ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ຄວາມສຳພັນລະຫວ່າງສະຫະລັດກັບຈີນຍັງສືບຕໍ່ມີຄວາມເປັນຫ່ວງກັງວົນຢ່າງຈະແຈ້ງສຳລັບສະຫະລັດ. ໃນລະຫວ່າງການປຶກສາຫາລືເມື່ອໄວໆມານີ້ ຢູ່ທີ່ສະຖາບັນຮູເວີ ຂອງມະຫາວິທະຍາໄລສແຕນຟອດ ລັດຖະມົນຕີການຕ່າງປະເທດແອນໂທນີ ບລິງເກັນໃຫ້ຂໍ້ສັງເກດວ່າ ຈີນ “ທີ່ມີຄວາມແຕກຕ່າງຫຼາຍ” ໄດ້ປາກົດໂຕໃຫ້ເຫັນ ໃນໄລຍະບໍ່ເທົ່າໃດປີທີ່ຜ່ານມານີ້ ພາຍໃຕ້ການນຳພາຂອງທ່ານສີ ຈິ້ນຜິງ. ທ່ານກ່າວວ່າ ສາທາລະນະລັດປະຊາຊົນຈີນຫຼື ສປ ຈີນ “ມີການກົດຂີ່ກວ່າເກົ່າຢູ່ພາຍໃນປະເທດ ມີການເອົາທ່າທີແບບຮຸກຮານຫຼາຍຂຶ້ນ ຢູ່ໃນຕ່າງປະເທດ ແລະໃນຫຼາຍໆໂອກາດກໍສ້າງບັນຫາທ້າທາຍຕໍ່ຜົນປະໂຫຍດຂອງພວກເຮົາ ຕະຫຼອດທັງຕໍ່ຫຼັກຄຸນຄ່າຂອງພວກເຮົາ.”
ນີ້ແມ່ນໂດຍສະເພາະແລ້ວ ກ່ຽວກັບ ເລື້ອງໄຕ້ຫວັນ. ແທນທີ່ຈະຮັກສາສະພາບການທີ່ເປັນຢູ່ໃນປັດຈຸບັນນີ້ ປັກກິ່ງໄດ້ສະແດງໃຫ້ເຫັນວ່າ ຕົນຈະນຳໃຊ້ວິທີການແບບບີບບັງຄັບ ແລະບາງທີໃນທີ່ສຸດ ອາດໃຊ້ກຳລັງເພື່ອໃຫ້ບັນລຸການທ້ອນໂຮມຊາດ.
“ນີ້ແມ່ນເລື້ອງທີ່ສ້າງຄວາມເປັນຫ່ວງກັງວົນບໍ່ພຽງແຕ່ສະຫະລັດເທົ່ານັ້ນ ແຕ່ມັນຍັງມັນຍັງສ້າງຄວາມວິຕົກກັງວົນໃຫ້ແກ່ປະເທດຕ່າງໆໃນທົ່ວໂລກ” ນັ້ນຄືຄຳປະກາດ ຂອງລັດຖະມົນຕີການຕ່າງປະເທດບລິງເກັນ. ປະລິມານຂອງສິນຄ້າ ທີ່ມີການຂົນສົ່ງຜ່ານຊ່ອງແຄບໄຕ້ຫວັນໃນແຕ່ລະມື້ແມ່ນມີຜົນກະທົບຢ່າງໃຫຍ່ຫຼວງຕໍ່ເສດຖະກິດຢູ່ໃນທົ່ວໂລກ.
ໂດຍສະເພາະ ອຸດສາຫະກຳເຊມີຄອນດັກເຕີ້ຈະໄດ້ຮັບຜົນກະທົບຢ່າງຮ້າຍແຮງຖ້າການຜະລິດເຊມີຄອນດັກເຕີ້ຂອງໄຕ້ຫວັນຫາກໄດ້ຮັບການລົບກວນ ອັນເປັນຜົນເນື່ອງມາຈາກວິກິດການ. “ດັ່ງນັ້ນ ມັນຈະມີຄວາມສຳຄັນຢ່າງເລິກເຊິ່ງບໍ່ພຽງແຕ່ສຳລັບພວກເຮົາ ແຕ່ທຸກໆປະເທດ ໃນທົ່ວໂລກ ໃນການປົກປັກຮັກສາສັນຕິພາບ ແລະສະຖຽນລະພາບ ເມື່ອເວົ້າເຖິງເລື້ອງໄຕ້ຫວັນ ແລະຊ່ອງແຄບ ແລະເພື່ອໃຫ້ເປັນທີ່ແນ່ໃຈວ່າ ຄວາມແຕກຕ່າງທີ່ມີຢູ່ ໄດ້ຮັບການແກ້ໄຂດ້ວຍສັນຕິວິທີ” ນັ້ນຄຳປະກາດຂອງລັດຖະມົນຕີບລິງເກັນ.
ລັດຖະມົນຕີບລິງເກັນ ເຕືອນວ່າ “ຂ້າພະເຈົ້າຫວັງວ່າ ປັກກິ່ງຈະກັບຄືນມາ ຫາບ່ອນທີ່ຕົນ ສາມາດມອງເຫັນໄດ້ຢ່າງແທ້ຈິງວ່າ ເປັນຄຸນຄວາມດີ ໃນການເຮັດໃຫ້ເປັນທີ່ແນ່ໃຈວ່າ ຄວາມແຕກຕ່າງໄດ້ຮັບການແກ້ໄຂແບບສັນຕິວິທີທີ່ບໍ່ໄດ້ມີການພະຍາຍາມດຳເນີນການດ້ວຍການບີບບັງຄັບ ແລະຮ້າຍໄປກວ່ານັ້ນ ໂດຍການໃຊ້ກຳລັງ. ພວກເຮົາໄດ້ຕັດສິນໃຈແລ້ວວ່າ ຈະປະຕິບັດຕາມ ຄວາມໝັ້ນໝາຍຂອງພວກເຮົາຕໍ່ໄຕ້ຫວັນ ພາຍໃຕ້ກົດໝາຍຄວາມສຳພັນກັບໄຕ້ຫວັນ ແລະໃຫ້ການສະໜັບສະໜຸນແກ່ຄວາມສາມາດຂອງພວກເຂົາເຈົ້າເພື່ອປ້ອງກັນໂຕເອງ.” ພາຍໃຕ້ການນຳພາໂດຍກົດໝາຍຄວາມສຳພັນກັບໄຕ້ຫວັນ ຖະແຫຼງການຮ່ວມ 3 ສະບັບແລະການໃຫ້ຄຳຄ້ຳປະກັນ 6 ສະບັບ ສະຫະລັດຍັງສືບຕໍ່ມີຄວາມໝັ້ນໝາຍຕໍ່ນະໂຍບາຍຈີນດຽວ.