ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ທ່ານເຄັມ ໂສຄາ ຜູ້ນຳທາງການເມືອງ ຊຶ່ງເປັນທີ່ນັບໜ້າຖືຕາຂອງກຳປູເຈຍ ເມື່ອໄວໆມານີ້ ໄດ້ຖືກຕັດສິນລົງໂທດ ໃຫ້ກັກບໍລິເວນເປັນເວລາ 27 ປີ. ອະດີດຜູ້ນຳພັກກູ້ຊາດກຳປູເຈຍ ໄດ້ຖືກພົບເຫັນວ່າສົມຮູ້ຮ່ວມຄິດກັບສະຫະລັດເພື່ອຂັບໄລ່ນາຍົກລັດຖະມົນຕີຮຸນເຊນ ໃຫ້ອອກຈາກຕຳແໜ່ງ. ທ່ານໂສຄາຊຶ່ງໄດ້ປະຕິເສດຕໍ່ຂໍ້ຫາ ຍັງໄດ້ຖືກຫ້າມບໍ່ໃຫ້ລົງສະໝັກແຂ່ງຂັນຫຼືປ່ອນບັດໃນການເລືອກຕັ້ງ.
ສະຫະລັດມີຄວາມເປັນຫ່ວງຢ່າງເລິກເຊິ່ງ ກ່ຽວກັບການຕັດສິນ ແລະລົງໂທດຕໍ່ທ່ານເຄັມ ໂສຄາ ນັ້ນຄືຄຳເວົ້າຂອງທ່ານເນດ ໄພຣສ໌ ໂຄສົກກະຊວງການຕ່າງປະເທດສະຫະລັດ ແລະທ່ານກ່າວຕື່ມວ່າ “ຂັ້ນຕອນເປັນເວລາຫຼາຍປີ ເພື່ອປິດປາກປິດສຽງລາວ ອີງຕາມຂໍ້ຫາ ທີ່ມີຈຸດປະສົງທາງການເມືອງ ແມ່ນບໍ່ເປັນທຳ ແລະເຮັດໃຫ້ຊື່ສຽງຂອງຣາຊະອານາຈັກກຳປູເຈຍ ເຊື່ອມຖອຍລົງຢູ່ໃນປະຊາຄົມນາໆຊາດ. ສະຫະລັດໄດ້ຮຽກຮ້ອງມາໂດຍຕະຫຼອດໃຫ້ລັດຖະບານກຳປູເຈຍ ເຄົາລົບນັບຖືສິດທິມະນຸດແລະອິດສະຫຼະພາບຂັ້ນພື້ນຖານຂອງທ່ານເຄັມ ໂສຄາ ແລະຊາວກຳປູເຈຍທຸກຖ້ວນໜ້າ.”
ໂຄສົກກະຊວງການຕ່າງປະເທດ ທ່ານເນດ ໄພຣສ໌ ກ່າວວ່າ “ການລົງໂທດຕໍ່ທ່ານເຄັມ ໂສຄາ ແມ່ນສ່ວນນຶ່ງ ຂອງແບບແຜນຂະໜາດໃຫຍ່ ຂອງການຂົ່ມຂູ່ການຮາວີລົບກວນ ແລະການເອົາມາດຕະການທີ່ຮັບບໍ່ໄດ້ ໂດຍເຈົ້າໜ້າທີ່ກຳປູເຈຍ ເພື່ອແນເປົ້າໝາຍໃສ່ພວກຜູ້ນຳການເມືອງຝ່າຍຄ້ານ ສື່ມວນຊົນ ແລະກຸ່ມສັງຄົມພົນລະເຮືອນ.” ໃນປີ 2017 ພັກກູ້ຊາດກຳປູເຈຍໄດ້ຖືກຍຸບໂດຍສານສູງສຸດຂອງປະເທດສອງເດືອນຫຼັງຈາກທ່ານໂສຄາຖືກຈັບ. ພັກປະຊາຊົນກຳປູເຈຍຂອງນາຍົກລັດຖະມົນຕີຮຸນເຊນໄດ້ຊະນະບ່ອນນັ່ງທັງໝົດໃນສະພາ 125 ບ່ອນ ໂດຍເຮັດໃຫ້ກຳປູເຈຍກາຍເປັນປະເທດທີ່ມີພັກການເມືອງພຽງພັກດຽວໃນເວລາພຽງຂ້າມຄືນ. ຍິ່ງໄປກວ່ານັ້ນມີພວກນັກການເມືອງຝ່າຍຄ້ານບໍ່ຕ່ຳກວ່າ 39 ຄົນໄດ້ຖືກຈັບຂັງຄຸກ ອີງຕາມອົງການນິລະໂທດກຳສາກົນ.
ການດຳເນີນຄະດີແລະຕັດສິນວ່າກະທຳຜິດຕໍ່ສ່ວນບຸກຄົນເຊັ່ນທ່ານເຄັມ ໂສຄາ ແລະນັກການເມືອງທີ່ສຳຄັນອື່ນໆ ຍ້ອນຊົມໃຊ້ອິດສະຫຼະພາບໃນການສະແດງອອກຊຶ່ງຄວາມຄິດຄວາມເຫັນແລະການຄົບຄ້າສະມາຄົມຂອງພວກເຂົາເຈົ້າແມ່ນບ່ອນທຳລາຍຕໍ່ລັດຖະທຳມະນູນຂອງກຳປູເຈຍ ຕໍ່ພັນທະລະຫວ່າງປະເທດແລະຄວາມກ້າວໜ້າທີ່ໄດ້ຮັບມາໃນເມື່ອກ່ອນເພື່ອພັດທະນາໃຫ້ເປັນສັງຄົມທີ່ມີຄວາມສະຫງົບ ຫຼາກຫຼາຍ ແລະຮວມເອົາທຸກພັກຝ່າຍ.
ໂຄສົກເນດ ໄພຣສ໌ “ຂໍຮຽກຮ້ອງໃຫ້ເຈົ້າໜ້າທີ່ກຳປູເຈຍ ຄ້ຳປະກັນວ່າປະຊາຊົນຂອງຕົນ ສາມາດຊົມໃຊ້ສິດທິມະນຸດຂອງພວກເຂົາເຈົ້າໄດ້ຢ່າງເສລີ ຮວມທັງອິດສະຫຼະພາບໃນການໂຮມຊຸມນຸມແບບສະຫງົບ ແລະສະແດງອອກຄວາມຄິດຄວາມເຫັນ ແລະໄດ້ຮັບການຊຸກຍູ້ ແລະສົ່ງເສີມ ໃຫ້ປະກອບສ່ວນເຂົ້າຮ່ວມໃນ
ການເສີມສ້າງລະບອບປະຊາທິປະໄຕຢ່າງແທ້ຈິງ.”