Accessibility links

Breaking News

ບົດບັນນາທິການ: ຢູ່ບາຫຼີ ປະທານາທິບໍດີໄບເດັນ ໄດ້ຊົມເຊີຍຄວາມກ້າວໜ້າໃນການເປັນພາຄີ


ປະ​ທາ​ນາ​ທິ​ບໍ​ດີສະ​ຫະ​ລັດ ທ່ານ​ໂຈ ໄບ​ເດັນ ​ພົບ​ປະ​ກັບ​ນາ​ຍົກ​ລັດ​ຖະ​ມົນ​ຕີ​ອັງ​ກິດ ທ່ານ​ຣິ​ສ​ຊີ ຊູ​ນາກ ທີ່​ນູ​ຊາ ດ​ວາ ເກາະ​ບາ​ຫຼີ ປະ​ເທດ​ອິນ​ໂດ​ເນ​ເຊຍ ເມື່ອ​ວັນ​ທີ 16 ພະ​ຈິກ 2022.

ເນື້ອໄນຂອງກອງປະຊຸມສຸດຍອດ ກຸ່ມຈີ 20 ທີ່ເກາະບາຫຼີ ປະເທດອິນໂດເນເຊຍໃນປີນີ້ິ້ ກໍແມ່ນ “ຟື້ນໂຕຄືນຮ່ວມກັນ ຟື້ນໂຕຄືນໃຫ້ເຂັ້ມແຂງກວ່າເກົ່າ.”

ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ

ເນື້ອ​ໄນ​ຂອງກອງ​ປະ​ຊຸມ​ສຸດຍອດ​ກຸ່ມ​ຈີ 20 ທີ່​ເກາະ​ບາ​ຫຼີ ປະ​ເທດ​ອິນ​ໂດ​ເນ​ເຊຍ​ໃນ​ປີນີ້ິ້ ກໍ​ແມ່ນ “ຟື້ນ​ໂຕ​ຄືນ​ຮ່ວມ​ກັນ ຟື້ນ​ໂຕ​ຄືນ​ໃຫ້​ເຂັ້ມ​ແຂງກວ່າ​ເກົ່າ.”

ເນື້ອ​ໄນ​ດັ່ງ​ກ່າວ​ໄດ້​ຖືກ​ເນັ້ນ​ຢ້ຳ ​ຢູ່​ໃນ​ກອງ​ປະ​ຊຸມ​ທີ່ຈັດຂຶ້ນ​ຄຽງ​ຄູ່ ​ໂດຍ​ການເປັນ​ເຈົ້າ​ພາບ​ຮ່ວມ​ຂອງ​ປະ​ທາ​ນາ​ທິ​ບໍ​ດີ​ໂຈ ໄບ​ເດັນ ປະ​ທາ​ນາ​ທິ​ບໍ​ດີ​ອິນ​ໂດ​ເນ​ເຊຍ ທ່ານ​ໂຈ​ໂກ ວີ​ໂດ​ໂດແລະ​ປະ​ທານ​ກຳ​ມາ​ທິ​ການ​ຢູ​ໂຣບ ທ່ານ​ນາງ​ເອີ​ຊູ​ລາ ວອນເດີ ເລ​ເຢັນ. ກອງ​ປະ​ຊຸມນີ້ ຍັງ​ເປັນ​ໂອ​ກາດ​ໃຫ້​ປະ​ເທດ​ຕ່າງໆ​ລົງ​ເລິກ ໃນ​ການ​ພົວ​ພັນ​ຂອງ​ພວກ​ເຂົາ​ເຈົ້າ ພາຍ​ໃຕ້​ການ​ເປັນ​ພາ​ຄີ​ດ້ານ​ພື້ນ​ຖານ​ໂຄງ​ລ່າງ ແລະ​ການ​ລົງ​ທຶນ​ຂອງ​ໂລກ ຊຶ່ງ​ຮູ້​ກັນ​ໂດຍ​ຊື່​ຫຍໍ້​ວ່າ PGII. ​ພາ​ຄີ PGII ໄດ້​ເປີດ​ໂຕ​ທີ່ກອງ​ປະ​ຊຸມ​ສຸດຍອດ​ຂອງ​ກຸ່ມ​ຈີ 7 ໃນ​ເດືອນ​ມິ​ຖຸ​ນາ​ຜ່ານ​ມາ ໂດຍ​ມີ​ຈຸດ​ປະ​ສົງທີ່ຈະ​ເສີມ​ຂະ​ຫຍາຍ​ການ​ເປັນ​ພາ​ຄີ​ຂອງ​ໂລກ ເພື່ອ​ໃຫ້​ເງິນ​ສະ​ໜັບ​ສະ​ໜຸນ​ໃນ​ການ​ປັບ​ປຸງ​ພື້ນ​ຖານ​ໂຄງ​ລ່າງ​ ແລະ​ລະ​ດົມ​ພາກ​ເອກ​ກະ​ຊົນ ​ໃຫ້​ເປັນ​ແຮງ​ຂັບ​ດັນ​ເຂົ້າ​ໃນ​ການ​ລົງ​ທຶນ​ແບບ​ມີ​ຄຸນ​ນະ​ພາບ ສຳ​ລັບ​ບັນ​ດາ​ປະ​ເທດ​ທີ່​ມີ​ລາຍ​ໄດ້​ຕ່ຳ​ຫາ​ປານກາງ. ເປົ້າ​ໝາຍ​ຮ່ວມ​ແມ່ນ​ລະ​ດົມ​ທຶນໃຫ້​ໄດ້ 600 ຕື້ໂດ​ລາ​ພາຍ​ໃນ​ເວ​ລາ 5 ປີ.

ໃນ​ການ​ໃຫ້​ຄວາມ​ເຫັນ​ຂອງ​ທ່ານ ປະ​ທາ​ນາ​ທິ​ບໍ​ດີ​ໄບ​ເດັນ ກ່າວ​ວ່າ “ໂດຍ​ຜ່ານການ​ເປັນ​ພາ​ຄີນີ້ ພວກ​ເຮົາ​ແມ່ນ​ໄດ້​ລິ​ເລີ້ມ​ໄປ​ແລ້ວ ໂຄງ​ການ​ໃໝ່​ຈຳ​ນວນ​ນຶ່ງ​ກັບ ບັນ​ດາ​ປະເທດ​ໃນ​ທົ່ວ​ກຸ່ມ​ຈີ 20 ແລະ​ນອກ​ອອກ​ໄປ ໂດຍ​ຮ່ວມ​ມື​ກັນ​ໃນ​ວິ​ທີ​ທາງ​ໃໝ່ ກ່ຽວ​ກັບ​ການ​ປ່ຽນ​ແປງ​ຂອງ​ດິນ​ຟ້າ​ອາ​ກາດ ຄວາມ​ໝັ້ນ​ຄົງ​ທາງ​ດ້ານ​ພະ​ລັງ​ງານ ການ​ເຊື່ອມ​ຕໍ່​ທາງ​ດີ​ຈີ​ຕອ​ລ ພື້ນ​ຖານ​ໂຄງ​ລ່າງ​ດ້ານ​ສຸ​ຂະ​ພາບ ຕະ​ຫລອດ​ທັງ​ຄວາມ​ເປັນ​ທຳ​ ແລະ​ຄວາມ​ສະ​ເໝີ​ພາບ​ທາງ​ເພດ.”

ຮວ​ມ​ຢູ່​ໃນ​ຕົວ​ຢ່າງ​ຕ່າງໆ​ທີ່​ທ່ານ​ໄດ້​ເວົ້າ​ເຖິງ​ມານັ້ນ ແມ່ນພາ​ຄີ​ການ​ປ່ຽນ​ແປງ​ເພື່ອ​ຄວາມ​ເປັນ​ທຳ​ທາງ​ດ້ານ​ພະ​ລັງ​ງານ​ຂອງ​ອິນ​ໂດ​ເນ​ເຊຍ ມູນ​ຄ່າ 20 ຕື້​ໂດ​ລາ ທີ່​ເອີ້ນ​ຫຍໍ້​ວ່າ JETP ຊຶ່ງ​ຈະ​ນຳ​ເອົາ 10 ປະ​ເທດ​ມາ​ເຕົ້າ​ໂຮມ​ກັນ ນຳ​ພາ​ໂດຍ​ສະຫະ​ລັດ ແລະ​ຍີ່​ປຸ່ນ ເພື່ອ​ເຮັດ​ວຽກ ​ຮ່ວມ​ກັບ​ອິນ​ໂດ​ເນ​ເຊຍ ໃນ​ການ​ປ່ຽນ​ແປງ​ພະ​ລັງ​ງານ​ແບບ​ເປັນ​ທຳ​ ຊຶ່ງ​ຮວມ​ທັງ​ການ​ຫຼຸດ​ຜ່ອນ​ໃນ​ການ​ປ່ອຍ​ແກັ​ສ​ເຮືອນ​ແກ້ວ​ທີ່ອີງ​ໃສ່​ການ​ຂະ​ຫຍາຍ​ພະ​ລັງ​ງານ​ທົດ​ແທນ ຕະ​ຫຼອດ​ເຖິງ​ການ​ໂອນ​ພະ​ລັງ​ງານ​ທີ່​ເປັນ​ທຳ​ສຳ​ລັບ​ພວກ​ຄົນ​ງານ ແລະ​ປະ​ຊາ​ຄົມ​ຕ່າງໆ.”

ອີກ​ໂຄງ​ການ​ນຶ່ງ​ທີ່​ໄດ້​ມີ​ການ​ເນັ້ນ​ຢ້ຳກໍ​ຄື​ຂໍ້​ສະ​ເໜີ​ຂອງ​ອິນ​ໂດ​ເນ​ເຊຍມູນ​ຄ່າ 649 ​ລ້ານ​ໂດ​ລາ ກັບ​ອົງ​ການ Millennium Challenge Corporation ຫຼື MCC ຊຶ່ງ​ສະ​ຫະ​ລັດ​ແລະ​ອິນໂດ​ເນ​ເຊຍຈະ​ເປັນ​ພາ​ຄີ ເພື່ອ​ໃຫ້​ການ​ສະ​ໜັບ​ສະ​ໜຸນ​ການ​ພັ​ດ​ທະ​ນາ​ພື້ນ​ຖານ​ໂຄງ​ລ່າງ​ໃນ​ດ້ານ​ການ​ຂົນ​ສົ່ງ​ທີ່​ມີ​ຄຸນ​ນະ​ພາບ ຮັບ​ຮູ້​ເຖິງ​ການ​ປ່ຽນ​ແປງ​ຂອງ​ດິນ​ຟ້າ​ອາ​ກາດ ຕະ​ຫຼອດ​ທັງ​ການ​ເຂົ້າ​ເຖິງ​ໃນ​ດ້ານ​ການ​ເງິນ ຂອງທຸ​ລະ​ກິດ​ຂະ​ໜາດ​ນ້ອຍ​ສຸດ ນ້ອຍແລະ​ຂະ​ໜາດ​ກາງ​ທີ່​ພວກ​ແມ່​ຍິງ​ເປັນ​ເຈົ້າ​ຂອງ ຊຶ່ງ​ສ້າງ​ລາຍ​ໄດ້​ປະ​ມານ 60 ເປີ​ເຊັນ​ໃຫ້​ແກ່ຍອດ​ຜະ​ລິດ​ຮວມ​ພາຍ​ໃນ​ຫຼື GDP ຂອງ​ອິນ​ໂດ​ເນ​ເຊຍ.

ນອກນັ້ນ ຍັງ​ໄດ້​ມີ​ການ​ເພັ່ງ​ເລັງ​ໃສ່​ເລື້ອງ​ການ​ເຊື່ອມ​ຕໍ່​ທາງ​ດີ​ຈີ​ຕອ​ລ. ສະ​ຫະ​ລັດ​ແມ່ນ​ເປັນ​ພາ​ຄີ ​ກັບ​ປະ​ເທດ​ຍີ່​ປຸ່ນ ແລະ​ ອອ​ສ​ເຕ​ຣ​ເລຍ ເພື່ອ​ຍົກ​ລະ​ດັບ​ຂອງ​ຕາ​ໜ່າງ​ອິນ​ເຕີ​ແນັດ​ໃນ​ປາ​ປົວ​ນິວ​ກີ​ນີແລະ​ໃນ​ທົ່ວ​ຂົງ​ເຂດ​ປາ​ຊີ​ຟິກ. ນອກ​ເໜືອ​ໄປ​ຈາກ​ນັ້ນ​ແລ້ວ ໂດຍ​ຜ່ານ​ການ​ລົງ​ທຶນ​ໃນ​ດ້ານ​ດີ​ຈິ​ຕອລ​ຂອງ​ສະ​ຫະ​ລັດ ປະ​ສົມ​ກັບ​ໂຄງ​ການ​ທາງ​ດ້ານ​ການ​ເງິນສະ​ຫະ​ລັດ​ພວມ​ເຮັດ​ວຽກ​ຮ່ວມ​ກັບບໍ​ລິ​ສັດ CSquared ຂອງ​ເຄັນ​ຢາ​ທີ່​ເປັນ​ພາ​ຄີ ເພື່ອ​ສ້າງ​ຕາ​ໜ່າງ​ສາຍ​ໃຍ​ແກ້ວ​ຫຼື​ຟາຍ​ເບີ້​ຢູ່​ໃນ​ປະ​ເທດ​ໄລ​ບີ​ເຣຍ ທີ່​ຈະ​ຊ່ວຍເຊື່ອມ​ໂຍງປະ​ຊາ​ຊົນ​ 1 ລ້ານ​ຄົນ​ໃຫ້​ໄດ້​ຊົມ​ໃຊ້​ອິນ​ເຕີ​ແນັດ.

ຢູ່​ໃນ​ທົ່ວ​ໂລກ ປະ​ທາ​ນາ​ທິ​ບໍ​ດີ​ໄບ​ເດັນ ໃຫ້​ຂໍ້​ສັງ​ເກດ​ວ່າ ພາ​ຄີ PGII ຍັງ​ໄດ້​ລົງ​ທຶນ​ກ່ຽວ​ກັບ​ແຮ່​ທາດ​ທີ່​ສຳ​ຄັນ ແລະ​ ຕ່ອງ​ໂສ້​ອຸບ​ປະ​ທານ ຕະ​ຫຼອດ​ທັງ​ ພື້ນ​ຖານ​ໂຄງ​ລ່າງໃນ​ດ້​ານ​ການ​ຮັກ​ສາ​ສຸ​ຂະ​ພາບ.

“ການ​ສ້າງ​ໂອ​ກາດ​ອັນ​ແທ້​ຈິງ ທີ່​ມີ​ຄວາມ​ສະ​ເໝີ​ພາບ​ຫຼາຍ​ຂຶ້ນ ແລະ​ມີ​ສຸ​ຂະ​ພາບ​ດີ​ຂຶ້ນ ໂລກ​ທີ່​ອຸ​ດົມ​ຮັ່ງ​ມີ ນັ້ນ​ຄື​ສິ່ງ​ທີ່​ພວກ​ເຮົາ​ທັງ​ໝົດ​ຕ່າງ​ກໍ​ປະ​ສົງ” ປະ​ທາ​ນາ​ທິ​ບໍ​ດີ​ໄບ​ເດັນໄດ້​ກ່າວ. “ພວກ​ເຮົາ​ຂໍ​ຊົມ​ເຊີຍ​ຕໍ່​ທຸກໆ​ຄົນ ທີ່​ມີ​ວິ​ໄສ​ທັດ​ແບບ​ດຽວ​ກັນ ຊຶ່ງ​ໄດ້​ເຂົ້າ​ຮ່ວມ​ໃນ​ການ​ເປັນ​ພາ​ຄີນີ້.”

XS
SM
MD
LG