ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ເມື່ອວັນທີ 18 ມັງກອນຜ່ານມານີ້ ສະຫະລັດໄດ້ທຳການລົງໂທດຕໍ່ຜູ້ຊ່ວຍອຳນວຍຄວາມສະດວກທາງດ້ານການເງິນ 3 ຄົນທີ່ພົວພັນກັບກຸ່ມເຮັສໂບລລາແລະບໍລິສັດເດີນທາງທີ່ມີສຳນັກງານຕັ້ງຢູ່ໃນເລບານອນ. ລັດຖະມົນຕີການຕ່າງປະເທດສະຫະລັດ ທ່ານແອນໂທນີ ບລິງເກັນກ່າວຢູ່ໃນຖະແຫຼງການສະບັບນຶ່ງວ່າ “ພວກເຮົາເອົາມາດຕະການນີ້ ກໍແມ່ນເພື່ອຄວາມເປັນນ້ຳນຶ່ງໃຈດຽວກັບປະຊາຊົນຊາວເລບານອນ ທີ່ຄວາມປອດໄພແລະອະທິປະໄຕຂອງພວກເຂົາເຈົ້າຍັງໄດ້ຮັບການຂົ່ມຂູ່ໂດຍກິດຈະກຳທີ່ບໍ່ດີແລະທຳລາຍສະຖຽນລະພາບຂອງກຸ່ມເຮັສໂບລລາ.”
ສ່ວນບຸກຄົນທີ່ຖືກລະບຸຊື່ ກໍມີ ທ້າວອັບແດລ ດີອາບ, ອາລີ ໂມຮຳໝັດ ດາອູນ ແລະທ້າວຈີຮາດ ຊາເລັມ ອາລາເມ. ບໍລິສັດທີ່ພວກເຂົາຕັ້ງຂຶ້ນ ແມ່ນບໍລິສັດເດີນທາງແລະການທ່ອງທ່ຽວດາ ອາລ ຊາລາມ. ການລະບຸຊື່ດັ່ງກ່າວ ໄດ້ມີຂຶ້ນພາຍໃຕ້ດຳລັດຂອງຝ່າຍບໍລິຫານເລກທີ 13224 ທີ່ແນເປົ້າໝາຍໃສ່ພວກກໍ່ການຮ້າຍ ພວກຜູ້ນຳ ແລະເຈົ້າໜ້າທີ່ຂອງກຸ່ມກໍ່ການຮ້າຍແລະພວກທີ່ໃຫ້ການການສະໜັບສະໜຸນພວກກໍ່ການຮ້າຍ ຫຼືດຳເນີນການທີ່ເປັນການກໍ່ການຮ້າຍ.
ເມື່ອວັນທີ 21 ມັງກອນຜ່ານມານີ້ ສະຫະລັດຍັງໄດ້ລະບຸຊື່ທ້າວອັດນັນ ອາຢັດ ຜູ້ອຳນວຍຄວາມສະດວກທາງດ້ານການເງິນ ຂອງກຸ່ມເຮັສໂບລລາເຂົ້າຕື່ມ ຕະຫຼອດທັງສະມາຊິກຂອງຕາໜ່າງອຳນວຍຄວາມສະດວກລະຫວ່າງປະເທດແລະບໍລິສັດຕ່າງໆທີ່ເຊື່ອມໂຍງກັບລາວ ແລະທ້າວອັບແດລ ດີອາບ ຊຶ່ງເປັນຮຸ້ນສ່ວນທາງດ້ານທຸລະກິດຂອງທ້າວອາຢັດ ແລະເພື່ອນນັກການເງິນກຸ່ມເຮັສໂບລລາຂອງລາວ ພາຍໃຕ້ອຳນາດກົດໝາຍດຽວກັນນີ້.
ສະຫະລັດໄດ້ລະບຸໃຫ້ກຸ່ມເຮັສໂບລລາ ເປັນອົງການກໍ່ການຮ້າຍຕ່າງປະເທດໃນວັນທີ 8 ຕຸລາ ປີ 1997 ແລະຖືກລະບຸ ໃຫ້ເປັນອົງການ ກໍ່ການຮ້າຍລະດັບໂລກໃນວັນທີ 31 ຕຸລາ ປີ 2001. ກຸ່ມເຮັສໂບລລາເປັນຜູ້ຮັບຜິດຊອບໃນການໂຈມຕີກໍ່ການຮ້າຍ ທີ່ຮ້າຍແຮງສຸດຈຳນວນນຶ່ງ ຮວມທັງການວາງລະເບີດໃສ່ຄ້າຍທະຫານມາຣີນສະຫະລັດ ທີ່ນະຄອນເບຣຸດ ໃນປີ 1983 ທີ່ເຮັດໃຫ້ທະຫານອາເມຣິກັນ 241 ຄົນເສຍຊິວິດ ການໂຈມຕີສູນກາງປະຊາຄົມຊາວຢິວ AMIA ທີ່ນະຄອນຫຼວງບູແອນົສແອເຣັສ ຊຶ່ງເຮັດໃຫ້ມີຜູ້ເສຍຊີວິດ 85 ຄົນ ແລະໄດ້ຮັບບາດເຈັບອີກຫຼາຍຮ້ອຍຄົນ ແລະການລອບສັງຫານມື້ລາງ ນາຍົກລັດຖະມົນຕີເລບານອນ ທ່ານຣາຟິກ ຮາຣີຣີ ໃນປີ 2005 ຊຶ່ງນອກນັ້ນຍັງເຮັດໃຫ້ 22 ຄົນເສຍຊີວິດ ແລະບາດເຈັບອີກ 226 ຄົນ.
ຢູ່ໃນຖະແຫຼງການເມື່ອວັນທີ 18 ມັງກອນຜ່ານມານີ້ ກະຊວງການເງິນຂອງສະຫະລັດກ່າວວ່າ “ການລະບຸຊື່… ສະແດງໃຫ້ເຫັນເຖິງຄວາມພະຍາຍາມທີ່ຍັງດຳເນີນຢູ່ຕໍ່ມາຂອງກະຊວງການເງິນ ເພື່ອແນເປົ້າໝາຍໃສ່ການສືບຕໍ່ຂອງກຸ່ມເຮັສໂບລລາ ທີ່ຈະສວຍໃຊ້ພາກສ່ວນການເງິນຂອງໂລກແລະຫຼົບຫຼີກການລົງໂທດ.”
ເລບານອນຊຶ່ງຄັ້ງນຶ່ງເຄີຍເປັນປະເທດທີ່ຈະເລີນຮຸ່ງເຮືອງ ເວລານີ້ພວມຕົກຢູ່ໃຕ້ວິກິດການທາງດ້ານເສດຖະກິດທີ່ຮ້າຍແຮງ ໂດຍທີ່ສາມສ່ວນສີ່ຂອງປະຊາກອນດຳລົງຊີວິດຢູ່ພາຍໃຕ້ຄວາມທຸກຍາກ.
ຮອງລັດຖະມົນຕີກະຊວງການເງິນ ຮັບຜິດຊອບໃນເລື່ອງພວກກໍ່ການຮ້າຍແລະຂ່າວກອງດ້ານການເງິນ ທ່ານບຣາຍແອນ ແນລສັນຂຽນວ່າ “ກຸ່ມເຮັສໂບລລາກ່າວອ້າງວ່າ ຕົນໃຫ້ການສະໜັບສະໜຸນແກ່ປະຊົນຊາວຊາວເລບານອນ ແຕ່ກໍບໍ່ຕ່າງຫຍັງກັບກຸ່ມທີ່ບໍ່ດີອື່ນໆໃນປະເທດເລບານອນ ທີ່ກະຊວງການເງິນໄດ້ລະບຸຊື່ ກຸ່ມເຮັສໂບລລາ ຍັງສືບຕໍ່ໄດ້ຮັບຜົນກຳໄລ ຈາກທຸລະກິດທີ່ໄດ້ຮັບການປົກປ້ອງ ແລະການຕົກລົງທາງການເມືອງທີ່ຜິດກົດໝາຍ ແລະການສ້າງຮັ່ງຄູນມີທີ່
ປະຊາຊົນຊາວເລບານອນບໍ່ເຄີຍເຫັນມາກ່ອນ.”
ລັດຖະມົນຕີການຕ່າງປະເທດບລິງເກັນ ກ່າວວ່າ “ກຸ່ມເຮັສໂບລລາ ແລະຄູ່ຮ່ວມງານ ມີຄວາມເປັນຫ່ວງກັງວົນ ໃນການສ້າງຄວາມກ້າວໜ້າໃຫ້ແກ່ຜົນປະໂຫຍດຂອງຕົນ ແລະອີຣ່ານທີ່ໃຫ້ການສະໜັບສະໜຸນ ຫຼາຍໄປກວ່າຜົນປະໂຫຍດຂອງປະຊາຊົນຊາວເລບານອນ.”
ສະຫະລັດຈະສືບຕໍ່ເອົາບາດກ້າວເພື່ອລົບກວນກິດຈະກຳທີ່ເປັນອັນຕະລາຍແລະສ້າງຄວາມບໍ່ທຸ່ນທ່ຽງຂອງກຸ່ມເຮັສໂບລລາ.