ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ເມື່ອວັນທີ 14 ກຸມພາຜ່ານມາ ປະທານາທິບໍດີຣັດເຊຍ ທ່ານວລາດີເມຍ ປູຕິນ ໄດ້ສັ່ງໃຫ້ກຳລັງທະຫານ ແລະໜ່ວຍສືບລັບຣັດເຊຍ ບຸກເຂົ້າໄປໃນປະເທດຢູເຄຣນ. ປູຕິນຄຳນວນວ່າ ກອງທັບຣັດເຊຍ ອີກຄັ້ງນຶ່ງສາມາດບຸກຂ້າມຊາຍແດນເຂົ້າໄປໃນຢູເຄຣນ ໂດຍຈະໄດ້ຮັບການຕ້ອງຕິພຽງເລັກນ້ອຍ ບໍ່ເຖິງຂັ້ນຖືກໂລກປະນາມ ເຖິງແມ່ນສະຫະລັດ ປະເທດພັນທະມິດ ແລະພາຄີໄດ້ສັນຍາໄວ້ແລ້ວວ່າ ຈະມີຜົນທີ່ຕິດຕາມມາຢ່າງວ່ອງໄວແລະຮ້າຍແຮງ ແລະຫຼັງຈາກທີ່ໄດ້ມີການດຳເນີນຄວາມພະຍາຍາມທາງດ້ານການທູດຢ່າງຂຸ້ນຂ້ຽວ ເພື່ອຫາລືກ່ຽວກັບຄວາມວິຕົກກັງວົນ ໃນດ້ານຄວາມປອດໄພຂອງຣັດເຊຍ. ປູຕິນໄດ້ຄຳນວນຜິດພາດ.
ປະທານາທິບໍດີໂຈ ໄບເດັນ ກ່າວໃນຄຳປາໄສຕໍ່ສະພາແລະປະເທດຊາດ ເມື່ອວັນທີ 1 ມີນາຜ່ານມານີ້ວ່າ “ວລາດີເມຍ ປູຕິນ ໄດ້ຊອກຫາທາງທີ່ຈະເຮັດໃຫ້ພື້ນຖານຂອງໂລກເສລີສັ່ນຄອນ ໂດຍຄິດວ່າລາວສາມາດເຮັດໃຫ້ມັນປ່ຽນແປງໄປຕາມວິທີທີ່ລາວໄດ້ຂົ່ມຂູ່. ແຕ່ລາວໄດ້ຄຳນວນຜິດພາດຢ່າງຮ້າຍແຮງ. ລາວຄິດວ່າ ລາວສາມາດບຸກເຂົ້າໄປໃນຢູເຄຣນ ແລະໂລກກໍຈະຢຸດເຊົາການຕ້ານຢັນ. ລາວຄິດວ່າປະເທດຕາເວັນຕົກແລະອົງການເນໂຕ້ຈະບໍ່ຕອບໂຕ້ຄືນ ແລະ ລາວຄິດວ່າ ລາວສາມາດແບ່ງແຍກພວກເຮົາ ຢູ່ໃນປະເທດຂອງເຮົາໄດ້. ປູຕິນ ແມ່ນຜິດພາດໃນເລື້ອງນີ້. ພວກເຮົາແມ່ນພ້ອມແລ້ວ.”
“ພວກເຮົາໄດ້ກະກຽມແບບຮອບດ້ານແລະຢ່າງລະມັດລະວັງ. ພວກເຮົາໄດ້ໃຊ້ເວລາຫຼາຍໆເດືອນ ເພື່ອສ້າງຕັ້ງແນວໂຮມ ຂອງບັນດາປະເທດທີ່ຮັກຫອມສິດເສລີພາບ ນັບແຕ່ຢູໂຣບ ຫາອາເມຣິກາຕະຫຼອດທັງເອເຊຍແລະອາຟຣິກາເພື່ອປະ ເຊີນໜ້າກັບປູຕິນ.”
ປະທານາທິບໍດີໄບເດັນ ກ່າວວ່າ “ພວກເຮົາໄດ້ແຈ້ງໃຫ້ໂລກຮູ້ລ່ວງໜ້າກ່ຽວກັບສິ່ງທີ່ພວກເຮົາຮູ້ວ່າ ປູຕິນວາງແຜນຈະເຮັດຫຍັງ ແລະຮູ້ຢ່າງຄັກແນ່ວ່າລາວຈະພະຍາຍາມນຳເອົາເຫດຜົນທີ່ຜິດໆເພື່ອມາສະໜັບສະໜຸນການຮຸກຮານຂອງລາວແບບໃດ. ພວກເຮົາໄດ້ຕອບໂຕ້ ຕໍ່ການຕົວະລ່າຍຂອງຣັດເຊຍ ດ້ວຍຄວາມຈິງ ແລະເວລານີ້ ລາວໄດ້ດຳເນີນການໄປແລ້ວ ແລະ ໂລກເສລີຖືວ່າລາວເປັນຜູ້ຮັບຜິດຊອບ.
“ພວກເຮົາໄດ້ຕັດທະນາຄານ ທີ່ໃຫຍ່ໆຂອງຣັດເຊຍ ອອກຈາກລະບົບການເງິນຂອງໂລກ. ປ້ອງກັນບໍ່ໃຫ້ທະນາຄານກາງຂອງຣັດເຊຍ ປົກປ້ອງເງິນຣູເບີຂອງຣັດເຊຍໄດ້ ເຮັດໃຫ້ ‘ກອງທຶນສົງຄາມ” ໃນມູນຄ່າ 630 ພັນລ້ານຂອງປູຕິນບໍ່ມີລາຄາຫຍັງເລີຍ. ພວກເຮົາໄດ້ຕັດຂາດບໍ່ໃຫ້ຣັດເຊຍເຂົ້າເຖິງເທັກໂນໂລຈີ ທີ່ຈະຊ່ວຍຫຼໍ່ລ້ຽງໃຫ້ເສດຖະກິດເຂັ້ມແຂງ ແລະເຮັດໃຫ້ກອງທັບຂອງປະເທດອ່ອນແອລົງໃນຊຸມປີຕໍ່ໜ້າ.”
ພວກເຮົາໄດ້ປິດເຂດນ່ານຟ້າຂອງອາເມຣິກາ ຕໍ່ທຸກໆຖ້ຽວບິນຂອງຣັດເຊຍ ສ້າງຄວາມໂດດດ່ຽວໃຫ້ແກ່ຣັດເຊຍຂຶ້ນຕື່ມແລະກົດດັນເສດຖະກິດຂອງພວກເຂົາໃຫ້ ໜັກຂຶ້ນກວ່າເກົ່າ. ພວກເຮົາແນໃສ່ພວກທີ່ຮັ່ງມີແລະພວກຜູ້ນຳທີ່ສໍ້ລາດບັງຫຼວງຊາວຣັດເຊຍຫຼັງຈາກພວກເຂົາໄດ້ຮັ່ງມີເປັນດີຍ້ອນການກະທຳທີ່ບໍ່ຖືກຕ້ອງ ແລະໃນຂະນະດຽວກັນ ພວກເຮົາກໍໄດ້ໃຫ້ການຊ່ວຍເຫຼືອແກ່ຊາວຢູເຄຣນ ໃນຂະນະທີ່ພວກເຂົາເຈົ້າໄດ້ຕໍ່ສູ້ຕ້ານຄືນການຮຸກຮານຂອງຣັດເຊຍດ້ວຍຄວາມພິລາດອາດຫານ.
“ຮ່ວມກັນກັບພັນທະມິດຂອງພວກເຮົາແລ້ວ ພວກເຮົາພວມສະໜອງ ການສະໜັບສະໜຸນຕໍ່ປະຊາຊົນຊາວຢູເຄຣນໃນການຕໍ່ສູ້ເພື່ອອິດສະຫຼະພາບຂອງພວກເຂົາເຈົ້າ. ການຊ່ວຍເຫຼືອທາງທະຫານ. ການຊ່ວຍເຫຼືອທາງດ້ານເສດຖະກິດ. ການຊ່ວຍເຫຼືອທາງດ້ານມະນຸດສະທຳ. ພວກເຮົາໄດ້ໃຫ້ການຊ່ວຍເຫຼືອໂດຍກົງ 1 ຕື້ໂດລາຕໍ່ຢູເຄຣນ ແລະພວກເຮົາຈະສືບຕໍ່ ໃຫ້ການຊ່ວຍເຫຼືອແກ່ປະຊາຊົນຊາວຢູເຄຣນໃນຂະນະທີ່ພວກເຂົາເຈົ້າປົກປ້ອງປະເທດຊາດຂອງພວກເຂົາເຈົ້າແລະຊ່ວຍຫຼຸດຜ່ອນຄວາມທຸກທໍລະມານຂອງພວກເຂົາເຈົ້າ.”
ປະທານາທິບໍດີໄບເດັນກ່າວວ່າ “ໃນຕະຫຼອດປະຫວັດສາດຂອງພວກເຮົາ ພວກເຮົາໄດ້ຮຽນຮູ້ບົດຮຽນນີ້ ເວລາຈອມຜະເດັດການ ບໍ່ໄດ້ຈ່າຍຄ່າຄວາມເສຍຫາຍສຳລັບການຮຸກຮານຂອງພວກເຂົາແລ້ວ ພວກເຂົາຈະສ້າງຄວາມວຸ້ນວາຍຂຶ້ນຕື່ມ ປູຕິນໄດ້ປ່ອຍໃຫ້ມີການກໍ່ຄວາມຮຸນແຮງ ແລະຄວາມສັບສົນວຸ້ນວາຍຂຶ້ນ ແຕ່ໃນ
ຂະນະທີ່ລາວອາດຈະໄດ້ຮັບຄວາມກ້າວໜ້າຢູ່ໃນສະໜາມລົບ ລາວຈະຕ້ອງໄດ້ຈ່າຍຄ່າຊົດໃຊ້ທີ່ມີລາຄາແພງ ໃນໄລຍະຍາວ.”