ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ປະຊາຄົມນາໆຊາດຕ້ອງສືບຕໍ່ກົດດັນຊີເຣຍ ໃນການປະກາດທີ່ບໍ່ຖືກຕ້ອງ ແລະບໍ່ຄົບຖ້ວນ ກ່ຽວກັບຂໍ້ຕົກລົງເລື້ອງອາວຸດເຄມີ ໃນຂະນະຊອກຫາຜູ້ຮັບຜິດຊອບໃນການໂຈມຕີດ້ວຍອາວຸດເຄມີຊ້ຳແລ້ວຊ້ຳອີກຕໍ່ປະຊາຊົນຊາວຊີເຣຍໂດຍ ອຳນາດການປົກຄອງອາຊາດ.
ເມື່ອວັນທີ 5 ມັງກອນຜ່ານມາ ຢູ່ໃນການລາຍງານທີ່ສະພາຄວາມໝັ້ນຄົງຂອງອົງການສະຫະປະຊາຊາດ ທ່ານອາເດເດຈີ ອີໂບ ຮອງຜູ້ຕາງໜ້າລະດັບສູງສະຫະປະຊາຊາດ ຮັບຜິດຊອບກິດຈະການຫຼຸດກຳລັງອາວຸດ ກ່າວຕໍ່ສະພາຄວາມໝັ້ນຄົງວ່າ ຊີເຣຍບໍ່ໄດ້ສ້າງຄວາມກ້າວໜ້າໃດໆ ໃນການແກ້ໄຂບັນຫາຄ້າງຄາ ທີ່ພົວພັນກັບມະຕິ 2118. ມະຕິສະບັບນີ້ບັງຄັບໃຫ້ຊີເຣຍປະກາດແລະທຳລາຍ ແບບມີການກວດສອບຕໍ່ທຸກໆອາວຸດເຄມີ ທີ່ຊີເຣຍມີຢູ່ໃນຄວາມຄອບຄອງ. ຍິ່ງໄປກວ່ານັ້ນ ທ່ານກ່າວວ່າ “ການດຳເນີນຄວາມພະຍາຍາມ ໂດຍກອງເລຂາທິການທາງດ້ານເຕັກນິກ ຂອງອົງການເກືອດຫ້າມອາວຸດເຄມີ ຫຼື OPCW ຕໍ່ອົງການ ໃນການປຶກສາຫາລືຮອບຕໍ່ໄປ ກັບອຳນາດການປົກຄອງຊີເຣຍ ຍັງສືບຕໍ່ບໍ່ປະສົບກັບຄວາມສຳເລັດ.” ທ່ານອີໂບ ແຈ້ງໃຫ້ທາງສະພາຊາບວ່າ ເນື່ອງຈາກຂາດຄວາມຮ່ວມມືຈາກອຳນາດການປົກຄອງຊີເຣຍ ທາງອົງການ OPCW ຈະສົ່ງແຕ່ຄະນະທີມງານ ໃນຂະໜາດທີ່ນ້ອຍລົງໄປຍັງຊີເຣຍ ເພື່ອປຶກສາຫາລືໃນ ເດືອນມັງກອນນີ້. ທ່ານໄດ້ກ່າວຢ້ຳເຖິງການຂາດຄວາມຮັບຜິດຊອບໃນການໃຊ້ອາວຸດເຄມີຂອງອຳນາດການປົກຄອງອາຊາດ “ແມ່ນເປັນໄພຂົ່ມຂູ່ຕໍ່ສັນຕິພາບແລະຄວາມໝັ້ນຄົງລະຫວ່າງປະເທດ ແລະຍັງເປັນອັນຕະລາຍຕໍ່ພວກເຮົາທຸກຄົນນຳດ້ວຍ.”
ຮອງຜູ້ຕາງໜ້າຂອງສະຫະລັດ ປະຈຳ ອົງການສະຫະປະຊາຊາດ ທ່ານຣິເຈີດ ມິລສ໌ ກ່າວວ່າ ມັນເປັນເລື້ອງ “ທີ່ໂສກເສົ້າ ໜ້າເປັນຫ່ວງທີ່ໄດ້ເກີດຂຶ້ນໃນຂະນະທີ່ພວກເຮົາເລີ້ມຕົ້ນປີໃໝ່ ຢູ່ສະພາຄວາມໝັ້ນຄົງ ອີກເທື່ອນຶ່ງພວມຫາທາງ ແກ້ໄຂກ່ຽວກັບການນຳໃຊ້ອາວຸດເຄມີຊ້ຳແລ້ວຊ້ຳອີກແບບໃດແລະບໍ່ສາມາດປະຕິບັດຕາມພັນທະ ພາຍໃຕ້ສັນຍາອາວຸດເຄມີ ແລະມະຕິ 2118 ຂອງສະພາຄວາມໝັ້ນຄົງອົງການສະຫະປະຊາຊາດ ໂດຍອຳນາດການປົກຄອງອາຊາດ.”
ໃນຂະນະທີ່ມີການຕ້ອນຮັບຂ່າວດີ ທີ່ວ່າ ຄະນະທີມງານເພື່ອຊັ່ງຊາເບິ່ງຄຳປະກາດຈະເດີນທາງໄປຊີເຣຍ ໃນເດືອນມັງກອນ ເອກອັກຄະລັດຖະທູດມິລສ໌ ກໍໄດ້ກ່າວຢ້ຳເຖິງຄວາມຈຳເປັນ ສຳລັບອຳນາດການປົກຄອງຊີເຣຍຕ້ອງຢຸດເຊົາໃນການຂັດຂວາງ ເພື່ອໃຫ້ອົງການເກືອດຫ້າມອາວຸດເຄມີສາມາດ “ເລີ້ມການເຮັດວຽກແບບມີຄວາມໝາຍຂອງຕົນ … ຍ້ອນຍັງມີຫຼາຍໆຄຳຖາມກ່ຽວກັບຄຳ ປະກາດຂອງຊີເຣຍ ຍັງບໍ່ມີຄຳຕອບເທື່ອ.”
ຮວມຢູ່ໃນນັ້ນ ທ່ານໃຫ້ຂໍ້ສັງເກດວ່າ ມັນຂາດຄວາມໜ້າເຊື່ອຖືຕໍ່ການໃຫ້ຄຳອະທິບາຍ ໃນການກວດພົບເມື່ອປີ 2018 ຂອງສານເຄມີ ທີ່ສູນກາງການສຶກສາ ແລະຄົ້ນຄວ້າວິທະຍາສາດ ທີ່ເມືອງບາຣາ ຊຶ່ງຂັດແຍ້ງກັບຄຳສັ່ງຂອງອົງການ OPCW ແລະຄວາມລົ້ມແຫຼວຂອງອຳນາດການປົກຄອງທີ່ບໍ່ສາມາດສະໜອງເອກກະສານ ໃນການຮ້ອງຂໍຊ້ຳແລ້ວຊ້ຳອີກ ໂດຍຄະນະທີມງານຊັ່ງຊາຄຳປະກາດຂອງອົງການ OPCW ນັບແຕ່ປີ 2019 ເປັນຕົ້ນມາ “ຊຶ່ງຈະໃຫ້ແສງສະວ່າງຕໍ່ໂຄງການອາວຸດເຄມີທັງໝົດຂອງອຳນາດການປົກຄອງ.”
ເອກອັກຄະລັດຖະທູດມິລສ໌ ປະກາດວ່າ “ສະຫະລັດ ອີກເທື່ອນຶ່ງ ຂໍຮຽກຮ້ອງໃຫ້ອຳນາດການປົກຄອງປະຕິບັດຕາມພັນທະມຂອງຕົນ ແລະໃນທັນທີໃຫ້ຢຸດເຊົາການອອກຄຳສັ່ງຕໍ່ພວກນັກຊ່ຽວຊານຂອງຄະນະທີມງານອົງການ OPCW ເພື່ອໃຫ້ພວກເຮົາສາມາດແກ້ໄຂບັນຫາການນຳໃຊ້ອາວຸດເຄມີຂອງຊີເຣຍ ເປັນເທື່ອສຸດທ້າຍ.