Accessibility links

Breaking News

ບົດບັນນາທິການ: ເຖິງເວລາແລ້ວ ທີ່ຈະຕ້ອງປ່ອຍພວກນັກໂທດ ທີ່ຖືກຈັບເມື່ອວັນທີ 11 ກໍລະກົດ ຢູ່ໃນຄິວບາ


ພວກ​ປະ​ທ້ວງ ພາ​ກັນ​ຮ້ອງ​ຄຳ​ຂວັນ​ຕໍ່​ຕ້ານ​ລັດ​ຖະ​ບານ ໃນ​ລະ​ຫວ່າງ​ການ​ເດີນ​ຂະ​ບວນ​ທີ່​ນະ​ຄອນ​ຫຼວງ​ຮາ​ວາ​ນາ ປະ​ເທດ​ຄິວ​ບາ. (ແຟ້ມ)

ອຳ​ນາດ​ການ​ປົກ​ຄອງ​ຄິວ​ບາ​ໄດ້​ຕັດ​ສິນ​ໂທດພວກປະທ້ວງ 550 ກວ່າຄົນ ໃຫ້ຕິດຄຸກ ເມື່ອໄລ່ຮວມກັນແລ້ວ ແມ່ນຫຼາຍກວ່າ 4,000 ປີ ຫຼືມາດຕະການລົງໂທດແບບອື່ນໆ ນັບແຕ່ໄດ້ມີການປະທ້ວງຄັ້ງປະຫວັດສາດ ເມື່ອວັນທີ 21 ກໍລະກົດ 2021

ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ

ອຳ​ນາດກ​ານ​ປົກ​ຄອງ​ຄິວ​ບາ​ໄດ້​ຕັດ​ສິນ​ໂທດ​ພວກ​ປະ​ທ້ວງ 550 ກວ່າ​ຄົນ​ໃຫ້​ຕິດ​ຄຸກ​ເມື່ອ​ໄລ່​ຮວມ​ກັນ​ແລ້ວ​ແມ່ນ​ຫຼາຍກວ່າ 4,000 ປີ ຫຼື​ມາດ​ຕະ​ການ​ລົງ​ໂທດ​ແບບ​ອື່ນໆ ນັບ​ແຕ່ໄດ້​ມີການ​ປະ​ທ້ວງ​ຄັ້ງ​ປະ​ຫວັດ​ສາດ ເມື່ອ​ວັນ​ທີ 21 ກໍ​ລະ​ກົດ 2021 ນັ້ນ​ຄື​ການ​ໃຫ້​ຂໍ້​ສັງ​ເກດ ​ຂອງ​ລັດ​ຖະ​ມົນ​ຕີ​ການ​ຕ່າງ​ປະ​ເທດ​ສະ​ຫະ​ລັດ ທ່ານ​ແອນ​ໂທ​ນີ ບ​ລິງ​ເກັນ ທີ່​ຂຽນ​ລົງ​ໃນ​ທວີດ​ເຕີ້ ເມື່ອ​ບໍ່​ດົນ​ຜ່ານ​ມານີ້. ​ປ່ຽນ​ການແປງເມື່ອ​ໄວໆ​ມານີ້ ຕໍ່​ກົດ​ໝາຍ​ອາ​ຍາ​ຂອງ​ຄິວ​ບາ​ແມ່ນເປັນ​ການລົງ​ໂທດ​ຕໍ່​ພວກ​ທີ່​ຕ້ອງ​ຕິ​ລັດ​ຖະ​ບານ ພວກ​ຜູ້​ແທນ ແລະ​ລະ​ບອບ​ສັງ​ຄົມ​ນິ​ຍົມ.

ຜູ້​ເຄາະ​ຮ້າຍ​ຈຸ​ຫຼ້າ​ສຸດ ກໍ​ແມ່ນ​ທ່ານ ມາຍ​ແກ​ລ “ໂອ​ຊໍ​ໂບ” ກາ​ສ​ຕີ​ໂຢ ​ນັກ​ຮ້ອງ​ແຣັບທີ່​ມີ​ຊື່​ສຽງ ​ຊຶ່ງໄດ້​ຖືກ​ຕັດ​ສິນ​ໂທດ​ໃຫ້​ຕິດ​ຄຸກ 9 ປີ ແລະ​ນັກແຕ້ມ ຫລຸຍ ມາ​ນູ​ແອ​ລ ອໍເຕ​ໂຣ ອາ​ລ​ການ​ຕາ​ຣາ ທີ່​ໄດ້​ຮັບ​ໂທດ ​ຕິດ​ຄຸກຫ້າ​ປີ. ບຸກ​ຄົນ​ທັງ​ສອງ​ໄດ້​ຖືກ​ດຳ​ເນີນ​ຄະ​ດີແບບ​ປິດ​ລັບ ໃນ​ເດືອນ​ພຶດ​ສະ​ພາ​ຜ່ານ​ມາ.

ທ່ານ​ກາ​ສ​ຕີ​ໂຢແລະ​ອໍ​ເຕ​ໂຣ ອາ​ລ​ການ​ຕາ​ຣາ ແມ່ນ​ເປັນ​ສະ​ມາ​ຊິກ​ຂອງ​ຂະ​ບວນ​ການ​ ຊັງ​ອີ​ຊີ​ໂດ​ຣ ຊຶ່ງ​ເປັນ​ກຸ່ມ​ນັກ​ສິນ​ລະ​ປິນ​ອິດ​ສະ​ຫຼະ ແລະ​ນັກ​ວິ​ຊາ​ການ​ທີ່​ໄດ້ທ້າ​ທາຍ​ຕໍ່​ການ​ຂາດ​ສິດ​ເສ​ລິ​ພາບ​ ຢູ່​ໃນ​ປະ​ເທດ​ຄິວ​ບາ ແລະ​ປຸກ​ລະ​ດົມ​ໃຫ້​ມີ​ປະ​ທ້ວງ​ແບບ​ສັນ​ຕິຕໍ່​ຕ້ານ​ລັດ​ຖະ​ບານ. ຕຳ​ຫຼວດ​ ​ຈັບ​ທ່ານ​ອໍ​ເຕ​ໂຣ ອາ​ລ​ການ​ຕາ​ຣາ ເມື່ອ​ວັນ​ທີ 11 ​ກໍ​ລະ​ກົດ 2021 ຫຼັງ​ຈາກ​ ໄດ້​ມີ​ການ​ປະ​ກາດ​ວ່າ ​ທ່ານ​ຈະ​ເຂົ້າ​ຮ່ວມ​ການ​ປະ​ທ້ວງ​ຂະ​ນາດ​ໃຫ​ຍ່ ​ໃນ​ມື້​ນັ້ນ.

ທ່ານ​ກາ​ສ​ຕີ​ໂຢແລະ​ອໍ​ເຕ​ໂຣ ອາ​ລ​ການ​ຕາ​ຣາ ເຂົ້າ​ຮ່ວມ​ໃນ​ລາຍ​ການ​ດົນ​ຕີ​ທາງ ວີ​ດີ​ໂອເພື່ອສັນ​ລະ​ເສີນ​ອິດ​ສະ​ຫຼະ​ພາບ “Patria y Vida” ຫຼື “ປິຕຸ​ພູມ​ແລະ​ຊີວິດ” ຊຶ່ງ​ໄດ້ຮັບ​ຄວາມ​ນິ​ຍົມຢ່າງວ່ອງ​ໄວ ​ທາງອິນ​ເຕີ​ແນັດ​ ເມື່ອ​ເດືອນ​ກຸມ​ພາ​ປີ 2021. ທ່ານ​ກາ​ສ​ຕີ​ໂຢໄດ້​ຖືກ​ທຸບ​ຕີ ​ໂດຍ​ເຈົ້າ​ໜ້າ​ທີ່​ຮັກ​ສາ​ຄວາມ​ປອດ​ໄພ​ຂອງ​ລັດ​ຖະ​ບານ 2 ເດືອນ ​ຫຼັງ​ຈາກ​ມີ​ການ​ນຳ​ວີ​ດີ​ໂອ​ອອກ​ເຜີຍ​ແຜ່. ທ່ານ​ກາ​ສ​ຕີ​ໂຢແລະ​ສິນ​ລະ​ປິນຄົນ​ອື່ນໆ ໃນ “Patria y Vida” ໄດ້​ຮັບ​ລາງວັນ​ແກ​ຣມ​ມີ​ຂອງ​ລາ​ຕິ​ນ​ອາ​ເມ​ຣິ​ກາ ໃນ​ຖາ​ນະ​ເປັນ​ເພງ​ດີ​ເດັ່ນ​ປະ​ຈຳ​ປີ ແລະ​ເພງສະ​ໄໝທີ່​ດີ​ທີ່​ສຸດ. ເພງ ​“Patria y Vida” ແມ່ນ​ການ​ບິດ​ສຳ​ນວນຟີ​ແດ​ລ​ ຄາ​ສ​ໂຕ​ຣ “ປິ​ຕຸ​ພູມ ​ຫຼື​ຄວາມຕາຍ” ແລະ​ກາຍ​ເປັນ​ເພງ​ທີ່​ໄດ້​ຮັບ​ຄວາມ​ນິ​ຍົມ​ສຳ​ລັບ​ພວກ​ປະ​ທ້ວງ​ໃນ​ວັນ​ທີ 11 ກໍ​ລະ​ກົດ.

ອົງ​ການ​ນິ​ລະ​ໂທດ​ກຳ​ສາ​ກົນໄດ້​ປະ​ນາມ​ການ​ດຳ​ເນີນ​ຄະ​ດີ​ຕໍ່​ທ່ານທ່ານ​ກາ​ສ​ຕີ​ໂຢ ແລະ​ອໍ​ເຕ​ໂຣ ອາ​ລ​ການ​ຕາ​ຣາ ໂດຍ​ເວົ້າ​ວ່າ ພວກ​ເຂົາ​ເຈົ້າ​ເປັນ “ຕົວ​ຢ່າງ​ທີ່​ໜ້າອັບ​ອາຍ ​ກ່ຽວ​ກັບ​ວິ​ກິດ​ການ​ສິດ​ທິ​ມະ​ນຸດ ທີ່​ເກີດ​ມາ​ຈາກ ​ນະ​ໂຍ​ບາຍ​ການ​ກົດ​ຂີ່​ຂອງ​ລັດ​ຖະ​ບານ​ຄິວ​ບາ ທີ່​ມີ​ມາ​ເປັນ​ເວ​ລາ​ຫຼາຍໆ​ທົດ​ສະ​ວັດ.”

ໃນ​ການ​ໃຫ້​ສຳ​ພ​າດ​ເມື່ອ​ເດືອນ​ທັນ​ວາ​ປີ 2020 ຫຼັງ​ຈາກ​ໄດ້​ທຳ​ການ​ອົ​ດ​ອາ​ຫານ​ປະ​ທ້ວງ ທ່ານອໍ​ເຕ​ໂຣ ອາ​ລ​ການ​ຕາ​ຣາ ກ່າວ​ຕໍ່​ໜັງ​ສື​ພິມໄມ​ອາ​ມີ ຮີ​ໂຣ​ລ​ດ໌ ວ່າ “ພວກ​ເຮົາ​ອາ​ໄສ​ຢູ່​ໃນ​ລະ​ບອບ​ຜະ​ເດັດ​ການທີ່​ລະ​ເມີດ​ສິດ​ທິ​ມະ​ນຸດ​ຂອງ​ພວກ​ເຮົາ ແລະ​ພວກ​ເຂົາ​ໄດ້ທຳ​ການຄວບ​ຄຸມ​ຂໍ້​ມູນ​ຂ່າວ​ສານ. ພວກ​ອາ​ໄສ​ຢູ່​ໃນ​ປະ​ເທດ​ຜະ
ເດັດ​ການ. ໃຜ​ສາ​ມາດ​ເຊື່ອ​ອຳ​ນາດ​ການ​ປົກ​ຄອງນີ້​ໄດ້ ເວ​ລາ​ພວກ​ເຂົາປະ​ຕິ​ບັດ​ແບບ​ບໍ່​ຖືກ​ບໍ່​ຕ້ອງ​ຕໍ່​ເຈົ້າ.”

ໃນ​ຂະ​ນະ​ທີ່​ວັນ​ຄົບ​ຮອບ 11 ກໍ​ລະ​ກົດ​ມາ​ຮອດ​ແລ້ວນັ້ນ ລັດ​ຖະ​ມົນ​ຕີ​ການ​ຕ່າງ​ປະ​ເທດບ​ລິງ​ເກັນ ກ່າວ​ຜ່ານ​ທາງ​ທວີດ​ ໂດຍ​ຮຽກ​ຮ້ອງໃຫ້ “ພວກ​ປະ​ທ້ວງ​ທີ່​ຍັງຖືກ​ຄຸມ​ຂັງ​ຢູ່ນັ້ນ” ໃຫ້ “ກັບ​ຄືນ​ໄປ​ຫາ​ ຄອບ​ຄົວ​ຂອງ​ພວກ​ເຂົາ​ເຈົ້າ.” ທ່ານບ​ລິງ​ເກັນຍັງ​ກ່າວ​ຢູ່​ໃນ​ຖະ​ແຫຼງ​ການ ເມື່ອວັນ​ທີ 11 ກໍ​ລະ​ກົດ​ນັ້ນ​ວ່າ “ນຶ່ງ​ປີ​ຫຼັງ​ຈາກ ການປະ​ທ້ວງ​ຢູ່​ຄິວ​ບາ​ໃນວັນ​ທີ 11 ກໍ​ລະ​ກົດ ປີ 2021 ສະ​ຫະ​ລັດໄດ້​ຮັບ​ຮູ້​ໃນ ການຕັດ​ສິນ​ໃຈ​ແລະ​ຄວາມ​ກ້າ​ຫານ​ຂອງ​ປະ​ຊາ​ຊົນ​ຊາວ​ຄິ​ວບາ ໃນ​ຂະ​ນະ​ທີ່​ພວກ​ເຂົາ​ເຈົ້າ​ສືບ​ຕໍ່ ທຳ​ການ​ຕໍ່​ສູ້ ​ເພື່ອ​ໃຫ້​ມີ​ການ​ເຄົາ​ລົບ​ນັບ​ຖື​ສິດ​ທິມ​ະ​ນຸດ ແລະສືບ​ຕໍ່​ຕ້ານ​ຢັນ ເຖິງ​ແມ່ນ​ໄດ້​ມີ​ການ​ກົດ​ຂີ່ໃນ​ລະ​ຫວ່າງ​ປີ​ແຫ່ງ​ປະ​ຫວັດ​ສາດ. ພວກ​ເຮົາ​ຂໍ​ສະ​ເຫຼີມ​ສະ​ຫຼອງ ແລະ​ຊົມ​ເຊີຍຕໍ່​ປະ​ຊາ​ຊົນ​ຊາວ​ຄິວບ​າ ໃນ​ຄວາມ​ຕັ້ງ​ທີ່ບໍ່​ມີ​ໃຜ​ສາ​ມາດ​ເອົາ​ຊະ​ນະ​ໄດ້ ​ທ່າ​ມ​ກາງ​ການ​ປະ​ເຊີນ​ໜ້າ​ກັບ​ການ​ກົດ​ຂີ່.”

XS
SM
MD
LG