ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ໃນກອງປະຊຸມຖະແຫຼງຂ່າວທ້າຍປີ ລັດຖະມົນຕີການຕ່າງປະເທດສະຫະລັດ ທ່ານແອນໂທນີ ບລິງເກັນ ໄດ້ເນັ້ນຢ້ຳເຖິງ 4 ຂົງເຂດວຽກງານທີ່ສຳຄັນສຸດ ທາງດ້ານການທູດ ທີ່ປະສົບຄວາມສຳເລັດ ໃນປີ 2022.
ທຳອິດ ທ່ານໃຫ້ຂໍ້ສັງເກດວ່າ ສະຫະລັດ “ໄດ້ເຕົ້າໂຮມໂລກເພື່ອໃຫ້ການຄ້ຳປະກັນວ່າ ການເຮັດສົງຄາມຂອງຣັດເຊຍໃນຢູເຄຣນ ແມ່ນຍຸດທະສາດແຫ່ງຄວາມລົ້ມແຫຼວ.” ທ່ານບລິງເກັນ ກ່າວວ່າ:
“ນັບແຕ່ວັນທີ 24 ກຸມພາເປັນຕົ້ນມາ ພວກເຮົາໄດ້ນຳເອົາພັນທະມິດແລະພາຄີຫຼາຍສິບປະເທດມາເຕົ້າໂຮມກັນ ເພື່ອຊຸກຍູ້ໃນດ້ານຄວາມໝັ້ນຄົງ ເສດຖະກິດແລະການສະໜັບສະໜຸນທາງດ້ານມະນຸດສະທຳແກ່ປະຊາຊົນຊາວຢູເຄຣນ ໃນຂະນະທີ່ພວກເຂົາເຈົ້າລຸກຂຶ້ນ ປົກປ້ອງປະຊາທິປະໄຕ ອະທິປະໄຕ ແລະເອກກະລາດໃນປະເທດເຂົາເຈົ້າ. ການໃຫ້ຄວາມສະໜັບສະໜຸນຮ່ວມກັນຂອງພວກເຮົາ ຮວມທັງ ການຊ່ວຍເຫຼືອທາງທະຫານ ໃນເວລານີ້ 1 ພັນ 850 ລ້ານໂດລາ…ເພື່ອຊ່ວຍໃຫ້ພວກນັກລົບຊາວຢູເຄຣນ ເປີດສາກບຸກໂຈມຕີຕອບໂຕ້ປົດປ່ອຍປະຊາຊົນຂອງພວກເຂົາເຈົ້າ ຢຶດເອົາຄືນດິນແດນຂອງພວກເຂົາເຈົ້າ.”
ສອງມາ ລັດຖະມົນຕີການຕ່າງປະເທດບລິງເກລັນ ກ່າວວ່າ “ພວກເຮົາໄດ້ເລັ່ງລັດທົບທວນທາງດ້ານຍຸດທະສາດ ກັບປະເທດພັນທະມິດແລະພາຄີຂອງພວກເຮົາ ກ່ຽວກັບສາທາລະນະລັດປະຊາຊົນຈີນ.” ທ່ານບລິງເກັນ ກ່າວວ່າ:
“ຢ້ອນຄືນໄປເມື່ອເດືອນພຶດສະພາ ຂ້າພະເຈົ້າໄດ້ກຳນົດຍຸດທະສາດ ຂອງພວກເຮົາ ເພື່ອຮັບມືກັບການທ້າທາຍທີ່ມີຂຶ້ນໂດຍ ສປ ຈີນ: ການລົງທຶນໃນດ້ານພື້ນຖານຂອງຄວາມເຂັ້ມແຂງພວກເຮົາຢູ່ພາຍໃນປະເທດ ວາງໂຕໃຫ້ສອດຄ່ອງກັບບັນດາປະເທດພັນທະມິດແລະພາຄີຂອງພວກເຮົາ ແຂ່ງຂັນກັບຈີນເພື່ອໃຫ້ພວກເຮົາ ສາມາດປົກປ້ອງຜົນປະໂຫຍດຂອງພວກເຮົາ ແລະ ເຮັດໃຫ້ວິໄສທັດຂອງພວກເຮົາ ກາຍເປັນຄວາມຈິງໃນອະນາຄົດ.”
ຍິ່ງໄປກວ່ານັ້ນ ສະຫະລັດ ແລະບັນດາປະເທດພັນທະມິດ ຍັງສືບຕໍ່ມີຄວາມປຸ້ມລຸມສາມັກຄີ ໃນຄວາມໝັ້ນໝາຍຂອງຕົນ ເພື່ອປົກປັກຮັກສາສັນຕິພາບແລະສະຖຽນລະພາບຢູ່ຂ້າມຊ່ອງແຄບໄຕ້ຫວັນແລະຍັງຈະສືບຕໍ່ສະແດງຄວາມເປັນຫ່ວງກັງວົນ ແລະເອົາມາດຕະການຮ່ວມກັນ ເພື່ອຮັບມື ກັບການລະເມີດສິດທິມະນຸດຂອງ ສປ ຈີນໃນເຂດຊິນຈຽງ ແລະທິເບດ ຕະຫຼອດທັງ ສິດເສລີພາບໃນການປາກເວົ້າ ແລະສິດເສລີພາບດ້ານການຂ່າວ ທີ່ພວມເຊື່ອມຖອຍ ຢູ່ໃນຮົງກົງ.
ສາມມາ ສະຫະລັດໄດ້ປຸກລະດົມແນວໂຮມ ເພື່ອຫາທາງແກ້ໄຂ ກ່ຽວກັບຄວາມໝັ້ນຄົງດ້ານອາຫານ ດ້ານສຸຂະພາບ ພະລັງງານ ແລະການປ່ຽນແປງຂອງອາກາດ ແລະການເຕີບໂຕຂອງທຸກພາກສ່ວນທາງດ້ານເສດຖະກິດ.
ສຸດທ້າຍ “ພວກເຮົາໄດ້ນຳໃຊ້ອຳນາດທາງດ້ານການທູດ ຂອງອາເມຣິກາ ເພື່ອສ້າງຄວາມກ້າວໜ້າໃຫ້ແກ່ສັນຕິພາບ ແລະປ້ອງກັນ ແລະບັນເທົາຕໍ່ບັນຫາຂັດແຍ້ງ.” ລັດຖະມົນຕີບລິງເກັນ ກ່າວວ່າ:
“ຮ່ວມກັນກັບບັນດາຄູ່ຕຳແໜ່ງຂອງຂ້າພະເຈົ້າຈາກອິສຣາແອລ ໂມຣົກໂກ ບາຫ໌ເຣນ ສະຫະລັດອາຣັບເອເມີເຣັສແລະອີຈິບ ຂ້າພະເຈົ້າໄດ້ເຂົ້າຮ່ວມກອງປະຊຸມສຸດຍອດຄັ້ງປະຫວັດສາດເນເກັບ ເພື່ອສ້າງຄວາມກ້າວໜ້າໃຫ້ແກ່ການຮວມໂຕ ແລະຄວາມເປັນປົກກະຕິຢູ່ໃນພາກຕາເວັນອອກກາງ. ພວກເຮົາໄດ້ຊ່ວຍໄກ່ເກ່ຍຂໍ້ຕົກລົງປະຫວັດສາດລະຫວ່າງອິສຣາແອລແລະເລບານອນ ເພື່ອແກ້ໄຂບັນຫາຂັດແຍ້ງທາງທະເລທີ່ມີມາເປັນເວລາດົນນານ. ພວກເຮົາໃຫ້ການສະໜັບສະໜຸນຕໍ່ການເຈລະຈາ ພາຍໃຕ້ການນຳພາຂອງອາຟຣິກາທີ່ໄດ້ນຳໄປສູ່ການຍຸຕິຄວາມເປັນປໍລະປັກລະຫວ່າງກອງກຳລັງຂອງເອທິໂປເປຍ ແລະທິເກຣ. ພວກເຮົາໄດ້ຊ່ວຍໃຫ້ມີການບັນລຸ ຂອບຂໍ້ຕົກລົງ ເພື່ອນຳເອົາຊູດານກັບຄືນມາສູ່ເສັ້ນທາງໄປສູ່ການປົກຄອງແບບປະຊາທິປະໄຕ ພາຍໃຕ້ການນຳພາ ຂອງພົນລະເຮືອນ. ພວກເຮົາໄດ້ຊ່ວຍໃຫ້ມີການບັນລຸ ແລະຕໍ່ມາກໍໄດ້ມີການຂະຫຍາຍ ການຢຸດຍິງໃນບັນຫາຂັດແຍ້ງເຢເມນ.”
ໃນການເບິ່ງໄປຂ້າງໜ້າສຳລັບປີ 2023 ນີ້ ລັດຖະມົນຕີການຕ່າງປະເທດບລິງເກັນກ່າວວ່າ ສະຫະລັດແລະບັນດາປະເທດພາຄີ ຍັງຈະສືບຕໍ່ເຮັດວຽກຮ່ວມກັນ ເພື່ອສ້າງໂລກ ທີ່ເສລີ ເປີດກວ້າງ ໝັ້ນຄົງ ແລະອຸດົມຮັ່ງມີ.