ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ສະຫະລັດພວມຂະຫຍາຍການລົງໂທດຕໍ່ກຸ່ມແວັກເນີ ຊຶ່ງເປັນອົງການຈັດຕັ້ງ ທະຫານຮັບຈ້າງ ທີ່ໄດ້ຮັບການໜຸນຫຼັງ ຈາກວັງເຄຣັມລິນພາຍໃຕ້ການນຳພາ ຂອງເຢັບເກນີ ພຣີໂກຊິນ. ທະຫານຮັບຈ້າງ ຂອງກຸ່ມດັ່ງກ່າວໄດ້ກໍ່ໂທດກຳແລະລ່ວງລະເມີດສິດທິມະນຸດຢູ່ໃນຢູເຄຣນ ແລະແຫ່ງອື່ນໆໃນທົ່ວໂລກ.
ການລົງໂທດຂອງສະຫະລັດ ແມ່ນແນເປົ້າໝາຍໃສ່ພື້ນຖານໂຄງລ່າງແລະບໍລິສັດທີ່ມີສ່ວນພົວພັນແຖວໜ້າທີ່ສຳຄັນໆ ຂອງກຸ່ມແວັກເນີ ການພົວພັນຂອງກຸ່ມດັ່ງກ່າວ ກັບການຄ້າຄຳແລະເພັດ ການປະຕິບັດງານຂອງກຸ່ມຢູ່ໃນສະໜາມລົບຢູເຄຣນ ບັນດາຜູ້ຜະລິດອາວຸດຂອງຣັດເຊຍ ແລະພວກບໍລິຫານງານຢູ່ໃນເຂດຢຶດຄອງຂອງຣັດເຊຍໃນຢູເຄຣນ.
ລັດຖະມົນຕີການຕ່າງປະເທດຂອງສະຫະລັດ ທ່ານແອນໂທນີ ບລິງເກັນ ກ່າວວ່າ “ບາດກ້າວນີ້ ແມ່ນໃຫ້ການສະໜັບສະໜຸນຕໍ່ເປົ້າໝາຍຂອງພວກເຮົາ ທີ່ຈະບັ່ນທອນຄວາມສາມາດໃນການເຮັດສົງຄາມາຢູ່ໃນຢູເຄຣນຂອງມົສກູລົງ ຊຸກຍູ້ໃຫ້ມີການຮັບເອົາຄວາມຮັບຜິດຊອບຂອງພວກທີ່ມີສ່ວນໃນການເຮັດສົງຄາມຮຸກຮານຂອງຣັດເຊຍແລະການລ່ວງລະເມີດຕ່າງໆ ແລະທຳຄວາມກົດດັນເພີ້ມຕື່ມ ຕໍ່ພາກສ່ວນດ້ານປ້ອງກັນປະເທດຂອງຣັດເຊຍ.
ກຸ່ມແວັກເນີ ມີລາຍງານວ່າໄດ້ສົ່ງທະຫານຮັບຈ້າງ 50,000 ຄົນ ເຂົ້າໄປໃນຢູເຄຣນ ຮວມທັງ 10,000 ຄົນເປັນພະນັກງານສັນຍາຈ້າງ ແລະ 40,000 ຄົນເປັນພວກນັກໂທດ ທີ່ໄປເກນເອົາຕາມຄຸກຕ່າງໆຂອງຣັດເຊຍ ອີງຕາມທຳນຽບຂາວ.
ການລົງໂທດຮອບໃໝ່ ທີ່ໄດ້ມີການປະກາດໄປແລ້ວ ຂອງກະຊວງການຕ່າງປະເທດສະຫະລັດ ແມ່ນຮວມທັງພື້ນຖານໂຄງລ່າງຫຼາຍຢ່າງຂອງກຸ່ມແວັກເນີ ຮວມທັງບໍລິສັດການບິນ ທີ່ໃຊ້ໂດຍກຸ່ມແວັກເນີ ອົງການໂຄສະນາຊວນເຊື່ອຂອງກຸ່ມແວັກເນີ ແລະບໍລິສັດຕ່າງໆທີ່ກໍ່ຕັ້ງຂຶ້ນໂດຍກຸ່ມແວັກເນີ.
ຍິ່ງໄປກວ່ານັ້ນ ກະຊວງການຕ່າງປະເທດສະຫະລັດ ຍັງໄດ້ປະກາດ ການເອົາບາດກ້າວ ທີ່ຈະຈຳກັດການອອກວີຊ່າ ໃຫ້ແກ່ພວກນາຍທະຫານຣັດເຊຍ 531 ຄົນ ຍ້ອນການປະຕິບັດງານທີ່ເປັນໄພຂົ່ມຂູ່ຕໍ່ອະທິປະໄຕ ຜືນແຜ່ນດິນອັນຄົບຖ້ວນ ຫຼືຄວາມເປັນເອກກະລາດທາງດ້ານການເມືອງຂອງຢູເຄຣນ.
ໃນເວລາດຽວກັນນັ້ນ ທາງກະຊວງການເງິນຂອງສະຫະລັດກໍໄດ້ລະບຸຊື່ກຸ່ມແວັກເນີເປັນຜູ້ຮັບຜິດຊອບໃນການກໍ່ຄວາມຮຸນແຮງຕໍ່ປະຊາຊົນຢູ່ໃນສາທາລະນະລັດອາຟຣິກາກາງ ຮວມຢູ່ໃນເຫດຜົນຫຼາຍໆຢ່າງ.
ນັບເປັນເທື່ອທຳອິດ ທີ່ສະຫະລັດໄດ້ລະບຸຊື່ກຸ່ມແວັກເນີ ເປັນອົງການກໍ່ອາຊະຍາກຳຂ້າມຊາດທີ່ສຳຄັນ ຊຶ່ງໄດ້ເພີ້ມການລົງໂທດທີ່ມີຢູ່ແລ້ວຕໍ່ກຸ່ມດັ່ງກ່າວໃຫ້ຮ້າຍແຮງຂຶ້ນຕື່ມ. ກະຊວງການເງິນ ກ່າວຢູ່ໃນຖະແຫຼງການວ່າ “ເຈົ້າໜ້າທີ່ຂອງກຸ່ມແວກເນີ ແມ່ນໄດ້ພົວພັນໃນການກໍ່ອາຊະຍາກຳທີ່ຮ້າຍແຮງທີ່ຍັງດຳເນີນຢູ່ຕໍ່ມາ ຮວມທັງ ການສັງຫານໝູ່ ການຂົ່ມຂືນສຳເລົາ ການລັກພາເດັກ ແລະການທຳຮ້າຍແຮງກາຍ ຢູ່ໃນສາທາລະນະລັດອາຟຣິກາກາງ ແລະມາລີ.”
ການຂະຫຍາຍການລົງໂທດຂອງສະຫະລັດຕໍ່ກຸ່ມແວັກເນີແມ່ນໄດ້ຮັບຮູ້ເຖິງໄພຂົ່ມຂູ່ຂ້າມທະວີບຂອງກຸ່ມດັ່ງກ່າວ ຮວມທັງໃນອາຟຣິກາ ແລະສົງຄາມທາງເລືອກທີ່ໂຫດຮ້າຍທາລຸນຂອງຣັດເຊຍ ຢູ່ໃນຢູເຄຣນ.
ລັດຖະມົນຕີກະຊວງການຕ່າງປະເທດບລິງເກັນກ່າວວ່າ “ສະຫະລັດ ແມ່ນແນ່ວແນ່ໃນການຕັດສິນໃຈຂອງພວກເຮົາ ຕ້ານສົງຄາມຮຸກຮານຂອງຣັດເຊຍ ແລະ ພຶດຕິກຳໃນການສ້າງຄວາມບໍ່ທຸ່ນທ່ຽງອື່ນໆ ຢູ່ໃນທົ່ວໂລກ.”