ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ສປປ ເກົາຫຼີ ໄດ້ຍິງທົດລອງລູກສອນໄຟຂີປະນາວຸດ ຄັ້ງທີ 10 ໃນປີນີ້ ເມື່ອວັນທີ 27 ກຸມພາຜ່ານມາ ຊຶ່ງອີກເທື່ອນຶ່ງ ເປັນການລະເມີດຕໍ່ມະຕິຫຼາຍໆສະບັບຂອງສະພາຄວາມໝັ້ນຄົງ ອົງການສະຫະປະຊາຊາດ. ສະຫະລັດ ພ້ອມກັບປະເທດອື່ນໆອີກ 10 ປະເທດໄດ້ປະນາມ “ດ້ວຍຄຳເວົ້າທີ່ແຮງສຸດ” ຕໍ່ການກະທຳຂອງ ສປປ ເກົາຫຼີ ນັ້ນວ່າ “ຜິດກົດໝາຍແລະທຳລາຍສະຖຽນລະພາບ.”
ເຈົ້າໜ້າທີ່ຍີ່ປຸ່ນ ແລະສາທາລະນະລັດເກົາຫຼີ ລາຍງານວ່າ ລູກສອນໄຟຂອງ ສປປ ເກົາຫຼີ ໄດ້ຍິງໄປໄກກວ່າ 300 ກິໂລແມັດ ແລະສູງເຖິງ 600 ກິໂລແມັດ ກ່ອນຈະຕົກລົງໃສ່ທະເລ ລະຫວ່າງປະເທດເກົາຫຼີ ແລະຍີ່ປຸ່ນ.
ກິດຈະກຳດັ່ງກ່າວນີ້ ແມ່ນໄດ້ຖືກຫ້າມໂດຍມະຕິຕ່າງໆ ຂອງສະພາຄວາມໝັ້ນຄົງອົງການສະຫະປະຊາຊາດ.
ໃນຖະແຫຼງການຮ່ວມຂອງ 11 ປະເທດກ່ຽວກັບການທົດລອງຂອງ ສປປ ເກົາຫຼີນັ້ນ ເອກອັກຄະລັດຖະທູດແຈັຟ ດີລໍເຣັນຕິສ ທີ່ປຶກສາອະວຸໂສທາງດ້ານການເມືອງ ປະຈຳສຳນັກງານຜູ້ຕາງໜ້າຂອງສະຫະລັດ ທີ່ອົງການສະຫະປະຊາຊາດ ໄດ້ຮຽກຮ້ອງໃຫ້ສະມາຊິກທຸກໆປະເທດ ຂອງສະພາຄວາມໝັ້ນຄົງສະຫະປະຊາຊາດ “ໃຫ້ເວົ້າເປັນສຽງດຽວກັນ ເພື່ອປະນາມ ຕໍ່ການກະທຳ ທີ່ເປັນອັນຕະລາຍ ແລະຜິດກົດໝາຍເຫຼົ່ານີ້. ອາລບາເນຍ ບຣາຊີລ ຝຣັ່ງ ໄອຣ໌ແລນ ຍີ່ປຸ່ນ ນໍເວ
ສະຫະຣາຊະອານາຈັກ ແລະສະຫະລັດ ກ່ອນໜ້ານີ້ເຄີຍໄດ້ສະແດງຄວາມເປັນຫ່ວງຂອງພວກເຮົາ ຢ່າງຈະແຈ້ງ ແລະບໍ່ມີຄວາມຄຸມເຄືອ ໃດໆມາແລ້ວ. ການ ປະນາມເປັນສຽງດຽວກັນຕໍ່ການກະທຳຂອງ ສປປ ເກົາຫຼີແມ່ນເພີ້ມທະວີຂຶ້ນນຳນັບມື້” ນັ້ນຄືຄຳເວົ້າ ຂອງທ່ານດີລໍເຣັນຕິສທີ່ໄດ້ກ່າວໄວ້ ແລະທ່ານກ່າວຕື່ມວ່າ “ມາຮອດມື້ນີ້ ກໍມີອອສເຕຣເລຍ ນິວຊີແລນ ແລະ ສາທາລະນະລັດເກົາຫຼີ ເຂົ້າຮ່ວມນຳດ້ວຍ.”
ທ່ານກ່າວຕື່ມວ່າ “ພວກເຮົາຂໍຮຽກຮ້ອງໃຫ້ສະມາຊິກທຸກໆປະເທດ ຈັດຕັ້ງປະຕິບັດໂດຍເຕັມ ທຸກໆມະຕິຂອງສະພາຄວາມໝັ້ນຄົງ ທີ່ພົວພັນກັບ ສປປ ເກົາຫຼີ. ມະຕິຂອງສະພາຄວາມໝັ້ນຄົງເຫຼົ່ານີ້ ຍັງຜູກມັດ ໃຫ້ ສປປ ເກົາຫຼີ ປະຖິ້ມໂຄງການອາວຸດທີ່ມີອະນຸພາບຮ້າຍແຮງ ແລະລູກສອນໄຟຂີປະນາວຸດ ຢ່າງສິ້ນເຊີງ ແລະໃນວິທີທີ່ກວດສອບໄດ້ແລະຕ່າວປີ້ນຄືນບໍ່ໄດ້. ການລົງໂທດຂອງລະຫວ່າງເທດຕໍ່ອຳນາດການປົກຄອງເກົາຫຼີເໜືອ ແມ່ນເປັນເຄື່ອງມືອັນສຳຄັນເພື່ອແກ້ໄຂໄພຂົ່ມຂູ່ນີ້ ຕໍ່ສັນຕິພາບແລະຄວາມໝັ້ນຄົງຂອງລະຫວ່າງປະເທດ.”
ສະຫະລັດ ແລະ ສປປ ເກົາຫຼີ ບໍ່ໄດ້ມີການເຈລະຈາຢ່າງເປັນທາງການ ມາໄດ້ ດົນກວ່າ 2 ປີແລ້ວ ແຕ່ສະຫະລັດກໍໄດ້ສະແດງໃຫ້ເຫັນຊ້ຳແລ້ວຊ້ຳອີກວ່າ ຕົນພ້ອມແລ້ວທີ່ຈະທຳການພົວພັນທາງດ້ານການທູດຢ່າງຈິງຈັງ ແລະຍືນຍົງ ກັບພຽງຢາງ.
ເອກອັກຄະລັດຖະທູດດີລໍເຣັນຕິສ ໄດ້ຮຽກຮ້ອງອີກເທື່ອນຶ່ງ ໃຫ້ ສປປ ເກົາຫຼີເລືອກເອົາເສັ້ນທາງ ທາງດ້ານການທູດ ເພື່ອຫຼຸດຜ່ອນຄວາມເຄັ່ງຕຶງ ຢູ່ໃນຂົງເຂດ ແລະຊຸກຍູ້ໃຫ້ມີສັນຕິພາບ ແລະຄວາມໝັ້ນຄົງລະຫວ່າງປະເທດ. ພວກເຮົາແມ່ນພ້ອມແລ້ວທີ່ຈະເຂົ້າຮ່ວມການພົວພັນ” ນັ້ນຄືການປະກາດຂອງທ່ານ “ແລະພວກເຮົາຈະບໍ່ມີຄວາມຫວັ່ນໄຫວ ໃນການຊອກສະແຫວງຫາສັນຕິພາບ ແລະສະຖຽນລະພາບຂອງພວກເຮົາ.”