມວນ​ຊົນ ທີ່​ໄດ້​ເຮັດ​ໜ້າ​ທີ່​ຂອງພວກ​ເຂົາ​ເຈົ້າ. ການ​ຂົ່ມ​ຂູ່​ເຫຼົ່າ​ນີ້​ທີ່​ເພີ້ມ​ທະ​ວີຫຼາຍ​ຂຶ້ນ​ນັບ​ມື້ ແມ່ນ​ມາ​ຈາກການ​ປະ​ຕິ​ບັດ​ງານຂອງ​ລັດ​ຖະ​ບານ ​ຢູ່ນອກ​ຊາຍ​ແດນ​ຂອງ​ພວກ​ເຂົາ​ເຈົ້າ ຮວມ​ທັງ​ການໃຊ້​ເຄື່ອງ​ສອດ​ແນມ​ດີ​ຈີ​ຕອ​ລ​ໄປ​ໃນ​ທາງ​ຜິດ ເພື່ອ​ຕິດ​ຕາມ​ເບິ່ງ​ການ​ສື່​ສານແລະ​ຢາກ​ຮູ້​ວ່າພວກ​ນັກ​ຂ່າວ​ພັກ​ເຊົາ​ຢູ່​ໃສ ເພື່ອ​ຂັດ​ຂວາງ​ບໍ່​ໃຫ້​ພວກ​ເຂົ​າ​ເຈົ້າ​ສາ​ມາດ​ລາຍ​ງານ​ຂ່າວ​ກ່ຽວ​ກັບ​ການ​ສໍ້​ລາດ​ບັງ​ຫຼວງ​ຫຼືການ​ກົດ​ຂີ່​ ຂອງ​ລັດ​ຖະ​ບານ. ສະ​ມາ​ຊິກ​ຂອງ​ອົງ​ການ​ຂ່າວ​ບໍ່​ຄວນ​ຖືກ​ຂົ່ມ​ຂູ່ ຮາ​ວີ​ລົບ​ກວນ ​ຖືກ​ໂຈມ​ຕີ​ທີ່​ໃຊ້​ຄວາມ​ຮຸນ​ແຮງ ຫຼື​ການ​ຈັບກຸມ​ຄຸມ​ຂັງ​ຍ້ອນ​ເຮັດ​ໜ້າ​ທີ່​ຂອງ​ພວກ​ເຂົາ​ເຈົ້າ.

ທ່ານ​ເນດ ໄພ​ຣ​ສ໌ ໂຄ​ສົກ​ກະ​ຊວງ​ການ​ຕ່າງ​ປະ​ເທ​ດ​ສະ​ຫະ​ລັດກ່າ​ວ​ວ່າ “ເວ​ລານີ້ ແມ່ນ​ຫຼາຍກວ່າ​ເວ​ລາ​ອື່ນ​ໃດ​ທັງ​ໝົດ ພວກ​ເຮົາ​ຕ້ອງ​ໄດ້​ລຸກ​ຂຶ້ນ ຕ້ານ​ຢັນ​ກັບ​ການໂຈມ​ຕີ ທີ່​ເພີ້ມ​ທະ​ວີ​ຂຶ້ນ ການ​ຮາ​ວີ ​ທາງ​ອອນ​ລາຍ​ນ໌ ການ​ຂູ່​ເຂັນ​ດ້ວຍ​ການ​ຟ້ອງ​ຮ້ອງ​ ແລະການ​ກົດ​ດັນທາງງ​ດ້ານ​ລະ​ບຽບ​ການ ໄດ້​ຖືກ​ນຳ​ໃຊ້​ເພື່ອ​ປິດ​ປາກ​ປິດ​ສຽງ​ສື່ມວນ​ຊົນ​ ຢູ່​ໃນ​ທົ່ວ​ໂລກ.”

ສະ​ຫະ​ລັດ​ຈະ​ສືບ​ຕໍ່ ​ໃຫ້​ການ​ສະ​ໜັບ​ສະ​ໜຸນ​ຕໍ່​ອິດ​ສະ​ຫຼະ​ພາບ ໃນ​ການ​ສະ​ແດງ​ອອກຊຶ່ງ​ຄວາມ​ຄິດ​ຄວາມ​ເຫັນ ໂດຍ​ປາ​ສະ​ຈາກ​ການ​ຈຳ​ກັດ​ຮັດ​ແຄບ​ໃດໆ ຮວມທັງ​ສະ​ມາ​ຊິກ​ຂອງ​ສື່ມວນ​ຊົນແລະ​ໃຫ້​ພວກ​ທີ່​ທຳ​ການ​ໂຈ​ມ​ຕີ​ອິດ​ສະ​ຫຼະ​ພາບ​ຂອງສື່ມວ​ນ​ຊົນ​ເປັນ​ຜູ້​ຮັບ​ຜິດ​ຊອບ.

​ປະ​ທາ​ນາ​ທິ​ບໍ​ດີ​ໄບ​ເດັນ ກ່າວ​ວ່າ “ທ່ານ​ນາງ​ແຣັ​ສ​ສາ ​ທ່ານ​ມູ​ຣາ​ຕອ​ຟ ແລະ​ນັກຂ່າວທີ່​ຄື​ກັນ​ກັບ​ພວກ​ເຂົາ​ເຈົ້າ​ ຢູ່​ໃນ​ທົ່ວ​ໂລກ ແມ່ນ​ຢູ່​ແຖວ​ໜ້າ​ໃນ​ການ​ຕໍ່​ສູ້​ໃນ​ໂລກ ກັບ​ທຸກໆ​ແນວ​ຄິດ ​ເພື່ອ​ຄວາມ​ເປັນ​ຈິງ. ຂ້າ​ພະ​ເຈົ້າ ພ້ອມ​ກັບ​ຜູ້​ຄົນ​ໃນ​ທຸກ​ໆ​ແຫ່ງ ແມ່ນ​ເປັນ​ໜີ້​ບຸນ​ຄຸນ​ໃນ​ວຽກ​ງານ​ການ​ບຸກ​ເບີກ​ຂອງ​ພວກ​ເຂົາ​ເຈົ້າທີ່​ບໍ່​ຍອມ​ທໍ້​ຖອຍຕໍ່​ການ​ກົດ​ດັນ​ໃດໆ.”

XS
SM
MD
LG