Accessibility links

Breaking News

ບົດບັນນາທິການ: ການເຈລະຈາ ກ່ຽວກັບນິວເຄລຍຂອງອີຣ່ານ ຈະເລີ້ມ​ຂຶ້ນອີກ


ການ​ເຈ​ລະ​ຈາ​ທາງອ​້ອມ ລະ​ຫວ່າງ​ສະ​ຫະ​ລັດ ແລະ​ອີ​ຣ່ານ ທີ່​ນະ​ຄອນ​ວຽນ​ນາ.

ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ

ອີ​ຣ່ານ​ໄດ້​ຕົກ​ລົງ ທີ່​ຈະ​ເລີ້ມ​ເປີດ​ການ​ເຈ​ລະ​ຈາ​ໃນ​ດ້ານ​ນິວ​ເຄ​ລຍ​ຄື​ນ​ອີກ​ຫຼັງ​ຈາກ​ໄດ້​ມີ​ການ​ຢຸດ​ເຊົາ​ມາ​ເປັນ​ເວ​ລາ​ 5 ເດືອນ. ສະ​ຫະ​ພາບ​ຢູ​ໂຣບຊຶ່ງ​ເປັນ​ຜູ້​ປະ​ສານ​ງານ​ກ່ຽວ​ກັບ​ການ​ເຈ​ລະ​ຈາປະ​ກາດ​ວ່າ ປະ​ເທດ​ທີ່​ເຂົ້າ​ຮ່ວມ​ທັງ​ໝົດ​ ຈະ​ພົບປະ​ກັນ​ ໃນ​ການ​ເຈ​ລະ​ຈາ​ຮອບ​ທີ 7 ​ທີ່​ນະ​ຄອນ​ວຽນ​ນາ ໃນ​ວັນ​ທີ 29 ພະ​ຈິກນີ້. ພວກ​ເຂົາ​ເຈົ້າ​ຈະ​ຫາ​ລື​ກັນ ກ່ຽວ​ກັບ​ການ​ກັບ​ຄືນ​ເຂົ້າ​ຮ່ວມ​ຂອງ​ສະ​ຫະ​ລັດ ແລະ​ອີ​ຣ່ານ​ເພື່ອຈະ​ປະ​ຕິ​ບັດ​ ແຜນ​ການ​ປະ​ຕິ​ບັດ​ງານ​ຮ່ວມ​ຮອບ​ດ້ານ ຫຼື JCPOA.

ສະ​ຫະ​ລັດ​ແລະ​ບັນ​ດາ​ປະ​ເທດ​ພັນ​ທະ​ມິດ​ໃນ​ຢູ​ໂຣບໃນ​ກຸ່ມ 5 ປະ​ເທດ​ມະ​ຫາ​ອຳນາດບວກ​ນຶ່ງ ເມື່ອ​ໄວໆ​ມານີ້ ຮຽກ​ຮ້ອງ​ໃຫ້​ອີ​ຣ່ານ “ຍາດ​ເອົາ​ໂອ​ກາດ ແລະ​ກັບຄືນ​ດ້ວຍ​ຄວາມ​ຈິງ​ໃຈ ເພື່ອ​ສະ​ຫຼຸບ​ການ​ເຈ​ລະ​ຈາຂອງ​ພວກ​ເຮົາ ແມ່ນ​ເປັນ​ເລື້ອງທີ່​ຮີບ​ດ່ວນ.” ໃນ​ຖະ​ແຫຼງກ​ານ​ຮ່ວມນັ້ນ ​ປະ​ທາ​ນາ​ທິ​ບໍ​ດີ​ໂຈ ​ໄບ​ເດັນ ນາ​ຍົກ​ລັດຖະ​ມົນ​ຕີ​ແອງ​ເກີ​ລາ ເມີ​ໂກ ແຫ່ງ​ເຢຍ​ຣະ​ມັນ ປະ​ທາ​ນາ​ທິ​ບໍ​ດີ​ເອັມ​ມາ​ນູ​ແອ​ລ ມາກ​ຣົງ ແຫ່ງ​ຝ​ຣັ່ງ ແລະ​ນາ​ຍົກ​ລັດ​ຖະ​ມົນ​ຕີ​ບໍ​ຣິ​ສ ຈອນ​ສັນ ແຫ່ງ​ອັງ​ກິດ ກ່າ​ວ​ວ່າ “ນີ້​ແມ່ນ​ຫົນ​ທາງ​ທີ່​ແນ່ນອນ​ພຽງ​ທາງ​ດຽວ​ເທົ່າ​ນັ້ນ ເພື່ອ​ຈະ​ຫຼີກ​ລ່ຽງ​ອັນ​ຕະ​ລາຍ​ທີ່​ຈະ​ເພີ້ມ​ທະ​ວີ​ຂຶ້ນ ຊຶ່ງ​ຈະ​ບໍ່​ເປັນ​ຜົນ​ດີ​ຕໍ່​ປະ​ເທດ​ໃດໆ​ທັງ​ໝົດ.”

ພວກ​ຜູ້​ນຳ​ທັງ​ 4 ຍັງ​ໃຫ້​ຂໍ້​ສັງ​ເກດ​ວ່າ “ຍ້ອນ​ຄວາມ​ເປັນ​ຫ່ວງ​ກັງ​ວົນ​ຢ່າງ​ແທ້​ຈິງ ແລະ​ພວມ​ເພີ້ມ​ທະ​ວີ​ຂຶ້ນ” ທີ່​ອີ​ຣ່ານ​ໄດ້​ເລັ່ງ​ລັດ​ບາດ​ກ້າວ ໃນ​ການ​ທ້າ​ທາຍ​ເກາະຜິດ​ທາງ​ດ້ານ​ນິວ​ເຄ​ລຍ ຮວ​ມ​ທັງ​ການ​ກັ່ນ​ທາດ​ຢູ​ເຣ​ນຽມ​ທີ່​ມີ​ປະ​ສິດ​ທິ​ພາບ​ສູງ​ແລະ​ການ​ເສີມ​ສະ​ມັດ​ຖະ​ພາບໂລ​ຫະ​ຢູ​ເຣ​ນຽມ ແລະ​ອີ​ຣ່ານ​ໄດ້​ຫຼຸດ​ການ​ຮ່ວມ​ມືແລະ​ໃຫ້​ຄວາມ​ໂປ່ງ​ໃສ​ໜ້ອຍ​ລົງ ຕໍ່​ອົງ​ການ​ພະ​ລັງ​ງານ​ປະ​ລະ​ມາ​ນູ​ສາ​ກົນ. ປະ​ເທດ​ທັງ 4 ໄດ້​ໃຫ້​ຄຳ​ໝັ້ນ​ສັນ​ຍາ “ເພື່​ອ​ຄ້ຳ​ປະ​ກັນ​ວ່າ ອີ​ຣ່ານ​ຈະ​ບໍ່​ສາ​ມາດສ້າງ ຫຼື​ໄດ້​ຮັບ​ອາ​ວຸດ​ນິວ​ເຄ​ລຍ ມາ​ຢູ່​ໃນ​ຄວາມ​ຄອບ​ຄອງ​ໄດ້.”

ໃນ​ລະ​ຫວ່າງ​ການ​ຖະ​ແຫຼງ​ຂ່າວນັ້ນ ໂຄ​ສົກ​ຂອງ​ກະ​ຊວງ​ການ​ຕ່າງ​ປະ​ເທດ​ສະ​ຫະ​ລັດ ທ່ານ​ເນດ ໄພ​ຣ​ສ໌ ຮັບ​ຮູ້​ເຖິງ​ຄວາມ​ເຕັມ​ໃຈ​ຂອງ​ອີ​ຣ່ານ ທີ່​ຈະ​ກັບ​ຄືນ​ເຂົ້າມາ​ຮ່ວມ​ການ​ເຈ​ລ​ະ​ຈາ. ທ່ານ​ກ່າວ​ວ່າ “ພວກ​ເຮົາ​ເຊື່ອ​ວ່າມັນ​ຍັງ​ມີ​ຄວາມເປັນ​ໄປ​ໄດ້ ​ທີ່​ຈະ​ບັນ​ລຸແລະ​ສ້າງ​ຄວາມ​ເຂົ້າ​ໃຈ​ຢ່າງວ່ອງ​ໄວ ກ່ຽວ​ກັບ​ຕ່າງ​ຝ່າຍ​ຕ່າງ​ກັບ​ຄືນ​ໄປປະ​ຕິ​ບັດ​ແຜນ​ການ JCPOA ໂດຍ​ແກ້​ໄຂ​ບັນ​ຫາ​ນ້ອຍໆ​ຈຳ​ນວນ​ນຶ່ງ​ທີ່​ຍັງ​ມີ​ການຄ້າງ​ຄາ ເວ​ລາ​ມີ​ການ​ສ​ະ​ຫຼຸບ​ການ​ເຈ​ລະ​ຈາ​ຮອບ​ທີ 6 ໃນ​ທ້າຍ​ເດືອນ​ມິ​ຖຸ​ນາຜ່ານມາ ແລະ​ທ່ານ​ກ່າວ​ຕື່ມ​ວ່າ “ແຕ່​ພວກ​ເຮົາ ​ກໍ​ໄດ້​ສະ​ແດງ​ໃຫ້​ເຫັນ​ຢ່າງ​ຈະ​ແຈ້ງ​ໄປ​ແລ້ວ ຮວມ​ທັງ​ ໃນ​ຂະ​ນະ​ທີ່​ການ​ຢຸດ​ພັກ​ເທື່ອນີ້ ​ໄດ້ຖືກ​ແກ່​ຍາວ​ອອກ​ໄປ ​ຊົ່ວ​ໄລ​ຍະ​ນຶ່ງ ຊຶ່ງ​ໂອ​ກາດ​ທີ່​ເປີດກວ້າງ​ດັ່ງ​ກ່າວຈະ​ບໍ່​ເປີດ​ຢ່າງ​ບໍ່​ມີ​ກຳ​ນົດ ໂດຍ​ສະ​ເພາະຖ້າ​ຫາກ​ອີ​ຣ່ານ​ຍັງ​ສືບ​ຕໍ່​ເອົາ​ບາດ​ກ້າ​ວ​ທີ່​ທ້າ​ທາຍ​ທາງ​ດ້ານ​ນິວ​ເຄ​ລຍ.”

ໂຄ​ສົກ​ກະ​ຊວງ​ການ​ຕ່າງ​ປະ​ເທດ ​ເນດ ໄພ​ຣ​ສ໌ ປະ​ກາດ​ວ່າ “ແນ່ນອນ​ພວກ​ເຮົາຫວັງ​ວ່າ ​ຄະ​ນະ​ຜູ້​ຕາງ​ໜ້າ​ຂອງ​ອີ​ຣ່ານ ຈະ​ກັບ​ຄືນ​ໄປ ​ນະ​ຄອນ​ວຽນ​ນາ ໃນ​ທ້າຍ ​ເ​ດືອນນີ້ ພວກ​ເຂົາ​ເຈົ້າ​ເຮັດ​ເຊັ່ນ​ນັ້ນ​ເພື່ອ​ກຽມ​ພ້ອມ​ໃນ​ການ​ເຈ​ລະ​ຈາຢ່າງວ່ອງ​ໄວ ແລະ​ດ້ວຍ​ຄວາມ​ຈິງ​ໃຈ​ເຊັ່ນ​ດຽວ​ກັນ.”

XS
SM
MD
LG