ສະຫະລັດ ແມ່ນມີຄວາມມຸ່ງໝັ້ນຕໍ່ “ປະຊາຄົມເອເຊຍ-ປາຊີຟິກ ທີ່ເປີດກວ້າງ, ມີຊີວິດຊີວາ, ຟື້ນຕົວໄດ້, ແລະ ສະຫງົບສຸກ ທີ່ຈະເສີມຂະຫຍາຍຄວາມຈະເລີນຮັ່ງມີຂອງປະຊາຊົນຂອງເຂົາເຈົ້າ ແລະ ຄົນລຸ້ນໃໝ່ໃນອະນາຄົດ,” ອີງຕາມການປະກາດໂດຍລັດຖະມົນຕີການຕ່າງປະເທດ ທ່ານ ແອນໂທນີ ບລິງເຄັນ ຢູ່ກອງປະຊຸມລະດັບລັດຖະມົນຕີ APEC ໃນນະຄອນ ແຊນ ແຟຣນຊິສໂກ.
ສະຫະລັດ ເຊື່ອໃນວິໄສທັດນັ້ນ, ພາກພື້ນທີ່ເສດຖະກິດແມ່ນມີເສລີພາບ ທີ່ຈະເລືອກເສັ້ນທາງຂອງເຂົາເຈົ້າເອງ ແລະ ຄູ່ຮ່ວມຂອງເຂົາເຈົ້າເອງ. ບ່ອນທີ່ບັນຫາຕ່າງໆຖືກແກ້ໄຂຢ່າງເປີດເຜີຍ, ບ່ອນທີ່ກົດລະບຽບຕ່າງໆແມ່ນຖືກປະຕິບັດຢ່າງໂປ່ງໃສ ແລະ ໃຊ້ຢ່າງເປັນທຳ, ບ່ອນທີ່ສິນຄ້າ, ຄວາມຄິດ, ປະຊາຊົນຫຼັ່ງໄຫຼໄປມາຢ່າງຖືກຕ້ອງຕາມກົດໝາຍ ແລະ ຢ່າງເປັນອິດສະຫຼະ.”
“ພວກເຮົາໄດ້ທຳຄວາມກ້າວໜ້າທີ່ແທ້ຈິງໄປສູ່ອະນາຄົດທີ່ຮຸ່ງເຮືອງກວ່າເກົ່າ,” ທ່ານ ບລິງເຄັນ ໄດ້ກ່າວຢ້ຳ. ນັບຕັ້ງແຕ່ການກໍ່ຕັ້ງ APEC ຂຶ້ນມາເມື່ອສາມທົດສະວັດແລ້ວນີ້, ຍອດຜະລິດຕະພັນລວມພາຍໃນຢູ່ໃນພາກພື້ນໄດ້ເພີ່ມຂຶ້ນຈາກ 19 ພັນຕື້ ເປັນ 52.8 ພັນຕື້. ລາຍໄດ້ຕໍ່ຫົວຄົນໄດ້ເພີ່ມຂຶ້ນປະມານ 4 ເທົ່າ, ເຊິ່ງໄດ້ຊ່ວຍປະຊາຊົນຫຼາຍລ້ານຄົນໃຫ້ພົ້ນຈາກຄວາມທຸກຍາກ. 21 ປະເທດສະມາຊິກຂອງ APEC ຕອນນີ້ປະກອບເປັນ 40 ເປີເຊັນຂອງປະຊາກອນໂລກ. ເຂົາເຈົ້າສ້າງການຄ້າຂາຍຈຳນວນເຄິ່ງນຶ່ງໃນໂລກ ແລະ ຜະລິດສິນຄ້າ ແລະ ການບໍລິການ 60 ເປີເຊັນຂອງໂລກ.
ສະຫະລັດ ໄດ້ກ່າວຢ້ຳບູລິມະສິດສາມຢ່າງສຳລັບ APEC ສຳລັບອະນາຄົດ, ອີງຕາມການກ່າວຂອງລັດຖະມົນຕີ ບລິງເຄັນ. ທຳອິດແມ່ນການເຊື່ອມຕໍ່ລະຫວ່າງກັນ.
ທ່ານ ບລິງເຄັນກ່າວວ່າ “ພວກເຮົາກຳລັງເຮັດວຽກເພື່ອສ້າງຕ່ອງໂສ້ສິນຄ້າທີ່ກວ້າງຂວາງທີ່ສາມາດຟື້ນຕົວໄດ້, ເພື່ອລົງທຶນໃນພື້ນຖານໂຄງລ່າງທີ່ມີຄຸນນະພາບສູງ ແລະ ຍືນຍົງທີ່ເຊື່ອມຕໍ່ພວກເຮົາ ແລະ ວາງພື້ນຖານສຳລັບການເຕີບໂຕທີ່ມີຫຼາກຫຼາຍ.”
ບູລິມະສິດອັນທີສອງແມ່ນນະວັດຕະກຳໃໝ່, ອີງຕາມທ່ານ ບລິງເຄັນ.
ທ່ານກ່າວວ່າ “ເອົາປຽບຈາກບົດບາດຂອງ APEC ເພື່ອຂະຫຍາຍຄວາມຄິດ, ພວກເຮົາກຳລັງເຮັດວຽກເພື່ອພັດທະນາຂໍ້ແກ້ໄຂໃໝ່ຕໍ່ສິ່ງທ້າທາຍທີ່ຫຍຸ້ງຍາກບາງອັນທີ່ພາກພື້ນ ແລະ ໂລກກຳລັງປະເຊີນ, ຈາກການອຳນວຍຄວາມສະດວກຕໍ່ການຫັນປ່ຽນດ້ານພະລັງງານ ໄປເຖິງການຫຼໍ່ຫຼອມເສດຖະກິດດິຈິຕອລ ທີ່ເປັນແຮງກະຕຸ້ນຕໍ່ກຳມະກອນ ແລະ ທຸລະກິດຕ່າງໆ.
ທ່ານ ບລິງເຄັນ ກ່າວວ່າ “ອັນທີສາມ, ພວກເຮົາກຳລັງເສີມຂະຫຍາຍການກວມລວມ ແລະ ເຮັດໃຫ້ປະຊາຊົນຂອງພວກເຮົາໄດ້ຮັບໂອກາດທີ່ບໍ່ຖືກໃຊ້, ບໍ່ວ່ານັ້ນຈະເປັນການສ້າງໂອກາດຫຼາຍກວ່າເກົ່າສຳລັບແມ່ຍິງໃນຂະແໜງ ວິທະຍາສາດ, ເທັກໂນໂລຈີ, ວິສະວະກຳ ແລະ ຄະນິດສາດ, ໃຫ້ບັນດານັກປະກອບກິດຈະການຄົນພື້ນເມືອງສາມາດເຂົ້າຫາເງິນທຶນຫຼາຍຂຶ້ນ, ຫຼື ຄົ້ນຫາລະບົບດາວທຽມໂລກໃນລະດັບຕ່ຳ ເພື່ອຂະຫຍາຍການເຊື່ອມຕໍ່ຫາເຂດຫ່າງໄກສອກຫຼີກ ແລະ ຊົນນະບົດ.”
“ປະຊາຊົນທີ່ພວກເຮົາເປັນຕົວແທນໃຫ້, ແມ່ນຕ້ອງການຄວາມຊ່ວຍເຫຼືອເພື່ອສ້າງອະນາຄົດທີ່ສາມາດຟື້ນຕົວໄດ້, ຍືນຍົງກວ່າເກົ່າ ແລະ ເຊື່ອມຕໍ່ໄດ້ຫຼາຍຂຶ້ນ. ເຂົາເຈົ້າແມ່ນພ້ອມທີ່ຈະເຮັດວຽກ, ເພື່ອລົງທຶນ, ເພື່ອສ້າງນະວັດຕະກຳໃໝ່, ເພື່ອຜັກດັນການເຕີບໂຕທີ່ຈະເສີມສ້າງຄວາມແຂງແກ່ນໃນພາກພື້ນຂອງພວກເຮົາຮ່ວມກັນຕໍ່ໄປ. ແລະ ຄວາມຮັບຜິດຊອບຂອງພວກເຮົາ, ວຽກງານຂອງພວກເຮົາ, ແມ່ນເພື່ອຊ່ວຍເຂົາເຈົ້າເຮັດສິ່ງນັ້ນເທົ່ານັ້ນ.”