ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ສະຫະລັດແລະຟີລິບປິນໄດ້ລົງນາມໃນສົນທິສັນຍາການເປັນພັນທະມິດລະຫວ່າງກັນນັບແຕ່ປີ 1951 ເປັນຕົ້ນມາ. ເວລານີ້ ການເປັນພັນທະມິດລະຫວ່າງປະເທດທັງສອງພວມມີການຂະຫຍາຍໂຕ ແລະມີຄວາມເຂັ້ມແຂງຕື່ມຂຶ້ນ.
ໃນຕົ້ນເດືອນນີ້ ຟີລິບປິນແລະສະຫະລັດໄດ້ປະກາດແຜນການທີ່ຈະລົງເລິກການຮ່ວມມື ພາຍໃຕ້ຂໍ້ຕົກລົງຍົກລະດັບການປ້ອງກັນປະເທດສະບັບ ປີ 2014 ທີ່ເອີ້ນຫຍໍ້ເປັນພາສາອັງກິດວ່າ EDCA ຊຶ່ງເປັນເສົາຄ້ຳທີ່ສຳຄັນ ໃນສົນທິສັນຍາການເປັນພັນທະມິດລະຫວ່າງສະຫະລັດ ກັບຟີລິບປິນ ແລະໃຫ້ການສະໜັບສະ ໜຸນ ຕໍ່ການຝຶກແອບ ຊ້ອມລົບ ແລະຄວາມສາມາດໃນການຖ່າຍໂອນຂໍ້ມູນລະຫວ່າງຄອມພິວເຕີ້ແລະໄດ້ສະທ້ອນໃຫ້ເຫັນເຖິງການມີຄວາມໝັ້ນໝາຍຮ່ວມກັນ ລະຫວ່າງຟີລິບປິນແລະສະຫະລັດເພື່ອຮັກສາຄວາມເປັນລະບຽບຮຽບຮ້ອຍຢູ່ໃນຂົງເຂດ.
ປະເທດທັງສອງໄດ້ປະກາດ ກ່ຽວກັບສະຖານທີ່ຕື່ມອີກ 4 ແຫ່ງ ພາຍໃຕ້ຂໍ້ຕົກລົງ EDCA ໃນເຂດຍຸດທະສາດຂອງຟີລິບປີນ ຈະເພີ້ມເຂົ້າໃສ່ ສະຖານທີ່ 5 ແຫ່ງທີ່ມີຢູ່ໃນປັດຈຸບັນ ແລະນັ້ນ ຈະມີການ “ສຳເລັດເສັດສິ້ນເພີ້ມຂຶ້ນຢ່າງຫຼວງຫຼາຍ” ສຳລັບໂຄງການທີ່ມີຢູ່ແລ້ວໃນ 5 ບ່ອນ. ເວລານີ້ສະຫະລັດໄດ້ອະນຸມັດເງິນຫຼາຍກວ່າ 82 ລ້ານໂດລາສຳລັບລົງທຶນໃນດ້ານພື້ນຖານໂຄງລ່າງພາຍໃຕ້ຂໍ້ຕົກລົງ EDCA ດ້ວຍເຫດນັ້ນຈຶ່ງເປັນການສະໜັບສະໜຸນເພື່ອໃຫ້ມີການເຕີບໂຕທາງດ້ານເສດຖະກິດ ແລະສ້າງວຽກເຮັດງານທຳສຳລັບປະຊາຄົມຊາວຟີລິບປິນຢູ່ໃນທ້ອງຖິ່ນ.
ໃນລະຫວ່າງການຖະແຫຼງຂ່າວຮ່ວມເມື່ອວັນທີ 2 ກຸມພາຜ່ານມາ ໃນລະຫວ່າງການເດີນທາງໄປຢ້ຽມຢາມໂດຍລັດຖະມົນຕີກະຊວງປ້ອງກັນປະເທດສະຫະລັດ ທ່ານລອຍ ອອສຕິນ ລັດຖະມົນຕີກະຊວງປ້ອງກັນຊາດຂອງຟີລິບປິນ ທ່ານຄາລີໂຕ ກາລເວສ ໄດ້ກ່າວເຖິງຂົງເຂດບູລິມມະສິດສຳລັບພັນທະມິດຮວມທັງ “ການຈັດຕັ້ງປະຕິບັດໂດຍເຕັມ ໃນຂໍ້ຕົກລົງຍົກລະດັບການປ້ອງກັນປະເທດ.” ລັດຖະມົນຕີກາລເວສ ໃຫ້ຂໍ້ສັງເກດ ໃນການໂອ້ລົມ ກັບລັດຖະມົນຕີກະຊວງປ້ອງກັນປະເທດອອສຕິນນັ້ນວ່າ “ຈະເສີມຂະຫຍາຍການດຳເນີນຄວາມພະຍາຍາມໃນການ ຮ່ວມມືຂອງປະເທດເຮົາເພີ້ມຕື່ມ ເພື່ອແກ້ໄຂໄພຂົ່ມຂູ່ດ້ານຄວາມໝັ້ນຄົງອັນຮີບດ່ວນຢູ່ໃນຂົງເຂດ ຕະຫຼອດເຖິງການຮັບມືຢ່າງມີປະສິດທິຜົນ ກັບໄພພິບັດ ທີ່ ມາຈາກການປ່ຽນແປງດິນຟ້າອາກາດ ຊຶ່ງແມ່ນຄວາມເປັນຫ່ວງກັງວົນຫຼັກຂອງໂລກ ທີ່ພວກເຮົາຕ້ອງໄດ້ປະເຊີນໜ້າໂດຍກົງ.”
ລັດຖະມົນຕີກະຊວງປ້ອງກັນປະເທດອອສຕິນ ໃນການສະໜອງຕອບ ໄດ້ກ່າວຢ້ຳວ່າ ຂໍ້ຕົກລົງ EDCA ແມ່ນຂໍ້ຕົກລົງການຮ່ວມມືທີ່ຊຸກຍູ້ໃຫ້ມີການແລກປ່ຽນກິດຈະກຳ ເພື່ອໃຫ້ປະເທດທັງສອງສາມາດຮັບມືກັບບັນຫາທ້າທາຍຕ່າງໆຢ່າງມີປະສິດທິຜົນຫຼາຍຂຶ້ນ.
ລັດຖະມົນຕີອອສຕິນ ໄດ້ຊີ້ໃຫ້ເຫັນວ່າ ການເສີມຂະຫຍາຍການຮ່ວມມືແມ່ນຈະຮວມທັງການປັບປຸງຄວາມສາມາດຂອງກອງທັບຟີລິບປິນໃຫ້ກ້າວໜ້າທັນສະໄໝ
ຊຶ່ງຈະຊ່ວຍ “ແກ້ໄຂການສ້າງຄວາມບໍ່ທຸ່ນທ່ຽງ ຢູ່ໃນເຂດນ່ານນ້ຳທີ່ຢູ່ອ້ອມຮອບປະເທດຟີລິບປິນ.. ຊຶ່ງຄວາມພະຍາຍາມເຫຼົ່ານີ້ ແມ່ນມີຄວາມສຳຄັນເປັນພິເສດ ໃນຂະນະທີ່ສາທາລະນະລັດປະຊາຊົນຈີນ ຍັງສືບຕໍ່ອ້າງເອົາກຳມະສິດ ຢ່າງຜິດກົດໝາຍ ຢູ່ໃນເຂດທະເລຕາເວັນຕົກ ຂອງຟີລິບປິນ.”
“ພັນທະມິດຂອງພວກເຮົາ ໄດ້ເຮັດໃຫ້ທັງປະຊາທິປະໄຕຂອງພວກເຮົາມີຄວາມໝັ້ນຄົງຕື່ມຂຶ້ນ ແລະຊ່ວຍຢຶດໝັ້ນເພື່ອເຮັດໃຫ້ເຂດອິນໂດປາຊີຟິກ ເປັນເຂດທີ່ເສລີແລະເປີດກວ້າງ” ນັ້ນຄືຄຳເວົ້າ ຂອງລັດຖະມົນຕີກະຊວງປ້ອງກັນປະເທດ ລອຍ ອອສຕິນ ແລະທ່ານກ່າວຕື່ມວ່າ “ຂ້າພະເຈົ້າມີຄວາມເຊື່ອໝັ້ນວ່າ ພວກເຮົາຈະສືບຕໍ່ເຮັດວຽກຮ່ວມກັນ ເພື່ອປ້ອງກັນຫຼັກຄຸນຄ່າຮ່ວມຂອງພວກເຮົາ ໃນການມີສິດເສລີພາບ ປະຊາທິປະໄຕ ແລະກຽດສັກສີຂອງມະນຸດ.”