Accessibility links

Breaking News

ບົດບັນນາທິການ: ສະຫະລັດ ສະໜັບສະໜຸນ ປະຊາທິປະໄຕ ສຳ​ລັບປະເທດເວເນຊູເອລາ


ຜູ້​ນຳ​ພັກ​ຝ່າຍ​ຄ້ານ​ໃນ​ເວ​ເນ​ຊູ​ເອ​ລາ ທ່ານ Juan Guaidó.

ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ

ສະ​ຫະ​ລັດ​ຂໍ​ສະ​ແດງ​ຄວາ​ມ​ຍິນ​ດີ​ກັບ​ຂໍ້​ຕົກ​ລົງ ທີ່​ບັນ​ລຸ​ກັນ​ໂດຍ​ຜູ້​ນຳສະ​ພາ​ແຫ່ງ​ຊາດ ທີ່​ຖືກ​ເລືອກ​ແບບປະ​ຊາ​ທິ​ປະ​ໄຕ​ຂອງ​ເວ​ເນ​ຊູ​ເອ​ລາ ໃນ​ປີ 2015 ທີ່ຈະ​ຕໍ່ສິດ​ອຳ​ນາດ​ໃນ​ການ​ເປັນ​ຕົວ​ແທນ​ຂອງ​ຕົນ ອ​ອກ​ໄປ​ຕື່ມ​ອີກ​ນຶ່ງ​ປີ ໂດຍ​ໃຫ້ທ່ານ​ຮ​ວານ ກົວ​ອີ​ໂດ​ ເປັນ​ປະ​ທານ​ຊົ່ວ​ຄາວ. ສະ​ຫະ​ລັດ ​ຍັງ​ສືບ​ຕໍ່​ຮັບ​ຮູ້​ສິດ​ອຳ​ນາດ ຂອງ​ສະ​ພາ​ແຫ່ງ​ຊາດ ທີ່​ຖືກ​ເລືອກ​ໃນ​ປີ 2015 ນັ້ນ​ ເປັນ​ສະ​ຖາ​ບັນ​ປະ​ຊາ
ທິ​ປະ​ໄຕ​ທີ່​ຍັງ​ເຫຼືອ​ຢູ່​ແຫ່ງ​ສຸດ​ທ້າຍ ຂ​ອງ​ປະ​ເທດ​ເວ​ເນ​ຊູ​ເອ​ລາ.

ແບບ​ແຜນ​ການ​ກົດ​ຂີ່​ທາງ​ດ້ານ​ການ​ເມືອງ ​ຂອງ​ອຳ​ນາດ​ການ​ປົກ​ຄອງ​ນິ​ໂກ​ລາ​ສ ມາ​ດູ​ໂຣ ການ​ລ່ວງ​ລະ​ເມີດ​ສິດ​ທິ​ມະ​ນຸດ​ຢ່າງ​ແຜ່ກວ້າງ ຕະ​ຫຼອດ​ທັງ​ການ​ຈຳ​ກັດຮັດ​ແຄບ​ຢ່າງ​ເຄັ່ງ​ຄັດ​ຕໍ່​ພວກ​ນັກ​ເຄື່ອນ​ໄຫ​ວ​ທາງ​ດ້ານ​ການ​ເມືອງ​ແລະ​ກຸ່ມ​ສັງ​ຄົມພົນ​ລະ​ເຮືອນແລະ​ອິດ​ສະ​ຫຼະ​ພາບ​ໃນ​ການ​ສະ​ແດງ​ຄວາມ​ຄິດ​ຄວາມ​ເຫັນ ໄດ້​ລັກຂະ​ໂມຍ​ເອົາສິດ​ອຳ​ນາດ​ໃນ​ການ​ຊີ້​ຊະ​ຕາ​ກຳ​ຕົນ​ເອງ ​ຂອງ​ປະ​ຊາ​ຊົນ​ຊາວ​ເວ​ເນ​ຊູ​ເອ​ລາ. ທ່ານ​ເນດ ໄພ​ຣ​ສ໌ ໂຄ​ສົກ​ຂອງ​ກະ​ຊວງ​ການ​ຕ່າງ​ປະ​ເທດ​ສະ​ຫະ​ລັດ​ກ່າວ
ຢູ່​ໃນ​ຖະ​ແຫຼງ​ການ​ສະ​ບັບ​ນຶ່ງວ່າ “ພວກ​ເຮົາ​ສະ​ໜັບ​ສະ​ໜຸນ​ຄວາມ​ພະ​ຍາ​ຍາມ..ເພື່ອ​ສ້າງ​ຕັ້ງ​ກົດ​ລະ​ບຽບ ແລະ​ການ​ປົກ​ຄອງ​ດ້ວຍ​ຕົວ​ບົດ​ກົດ​ໝາຍ​ຢູ່​ໃນ​ເວ​ເນ​ຊູ​ເອລາ.”

ທ່ານ​ເນດ ໄພ​ຣ​ສ໌ ກ່າວ​ຕື່ມ​ວ່າ “ພວກ​ເຮົາ​ຂໍ​ຮຽກ​ຮ້ອງ ​ໃຫ້​ນິ​ໂກ​ລາ​ສ ມາ​ດູ​ໂຣທຳ​ການພົວ​ພັນ​ຄືນ​ໃໝ່ ກັບ​ເມັກ​ຊິ​ໂກ ​ແລະ​ໃຫ້ພົວ​ພັນ​ດ້ວຍ​ຄວາມ​ຈິງ​ໃຈ ເພື່ອ​ເຫັນແກ່​ຜົນ​ປະ​ໂຫຍດ ​ຂອ​ງ​ປະ​ຊາ​ຊົນ​ ຊາວ​ເວ​ເນ​ຊູ​ເອ​ລາ. ພວກ​ເຮົາ​ຈະ​ສືບ​ຕໍ່​ເຮັດ​ວຽກຮ່ວ​ມ​ກັບ​ຊາວ​ເວ​ເນ​ຊູ​ເອ​ລາ​ ໃນ​ຂອບ​ເຂດ​ທີ່ກວ້າງ​ຂວາງ ແລະ​ຄູ່​ຮ່ວມ​ງານລະ​ຫວ່າງ​ປະ​ເທດ ໂດຍ​ນຳ​ໃຊ້​ທຸກ​ເຄື່ອງ​ມື​ອັນ​ເໝາະ​ສົມ​ທາງ​ດ້ານ​ການ​ທູດ​ແລະເສ​ດ​ຖະ​ກິດ ເພື່ອ​ກົດ​ດັນ​ໃຫ້​ມີ​ການ​ປ່ອຍພວກ​ທີ່​ຖື​ກ​ຄຸມ​ຂັງ​ຢ່າງ​ບໍ່​ເປັນ​ທຳທັງ​ໝົດ​ຍ້ອນ​ເຫດ​ຜົນ​ທາງ​ດ້ານ​ການ​ເມືອງ ຄວາມ​ເປັນ​ອິດ​ສະ​ຫ​ລະຂອງ​ພັກ​ການ​ເມືອງການ​ເຄົາ​ລົບ​ຕໍ່​ສິດ​ເສ​ລີ​ພາບ​ໃນ​ການ​ສະ​ແດງ​ຄວາມ​ຄິດ​ຄວາມ​ເຫັນແລະ​ສິດ​ທິ​ມະນຸດ​ສາ​ກົນ​ອື່ນໆ ແລະ​ຢຸດ​ເຊົາ​ການ​ລ່ວງ​ລະ​ເມີດ​ສິດ​ທິ​ມະ​ນຸດ.” ຍິ່ງ​ໄປ​ກວ່ານັ້ນ ສະ​ຫະ​ລັດ​ຍັງ​ຈະ​ສືບ​ຕໍ່​ເຮັດ​ວຽກ​ຮ່ວມ​ກັນ​ກັບ​ສະ​ມາ​ຊິກ​ຂອງ​ປະ​ຊາ​ຄົມ​ນາໆ​ຊາດ ເພື່ອ​ກົດ​ດັນ​ໃນ​ການ​ສ້າງ​ເງື່ອນ​ໄຂ​ທີ່​ເອື້ອ​ອຳ​ນວຍ​ໃຫ້​ມີ​ການ​ເລືອກ​ຕັ້ງ​ທີ່​ເສ​ລີ​ແລະ
ເປັນ​ທຳ ຢູ່​ໃນ​ປະ​ເທດ​ເວ​ເນ​ຊູ​ເອ​ລາ.

ສະ​ຫະ​ລັດຍັງ​ໃຫ້​ການ​ສະ​ໜັບ​ສະ​ໜຸນ​ຕໍ່​ການ​ດຳ​ເນີນ​ຄວາມ​ພະ​ຍາ​ຍາມ​ເພື່ອ​ຊ່ວຍບັນ​ເທົາ​ຄວາມ​ທຸກ​ທໍ​ລະ​ມານ​ຂອງ​ປະ​ຊາ​ຊົນ​ຊາວ​ເວ​ເນ​ຊູ​ເອ​ລາແລະ​ເຮັດ​ໃຫ້​ວິ​ກິດການ​ດ້ານ​ມະ​ນຸດ​ສະ​ທຳ ​ໃນ​ປະ​ເທດ​ດັ່ງ​ກ່າວ​ສິ້ນ​ສຸດ​ລົງ. ນັບ​ແຕ່​ປີ 2017 ເປັນ​ຕົ້ນ​ມາ ສະ​ຫະ​ລັດ​ໄດ້​ສະ​ໜອງ​ການ​ຊ່ວຍ​ເຫຼືອ​ທາງ​ດ້ານ​ມະ​ນຸດ​ສະ​ທຳ ການ​ພັດທະ​ນາ​ທາງ​ດ້ານເສດ​ຖະ​ກິດ ​ແລະ​ການ​ຊ່ວຍ​ເຫຼືອ​ທາງ​ດ້ານ​ສາ​ທາ​ລະ​ນະ​ສຸກ​ໃຫ້ແກ່​ປະ​ຊາ​ຊົນ​ຊາວ​ເວ​ເນ​ຊູ​ເອ​ລາ ທັງ​ຢູ່​ພາຍ​ໃນ​ປະ​ເທດ ແລະ​ພວກ​ທີ່​ຖືກ​ບັງ​ຄັບ ໃຫ້ຫຼົບໜີ​ ອອກ​ໄປ​ຢູ່​ໃນ​ປະ​ເທດ​ຕ່າງໆ ​ທົ່​ວ​ທັງ​ຂົງ​ເຂດ ຕົກ​ເປັນ​ເງິນ 1 ພັນ 900 ລ້ານໂດ​ລາ.

ສະ​ຫະ​ລັດ​ຍັງຈະ​ສືບ​ຕໍ່ເປັນ​ປະ​ເທດ​ໃຫ້​ການ​ສະ​ໜັບ​ສະ​ໜຸນ​ຢ່າງ​ແຂງ​ຂັນ​ຕໍ່​ປະ​ຊາຊົນຊາວ​ເວ​ເນ​ຊູ​ເອ​ລາ ໃນ​ຂະ​ນະ​ທີ່​ພວກ​ເຂົາ​ເຈົ້າ​ເຮັດ​ວຽກ​ເພື່ອ​ກ້າວ​ໄປ​ສູ່​ການ​ຟື້ນ​ຟູ​ປະ​ຊາ​ທິ​ປະ​ໄຕ​ດ້ວ​ຍ​ສັນ​ຕິ​ວິ​ທີ ໂດຍ​ຜ່ານ​ການ​ເລືອກ​ຕັ້ງ​ທີ່​ເສ​ລີ ແລະ​ຍຸ​ຕິ​ທຳ.

XS
SM
MD
LG