ສະຫະລັດ ກ່າວປະນາມຢ່າງແຮງຕໍ່ການຟ້ອງຮ້ອງຜູ້ສະໜັບສະໜູນປະຊາທິປະໄຕ ແລະ ເຈົ້າຂອງສື່ມວນຊົນ ທ່ານ ຈິມມີ ລາຍ ໃນ ຮົງກົງ.
ທ່ານ ລາຍ ຖືກຟ້ອງຮ້ອງພາຍໃຕ້ກົດໝາຍຄວາມໝັ້ນຄົງແຫ່ງຊາດທີ່ເຂັ້ມງວດ, ທີ່ຖືກກຳນົດຕໍ່ເກາະຮົງກົງໂດຍ ປັກກິ່ງ ຫຼັງຈາກການປະທ້ວງທົ່ວເມືອງດັ່ງກ່າວໃນປີ 2019. ປະຊາຊົນ ຮົງກົງ ຫຼາຍພັນຄົນໄດ້ເຕົ້າໂຮມກັນຢູ່ຖະໜົນຕ່າງໆ ເພື່ອປະທ້ວງ ການຫ້າມຕໍ່ເສລີພາບພື້ນຖານຂອງເຂົາເຈົ້າ ແລະ ການປົກຄອງຕົນເອງທາງການເມືອງທີ່ຖືກສັນຍາໄວ້ ເວລາທີ່ ອັງກິດ ໄດ້ມອບການປົກຄອງຂອງເມືອງ ທີ່ດຳເນີນຢ່າງເປັນປະຊາທິປະໄຕ ໃຫ້ສາທາລະນະລັດ ປະຊາຊົນ ຈີນ ໃນປີ 1997.
ພາຍໃຕ້ກົດໝາຍຄວາມໝັ້ນຄົງແຫ່ງຊາດ, ທ່ານ ຈິມມີ ລາຍ ຖືກຕັ້ງຂໍ້ຫາ ກ່ຽວກັບ ການສົມຮູ້ຮ່ວມຄິດ ກັບກອງກຳລັງຕ່າງຊາດ, ເຊິ່ງແມ່ນອາຊະຍາກຳທີ່ສາມາດລົງໂທດຂັງຄຸກຕະຫຼອດຊີວິດໄດ້, ຖ້າຖືກຕັດສິນວ່າມີຄວາມຜິດ.
ດັ້ງເດີມແລ້ວຜູ້ຊາຍອາຍຸ 12 ປີທີ່ແອບຂຶ້ນກຳປັ່ນໄປເກາະຮົງກົງຈາກ ສປ ຈີນ, ທ່ານ ລາຍ ໄດ້ສ້າງອານາຈັກເຄື່ອງນຸ່ງທີ່ປະສົບຄວາມສຳເລັດ ກ່ອນການກໍ່ຕັ້ງສື່ມວນຊົນຫຼາຍແຫ່ງ, ລວມທັງໜັງສືພິມ Apple Daily ທີ່ໄດ້ຮັບຄວາມນິຍົມ, ເຊິ່ງຖືກປິດລົງໃນປີ 2021. ນັກເຄື່ອນໄຫວສະໜັບສະໜູນປະຊາທິປະໄຕຫົວຈັດ ແລະ ນັກວິຈານການລ່ວງລະເມີດສິດທິມະນຸດຂອງ ຈີນ, ລວມທັງການລ່ວງລະເມີດເສລີພາບທາງສາສະໜາ, ທ່ານ ລາຍ ຖືກກັກຂັງໂດຍພວກເຈົ້າໜ້າທີ່ ຮົງກົງ ໃນປີ 2020 ໃນຂໍ້ກ່າວຫາທີ່ອີງໃສ່ຄວາມປອດໄພຫຼາຍຢ່າງ ແລະ ຖືກຂັງຄຸກດົນກວ່າ 1,000 ວັນແລ້ວ.
ບັນດາຜູ້ນຳການເຄື່ອນໄຫວສະໜັບສະໜູນປະຊາທິປະໄຕຫຼາຍຄົນໃນ ຮົງກົງ ຖືກຄວບຄຸມຕົວໂດຍລັດຖະບານດັ່ງກ່າວຫຼັງຈາກການປະທ້ວງໃນປີ 2019, ເຊິ່ງຫຼາຍຄົນໄດ້ຫຼົບໜີໄປຕ່າງປະເທດ. ແຕ່ທ່ານ ຈິມມີ ລາຍ ໄດ້ເລືອກທີ່ຈະຢູ່ໃນຮົງກົງ.
ການດຳເນີນຄະດີໃນປັດຈຸບັນຂອງທ່ານ ລາຍ ໄດ້ເລີ່ມຂຶ້ນເມື່ອວັນທີ 18 ທັນວາທີ່ຜ່ານມາ ກ່ອນຄະນະກຳມະການທີ່ປະກອບມີຜູ້ພິພາກສາສາມໂດຍໄດ້ຮັບການອະນຸມັດໂດຍລັດຖະບານ. ມັນບໍ່ມີຄະນະຕຸລາການ, ແລະ ການດຳເນີນຄະດີແມ່ນຄາດວ່າຍາວ 80 ວັນ. ທ່ານບໍ່ໄດ້ຮັບອະນຸຍາດ ໃຫ້ຈ້າງທະນາຍຄວາມທີ່ທ່ານເລືອກ.
ໂຄສົກກະຊວງການຕ່າງປະເທດ ທ່ານ ແມັດທິວ ມິລເລີ ໄດ້ອອກຖະແຫຼງການສະບັບນຶ່ງທີ່ກ່າວປະນາມການຟ້ອງຮ້ອງທ່ານ ຈິມມີ ລາຍ ພາຍໃຕ້ກົດໝາຍຄວາມໝັ້ງຄົງແຫ່ງຊາດຂອງ ຮົງກົງ ແລະ ໄດ້ກ່າວຢ້ຳເຖິງການກັກຂັງກ່ອນດຳເນີນຄະດີທີ່ຍາວນານ ແລະ ການປະຕິເສດຕົວແທນທາງກົດໝາຍທີ່ທ່ານເລືອກ.
ທ່ານໄດ້ກ່າວວ່າ “ພວກເຮົາຮຽກຮ້ອງເຈົ້າໜ້າທີ່ ປັກກິ່ງ ແລະ ຮົງກົງ ໃຫ້ເຄົາລົບເສລີພາບຂອງສື່ມວນຊົນໃນ ຮົງກົງ. ການກະທຳທີ່ປາບປາມເສລີພາບຂອງສື່ມວນຊົນ ແລະ ການຫ້າມການຫຼັ່ງໄຫຼຂອງຂໍ້ມູນທີ່ເສລີ ເຊັ່ນດຽວກັບການປ່ຽນແປງລະບົບການເລືອກຕັ້ງຂອງພວກເຈົ້າໜ້າທີ່ ປັກກິ່ງ ແລະ ທ້ອງຖິ່ນທີ່ຫຼຸດຜ່ອນການລົງຄະແນນສຽງໂດຍກົງ ແລະ ຂັດຂວາງຜູ້ລົງແຂ່ງຂັນພັກການເມືອງທີ່ສະໜັບສະໜູນປະຊາທິປະໄຕຈາກການເຂົ້າຮ່ວມ, ໄດ້ທຳລາຍສະຖາບັນທີ່ເປັນປະຊາທິປະໄຕຂອງຮົງກົງ ແລະ ສ້າງຄວາມເສຍຫາຍຕຕໍ່ຊື່ສຽງຂອງຮົງກົງ ໃນຖານະທີ່ເປັນສູນກາງຂອງທຸລະກິດສາກົນ ແລະ ການເງິນ. ພວກເຮົາຂໍຮຽກຮ້ອງບັນດາເຈົ້າໜ້າທີ່ ຮົງກົງ ໃຫ້ປ່ອຍຕົວທ່ານ ຈິມມີ ລາຍ ໃນທັນທີ ແລະ ຄົນອື່ນໆທີ່ຖືກຂັງຄຸກສຳລັບການປ້ອງກັນສິດທິມະນຸດ.”