ໃນຄຳໃຫ້ການຕໍ່ລັດຖະສະພາ, ຮອງລັດຖະມົນຕີກະຊວງການຕ່າງປະເທດຮັບຜິດຊອບການຄວບຄຸມອາວຸດ ແລະຄວາມໝັ້ນຄົງລະຫວ່າງປະເທດ ທ່ານນາງບອນນີ້ ເຈັ່ນກິນສ໌ ໄດ້ກ່າວວ່າ ພູມສາດດ້ານຄວາມໝັ້ນຄົງໃໝ່ຂອງໂລກຮຽກຮ້ອງໃຫ້ສະຫະລັດ ຕ້ອງນຳໜ້າດ້ວຍນະວັດຕະກຳໃໝ່ ເພື່ອປົກປ້ອງຕົນເອງ ແລະບັນດາພັນທະມິດຂອງຕົນ ຈາກຄວາມທ້າທາຍຕ່າງໆທັງໃນປັດຈຸບັນ ແລະທີ່ກຳລັງຈະເກີດຂຶ້ນ.
ຄວາມທ້າທາຍທັງຫຼາຍເຫຼົ່ານັ້ນ ລວມມີການບຸກລຸກຂະໜາດເຕັມອັດຕາຕໍ່ຢູເຄຣນຂອງຣັດເຊຍ; ການກົດດັນຕໍ່ໄຕ້ຫວັນຂອງສາທາລະນະລັດ ປະຊາຊົນຈີນ; ບັນຫາຂັດແຍ້ງໃນເຂດຕາເວັນອອກກາງ ຂະນະທີ່ອິສຣາແອລປ້ອງກັນຕົນເອງ ຈາກການກໍ່ການຮ້າຍຂອງກຸ່ມຮາມາສ; ການໂຈມຕີຕໍ່ພວກກຳປັ່ນພານິດຫຼາຍຮອບຂອງພວກກະບົດຮູຕີ; ການຮ່ວມມືກັນລະຫວ່າງຣັດເຊຍ, ສປ ເກົາຫຼີ ແລະ ອີຣ່ານ ທີ່ເລິກເຊິ່ງຂຶ້ນນັບມື້.
ຮອງລັດຖະມົນຕີເຈັ່ນກິນສ໌ ໄດ້ກ່າວວ່າ ສະຫະລັດ ພວມຕອບໂຕ້ຕໍ່ໄພຂົ່ມຂູ່ເຫຼົ່ານັ້ນ ແລະທີ່ກຳລັງເກີດຂຶ້ນ ແລະເວົ້າວ່າ:
“ລັດຖະບານຊຸດນີ້ ໄດ້ຮັກສາຄວາມເປັນເອກະພາບຂອງບັນດາພັນທະມິດ ໃນການຍົກເລີກສົນທິສັນຍາ ວ່າດ້ວຍກອງກຳລັງປະກອບອາວຸດປະເພດສົງຄາມໃນຢູໂຣບ ເພື່ອການຕອບສະໜອງຕໍ່ການຖອນກຳລັງຂອງຣັດເຊຍ. ພວກເຮົາໄດ້ສະເໜີ ແລະຜ່ານມະຕິຂອງອົງການສະຫະປະຊາຊາດ ໂດຍຮຽກຮ້ອງຕໍ່ບັນດາປະເທດທັງຫຼາຍ ບໍ່ໃຫ້ດຳເນີນການທົດລອງລູກສອນໄຟຕໍ່ຕ້ານດາວທຽມດ້ວຍການທຳລາຍໃຫ້ຕົກລົງມາໂດຍກົງ ແລະບໍ່ໃຫ້ໃຊ້ອາວຸດລັງສີຕ່າງໆ. ພວກເຮົາໄດ້ນຳພາປະເທດຕ່າງໆເພື່ອໃຫ້ຮັບຮອງເອົາການປະຕິບັດທີ່ມີຄວາມຮັບຜິດຊອບ ກ່ຽວກັບການເອົາປັນຍາປະດິດມາໝຸນໃຊ້ເພື່ອການທະຫານ, ແລະ ພວກເຮົາໄດ້ສຳເລັດການທຳລາຍຄັງອາວຸດເຄມີທັງຫຼາຍ, ກຳຈັດປະເພດອາວຸດທີ່ໄດ້ຖືກປະກາດໃຫ້ເປັນອາວຸດທຳລາຍລ້າງຂະໜາດໃຫຍ່ທັງໝົດ.”
ໃນເວລາດຽວກັນ ຮອງລັດຖະມົນຕີ ເຈັ່ນກິນສ໌ ໄດ້ກ່າວວ່າ ສະຫະລັດກຳລັງເພີ້ມທະວີໃນການປົກປັກຮັກສານິວເຄລຍ ແລະຄວາມໝັ້ນຄົງ ຂະນະທີ່ຕົນຊ່ວຍບັນດາປະເທດຄູ່ຮ່ວມງານໃນດ້ານພະລັງງານນິວເຄລຍ ແລະການຮ່ວມມືກັນໃນດ້ານນິວເຄລຍທີ່ສັນຕິ. ຕົນຍັງເສີມຂະຫຍາຍມາດຕະການສະກັດກັ້ນເພື່ອປ້ອງກັນເທັກໂນໂລຈີທີ່ລໍ່ແຫຼມຂອງສະຫະລັດ ຈາກການສະແຫວງຫາຜົນປະໂຫຍດ ຕະຫຼອດເຖິງວຽກງານເພື່ອປົກປ້ອງເຊມມີຄອນດັກເຕີ ແລະເທັກໂນໂລຈີອື່ນໆ ທີ່ກຳລັງເກີດຂຶ້ນໃໝ່.
“ໃນການຢືນຄຽງບ່າຄຽງໄລ່ກັບບັນດາພັນທະມິດທີ່ໃກ້ຊິດທີ່ສຸດຂອງພວກເຮົາ ແມ່ນນຶ່ງໃນຂີດໝາຍດ້ານການທູດຂອງອາເມຣິການ” ຮອງລັດຖະມົນຕີ ເຈັ່ນກິນສ໌ ໄດ້ກ່າວ. ທ່ານນາງຊີ້ໃຫ້ເຫັນເຖິງການເພີ້ມທະວີຄວາມແຂງແກ່ນຂອງສັກກະຍະພາບໃນການປ້ອງກັນຕົນເອງຂອງໄຕ້ຫວັນ ໂດຍສະຫະລັດ, ພ້ອມດ້ວຍການຊ່ວຍເຫຼືອແກ່ບັນດາພັນທະມິດ ແລະຄູ່ພາຄີທັງຫຼາຍຂອງຕົນ ໃນການຫັນປ່ຽນໄປຈາກອຸປະກອນທີ່ມີຕົ້ນກຳເນີດຈາກຣັດເຊຍ.
ຮອງລັດຖະມົນຕີ ເຈັ່ນກິນສ໌ ຍັງໄດ້ເອີ້ນພາຄີດ້ານຄວາມໝັ້ນຄົງສາມຝ່າຍພາຍໃນ ອອສເຕຣເລຍ, ສະຫະຣາຊະອານາຈັກ, ແລະ ສະຫະລັດ ທີ່ຮູ້ຈັກກັນໃນຊື່ AUKUS ວ່າ “ແບບຢ່າງສຳຄັນ” ດ້ານການທູດຂອງອາເມຣິກາ.
ທ່ານນາງເຈັ່ນກິນສ໌ ກ່າວວ່າ “ໂອກາດຂອງລຸ້ນຄົນຕ່າງໆ ທີ່ກາງຕໍ່ການຮ່ວມມືກັນກັບບັນດາພັນທະມິດທີ່ໃກ້ຊິດທີ່ສຸດຂອງພວກເຮົາ, ເສີມສ້າງຄວາມເປັນຮຸ້ນສ່ວນດ້ານການປ້ອງກັນ ແລະຄວາມໝັ້ນຄົງໃນໄລຍະຍາວ, ສະໜອງເສັ້ນທາງທີ່ຊັດເຈນແກ່ພວກເຮົາ ເພື່ອສືບຕໍ່ສົ່ງເສີມວິໄສທັດທີ່ມີຮ່ວມກັນຂອງເຂດ ອິນໂດ-ປາຊີຟິກ ໃຫ້ເສລີແລະເປີດກວ້າງ, ແລະສົ່ງສັນຍານອັນໜັກແໜ້ນໃນການສະກັດກັ້ນ ແລະຄວາມໝັ້ນໝາຍຕໍ່ມາດຕະຖານທີ່ສູງສຸດຂອງການບໍ່ແພ່ຜາຍອາວຸດນິວເຄລຍ ໃນຂົງເຂດດັ່ງກ່າວ ແລະໃນທົ່ວໂລກ.”
ຮອງລັດຖະມົນຕີ ເຈັ່ນກິນສ໌ ໄດ້ປະກາດວ່າ ສະຫະລັດ ແມ່ນ “ຕາໃສສະຫວ່າງ ກ່ຽວກັບພື້ນທີ່ທັງຫຼາຍຊຶ່ງພວກສັດຕູ ຫຼື ພວກຂູ່ແຂ່ງຂອງພວກເຮົາ ກຳລັງສ້າງຜົນກະທົບທີ່ເຫັນໄດ້ ແລະການກະທຳຂອງພວກເຮົານັ້ນຈະກຳນົດຄວາມປອດໄພ ແລະຄວາມໝັ້ນຄົງຂອງຄົນລຸ້ນຕໍ່ໄປແນວໃດ.”