ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ກຸ່ມລັດອິສລາມໃນແຂງໂຄຣາຊານ ຫຼື ISIS-K ແມ່ນກຸ່ມກໍ່ການຮ້າຍ ທີ່ມີການເຄື່ອນໄຫວຢູ່ໃນເຂດເອເຊຍໃຕ້ ແລະເອເຊຍກາງ ສ່ວນໃຫຍ່ແລ້ວແມ່ນໃນປະເທດອັຟການິສຖານ ແຕ່ນອກນັ້ນ ກໍຍັງມີໜ້າຢູ່ໃນບ່ອນອື່ນໆຂອງເອເຊຍໃຕ້ ເຊັ່ນດຽວກັນ. ກຸ່ມ ISIS-K ຖືກສ້າງຕັ້ງຂຶ້ນມາເມື່ອ 6 ປີກ່ອນ ໂດຍບັນດາສະມາຊິກທີ່ບໍ່ຈົງຮັກພັກດີຂອງກຸ່ມຕາລີບານ ຊຶ່ງກຸ່ມດັ່ງກ່າວຖືກຸ່ມຕາລີບານວ່າເປັນ
ສັດຕູ. ໃນໄລຍະ 6 ປີທີ່ຜ່ານມານີ້ ກຸ່ມ ISIS-K ໄດ້ທຳການໂຈມຕີທີ່ຮ້າຍແຮງຫຼາຍໆຄັ້ງ ທີ່ເຮັດໃຫ້ມີຜູ້ເສຍຊີວິດຫຼາຍຮ້ອຍຄົນ ໂດຍສະເພາະແລ້ວ ແມ່ນຊາວອັຟການິສຖານ. ການໂຈມຕີເຫຼົ່ານີ້ແມ່ນຮວມທັງການວາງລະເບີດທີ່ວັດໃຫຍ່ກາບູລເມື່ອພຶດສະພາ 2021 ທີ່ເຮັດໃຫ້ມີຜູ້ໄປສູດມົນໃນວັນເທດສະການອີດ-ອາລ ຟີດ 12 ຄົນເສຍຊີວິດ ແລະການວາງລະເບີດ ທີ່ສະໜາມບິນສາກົນຮາມິດ ກາຊາຍ ໃນເດືອນສິງຫາ 2021 ທີ່ເຮັດໃຫ້ມີຜູ້ເສຍຊີວິດຫຼາຍກວ່າ 170 ຄົນ ຊຶ່ງຜູ້ເຄາະຮ້າຍສ່ວນໃຫຍ່ແມ່ນພົນລະເຮືອນ ຫຼາຍໆຄົນແມ່ນເດັກນ້ອຍ ແລະພວກເຂົາມັກຈະແນເປົ້າໝາຍໃສ່ ສາສະໜາກຸ່ມນ້ອຍ ຮວມທັງ ປະຊາຄົມຊາວເຊຍ ແລະປະຊາຄົມຊາວຊິກ.
ໃນທ້າຍເດືອນພະຈິກຜ່ານມານີ້ ກະຊວງການຕ່າງປະເທດສະຫະລັດ ໄດ້ລະບຸຊື່ ຜູ້ນຳ 3 ຄົນຂອງກຸ່ມ ISIS-K ພ້ອມກັບຫົວໜ້າອຳນວຍຄວາມສະດວກໃນດ້ານ ການເງິນ ເປັນຜູ້ກໍ່ການຮ້າຍຂອງໂລກ ພາຍໃຕ້ດຳລັດຂອງຝ່າຍບໍລິຫານເລກທີ 13224 ຕາມທີ່ໄດ້ຮັບການແກ້ໄຂໄປນັ້ນ.
ທ້າວຊາໂນລລາ ກາຟາຣີ ທີ່ຍັງຮູ້ກັນ ໃນອີກຊື່ນຶ່ງວ່າ ຊາຮາດ ອາລ-ມູຮາເຈຍ ແມ່ນຫົວໜ້າໃຫຍ່ສຸດ ຂອງກຸ່ມໃນປັດຈຸບັນ. ລາວຖືກແຕ່ງຕັ້ງໂດຍແກນນຳກຸ່ມໄອຊິສໃຫ້ເປັນຜູ້ນຳພາກຸ່ມ ISIS-K ໃນເດືອນມິຖຸນາ ປີ 2020. ທ້າວກາຟາຣີແມ່ນຜູ້ຮັບຜິດຊອບໃນການອະນຸມັດການປະຕິບັດງານທັງໝົດຂອງກຸ່ມ ISIS-K ໃນທົ່ວປະເທດອັຟການິສຖານ ແລະເປັນຜູ້ຈັດແຈງຫາເງິນໃນການປະຕິບັດງານເຫຼົ່ານັ້ນ.
ຊູຸລຕານອາຊິສ ອາຊາມ ຫຼືຊຸລຕານອາຊິສ ເປັນໂຄສົກຂອງກຸ່ມ ISIS-K ນັບແຕ່ກຸ່ມດັ່ງກ່າວໄດ້ມີການສ້າງຕັ້ງຂຶ້ນ ຢູ່ທີ່ປະເທດອັຟການິສຖານ.
ທ້າວໂມລລາວີ ຣາຈາບ ຊຶ່ງຮູ້ກັນໃນອີກຊື່ນຶ່ງວ່າ ໂມລລາວີ ຣາຈາບ ຊາລາ-ຮຸດດິນ ແມ່ນຜູ້ນຳອະວຸໂສຂອງກຸ່ມ ISIS-K ໃນແຂວງກາບູລຂອງອັຟການິສຖານ. ລາວເປັນຜູ້ວາງແຜນໃນການປະຕິບັດງານຂອງກຸ່ມ ແລະຜູ້ບັນຊາການໃນການໂຈມຕີຂອງກຸ່ມ ISIS-K ໃນເຂດກາບູລ.
ທ້າວອິສມາຕູລລາ ຄາໂລຊາຍ ໄດ້ຖືກລະບຸວ່າ ເປັນຜູ້ສະໜອງການສະໜັບສະໜຸນທາງດ້ານການເງິນແກ່ກຸ່ມ ISIS-K. ລາວເປັນຜູ້ອຳນວຍຄວາມສະດວກໃນດ້ານການເງິນລະຫວ່າງປະເທດຂອງກຸ່ມ ISIS-K ແລະເປັນຜູ້ປະຕິບັດງານໃຫ້ແກ່ຜູ້ນຳອະວຸໂສຂອງກຸ່ມ ISIS.
ລັດຖະມົນຕີການຕ່າງປະເທດສະຫະລັດ ທ່ານແອນໂທນີ ບລິງເກັນ ກ່າວຢູ່ໃນຖະແຫຼງການສະບັບນຶ່ງວ່າ “ສະຫະລັດມີຄວາມໝັ້ນໝາຍທີ່ຈະນຳໃຊ້ທຸກເຄື່ອງ ມືຕໍ່ຕ້ານພວກກໍ່ການຮ້າຍທີ່ມີຢູ່ທັງໝົດເພື່ອກຳຈັດໄພຂົ່ມຂູ່ຂອງກຸ່ມລັດອິສລາມໃນແຂວງໂຄຣາຊານ ຊຶ່ງໂດຍທົ່ວໄປແລ້ວ ເອີ້ນກັນໃນຊື່ຫຍໍ້ວ່າ ISIS-K ນັ້ນໃນຖານະທີ່ເປັນພາກສ່ວນນຶ່ງຂອງຄວາມພະຍາຍາມທີ່ບໍ່ຢຸດຢ່ອນຂອງພວກເຮົາ ເພື່ອຄ້ຳປະກັນວ່າ ອັຟການິສຖານ ຈະບໍ່ກາຍເປັນບ່ອນຫຼົບລີ້ແລະເວທີປະຕິບັດງານສຳລັບພວກກໍ່ການຮ້າຍລະຫວ່າງປະເທດຄືນອີກ.
ທ່ານບລິງເກັນ ກ່າວສະຫຼຸບວ່າ “ພວກເຮົາຈະສືບຕໍ່ ນຳໃຊ້ທຸກເຄື່ອງມືຂອງອຳນາດອາເມຣິກັນເພື່ອແນເປົ້າໝາຍໃສ່ພວກກໍ່ການຮ້າຍທີ່ວາງແຜນປະຕິບັດງານສັງຫານພົນລະເຮືອນຢ່າງບໍ່ເລືອກໜ້າຢູ່ໃນທົ່ວໂລກ ແລະພວກທີ່ສາມາດ ອຳນວຍຄວາມສະດວກ ແລະໃຫ້ການສະໜັບສະໜຸນທາງດ້ານການເງິນ ໃນການດຳເນີນການຂອງພວກເຂົາ.”