ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ເມື່ອວັນທີ 30 ກໍລະກົດທີ່ຜ່ານມານີ້ ທ້າວເອແມນ ອາລ-ຊາວາຮີຣີ ຫົວໜ້າຂອງກຸ່ມກໍ່ການຮ້າຍອາລກາອີດາ ຊຶ່ງເປັນນຶ່ງ ໃນບັນດາຜູ້ກໍ່ການຮ້າຍທີ່ໂລກຕ້ອງການໂຕຫຼາຍທີ່ສຸດນັ້ນ ໄດ້ຖືກຂ້າຕາຍ ໃນການໂຈມຕີທາງອາກາດໂດຍເຮືອບິນບໍ່ມີຄົນຂັບ ຫຼືໂດຣນຂອງສະຫະລັດ ໃນຂະນະທີ່ລາວຢືນກິນອາກາດສົດ ຢູ່ທີ່ລະບຽງເຮືອນຂອງລາວ ໃນນະຄອນຫຼວງກາບູລ ປະເທດອັຟການິສຖານ.
ທ້າວຊາວາຮີຣີ ແມ່ນເພື່ອນຮ່ວມງານຂອງໂອຊາມາ ບິນ ລາເດັນ ມາເປັນເວລາດົນນານ ແລະຮອງຜູ້ບັນຊາການ ຊຶ່ງເປັນບຸກຄົນສຳຄັນໃນການວາງແຜນໂຈມຕີຂອງພວກກໍ່ການຮ້າຍທີ່ສຳຄັນຫຼາຍໆຄັ້ງ.
ລາວເປັນບຸກຄົນໝາຍເລກ 2 ໃນເວລາທີ່ກຸ່ມກໍ່ການຮ້າຍອາລກາອີດາທຳການໂຈມຕີ ເມື່ອເດືອນກັນຍາ ປີ 2001 ນັ້ນຄືຄຳເວົ້າ ຂອງປະທານາທິບໍດີໂຈ ໄບເດັນ.
“ລາວມີສ່ວນພົວພັນຢ່າງເລິກເຊິ່ງ ໃນການວາງແຜນເພື່ອໂຈມຕີເມື່ອວັນທີ 11 ເດືອນ 9 ຊຶ່ງເປັນນຶ່ງໃນຜູ້ທີ່ມີຄວາມຮັບຜິດຊອບຫຼາຍທີ່ສຸດ ໃນການໂຈມຕີທີ່ໄດ້ສັງຫານ 2,977 ຄົນໃນດິນແດນຂອງອາເມຣິກາ. ນັບເປັນເວລາຫຼາຍທົດສະວັດມາແລ້ວ ລາວເປັນຜູ້ວາງແຜນຢູ່ເບື້ອງຫຼັງການໂຈມຕີຕໍ່ປະຊາຊົນອາເມຣິກັນ ຮວມທັງການວາງລະເບີດໃສ່ກຳປັ່ນລົບ USS Cole ຂອງສະຫະລັດທີ່ເຮັດໃຫ້ທະຫານເຮືອສະຫະລັດ ເສຍຊີວິດ 17 ຄົນ ແລະໄດ້ຮັບບາດເຈັບອີກຫຼາຍສິບຄົນ. ລາວມີບົດບາດທີ່ສຳຄັນໃນການວາງລະເບີດໃສ່ສະຖານທູດສະຫະລັດໃນປະເທດເຄັນຢາ ແລະແທນຊາເນຍ ທີ່ເຮັດໃຫ້ 224 ຄົນເສຍຊີວິດ ແລະຫຼາຍກວ່າ 4,500 ຄົນບາດເຈັບ.”
ຫຼັງຈາກສະຫະລັດໄດ້ປະຕິບັດງານ ທີ່ສັງຫານທ້າວບິນລາເດັນໃນເດືອນພຶດສະພາປີ 2011 ແລ້ວ ທ້າວຊາວາຮີຣີ ກໍໄດ້ເຂົ້າເປັນຜູ້ນຳຂອງກຸ່ມກໍ່ການຮ້າຍອາລກາອີດາ.
“ຈາກບ່ອນຫຼົບລີ້ ລາວໄດ້ປະສານງານສາຂາຕ່າງໆຂອງກຸ່ມອາລກາອີດາແລະຢູ່ໃນທົ່ວໂລກ -- ຮວມທັງການກຳນົດບູລິມີສິດ ເພື່ອສະໜອງທິດທາງນຳພາ ສຳລັບການປະຕິບັດງານ ທີ່ຮຽກຮ້ອງໃຫ້ໄດ້ຮັບແຮງດົນໃຈ ໃນການໂຈມຕີ ຕໍ່ເປົ້າໝາຍຕ່າງໆຂອງສະຫະລັດ. ລາວໄດ້ເຮັດວີດີໂອ ຮວມທັງເມື່ອບໍ່ເທົ່າໃດອາທິດທີ່ຜ່ານມານີ້ ໂດຍຮຽກຮ້ອງໃຫ້ບັນດາຜູ້ຕິດຕາມ ໂຈມຕີສະຫະລັດ ແລະພັນທະມິດຂອງພວກເຮົາ.”
ປະທານາທິບໍດີໄບເດັນ ກ່າວວ່າ “ຫຼັງຈາກໄດ້ຊອກຫາທ້າວຊາວາຮີຣີ ຢ່າງບໍ່ຮູ້ອິດເມື່ອຍມາໄດ້ຫຼາຍໆປີ ພາຍໃຕ້ລັດຖະບານທ່ານບຸສ ໂອບາມາ ແລະ ທ່ານ ທຣຳ ປະຊາຄົມສືບລັບຂອງພວກເຮົາກໍຮູ້ບ່ອນຢູ່ຂອງທ້າວຊາວີຮີຣີ ເມື່ອຕົ້ນປີນີ້. ລາວໄດ້ຍ້າຍໄປຢູ່ເຂດໃຈກາງເມືອງ ໃນນະຄອນຫຼວງກາບູລ ຂອງອັຟການິສຖານເພື່ອເຕົ້າໂຮມກັບສະມາຊິກທີ່ໃກ້ຊິດຂອງຄອບຄົວລາວ.”
ແລະຫຼັງຈາກໄດ້ມີການພິຈາລະນາຢ່າງຖີ່ຖ້ວນ ກໍໄດ້ພົບເຫັນຫຼັກຖານອັນຈະແຈ້ງແລະໜ້າເຊື່ອຖືກ່ຽວກັບບ່ອນຢູ່ຂອງລາວ ປະທານາທິບໍດີໄບເດັນຈຶ່ງໄດ້ສັ່ງໃຫ້ທຳການໂຈມຕີຢ່າງແມ່ນຍຳ ເພື່ອກຳຈັດທ້າວຊາວາຮີຣີ ອອກຈາກສະໜາມ ລົບເປັນຄັ້ງສຸດທ້າຍ.
“ການປະຕິບັດງານນີ້ ແມ່ນໄດ້ມີການກະກຽມຢ່າງລະມັດລະວັງແລະໃຫ້ມີຄວາມສ່ຽງໜ້ອຍທີ່ສຸດທີ່ຈະເຮັດໃຫ້ພົນລະເຮືອນຕົກຢູ່ໃນອັນຕະລາຍ ແລະເມື່ອນຶ່ງອາທິດກ່ອນນີ້ ຫຼັງຈາກໄດ້ຮັບຄຳແນະນຳວ່າ ເງື່ອນໄຂຕ່າງໆ ແມ່ນເອື້ອອຳນວຍທີ່ສຸດແລ້ວ ຂ້າພະເຈົ້າຈຶ່ງໄດ້ໃຫ້ການອະນຸມັດ ຂັ້ນສຸດທ້າຍ ເພື່ອທຳການກຳຈັດຜູ້ກ່ຽວແລະການປະຕິບັດງານ ກໍປະສົບຜົນສຳເລັດ. ບໍ່ມີສະມາຊິກຄົນໃດ ໃນຄອບຄົວຂອງລາວໄດ້ຮັບບາດເຈັບ ແລະກໍບໍ່ມີພົນລະເຮືອນບາດເຈັບລົ້ມຕາຍ.”
ປະທານາທິບໍດີໄບເດັນ ກ່າວວ່າ “ເວລານີ້ ຄວາມຍຸຕິທຳໄດ້ມີຂຶ້ນແລ້ວແລະຫົວໜ້າກຸ່ມກໍ່ການຮ້າຍຄົນນີ້ ກໍບໍ່ມີອີກຕໍ່ໄປ. ຜູ້ຄົນຢູ່ໃນທົ່ວໂລກ ບໍ່ຈຳເປັນຕ້ອງມີຄວາມຢ້ານກົວ ມືສັງຫານທີ່ຊົ່ວຊ້າ ແລະດື້ດ້ານຄົນນີ້ ອີກຕໍ່ໄປ.”
ແລະປະທານາທິບໍດີ ໄດ້ກ່າວຢ້ຳວ່າ “ສະຫະລັດ ຈະສືບຕໍ່ສະແດງໃຫ້ເຫັນເຖິງຄວາມຕັ້ງໃຈແລະຄວາມສາມາດຂອງພວກເຮົາ ທີ່ຈະປົກປ້ອງປະຊາຊົນອາເມຣິກັນຕໍ່ພວກທີ່ຊອກຫາທາງເຮັດໃຫ້ພວກເຮົາຕົກຢູ່ໃນອັນຕະລາຍ.”