ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ສະຫະລັດ ໃຫ້ການຢືນຢັນອີກເທື່ອນຶ່ງ ໃນການໃຫ້ຄວາມໝັ້ນໝາຍທາງດ້ານການເງິນ ຕໍ່ປະຊາຊົນຢູເຄຣນ. ລັດຖະມົນຕີການຕ່າງປະເທດສະຫະລັດ ທ່ານແອນໂທນີ ບລິງເກັນ ໄດ້ປະກາດ ການໃຫ້ເງິນກູ້ຢືມທີ່ໄດ້ຮັບການຄ້ຳປະ ກັນຂອງສະຫະລັດຕໍ່ຢູເຄຣນ ຫຼາຍເຖິງ 1 ພັນລ້ານໂດລາເພື່ອສະໜັບສະໜຸນການປະຕິຮູບເສດຖະກິດ ແລະການສືບຕໍ່ພົວພັນກັບອົງການກອງທຶນສາກົນ ຫຼື
IMF. ລັດຖະມົນຕີການຕ່າງປະເທດບລິງເກັນກ່າວຢູ່ໃນຖະແຫຼງການວ່າ “ຂໍ້ສະເໜີນີ້ ປະກອບກັບການເປັນພາຄີ ລະຫວ່າງຢູເຄຣນ ອົງການ IMF ສະຖາບັນການເງິນລະຫວ່າງປະເທດອື່ນໆ ກຸ່ມຈີ 7 ຕະຫຼອດທັງບັນດາຜູ້ໃຫ້ການບໍລິຈາກ 2 ຝ່າຍອື່ນໆ ຈະເສີມຄວາມເຂັ້ມແຂງ ໃຫ້ແກ່ສະຖຽນລະພາບທາງດ້ານເສດຖະກິດຂອງຢູເຄຣນ ການເຕີບໂຕ ແລະຄວາມອຸດົມຮັ່ງມີ ທ່າມກາງ ທີ່ປະເຊີນໜ້າກັບຮຸກຮານຂອງຣັດເຊຍ.”
ລະຫວ່າງປີ 2014 ຫາ 2016 ສະຫະລັດ ໄດ້ໃຫ້ການຄ້ຳປະກັນແກ່ການກູ້ຢືມຂອງລັດຖະບານຢູເຄຣນ ໃນມູນຄ່າ 1 ພັນລ້ານໂດລາ 3 ເທື່ອດ້ວຍກັນ ໂດຍຄ້ຳປະກັນວ່າ ຜູ້ໃຫ້ເງິນກູ້ຈະໄດ້ຮັບການຈ່າຍເງິນຄືນ ຫຼັງຈາກຣັດເຊຍເລີ້ມການຢຶດຄອງແຫຼມໄຄຣເມຍ. ລັດຖະມົນຕີການຕ່າງປະເທດບລິງເກັນກ່າວວ່າ “ເງິນກູ້ທີ່ໄດ້ຮັບການຄ້ຳປະກັນເຫຼົ່ານີ້ ມີບົດບາດສຳຄັນ ໃນການຊ່ວຍຢູເຄຣນ ໃຫ້ປະສົບຄວາມສຳເລັດ ໃນການສ້າງສະຖຽນລະພາບທາງດ້ານເສດຖະກິດ ທ່າມກາງການຮຸກຮານໃນເທື່ອກ່ອນຂອງຣັດເຊຍ ແລະການຈັດຕັ້ງປະຕິບັດການປະຕິຮູບເສດຖະກິດທີ່ກ້າຫານ ທີ່ໄດ້ຮັບການສະໜັບສະໜຸນໂດຍການຮ່ວມມືກັບອົງການ
ກອງທຶນ IMF.”
ສະຫະລັດໄດ້ສະໜອງການຊ່ວຍເຫຼືອ ໃນດ້ານການພັດທະນາຫຼາຍກວ່າ 2 ພັນລ້ານໂດລາໃຫ້ແກ່ຢູເຄຣນ ນັບແຕ່ປີ 2014 ເປັນຕົ້ນມາ. ນອກນັ້ນລັດຖະບານສະຫະລັດຍັງໄດ້ເຮັດວຽກ ເພື່ອຊຸກຍູ້ໃນການປະກອບສ່ວນເຂົ້າຮ່ວມ ທາງດ້ານການຄ້າໂດຍບໍລິສັດຕ່າງໆຂອງສະຫະລັດໃນທຸກໆຂະແໜງການຂອງເສດຖະກິດຢູເຄຣນ.
ທະນາຄານຂາອອກ-ຂາເຂົ້າຂອງສະຫະລັດ ມີຄວາມຕັ້ງໃຈ ທີ່ຈະກະກຽມເງິນຫຼາຍເຖິງ 3 ພັນລ້ານໂດລາເພື່ອອຳນວຍຄວາມສະດວກໃນການຊື້ສິນຄ້າແລະ ບໍລິການຂອງສະຫະລັດ ສຳລັບໂຄງການຕ່າງໆໃນຢູເຄຣນ ໃນຂະນະທີ່ບໍລິສັດການເງິນເພື່ອການພັດທະນາລະຫວ່າງປະເທດຂອງສະຫະລັດທຳການລົງທຶນຢູ່ໃນຢູເຄຣນ ປະມານ 800 ລ້ານໂດລາ ຢູ່ໃນ 10 ກວ່າໂຄງການທີ່ນັ້ນ.
ລັດຖະມົນຕີການຕ່າງປະເທດບລິງເກັນ ກ່າວວ່າ ສະຫະລັດ “ຈະສືບຕໍ່ຊອກຫາຊ່ອງທາງເພື່ອໃຫ້ການສະໜັບສະໜຸນແກ່ຢູເຄຣນ ແລະປະເທດຊົນຂອງປະເທດດັ່ງກ່າວ” ຮັບມືກັບໄພອັນຕະລາຍທີ່ຈະແຈ້ງ ແລະຍັງມີຢູ່ ໃນການຮຸກຮານຂອງປະເທດຣັດເຊຍ.