ຢູ່ກອງປະຊຸມເສດຖະກິດໂລກເມື່ອບໍ່ດົນມານີ້, ທີ່ປຶກສາດ້ານຄວາມໝັ້ນຄົງແຫ່ງຊາດ ທ່ານ ເຈກ ຊຸລລີວານ ໄດ້ກ່າວວ່າໂລກແມ່ນ “ຍັງຢູ່ໃນຊຸມປີຕົ້ນໆ ຂອງຍຸກສະໄໝໃໝ່,” ຍຸກສະໄໝທີ່ເຕັມໄປດ້ວຍສິ່ງທ້າທາຍ, ແຕ່ເປັນສະໄໝທີ່ສາມາດປັບປ່ຽນເພື່ອຜົນປະໂຫຍດຂອງທຸກຄົນ, ຖ້າມີວິໄສທັດ, ມີຄວາມມຸ່ງໝາຍອັນນຶ່ງດຽວກັນ ແລະ ມີຄວາມຄິດໃນແງ່ບວກ.
ທ່ານກ່າວວ່າ “ຍຸກນີ້ແມ່ນຍຸກຂອງການປ່ຽນແປງທີ່ຫຍຸ້ງຍາກ. ບາງສິ່ງໃນນີ້ແມ່ນໄດ້ມີແງ່ບວກ, ໃນຂະນະທີ່ປະເທດຕ່າງໆຊອກຫາວິທີໃໝ່ເພື່ອຄວບຄຸມເທັກໂນໂລຈີ, ສົ່ງເສີມການພັດທະນາ, ແລະ ເສີມຂະຫຍາຍສາຍພົວພັນເຊິ່ງກັນແລະກັນ. ແຕ່ບາງອັນແມ່ນໄດ້ເປັນແງ່ລົບ, ໃນຂະນະທີ່ຜູ້ກະທຳທີ່ອັນຕະລາຍ ທົດລອງຂີດຈຳກັດຂອງລະບົບສາກົນ ທີ່ເຕີບໂຕຂຶ້ນເລື້ອຍໆ.”
ໃນການປະເຊີນໜ້າກັບການຮຸກຮານທີ່ອັນຕະລາຍ, ຄືການໂຈມຕີ ຢູເຄຣນ ຂອງທ່ານ ປູຕິນ ນັ້ນ, ທີ່ປຶກສາດ້ານຄວາມໝັ້ນຄົງແຫ່ງຊາດ ທ່ານ ຊຸລລີວານ ໄດ້ກ່າວຢ້ຳວ່າ ສະຫະລັດ ແມ່ນ “ຈະບໍ່ເກັບໄວ້ກັບຕົນເອງ.”
ທ່ານກ່າວວ່າ “ພາຍໃຕ້ການນຳພາຂອງປະທານາທິບໍດີ ໄບເດັນ, ພວກເຮົາກຳລັງປຸກລະດົມການຕອບໂຕ້ຈາກທົ່ວໂລກເພື່ອຕ້ານຢັນຄືນ. ພວກເຮົາກຳລັງດຳເນີນການທາງການທູດທີ່ເຂັ້ມງວດ ແລະ ແຂງຂັນເພື່ອຈັດການກັບສາຍພົວພັນທີ່ມີຜົນຕາມມາຫຼາຍທີ່ສຸດຂອງພວກເຮົາ. ພວກເຮົາກຳລັງລົງທຶນໃນແຫຼ່ງຕ່າງໆຂອງຄວາມແຂງແກ່ນແຫ່ງຊາດຂອງພວກເຮົາ ແລະ ຜູ້ທີ່ເປັນພັນທະມິດ ແລະ ຄູ່ຮ່ວມຂອງພວກເຮົາ. ພວກເຮົາຈະບໍ່ຫັນໜີຈາກລະບົບເສດຖະກິດສາກົນແຕ່ປັບມັນໃຫ້ເຂົ້າກັບສິ່ງທ້າທາຍຕ່າງໆຂອງມື້ນີ້ ແລະ ມື້ອື່ນ. ແລະ ພວກເຮົາແມ່ນກຳລັງແຂ່ງຂັນຢ່າງຂະຫຍັນຂັນແຂງເພື່ອສ້າງອະນາຄົດຂອງລະບົບສາກົນ.”
ໃນ ຢູເຄຣນ, ທ່ານ ປູຕິນ ແມ່ນຖືກຂັດຂວາງໃນຄວາມພະຍາຍາມຂອງທ່ານທີ່ຈະປາບປາມປະເທດເພື່ອນບ້ານ ທີ່ມີອຳນາດອະທິປະໄຕຂອງທ່ານ, ອີງຕາມການກ່າວຂອງທ່ານ ຊຸລລີວານ. ໃນຕາເວັນອອກກາງ, ສະຫະລັດ ໄດ້ປຸກລະດົມການຕອບໂຕ້ຂອງສາກົນຕໍ່ການຮຸກຮານໂດຍພວກກະບົດຮູຕີ ທີ່ໄດ້ຮັບການໜູນຫຼັງໂດຍອີຣ່ານ.
ທ່ານກ່າວວ່າ “ຜ່ານການປະສານກັນຂອງຂັດຂວາງທີ່ສະໝ່ຳສະເໝີ ແລະ ການທູດທີ່ແນ່ນອນ, ພວກເຮົາພະຍາຍາມທີ່ຈະຢຸດການແຜ່ລາມຂອງຄວາມຂັດແຍ້ງ ແລະ ສ້າງເງື່ອນໄຂສຳລັບການຫຼຸດຜ່ອນຄວາມຮຸນແຮງ.”
ນັ້ນແມ່ນລວມມີຄວາມຂັດແຍ້ງລະຫວ່າງ ອິສຣາແອລ ແລະ ກຸ່ມຮາມາສ, ເຊິ່ງ “ດົນກ່ອນວັນທີ 7 ຕຸລາ, ສະຫະລັດ ແມ່ນໄດ້ມີສ່ວນຮ່ວມຢ່າງເລິກເຊິ່ງທີ່ຈະປະກັນຂອບເຂດທາງການເມືອງສຳລັບປະຊາຊົນ ປາແລັສໄຕນ໌, ດ້ວຍຄວາມປອດໄພຂອງ ອິສຣາແອລ ຖືກຮັບປະກັນດັ່ງກັບສ່ວນນຶ່ງຂອງມັນ,” ອີງຕາມການກ່າວຂອງທີ່ປຶກສາດ້ານຄວາມໝັ້ນຄົງແຫ່ງຊາດ ທ່ານ ຊຸລລີວານ. ວຽກງານນັ້ນແມ່ນຈະສືບຕໍ່ໄປ.
ທ່ານໄດ້ກ່າວຢ້ຳວ່າ ສະຫະລັດ ແມ່ນຍັງໄດ້ຈັດການກັບສາຍພົວພັນທີ່ສຳຄັນຂອງເຂົາເຈົ້າ, “ບໍ່ມີຫຍັງທີ່ສຳຄັນໄປກວ່າ” ກັບຈີນ. “ພວກເຮົາກຳລັງພະຍາຍາມທີ່ຈະຈັດການກັບການແຂ່ງຂັນຢ່າງມີຄວາມຮັບຜິດຊອບ, ຂະຫຍາຍການພົວພັນທາງການທູດເພື່ອຫຼຸດຜ່ອນຄວາມສ່ຽງຂອງການຄິດໄລ່ທີ່ຜິດ.”
ທ່ານເວົ້າວ່າ “ສະນັ້ນພວກເຮົາຈະຢູ່ໃນຊ່ອງທາງ ແລະ ອາໄສຄູ່ຮ່ວມຂອງພວກເຮົາ.. ເພື່ອສືບຕໍ່ກັບພວກເຮົາ, ເພື່ອເຮັດໃຫ້ກະຈ່າງແຈ້ງວ່າການລົບກວນທີ່ຮຸນແຮງຕໍ່ລະບົບສາກົນຈະປະສົບຄວາມລົ້ມແຫຼວ, ເພື່ອຮັກສາຄຳໝັ້ນສັນຍາທາງການທູດໄວ້ຄືເກົ່າ, ເຊິ່ງມີຄວາມສຳຄັນຍິ່ງກວ່າໃນຂະນະທີ່ຄວາມເຄັ່ງຕຶງດ້ານພູມສາດການເມືອງເພີ່ມຂຶ້ນ,” ອີງຕາມການປະກາດຂອງທີ່ປຶກສາດ້ານຄວາມໝັ້ນຄົງແຫ່ງຊາດທ່ານ ຊຸລລີວານ. ທ່ານເວົ້າວ່າ “ມັນຂຶ້ນກັບພວກເຮົາ… ທີ່ຈະສ້າງອະນາຄົດເພື່ອຜົນປະໂຫຍດຂອງເພື່ອຮ່ວມຊາດຂອງພວກເຮົາ ແລະ ອະນາຄົດຂອງຄົນລຸ້ນຕໍ່ໄປໃນອະນາຄົດ.”