ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ລັດຖະບານທ່ານໄບເດັນ ແລະ ທ່ານນາງແຮຣິສ ໄດ້ຕັດສິນໃຈທີ່ຈະປາບປາມການກໍ່ອາຊະຍາກຳບັງຄັບໃຊ້ແຮງງານ ແລະປ້ອງກັນບໍ່ໃຫ້ສິນຄ້າທີ່ຜະລິດຈາກການບັງຄັບໃຊ້ແຮງງານ ເຂົ້າມາຈຳໜ່າຍຢູ່ໃນສະຫະລັດ.
ເພື່ອກ້າວໄປສູ່ຈຸດນັ້ນ ກົດໝາຍປ້ອງກັນການບັງຄັບໃຊ້ແຮງງານຊາວວີເກີ້ ທີ່ເອີ້ນຫຍໍ້ວ່າ UFLPA ເລີ້ມມີຜົນບັງຄັບໃຊ້ ເມື່ອວັນທີ 21 ມິຖຸນາ. ກົດໝາຍດັ່ງກ່າວໄດ້ຫ້າມບໍ່ໃຫ້ນຳເຂົ້າສິນຄ້າຈາກເຂດປົກຄອງຕົນເອງຊິນຈຽງຂອງຊາວ
ວີເກີ້ ແລະບາງອົງການ ໃນສາທາລະນະລັດປະຊາຊົນຈີນ ນອກເສຍຈາກວ່າ
ບໍລິສັດນ້ຳເຂົ້າສາມາດພິສູດໃຫ້ເຫັນວ່າ ສິນຄ້າທີ່ນຳເຂົ້າມານັ້ນ ບໍ່ໄດ້ເຮັດຈາກການບັງຄັບໃຊ້ແຮງງານ.
ຢູ່ທີ່ເຂດຊິນຈຽງ ສປ ຈີນ ພວມທຳການຂ້າລ້າງເຜົ່າພັນ ແລະກໍ່ອາຊະຍາກຳຕ້ານມະນຸດຊາດ. ຈີນໄດ້ສ້າງສູນຄຸມຂັງສຳລັບຊາວມຸສລິມເຜົ່າວີເກີ້ເປັນສ່ວນໃຫຍ່ແລະສາສະໜາກຸ່ມນ້ອຍອື່ນໆ ບ່ອນທີ່ການບັງຄັບໃຊ້ແຮງງານ ການຂົ່ມ
ຂືນສຳເລົາ ການທໍລະມານ ແລະການບັງຄັບສັ່ງສອນເພື່ອໃຫ້ຊາບຊຶມຫຼືລ້າງ
ສະໝອງຍັງດຳເນີນຢູ່ຕໍ່ໄປ. ການບັງຄັບໃຊ້ແຮງງານຍັງສືບຕໍ່ມີຂຶ້ນຢູ່ນອກສູນ
ຕ່າງໆໃນເຂດຊິນຈຽງ ແລະມີຊາວວີເກີ້ຈຳນວນນຶ່ງແລະພວກຊົນກຸ່ມນ້ອຍອື່ນໆ
ຈາກເຂດຊິນຈຽງ ໄດ້ຖືກບັງຄັບໃຫ້ໄປເຮັດວຽກຢູໃນຫຼາຍໆເຂດຂອງ ສປ ຈີນ.
ກົດໝາຍປ້ອງກັນການບັງຄັບໃຊ້ແຮງງານຊາວວີເກີ ຫຼື UFLPA ແມ່ນມີການຈັດຕັ້ງປະຕິບັດໂດຍອົງການພາສີແລະຄຸ້ມຄອງຊາຍແດນ ຫຼື CBP ຂອງສະຫະລັດ ໂດຍມີການສັນນິດຖານວ່າສິນຄ້າທັງໝົດ ເຄື່ອງປັ້ນດິນເຜົາ ຂອງໃຊ້ ຫຼືສິນຄ້າແຮ່ທາດ ຜະລິດຕະພັນ ເຄື່ອງຜະລິດທີ່ເຮັດໂດຍທັງໝົດ ຫຼືສ່ວນໃດ
ສ່ວນນຶ່ງຈາກເຂດຊິນຈຽງ ແມ່ນເຮັດດ້ວຍແຮງງານບັງຄັບ ແລະຈະຖືກຫ້າມບໍ່
ໃຫ້ນຳເຂົ້າມາໃນສະຫະລັດ ນອກຈາກວ່າຜູ້ນຳເຂົ້າ ສາມາດສະໜອງຫຼັກຖານ ທີ່ຈະແຈ້ງໜ້າເຊື່ອຖື ໃຫ້ແກ່ອົງການ CBP.
ລັດຖະມົນຕີການຕ່າງປະເທດສະຫະລັດ ທ່ານແອນໂທນີ ບລິງເກັນ ໃຫ້ຂໍ້ສັງເກດວ່າ ກົດໝາຍສະບັບນີ້ໄດ້ຮັບຮອງເອົາໂດຍລັດຖະສະພາສະຫະລັດດ້ວຍການໃຫ້ຄວາມສະໜັບສະໜຸນຢ່າງຖ້ວມລົ້ນ ຈາກທັງສອງພັກການເມືອງ.
ລັດຖະມົນຕີບລິງເກັນ ກ່າວວ່າ “ກະຊວງການຕ່າງປະເທດ ມີຄວາມໝັ້ນໝາຍ
ທີ່ຈະເຮັດວຽກຮ່ວມກັບສະພາ ແລະຄູ່ພາຄີ ໃນພະແນກການຕ່າງໆ ເພື່ອສືບຕໍ່
ປາບປາມການບັງຄັບໃຊ້ແຮງງານໃນເຂດຊິນຈຽງ ແລະເສີມຂະຫຍາຍການປະສານງານຂອງລະຫວ່າງປະເທດຕ້ານການລະເມີດສິດທິມະນຸດທີ່ຮ້າຍແຮງເປັນ
ພິເສດ. ພວກເຮົາໄດ້ເອົາມາດຕະການອັນໜັກແໜ້ນ ເພື່ອຊຸກຍູ້ໃຫ້ມີຄວາມຮັບຜິດຊອບຢູ່ໃນເຂດຊິນຈຽງຮວມທັງການຈຳກັດຮັດແຄບໃນການອອກວີຊາ ການ
ລົງໂທດທາງດ້ານການເງິນພາຍໃຕ້ໂຄງການມັກນິສກີໂກລໂບ ການຄວບຄຸມໃນການສົ່ງອອກ ຄຳສັ່ງໃຫ້ກັກແລະການຈຳກັດໃນການນຳເຂົ້າ ພ້ອມກັບການເປັນພາຄີລະຫວ່າງພະແນກການຕ່າງໆ ພວກເຮົາຈະສືບຕໍ່ພົວພັນກັບບັນດາບໍລິສັດເພື່ອເຕືອນພວກເຂົາເຈົ້າ ກ່ຽວກັບພັນທະທາງດ້ານກົດໝາຍຂອງສະຫະລັດຊຶ່ງຫ້າມການນຳສິນຄ້າທີ່ເຮັດດ້ວຍການບັງຄັບໃຊ້ແຮງງານ ເຂົ້າມາໃນສະຫະລັດ.”
ລັດຖະມົນຕີບລິງເກັນປະກາດວ່າ “ພວກເຮົາຊັກຊວນໃຫ້ບັນດາພັນທະມິດແລະພາຄີຂອງພວກເຮົາ ຊ່ວຍເຮັດໃຫ້ ຕາໜ່າງອຸບປະທານຂອງໂລກ ປອດຈາກການບັງຄັບໃຊ້ແຮງງານ ສະແດງການຄັດຄ້ານຕໍ່ການກໍ່ໂທດກຳຢູ່ໃນເຂດຊິນຈຽງແລະຮ່ວມກັບພວກເຮົາຮຽກຮ້ອງໃຫ້ລັດຖະບານ ສປ ຈີນ ຢຸດເຊົາໃນທັນ ທີຕໍ່ການກໍ່ໂທດກຳແລະການລະເມີດສິດທິມະນຸດ ຮວມທັງການບັງຄັບໃຊ້ແຮງງານ.”