ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ທ່ານນາງເຈັນ ຊາກີ ໂຄສົກຂອງທຳນຽບຂາວກ່າວວ່າ “ລັດຖະບານທ່ານໄບເດັນ ຈະບໍ່ສົ່ງນັກການທູດຫຼືເຈົ້າໜ້າທີ່ຜູ້ຕາງໜ້າ ໄປຮ່ວມການແຂ່ງຂັນກິລາໂອລິມປິກລະດູໜາວ ປີ 2022 ທີ່ປັກກິ່ງ ແລະກິລາໂອລິມປິກຄົນພິການ ໃນຂະນະທີ່ (ສາທາລະນະລັດປະຊາຊົນຈີນ) ຍັງມີການສືບຕໍ່ຂ້າລ້າງເຜົ່າພັນແລະການກໍ່ອາຊະຍາກຳຕ້ານມະນຸດຊາດແລະການລະເມີດສິດທິມະນຸດອື່ນໆ ທີ່ເຂດຊິນຈຽງ” ແຕ່ແນວໃດກໍຕາມ ທ່ານນາງຊາກີ ກ່າວວ່າ ພວກນັກກິລາສະຫະລັດຈະປະກອບສ່ວນເຂົ້າຮ່ວມໃນການແຂ່ງຂັນກິລາດັ່ງກ່າວ ໂດຍເວົ້າວ່າ “ທີມຊາດຂອງສະຫະລັດອາເມຣິກາຈະໄດ້ຮັບການສະໜັບສະໜຸນຈາກພວກເຮົາຢ່າງເຕັມທີ່.”
ທ່ານນາງໃຫ້ການອະທິບາຍວ່າ “ພວກນັກການທູດ ຫຼືເຈົ້າໜ້າທີ່ຜູ້ຕາງໜ້າອາດຈະເປັນການຖືວ່າ ການແຂ່ງຂັນກິລາໂອລິມປິກ ກິລາໂອລິມປິກຄົນພິການເຫຼົ່ານີ້ ແມ່ນເປັນການເຮັດທຸລະກິດຕາມປົກກະຕິທ່າມກາງທີ່ປະເຊີນໜ້າກັບການລະເມີດ ສິດທິມະນຸດທີ່ຮ້າຍແຮງເປັນພິເສດ ແລະການກະທຳທີ່ຮ້າຍແຮງອື່ນໆຂອງ ສປ ຈີນ ໃນເຂດຊິນຈຽງ ແລະພວກເຮົາຈະພຽງແຕ່ບໍ່ເຮັດສິ່ງນັ້ນ.”
ເຂດຊິນຈຽງ ເປັນທີ່ຢູ່ອາໄສ ຂອງພວກຊົນເຜົ່າວີເກີ້ປະມານ 14 ລ້ານຄົນ ຊຶ່ງ ສ່ວນໃຫຍ່ນັບຖືສາສະໜາອິສລາມ ແລະພວກຊົນຊາດຊົນເຜົ່າ ແລະສາສະໜາກຸ່ມນ້ອຍອື່ນໆ ທີ່ປາກພາສາເທີກີ. ລາຍງານວ່າດ້ວຍສິດທິມະນຸດສະບັບຫຼ້າສຸດ ຂອງກະຊວງການຕ່າງປະເທດສະຫະລັດ ແຈ້ງວ່າ ການຂ້າລ້າງເຊື້ອຊາດເຜົ່າພັນແລະການກໍ່ອາຊະຍາກຳຕ້ານມະນຸດຊາດຕໍ່ຊາວວີເກີ້ແລະສະມາຊິກຊົນຊາດ ຊົນເຜົ່າແລະສາສະໜາກຸ່ມນ້ອຍອື່ນໆ ຍັງດຳເນີນຕໍ່ໄປຢູ່ໃນເຂດຊິນຈຽງ. ອາຊະຍາກຳເຫຼົ່ານີ້ ແມ່ນຮວມທັງການຈັບກຸມຄຸມຂັງໂດຍພະລະການຫຼືການຖອດຖອນສິດເສລີພາບອື່ນໆຢ່າງຮ້າຍແຮງຂອງພົນລະເຮືອນຫຼາຍກວ່ານຶ່ງລ້ານຄົນ ການບັງຄັບໃຫ້ເຮັດໝັນ ການບັງຄັບໃຫ້ເຮັດແທ້ງລູກ ແລະການນຳໃຊ້ນະໂຍບາຍຄຸມກຳເນີດ ທີ່ເຄັ່ງຄັດຂອງຈີນ ການຂົ່ມຂືນ ການທໍລະມານ ການບັງຄັບໃຊ້ແຮງງານ ແລະການຈຳກັດຮັດແຄບທີ່ຮ້າຍແຮງສຸດຕໍ່ສິດເສລີພາບໃນການນັບຖືສາສະໜາຫຼືຄວາມເຊື່ອ ແລະສິດເສລີພາບ ໃນການເດີນທາງໄປມາ.
ມີຊາວວີເກີ້ແລະສະມາຊິກສ່ວນໃຫຍ່ຂອງພວກຊົນກຸ່ມນ້ອຍທີ່ນັບຖືສາສະໜາອິສລາມ ຫຼາຍກວ່າ 1 ລ້ານຄົນ ໄດ້ຖືກສົ່ງແບບຮວບຮັດຕັດຕອນ ເຂົ້າໄປຢູ່ໃນສູນກັກຂັງ ແລະອີກ 2 ລ້ານຄົນຖືກສົ່ງເຂົ້າໄປຢູ່ໃນອັນທີ່ເອີ້ນວ່າ ສູນ “ສຳມະນາ” ເພື່ອຝຶກວິຊາຊີບ.
ປະທານາທິບໍດີໂຈ ໄບເດັນ ໄດ້ສະແດງໃຫ້ປະທານປະເທດຈີນ ທ່ານສີ ຈິ້ນຜິງເຫັນຢ່າງຈະແຈ້ງວ່າ ສະຫະລັດມີຄວາມໝັ້ນໝາຍຂັ້ນພື້ນຖານຕໍ່ການສ້າງຄວາມກ້າວໜ້າ ໃນດ້ານສິດທິມະນຸດຢູ່ປະເທດຈີນ ແລະໄກອອກໄປກວ່ານັ້ນ. ໂຄສົກຂອງທຳນຽບຂາວ ທ່ານນາງເຈັນ ຊາກີ ປະກາດວ່າ “ການບໍ່ສົ່ງຄະນະຜູ້ແທນການທູດ (ໄປຮ່ວມການແຂ່ງຂັນກິລາໂອລິມແລະໂອລິມປິກຄົນພິການຢູ່ປັກກິ່ງ) ແມ່ນເປັນການສົ່ງຂ່າວດັ່ງກ່າວ.”