Accessibility links

Breaking News

ບົດບັນນາທິການ: ລັດຖະບານຄິວບາ ຍັງສືບຕໍ່ປິດປາກປິດສຽງພວກນັກສິນລະປິນ


ໃນ​ຮູບນີ້ ທີ່​ຖ່າຍ​ເມື່ອ​ວັນ​ທີ 11 ກໍ​ລະ​ກົດ 2021 ປະ​ຊາ​ຊົນ​ໄດ້​ພາ​ກັນ​ເຂົ້າ​ຮ່ວມ​ການ​ເດີນ​ຂະ​ບວນ​ປະ​ທ້ວງ​ລັດ​ຖະ​ບານ​ປະ​ທາ​ນາ​ທິ​ບໍ​ດີ ມີ​ແກ​ລ ດາ​ອາ​ສ-ກາ​ແນ​ລ ທີ່​ນະ​ຄອນ​ຫຼວງ​ຮາ​ວາ​ນາ.

ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ

ມັນ​ເປັນ​ເວ​ລາ​ນຶ່ງ​ປີ​ມາ​ແລ້ວ ນັບ​ແຕ່​ພວກ​ສິນ​ລະ​ປິນແລະ​ພວກ​ນັກ​ເຄື່ອນ​ໄຫວເກືອບ 300 ຄົນ ໄດ້​ພາ​ກັນ​ໄປ​ໂຮມ​ຊຸມແລະ​ປະ​ທ້ວງ ເພື່ອ​ຮຽກ​ຮ້ອງ​ເອົາສິດ​ເສ​ລີ​ພາບ​ໃນ​ການ​ປາກ​ເວົ້າ ທີ່​ປະ​ຕູ​ທາງ​ເຂົ້າ ​ກະ​ຊວງວັດ​ທະ​ນະ​ທຳ ໃນ​ນະ​ຄອນ​ຫຼວງ​ຮາ​ວາ​ນາ. ພວກ​ນັກ​ສິນ​ລະ​ປິນ​ເຫຼົ່າ​ນີ້ ພາ​ກັນ​ຮຽກ​ຮ້ອງ​ເອົາ​ສິດ​ເສ​ລີ​ພາບທາງ​ດ້ານ​ສິນ​ລະ​ປະ ແລະ​ໃນ​ດ້ານ​ສ່ວນ​ຕົວ ຢູ່​ໃນ​ປະ​ເທດ​ຄິວ​ບາ ແລະ​ໃຫ້ລັດ​ຖະ ​ບານ ​ຄິວ​ບາ​ເຂົ້າ​ຮ່ວມ​ໃນ​ການ​ໂອ້​ລົມ ທີ່​ຈະ​ອຳ​ນວຍ​ໃຫ້​ປະ​ຊາ​ຊົນ​ຊາວ​ຄິວບາ ມີ​ປາກ​ມີ​ສຽງ​ໃນ​ການ​ຕັດ​ສິນ​ໃຈ​ກ່ຽວ​ກັບ​ອະ​ນາ​ຄົດ​ຂອງ​ພວກ​ເຂົາ​ເຈົ້າ.

ໃນ​ຂະ​ນະ​ທີ່​ພວກ​ເຈົ້າ​ໜ້າ​ທີ່ ​ໃນ​ຂັ້ນ​ຕົ້ນຕົກ​ລົງ​ທີ່​ຈະ​ຮັບ​ຟັງ ​ໃນ​ອັນ​ທີ່​ພວກ​ນັກ​ສິນ​ລະປິນຢາກ​ເວົ້າ​ ແຕ່​ອຳ​ນາດ​ການ​ປົກ​ຄອງ​ ຕໍ່​ມາ​ໄດ້​ປະ​ຕິ​ເສດ ທີ່​ຈະ​ເຂົ້າ​ຮ່ວມ​ໃນ​ການ​ໂອ້​ລົມ​ໃດໆ​ກໍ​ຕາມ. ນັບ​ແຕ່ນັ້ນ​ມາລັດ​ຖະ​ບານ​ຄິວ​ບາ​ກໍ​ໄດ້​ເພີ້ມ​ຄວາມ​ພະ​ຍາຍາມ​ຂອງ​ຕົນ​ຫຼາຍ​ຂຶ້ນ ທີ່​ຈະ​ປິດ​ປາກ​ປິດ​ສຽງ​ພວກ​ນັກ​ສິນ​ລະ​ປິນ ​ນັກ​ເຄື່ອນໄຫວ ແລະນັກ​ຂ່າວ​ອິດ​ສະ​ຫຼະ ທີ່​ຍັງ​ສືບ​ຕໍ່​ໃຫ້​ການ​ສະ​ໜັບ​ສະ​ໜຸນ​ຢ່າງ​ກ້າ​ຫານ​ໃນ​ດ້ານສິດ​ທິ​ມະ​ນຸດແລະ​ອິດ​ສະ​ຫຼະ​ພາບ​ຂັ້ນ​ພື້ນ​ຖານ​ຢູ່​ໃນ​ປະ​ເທດ​ຄິວ​ບາ. ອຳ​ນາດ​ການປົກ​ຄອງໄດ້​ຮັບ​ຮອງ​ເອົາ​ຮ່າງ​ກົດ​ໝາຍຈຳ​ກັດ​ຮັດ​ແຄບ​ສິດ​ເສ​ລີ​ພາບ​ໃນ​ການ​ປາກ​ເວົ້າ​ທາງ
ອອນ​ລາຍ​ນ໌ ໂດຍ​ໃຊ້​ກົດ​ໝາຍ​ເຫຼົ່າ​ນີ້​ປັບ​ໃໝ ແລະ​ຕັດ​ການ​ສື່​ສານ​ຄົມ​ມະ​ນາ​ຄົມ ຂອງ​ພວກ​ນັກ​ເຄື່ອນ​ໄຫວແລະ​ພວ​ກ​ນັກ​ຂ່າວທີ່​ພິມ​ເຜີຍ​ແຜ່​ຄວາມ​ຈິງອັ​ນສຳ​ຄັນໆ​ ແລະ​ຄວາມເຫັ​ນ​ຕ່າງໆ.

ສຳ​ລັບ​ພວກ​ທີ່​ເຂົ້າ​ຮ່ວມ ​ໃນ​ການ​ປະ​ທ້ວງ ເມື່ອ​ວັນ​ທີ 11 ກໍ​ລະ​ກົດ​ນັ້ນ ລັດ​ຖະ​ບານ​ຄິວ​ບາໄດ້​ລົງ​ໂທດ​ຢ່າງ​ໜັກໂດຍ​ຊອກ​ຫາ​ທາງ​ໃຫ້​ພວກ​ເຂົາ​ເຈົ້າ​ໄດ້​ຖືກ​ໂທດຈຳ​ຄຸກດົນ​ເຖິງ 30 ປີ. ເຈົ້າ​ໜ້າ​ທີ່​ໄດ້​ຈັບ​ກຸມ​ຄຸມ​ຂັງ​ຊ້ຳ​ແລ້ວ​ຊ້ຳ​ອີກ​ທ່ານ​ຫຼຸຍ ມາ​ນູ​ແອ​ລ ອໍ​ເຕ​ໂຣ ອາ​ລ​ການ​ຕ​າ​ຣາ, ທ່ານ​ເມຍ​ແກ​ລ ໂອ​ຊໍ​ໂບ ແລະ ​ທ່ານ​ໂຮ​ເຊ ດາ​ນີ​ລ ແຟເຣີ ຊຶ່ງ​ທັງ​ໝົດຕ່າງ​ກໍ​ພວມຕິດ​ຄຸກ​ຢູ່​ໃນ​ເວ​ລານີ້ ​ພຽງ​ແຕ່​ໄດ້​ເປັນ​ປາກ​ເປັນສຽງ​ຮຽກ​ຮ້ອງ​ເອົາ​ສິດ​ເສ​ລີ​ພາບ​ໃຫ້​ແກ່​ປະ​ຊາ​ຊົນ​ຊາວ​ຄິວ​ບາ​ຕາມ​ທີ່​ພວກ​ເຂົາ ​ເຈົ້າ​ມີ​ຄວາມ​ປະ​ສົງ.

ໃນ​ກາງ​ເດືອນ​ພະ​ຈິກ​ຜ່ານ​ມາ ອຳ​ນາດ​ການ​ປົກ​ຄອງ​ຄິວ​ບາ​ ໄດ້​ສົ່ງ​ກຳ​ລັງ​ຮັກ​ສາ​ຄວາມ​ປອດ​ໄພແລະ​ຝູງ​ຊົນ​ທີ່​ລັດ​ຖະ​ບານ​ສະ​ໜັບ​ສະ​ໜຸນ ໄປ​ຮາ​ວີ​ລົບ​ກວນ​ ນັກ​ຂຽນ​ບົດ​ລະ​ຄູອນ ຢູ​ນີ​ອໍ ກາ​ເຊຍ ​ທີ່​ໄດ້​ເຂົ້າ​ຮ່ວມ​ໃນ​ການ​ເຈ​ລະ​ຈາ​ປີ​ກາຍ ແລະຈັດ​ຕັ້ງ​ການ​ຮຽກ​ຮ້ອງ​ໃຫ້​ມີ​ການ​ປະ​ທ້ວງ​ແບບ​ສັນ​ຕິ​ຂຶ້ນ​ອີກ​ເທື່ອ​ນຶ່ງ. ຫຼັງ​ຈາກນັ້ນທ່ານ​ແລະ​ຄອບ​ຄົວ​ກໍ​ໄດ້​ຫຼົບ​ໜີ​ໄປ​ຢູ່​ປະ​ເທດ​ສະ​ເປນ.

ປະ​ຊາ​ຊົນ​ຊາວ​ຄິວ​ບາ​ໄດ້​ຮຽກ​ຮ້ອງ​ຊ້ຳ​ແລ້ວ​ຊ້ຳ​ອີກ ໃຫ້​ລັດ​ຖະ​ບານ​ ຮັບ​ຟັງ​ການ ຮຽກ​ຮ້ອງຂອງ​ເຂົາ​ເຈົ້າ ໃຫ້​ເຄົາ​ລົບ​ນັບ​ຖື​ສິດ​ທິ​ມະ​ນຸດ ສິດ​ເສ​ລີ​ພາບ​ໃນ​ການ​ສະແດງ​ຄວາມ​ຄິດ​ຄວາມ​ເຫັນ​ແລະ​ການ​ໂຮມ​ຊຸມ​ນຸມ ແລະ​ປະ​ຊາ​ທິ​ປະ​ໄຕ. ລັດ​ຖະມົນ​ຕີ​ການ​ຕ່າງ​ປະ​ເທດ​ບ​ລິງ​ເກັນ ກ່າວ​ຢູ່​ໃນ​ຖະ​ແຫຼງ​ການວ່າ “ໃນ​ທຸກໆຄັ້ງ ອຳ​ນາດ​ການ​ປົກ​ຄອງ ​ໄດ້​ປ່ອຍ​ໃຫ້​ຫຼຸດ​ມື​ໄປ ໂອ​ກາດ​ສຳ​ລັບ​ເປີດ​ການ​ໂອ້​ລົມ​ ໂດຍ​ເນັ້ນ​ໜັກ​ໃສ່​ແຕ່ແນວ​ຄິດ​ທີ່​ລົ້ມ​ລະ​ລາຍແລະ​ລະ​ບົບ​ເສດ​ຖະ​ກິດ​ທີ່​ປະ​ສົບ​ກັບ​ຄວາມ ລົ້ມ​ແຫຼວທີ່​ບໍ່​ສາ​ມາດ​ສະ​ໜອງ​ຕອບຕໍ່​ຄວາມ​ຮຽກ​ຕ້ອງ​ການ​ຂັ້ນ​ພື້ນ​ຖານ​ຂອງ​ປະ​ຊາ​ຊົນຊາວ​ຄິວບາ.”

ລັດ​ຖະ​ມົນ​ຕີ​ການ​ຕ່າງ​ປະ​ເທດບ​ລິງ​ເກັນ​ກ່າວ​ຕື່ມ​ວ່າ “ພວກ​ເຮົາ​ຂໍ​ຊົມ​ເຊີຍ​ຕໍ່​ປະ​ຊາ​ຊົນ​ຊາວ​ຄິວ​ບາ ທີ່​ຍັງ​ສືບ​ຕໍ່​ຮຽກ​ຮ້ອງ​ໃຫ້​ລັດ​ຖະ​ບານ​ຂອງ​ພວກ​ເຂົາ​ເຈົ້າ​ຮັບ​ຟັງ​ໃນ​ສິ່ງທີ່​ພວກ​ເຂົາ​ເຈົ້າ​ມຸ້ງ​ມາດ​ປາ​ຖະ​ໜາ​ຢ່າງ​ແຮງ​ກ້າ ແລະ​ທວງ​ໃຫ້​ລັດ​ຖະ​ບານ​ເຄົາລົບ​ໃນ​ສິດ​ທິ​ສາ​ກົນ ແລະ​ອິດ​ສະ​ຫຼະ​ພາບ​ຂັ້ນ​ພື້ນ​ຖານ ​ຂອງ​ມະ​ນຸດ. ພວກ​ເຮົາ​ຂໍ​ຮຽກ​ຮ້ອງ​ໃຫ້ອຳ​ນາດ​ການ​ປົກ​ຄອງ​ຄິວ​ບາຈົ່ງໃຫ້​ຄວາມສົນ​ໃຈ​ຕໍ່​ຄຳ​ຮຽກ​ຮ້ອງ​ຂອງປະ​ຊາ​ຊົນ ແລະ​ອະ​ນຸ​ຍາດ​ໃຫ້​ປະ​ຊາ​ຊົນ​ຄິວ​ບາ ຫຼໍ່​ຫຼອມ​ອະ​ນາ​ຄົດ​ຂອງ​ພວກ​ເຂົາ​ເຈົ້າ​ເອງ ​ໂດຍ​ປາ​ສະ​ຈາກ​ການ​ຂົ່ມ​ຂູ່ ​ທີ່​ຈະ​ແກ້​ແຄ້ນ​ຄືນ​ຂອງ​ລັດ​ຖະ​ບານ.”

XS
SM
MD
LG