ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ສະຫະລັດຂໍຮຽກຮ້ອງໃຫ້ປ່ອຍ ຜູ້ນຳຂອງສາສະໜາຄຣິສຕຽນ ພ້ອມທັງເປັນຜູ້ນຳຂອງຊົນເຜົ່າກະຈິ່ນ ພະອາຈານ ດຣ. ກາລາມ ຊາມຊົງ ທີ່ໄດ້ຖືກ ຈັບກຸມຄຸມຂັງ ແລະຂຶ້ນສານດຳເນີນຄະດີ ຢູ່ໃນປະເທດມຽນມາ.
ພະອາຈານຊາມຊົງ ແມ່ນນຶ່ງໃນຜູ້ນຳທາງສາສະໜາ ຄົນສຳຄັນ ຂອງປະເທດ. ທ່ານເປັນທີ່ປຶກສາໃຫ້ແກ່ສະພາບັບຕິສເຜົ່າກະຈິ່ນ ລຸນຫຼັງທີ່ໄດ້ຮັບຕຳແໜ່ງປະທານແລະເລຂາທິການຂອງສະພາດັ່ງກ່າວມາເປັນເວລານຶ່ງທົດສະວັດ. ສະພານີ້ມີສະມາຊິກຢູ່ປະມານ 400,000 ຄົນ ຊຶ່ງສ່ວນໃຫຍ່ແລ້ວແມ່ນຊົນເຜົ່າກະຈິ່ນ. ນອກນັ້ນ ທ່ານຍັງເປັນປະທານຂອງສະພາທີ່ປຶກສາແຫ່ງຊາດເຜົ່າກະຈິ່ນນຳດ້ວຍ.
ພະອາຈານຊາມຊົງ ແມ່ນຜູ້ສະໜັບສະໜຸນຄົນສຳຄັນໃນດ້ານສິດທິມະນຸດ ຮວມທັງສິດເສລີພາບໃນການນັບຖືສາສະໜາສຳລັບຜູ້ຄົນໃນທຸກໆຄວາມເຊື່ອ. ນອກນັ້ນທ່ານຍັງເປັນທີ່ຮູ້ຈັກກັນ ໃນເລື້ອງວຽກງານດ້ານມະນຸດສະທຳຂອງທ່ານ.
ອຳນາດການປົກຄອງຜະເດັດການໃນມຽນມາ ໄດ້ຈັບທ່ານເມື່ອວັນທີ 4 ທັນວາປີ 2022 ກ່ອນທີ່ທ່ານຈະອອກເດີນທາງໄປບາງກອກເພື່ອຮັບການປິ່ນປົວທາງດ້ານການແພດ. ທ່ານໄດ້ປະເຊີນກັບສາມຂໍ້ຫາຮວມທັງພາຍໃຕ້ກົດໝາຍຕໍ່ຕ້ານການກໍ່ການຮ້າຍ ທີ່ລວມມີການຍຸແຍ່ໃຫ້ກໍ່ຄວາມຮຸນແຮງ. ທະນາຍຄວາມຂອງທ່ານໄດ້ກ່າວຕໍ່ວິທະຍຸເອເຊຍເສລີວ່າ ສານເວົ້າວ່າພະອາຈານຊາມຊົງຖືກຟ້ອງພາຍໃຕ້ກົດໝາຍກໍ່ການຮ້າຍ ຍ້ອນທ່ານໄດ້ພົບປະ ກັບພວກເຈົ້າໜ້າທີ່ລັດຖະບານສາມັກຄີຊາດຂອງພະມ້າ. ຖ້າຫາກຖືກພົບເຫັນໃນທຸກໆຂໍ້ຫາແລ້ວ ທ່ານຈະໄດ້ຖືກໂທດຫຼາຍກວ່າ 10 ປີ.
ໂຄສົກກະຊວງການຕ່າງປະເທດສະຫະລັດ ທ່ານເນດ ໄພຣສ໌ ກ່າວວ່າ “ພວກເຮົາມີຄວາມເປັນຫ່ວງທີ່ສຸດກ່ຽວກັບສະພາບແລະຄວາມປອດໄພຂອງທ່ານແລະຂໍຮຽກຮ້ອງໃຫ້ພາຄີແລະພັນທະມິດຂອງພວກເຮົາ ມາຮ່ວມກັນຮຽກຮ້ອງໃຫ້ອຳນາດການປົກຄອງຍົກເລີກທຸກຂໍ້ຫາແລະປ່ອຍພະອາຈານຊາມຊົງໃນທັນທີໂດຍບໍ່ມີເງື່ອນໄຂໃດໆທັງສິ້ນ. ວຽກງານທີ່ບໍ່ໜ້າເຊື່ອ ຂອງພະອາຈານແຊມຊົງ ໃນການສະໜັບສະໜຸນຕໍ່ສິດເສລີພາບໃນການເຊື່ອຖືສາສະໜາ ຄວາມຍຸຕິທຳ ສັນຕິພາບ ແລະການຮັບເອົາຄວາມຮັບຜິດຊອບ ຄວນໄດ້ຮັບການສະເຫຼີມສະຫຼອງແລະເອົາເປັນແບບຢ່າງ ບໍ່ແມ່ນຖືກປະນາມ.”
ບັນດາກຸ່ມປົກປ້ອງສິດທິມະນຸດ ແລະອົງການຈັດຕັ້ງສັງຄົມພົນລະເຮືອນໄດ້ເຂົ້າຮ່ວມໃນການຮຽກຮ້ອງໃຫ້ປ່ອຍໂຕທ່ານ ຮວມທັງກຸ່ມປົກປ້ອງສິດທິມະນຸດ Hu-man Rights Watch ທີ່ເອີ້ນຂໍ້ຫາຕໍ່ພະອາຈານຊາມຊົງນັ້ນວ່າ “ມີຈຸດປະສົງທາງດ້ານການເມືອງ” ແລະ “ເປັນຄວາມພະຍາຍາມ ແບບໜັກມື ເພື່ອສ້າງໃຫ້ມີຄວາມຢ້ານກົວຕໍ່ພວກທີ່ຄັດຄ້ານ ໃນໝູ່ຜູ້ນຳຊົນກຸ່ມນ້ອຍ.”
ໃນລາຍງານສະບັບຫຼ້າສຸດ ກ່ຽວກັບອິດສະຫຼະພາບໃນການນັບຖືສາສະໜາຂອງລະຫວ່າງປະເທດເມື່ອໄວໆມານີ້ ກະຊວງການຕ່າງປະເທດສະຫະລັດ ໃຫ້ຂໍ້ສັງເກດວ່າ ເຈົ້າໜ້າທີ່ອະວຸໂສຂອງສະຫະລັດໄດ້ຍົກເອົາເລື້ອງນີ້ ຂຶ້ນມາຖາມພວກເຈົ້າໜ້າທີ່ທະຫານມຽນມາຕະຫຼອດມາ “ກ່ຽວກັບຄວາມກັງວົນຂອງສະຫະລັດທີ່ຍັງມີຢູ່ ກ່ຽວກັບອິດສະຫຼະພາບໃນການນັບຖືສາສະໜາ ຮວມທັງສະພາບການຂອງຊາວມຸສລິມໂຣຮິງຢາ ຊຶ່ງເປັນຊົນກຸ່ມໃຫຍ່ໃນລັດຣາໄຄນ໌ ຄວາມທຸກທໍລະມານທີ່ພວມປະເຊີນໜ້າຊາວຄຣິສຕຽນ ຊຶ່ງເປັນຊົນກຸ່ມນ້ອຍໃນປະຊາຄົມກະຈິ່ນ ພາກເໜືອຂອງລັດສານ ແລະລັດຈິ່ນ ທ່າມກາງທີ່ເກີດຄວາມຮຸນແຮງ.”
ໂຄສົກກະຊວງການຕ່າງປະເທດ ທ່ານເນດ ໄພຣສ໌ ກ່າວວ່າ “ພວກເຮົາຂໍຮຽກຮ້ອງໃຫ້ອຳນາດການປົກຄອງ ຢຸດເຊົາການກົດຂີ່ ທີ່ຜິດຈິດສຳນຶກຕໍ່ຜູ້ຕາງໜ້າ ສາສະໜາແລະປະຊາຄົມຕ່າງໆ ໃນປະເທດມຽນມາ ແລະຍຸຕິການກໍ່ຄວາມຮຸນແຮງ.”