Accessibility links

Breaking News

ບົດບັນນາທິການ: ລັດຖະມົນຕີບລິງເກັນ ກ່າວເຖິງນະໂຍບາຍ ຂອງສະຫະລັດຕໍ່ຈີນ


ທ່ານ​ແອນ​ໂທ​ນີ ບ​ລິງ​ເກັນ ກ່າວ​ຖະ​ແຫຼງ​ທີ່​ມະ​ຫາ​ວິ​ທະ​ຍາ​ໄລ​ວໍ​ຈອ​ຣ​ຈ໌ ວໍ​ຊິງ​ຕັນ ໃນ​ນະ​ຄອນ​ຫຼວງວໍ​ຊິງ​ຕັນ ເວົ້າ​ເຖິງ​ນະ​ໂຍ​ບາຍ​ຂອງ​ສະ​ຫະ​ລັດ ຕໍ່​ຈີນ ເມື່ອ​ວັນ​ພະ​ຫັດ ທີ 26 ພຶດ​ສະ​ພາ 2022.

ສະຫະລັດ ຍັງສືບຕໍ່ເພັ່ງເລັງໃສ່ປະເທດທີ່​ເປັນ​ບັນ​ຫາທ້າທາຍຮ້າຍແຮງສຸດ ໃນໄລຍະຍາວ ຕໍ່ກົດລະບຽບຂອງລະຫວ່າງປະເທດ: ສາທາລະນະລັດປະຊາຊົນຈີນ.

ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ

ສະ​ຫະ​ລັດ​ ຍັງ​ສືບ​ຕໍ່​ເພັ່ງ​ເລັງ​ໃສ່​ປະ​ເທດ​ທີ່​ທຳ​ການທ້າ​ທາຍຮ້າຍ​ແຮງ​ສຸດ ໃນ​ໄລ​ຍະ​ຍາວ ຕໍ່​ກົດ​ລະ​ບຽບ​ຂອງ​ລະ​ຫວ່າງ​ປະ​ເທດ: ສາ​ທາ​ລະ​ນະ​ລັດ​ປະ​ຊາ​ຊົນ​ຈີນ ນັ້ນ​ຄື​ຄຳ​ເວົ້າ ​ຂອງ​ລັດ​ຖະ​ມົນ​ຕີ​ການ​ຕ່າງ​ປະ​ເທດ ​ແອນ​ໂທ​ນີ ບ​ລິງ​ເກັນ.

ພາຍ​ໃຕ້​ປະ​ທານ​ປະ​ເທດ​ສີ ຈິ້ນ​ຜິງ ພັກ​ຄອມ​ມູ​ນິ​ສ​ຈີນ ທີ່​ປົກ​ຄອງ​ປະ​ເທດ​ຢູ່​ໃນ​ເວ​ລານີ້ ໄດ້​ກາຍ​ເປັນ​ພັກ​ທີ່​ມີ​ການ​ກົດ​ຂີ່​ຫຼາຍ​ຂຶ້ນ ​ຢູ່​ພາຍ​ໃນ​ປະ​ເທດແລະ​ເອົາ​ທ່າ​ທີ​ແບບ​ຮຸກ​ຮານ​ຫຼາຍ​ຂຶ້ນ​ໃນ​ຕ່າງ​ປະ​ເທດ.

ສະ​ຫະ​ລັດ ​ບໍ່​ສາ​ມາດ​ກາງ​ຕໍ່ ​ທີ່​ຈະ​ໃຫ້ ສ​ປ ຈີນ ປ່ຽນ​ທິດ​ທາງ​ຂອງ​ຕົນ ແຕ່​ລັດ​ຖະ​ບານ​ທ່ານ​ໄບ​ເດັນ ໄດ້​ພັດ​ທະ​ນາ​ຍຸດ​ທະ​ສາດ ທີ່​ສາ​ມາດ​ສະ​ຫຼຸບ​ໄດ້ສາມ​ຄຳ​ຄື
“ລົງ​ທຶນ ຈັດ​ແຈງ ແ​ຂ່ງ​ຂັນ.”

ລັດ​ຖະ​ບານ​ທ່ານ​ໄບ​ເດັນ​ໄດ້​ລົງ​ທຶນ​ໃນ​ຍຸດ​ທະ​ສາດ​ອຸດ​ສາ​ຫະ​ກຳເພື່ອ​ໃຫ້​ອິດ​ທິ​ພົນ​ທາງ​ດ້ານ​ເສດ​ຖະ​ກິດ​ແລະ​ເທັກ​ໂນ​ໂລ​ຈີ​ຂອງ​ສະ​ຫະ​ລັດ ມີ​ຄວາມ​ຍືນ​ຍົງ​ແລະ​ຂະ​ຫຍາຍ​ຕົວ ແລະ​ຕ່ອງ​ໂສ້​ອຸບ​ປະ​ທານ​ ​ປັບ​ໂຕແລະ​ແຂ່ງ​ຂັນ​ໄດ້​ຫຼາຍ​ຂຶ້ນ.

ຍຸດ​ທະ​ສາດ​ອັນ​ທີ​ສອງ​ກໍ​ແມ່ນ​ເຮັດ​ໃຫ້​ຕາ​ໜ່າງ​ພັນ​ທະ​ມິດ​ຂອງ​ອາ​ເມ​ຣິ​ກາ​ມີ​ກຳ​ລັງ​ວັງ​ຊາ​ຄືນ​ໃໝ່ ແລະ​ທຳ​ການ​ພົວ​ພັນ​ຄືນກັບ​ສະ​ຖາ​ບັນ​ລະ​ຫວ່າງ​ປະ​ເທດ​ຕ່າງໆ.

“ອີກ​ຂົງ​ເຂດ​ນຶ່ງ ໃນ​ການຈັດ​ແຈງ​ ທີ່​ພວກ​ເຮົາ​ແບ່ງ​ປັນ ​ກັບ​ພັນ​ທະ​ມິດ​ແລະ​ພາ​ຄີ​ຂອງ​ພວກ​ເຮົາ​ກໍ​ແມ່ນ​ສິດທິ​ມະ​ນຸດ.” ນັ້ນ​ຄື​ຄຳ​ເວົ້າ​ຂອງລັດ​ຖະ​ມົນ​ຕີ​ບ​ລິງ​ເກັນ.

“ສະ​ຫະ​ລັດ​ຢືນ​ຢູ່​ກັບ​ປະ​ເທດ​ຕ່າງໆ​ແລະ​ປະ​ຊາ​ຊົນ​ໃນ​ທົ່ວ​ໂລກ ຕ້ານ​ການ​ຂ້າ​ລ້າງ​ເຊື້ອ​ຊາດ​ເຜົ່າ​ພັນ ແລະ​ການ​ກໍ່​ອາ​ຊະ​ຍາ​ກຳ​ຕ້ານ​ມະ​ນຸດ​ຊາດ​ ທີ່​ເກີດ​ຂຶ້ນຢູ່​ໃນ​ເຂດ​ຊິນ​ຈຽງ.. ພວກ​ເຮົາ​ຢືນ​ຢູ່​ດ້ວຍ​ກັນ​ກ່ຽວ​ກັບ​ເລື້ອງ​ທິ​ເບດ ບ່ອນ​ທີ່​ເຈົ້າ​ໜ້າ​ທີ່​ຍັງ​ສືບ​ຕໍ່​ທຳ​ການ​ປຸກ​ລະ​ດົມ​ຢ່າງ​ໂຫດ​ຮ້າຍ​ຕໍ່​ຕ້ານ​ຊາວ​ທິ​ເບດ ແລະ​ວັດ​ທະ​ນະ​ທຳ​ຂອງ​ເຂົາ​ເຈົ້າ ພາ​ສາ ແລະ​ສາ​ສະ​ໜາດັ້ງ​ເດີມ ແລະ​ຢູ່​ຮົງ​ກົງ ບ່ອນ​ທີ່​ພັກ​ຄອມ​ມູ​ນິ​ສ​ຈີນ​ ໄດ້​ເອົາ​ມາດ​ຕະ​ການ​ຢ່າງ​ຮຸນແຮງ​ ຕໍ່​ຕ້ານ​ປະ​ຊາ​ທິ​ປະ​ໄຕ ພາຍ​ໃຕ້​ອັນ​ທີ່​ເອີ້ນ​ວ່າ​ຄວາມ​ໝັ້ນ​ຄົງ​ແຫ່ງ​ຊາດ.”

ສິ່ງດັ່ງ​ກ່າວນັ້ນ ​ໄດ້​ນຳ​ພວກ​ເຮົາ​ໄປ​ສູ່​ອົງ​ປະ​ກອບ​ອັນ​ທີ 3 ໃນ​ຍຸດ​ທະ​ສາດ​ຂອງ​ພວກ​ເຮົາ ຄື​ການ​ແຂ່ງ​ຂັນ​ກັບ​ຈີນ​ຢູ່​ໃນ​ຂົງ​ເຂດ​ຕ່າງໆ ນັ້ນ​ຄື​ຄຳ​ເວົ້າ​ຂອງ​ລັດ​ຖະ​ມົນ​ຕີບ​ລິງ​ເກັນ.

“ປັກ​ກິ່ງ​ພວມ​ສວຍ​ໂອ​ກາດ​ໃນ​ການ​ເປີດກວ້າງ​ເສດ​ຖະ​ກິດ​ຂອງ​ພວກ​ເຮົາເພື່ອ​ທຳການສອດ​ແນມ ​ເຈາະາ​ຂໍ້​ມູນ ລັກ​ຂະ​ໂມຍ​ເທັກ​ໂນ​ໂລ​ຈີ ແລະ​ຄວາມ​ຮູ້​ທາງ​ດ້ານ ເທັກ​ນິກ ເພື່ອ​ນຳໄປ​ປັບ​ປຸງ​ນະ​ວັດ​ຕະກຳ ​ໃຫ້ກອ​ງ​ທັບ​ຕົນມີຄວາມ​ກ້າວ​ໜ້າແລະ​ເພີ້ມ​ມາດ​ຕະ​ການ​ປ້ອງກັນໃນ​ການກວດ​ກາ​ຄວບ​ຄຸມ​ຂອງ​ປະ​ເທດ. ດ້ວຍ​ເຫດນີ້​ໃນ​ຂະ​ນະ​ທີ່​ພວກ​ເຮົາ​ຢາກ​ໃຫ້​ເປັນ​ທີ່​ແນ່​ໃຈ​ວ່າ ຄື້ນ​ຟອງ​ນະ​ວັດ​ຕະ​ກຳໃນ​ຄັ້ງ​ຕໍ່​ໄປ​ຈະ​ນຳ​ພາ​ໂດຍ​ສະ​ຫະ​ລັດ​ ພັນ​ທະ​ມິດແລະ​ພາ​ຄີ​ຂອງ​ພວກ​ເຮົາ ພວກ​ເຮົາ​ກໍ​ຈະປ້ອງກັນໂຕ​ເອງ​ຕໍ່​ການ​ດຳ​ເນີນ​ຄວາມ​ພະ​ຍາ​ຍາມ​ທີ່​ຈະ​ລັກ​ຂະ​ໂມຍ​ເອົາ​ຄວາມ​ຄິດ​ຂອງພວກ​ເຮົາ ຫຼື​ເຮັດ​ໃຫ້​ຄວາມ​ໝັ້ນ​ຄົງ​ຂອງ​ພວກ​ເຮົາ​ຕົກ​ຢູ່​ໃນ​ອັນ​ຕະ​ລາຍ.”

ກ່ຽວ​ກັບ​ເລື້ອງ​ໄຕ້​ຫວັນ​ນັ້​ນ ສະ​ຫະ​ລັດ​ຍັງ​ມີ​ຄວາມ​ໝັ້ນ​ໝາຍ ​ຕໍ່​ນະ​ໂຍ​ບາຍ “ຈີນ​ດຽວ ຂອງ​ຕົນຊຶ່ງ​ຢູ່​ພາຍ​ໃຕ້​ການ​ນຳ​ທິດ​ທາງ​ໂດຍ​ກົດ​ໝາຍ​ຄວາມ​ສຳ​ພັນ​ກັບ​ໄຕ້​ຫວັນ ຖະ​ແຫຼງ​ການ​ຮ່ວມ 3 ສະ​ບັບແລະ​ການ​ຄ້ຳ​ປະ​ກັນ 6 ສະ​ບັບ. ພວກ​ເຮົາຄັດ​ຄ້ານ​ຕໍ່​ການ​ປ່ຽນ​ແປງ​ໂດຍ​ຝ່າຍ​ໃດ​ຝ່າຍ​ນຶ່ງ​ຕາມ​ລຳ​ພັງ​ກ່ຽວ​ກັບ​ສະ​ຖາ​ນະ​ພາບ​ໃນ​ປັດ​ຈຸ​ບັນ ພວກ​ເຮົາ​ບໍ່​ສະ​ໜັບ​ສະ​ໜຸນ​ໃຫ້​ໄຕ້​ຫວັນ​ເປັນ​ເອກ​ກະ​ລາດແລະ​ພວກເຮົາ​ຫວັງ​ວ່າ​ບັນ​ຫາ​ຂັດ​ແຍ້ງ​ຂ້າມ​ຊ່ອງ​ແຄບ ສາ​ມາດ​ໄດ້​ຮັບ​ການ​ແກ້​ໄຂ​ໂດຍ​ສັນ​ຕິ​ວິ​ທີ” ນັ້ນ​ຄື​ຄຳ​ເວົ້າ​ຂອງ​ລັດ​ຖະ​ມົນ​ຕີບ​ລິງ​ເກັນ.

“ພວກ​ເຮົາ​ຈະ​ແຂ່ງ​ຂັນ​ດ້ວຍ​ຄວາມ​ເຊື່ອ​ໝັ້ນ ພວກ​ເຮົາ​ຈະ​ໃຫ້​ການ​ຮ່ວມ​ມື (ກັບ​ຈີນ) ຢູ່​ບ່ອນ​ໃດ​ທີ່​ພວກ​ເຮົາ​ສາ​ມາດ​ເຮັດ​ໄດ້ ພວກ​ເຮົາ​ຈະໂຕ້​ຖຽງ​ໃນ​ບ່ອນ​ທີ່​ພວກ​ເຮົາ​ຕ້ອງ​ເຮັດ” ນັ້ນ​ຄື​ຄຳ​ປະ​ກາດ ​ຂອງ​ລັດ​ຖະ​ມົນ​ຕີບ​ລິງ​ເກັນ. “ມັນ​ບໍ່​ມີ​ເຫດ​ຜົນ​ເລີຍວ່າ ເປັນ​ຫຍັງ​ທັງສອງ​ປະ​ເທດ​ທີ່​ຍິ່ງ​ໃຫຍ່​ຂອງ​ພວກ​ເຮົາ​ຈຶ່ງ​ບໍ່​ສາ​ມາດ​ຢູ່​ຮ່ວມ​ກັນ​ຢ່າງ​ສັນ​ຕິ ແລະ​ແບ່ງ​ປັນໃຫ້ແລະກໍ​ປະ​ກອບ​ສ່ວນເຂົ້າ​ໃນ​ຄວາມ​ກ້າວ​ໜ້າ​ຂອງ​ມະ​ນຸດ​ຊາດ​ດ້ວຍ​ກັນ.”

XS
SM
MD
LG