ເມື່ອສາມປີທີ່ຜ່ານມາ, ຫຼັງຈາກຜ່າຍແພ້ການເລືອກຕັ້ງແຫ່ງຊາດຢ່າງຖ້ວມລົ້ນ, ກອງທັບຂອງ ມຽນມາ ໄດ້ກຳນົດພາວະສຸກເສີນ ຕໍ່ປະເທດ ແລະ ໄດ້ຈັດການກໍ່ລັດຖະປະຫານ. ເຂົາເຈົ້າໄດ້ຈັບກຸມບັນດາຜູ້ນຳພົນລະເຮືອນທີ່ຖືກເລືອກຂອງປະເທດ ແລະ ໄດ້ປາບປາມການປະທ້ວງທີ່ສະຫງົບທີ່ໄດ້ເກີດຂຶ້ນຕາມມາ.
ລາຍງານຫຼາຍສະບັບ, ລວມທັງຫຼາຍຄັ້ງໂດຍຂ້າຫຼວງໃຫຍ່ເພື່ອສິດທິມະນຸດຂອງ ສະຫະປະຊາຊາດ, ໄດ້ສະຫຼຸບວ່າລະບອບການປົກຄອງຂອງ ມຽນມາ ໄດ້ສືບຕໍ່ແນເປົ້າໃສ່ພົນລະເຮືອນຜ່ານການໂຈມຕີທາງອາກາດ ແລະ ໄດ້ທຳລາຍເຂດທີ່ມີປະຊາກອນໜາແໜ້ນ.
ທ່ານນາງ ເບັດ ແວນ ສແກັກ, ເອກອັກຄະລັດຖະທູດທົ່ວໄປຂອງກະຊວງການຕ່າງປະເທດ ທີ່ຮັບຜິດຊອບ ກ່ຽວກັບ ຄວາມຍຸຕິທຳທາງອາຍາໂລກ ກ່າວວ່າ “ລຸນຫຼັງການວິເຄາະຂໍ້ເທັດຈິງ ແລະ ກົດໝາຍຢ່າງເຄັ່ງຄັດ, ລັດຖະມົນຕີການຕ່າງປະເທດ ສະຫະລັດ ໄດ້ພິຈາລະນາວ່າສະມາຊິກຂອງກອງທັບ ມຽນມາ ໄດ້ກໍ່ການຂ້າງລ້າງເຜົ່າພັນ ແລະ ອາຊະຍາກຳຕໍ່ມວນມະນຸດຕໍ່ຊາວ ໂຣຮິງຢາ ໃນປີ 2017. ນັບຕັ້ງແຕ່ການກໍ່ລັດຖະປະຫານເມື່ອສາມປີທີ່ຜ່ານມາ, ລະບອບການປົກຄອງທະຫານໄດ້ຂະຫຍາຍຄວາມໂຫດຮ້າຍຂອງພວກເຂົາຕໍ່ຜູ້ທີ່ມີຄວາມຫວັງສຳລັບປະຊາທິປະໄຕໃນ ມຽນມາ.”
ທ່ານກ່າວວ່າ “ລະບອບການປົກຄອງດັ່ງກ່າວໄດ້ດຳເນີນການປະຫານຊີວິດບັນດານັກເຄື່ອນໄຫວທີ່ສະໜັບສະໜູນປະຊາທິປະໄຕ, ຜູ້ນຳການເມືອງ, ແລະ ຜູ້ປະທ້ວງທີ່ສະຫງົບ. ພວກເຂົາໄດ້ຂ້າຜູ້ຊາຍ, ແມ່ຍິງ ແລະ ເດັກນ້ອຍຫຼາຍພັນຄົນ, ທຳລາຍໂຮງຮຽນ ແລະ ສະຖານທີ່ບູຊາຕ່າງໆ. ພວກເຂົາໄດ້ຢຸດເສລີພາບທາງສັງຄົມສ່ວນຫຼາຍ ແລະ ໄດ້ກັກຂັງ ແລະ ທໍລະມານນັກໂທດການເມືອງ.”
ເອກອັກຄະລັດຖະທູດ ແວນ ສແກັກ ກ່າວວ່າ “ວິກິດການໃນ ມຽນມາ ໄດ້ກໍ່ໃຫ້ເກີດການອອກມາຕອບໂຕ້ ເພື່ອຄວາມຮັບຜິດຊອບທີ່ແຕກຕ່າງກັນແບບບໍ່ເຄີຍມີມາກ່ອນ. ປະເທດ ແກມເບຍ, ດ້ວຍການສະໜັບສະໜູນຂອງອົງການຮ່ວມມືສາສະໜາ ອິສລາມ, ໄດ້ລິເລີ່ມການຟ້ອງຮ້ອງໃນສານອາຍາສາກົນໃນນະຄອນ ເຮັກ, ໂດຍກ່າວຫາ ມຽນມາ ກ່ຽວກັບ ການລະເມີດພັນທະຂອງເຂົາເຈົ້າພາຍໃຕ້ສົນທິສັນຍາປ້ອງກັນ ແລະ ລົງໂທດອາຊະຍາກຳຂ້າລ້າງເຜົ່າພັນ.
ທ່ານກ່າວວ່າ “ໃນເດືອນມັງກອນ 2020, ສານອາຍາສາກົນໄດ້ຕັດສິນວ່າ ມຽນມາ ຕ້ອງເອົາມາດຕະການພາຍໃນອຳນາດຂອງເຂົາເຈົ້າ ເພື່ອປ້ອງກັນການຂ້າລ້າງເຜົ່າພັນຕໍ່ຊາວ ໂຣຮິງຢາ ແລະ ເພື່ອຮັກສາຫຼັກຖານ. ສະຫະລັດ ໄດ້ແບ່ງປັນຂໍ້ມູນກັບບັນດາທະນາຍຄວາມຂອງ ແກມເບຍ ໃນຂະນະທີ່ເຂົາເຈົ້າກະກຽມການມອບຫຼັກຖານໃຫ້ສານ.”
ການສິ້ນສຸດຄວາມຮຸນແຮງ ແລະ ການປ່ຽນແປງ ມຽນມາ ໃນເສັ້ນທາງໄປສູ່ປະຊາທິປະໄຕແມ່ນບູລິມະສິດສູງສຸດສຳລັບ ສະຫະລັດ.
ທ່ານກ່າວວ່າ “ສະຫະລັດ ໄດ້ຂະຫຍາຍການກົດດັນທາງເສດຖະກິດ ແລະ ການເມືອງຕໍ່ລະບອບການປົກຄອງທະຫານນັ້ນ, ລວມມີການຫ້າມໂອນເງິນໂດລາ ສະຫະລັດ ດ້ວຍວິສະຫະກິດທີ່ລັດຖະບານເປັນເຈົ້າຂອງທີ່ອະນຸຍາດໃຫ້ກອງທັບ ສັງຫານ ແລະ ສ້າງອັນຕະລາຍຕໍ່ພົນລະເຮືອນ.”
ເອກອັກຄະລັດຖະທູດ ແວນ ສແກັກ ກ່າວວ່າ “ລັດຖະບານ ສະຫະລັດ ຍັງໄດ້ສະໜອງການຊ່ວຍເຫຼືອເກືອບ 4 ພັນ 2 ຮ້ອຍລ້ານໂດລາເພື່ອຊ່ວຍເຫຼືອອົບພະຍົບໃນ ບັງກລາແດັສ ແລະ ສິ່ງຂອງທີ່ຈຳເປັນອື່ນໆເຊັ່ນກັນ.”
ທ່ານນາງກ່າວວ່າ “ໃນອະນາຄົດ, ສະຫະລັດ ຈະສືບຕໍ່ດຳເນີນການບັນທຶກຢ່າງກວ້າງຂວາງ ກ່ຽວກັບ ພຶດຕິກຳທີ່ໂຫດຮ້າຍ ແລະ ຮຽກຮ້ອງຄວາມຮັບຜິດຊອບສຳລັບການລະເມີດສິດທິມະນຸດ ແລະ ສຳລັບການສໍ້ລາດບັງຫຼວງ. ພວກເຮົາຈະສືບຕໍ່ສະໜັບສະໜູນປະຊາຊົນ ມຽນມາ ໃນຄວາມພະຍາຍາມຂອງເຂົາເຈົ້າເພື່ອຊອກຫາຄວາມຈິງ, ຄວາມເປັນທຳ ແລະ ຄວາມຮັບຜິດຊອບ.”