ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ການເຮັດລັດຖະປະຫານໃນມຽນມາ ໄດ້ຜ່ານມາເປັນເວລານຶ່ງປີເຄິ່ງແລ້ວ. ໃນຊ່ວງເວລາດັ່ງກ່າວ ອຳນາດການປົກຄອງທະຫານມຽນມາໄດ້ເພີ້ມທະວີການກໍ່ຄວາມຮຸນແຮງ ເພື່ອຮວບຮວມອຳນາດ ໃນການເຂົ້າຄວບຄຸມປະເທດ ຊຶ່ງມີລາຍງານວ່າ ໄດ້ສັງຫານປະຊາຊົນຫຼາຍກວ່າ 2,100 ຄົນ ຈັບກຸມຄຸມຂັງຫຼາຍສິບພັນຄົນ ແລະໄດ້ທຳການລ່ວງລະເມີດສິດທິມະນຸດຢ່າງຮ້າຍແຮງ ຮວມທັງຕໍ່ພວກທີ່ຖືກຈັບກຸມຄຸມຂັງນັ້ນ. ເມື່ອໄວໆມານີ້ ອຳນາດການປົກຄອງດັ່ງກ່າວກໍໄດ້ກະທຳການທີ່ຊົ່ວຊ້າ ໂດຍປະຫານຊີວິດພວກນັກເຄື່ອນໄຫວເພື່ອປະຊາທິປະໄຕ 4 ຄົນ ແລະຍິ່ງໄປກວ່ານັ້ນ ຍັງໄດ້ເພີ້ມທະວີການກົດຂີ່ປາບປາມຢ່າງໂຫດຮ້າຍປ່າເຖື່ອນຕໍ່ປະຊາຊົນຊາວມຽນມາ.
ໃນການປະຊຸມຢູ່ວໍຊິງຕັນເມື່ອບໍ່ດົນມານີ້ ທ່ານດິເຣັກ ໂຊລເລ ທີ່ປຶກສາຂອງກະຊວງການຕ່າງປະເທດສະຫະລັດ ຊີ້ໃຫ້ເຫັນວ່າ ອຳນາດການປົກຄອງທະຫານ ມຽນມາໄດ້ສະແດງໃຫ້ເຫັນເຖິງຄວາມບໍ່ເຕັມໃຈທີ່ຈະທຳການເຈລະຈາຢ່າງເດັດຂາດ.
“ແຕ່ຢູ່ພາຍໃຕ້ຄວາມໂຫດຮ້າຍປ່າເຖື່ອນທີ່ໜ້າຢ້ານກົວນີ້ ພວກເຮົາໄດ້ມອງເຫັນອຳນາດການປົກຄອງທີ່ຖືກໂດດດ່ຽວແລະບໍ່ມີຄວາມໝັ້ນຄົງພວມປະເຊີນໜ້າກັບຂະບວນການຕໍ່ຕ້ານປະຊາຊົນ ທີ່ນັບມື້ນັບເພີ້ມທະວີຂຶ້ນ ແລະສາມາດປັບໂຕໄດ້ ແລະໃນຂະນະທີ່ພວກທະຫານ ກ່າວອ້າງວ່າ ຕົນສາມາດຄວບຄຸມປະເທດ ແຕ່ໃນສະພາບການໂຕຈິງແລ້ວ ການຄວບຄຸມທາງດ້ານການເມືອງແລະເສດຖະກິດ ຍັງມີການຍາດແຍ່ງກັນຢູ່ແລະອຳນາດການປົກຄອງທະຫານໄດ້ສະແດງໃຫ້ເຫັນວ່າ ພວກຕົນໂດຍພື້ນຖານແລ້ວບໍ່ສາມາດສ້າງສະຖຽນລະພາບໄດ້.”
ສະຫະລັດຍັງສືບຕໍ່ມີຄວາມຕັ້ງໃຈຢ່າງແນ່ວແນ່ທີ່ຈະຟື້ນຟູເສັ້ນທາງໄປສູ່ປະຊາທິປະໄຕໃນມຽນມາ ແບບມີຫຼາຍພັກການເມືອງແລະຮວມເອົາທຸກພັກຝ່າຍ ເພື່ອເຮັດວຽກຮ່ວມກັບປະເທດພັນທະມິດແລະພາຄີ ໃນການແກ້ໄຂບັນຫາສິດທິມະນຸດ ແລະວິກິດການທາງດ້ານມະນຸດສະທຳທີ່ເກີດມາຈາກການປາບປາມຢ່າງໂຫດຮ້າຍປ່າເຖື່ອນຂອງອຳນາດການປົກຄອງທະຫານ.
ເພື່ອໃຫ້ບັນລຸເປົ້າໝາຍຂັ້ນສຸດທ້າຍນັ້ນ ສະຫະລັດ ໄດ້ລົງໂທດ 70 ກວ່າຄົນ ຮວມທັງບັນດາຜູ້ຕາງໜ້າຂອງພວກທະຫານ ແລະບຸກຄົນອື່ນໆທີ່ຮັບຜິດຊອບໃນການກໍ່ຄວາມຮຸນແຮງ. “ພວກເຮົາຍັງໄດ້ລົງໂທດອົງການຕ່າງໆທີ່ພົວພັນກັບອຳນາດການປົກຄອງ” ນັ້ນຄືການໃຫ້ຂໍ້ສັງເກດຂອງທີ່ປຶກສາໂຊລເລ.
“ພວກເຮົາຍັງໄດ້ຕື່ມຊື່ອົງການຕ່າງໆຂອງພວກທະຫານໃນຈຳນວນຫຼວງຫຼາຍ… ເຂົ້າໃນບັນຊີ ເພື່ອຄ້ຳປະກັນວ່າ ພວກເຂົາຈະບໍ່ໄດ້ຮັບຜົນປະໂຫຍດຈາກການສົ່ງອອກມາຍັງສະຫະລັດ. ພ້ອມກັບການລົງໂທດທາງດ້ານເສດຖະກິດ ຂອງພວກເຮົາຕໍ່ອຳນາດການປົກຄອງນັ້ນ ພວກເຮົາໄດ້ສະໜອງຊັບພະຍາກອນໃຫ້ແກ່ພວກນິຍົມປະຊາທິປະໄຕ ແລະພວກເຮົາໄດ້ໃຫ້ການຊ່ວຍເຫຼືອສຸກເສີນຕໍ່ພວກນັກເຄື່ອນໄຫວຂອງກຸ່ມສັງຄົມພົນລະເຮືອນຫຼາຍກວ່າ 1,000 ຄົນ.”
ໃນທີ່ສຸດ ສະຫະລັດກໍໄດ້ສະໜອງການຊ່ວຍເຫຼືອທາງດ້ານມະນຸດສະທຳໂດຍກົງໃຫ້ແກ່ປະຊາຊົນຊາວມຽນມາ. ເພື່ອຮັບມືກັບວິກິດການໃນມຽນມາ ສະຫະລັດໄດ້ສະໜອງເງິນຫຼາຍກວ່າ 434 ລ້ານໂດລາ ໃນການຊ່ວຍເຫຼືອທາງດ້ານມະນຸດສະທຳສຳລັບຊ່ວຍຊີວິດ ແລະເກືອບ 250 ລ້ານໂດລາ ໃນການຊ່ວຍເຫຼືອທີ່ພົວພັນກັບໂຄວິດ-19 ໃຫ້ແກ່ປະຊາຊົນຊາວມຽນມາ ນັ້ນຄືຄຳເວົ້າຂອງທີ່ປຶກສາໂຊລເລ.
ສະຫະລັດ ຍັງຈະສືບຕໍ່ເພັ່ງເລັງໃສ່ການໃຫ້ຄວາມສະໜັບສະໜຸນແກ່ປະຊາຊົນຊາວມຽນມາທີ່ພວມດີ້ນຮົນຂົນຂວາຍເພື່ອຈະນຳເອົາປະເທດຂອງພວກເຂົາເຈົ້າກັບຄືນໄປສູ່ເສັ້ນທາງປະຊາທິປະໄຕ. ປະຊາຊົນຊາວມຽນມາໄດ້ຮັບຄວາມທຸກທໍລະມານພາຍໃຕ້ການປົກຄອງແບບຜະເດັດການຂອງພວກທະຫານມາເປັນເວລາດົນນານໂພດແລ້ວແລະພວກເຂົາເຈົ້າສົມຄວນຈະໄດ້ຮັບການສະໜັບສະໜຸນໂດຍເຕັມຈາກພວກເຮົາ.